1. Yesuusi Yihowa harunsaanosi agarannonsa gede huucciˈrinohu mayiraati?

 YESUUSI reyara albaanni noo hashsha iima noo Annisiwa mitte baxxitino huuccatto huucciˈrino. Isi Yihowa harunsaanosi agarannonsa gede huucciˈrino. (Yoh. 17:15, 20) Hige Yihowa woˈmanka woyite mannasi towaatannotinna agarannoti egennantinote. Ikkirono Yesuusi Sheexaanu harunsaanosi tiyyiˈre giwannonsata afino. Qoleno Yesuusi Daawuloosi siannonsa woyite gargadhate Yihowa kaaˈlo hasiissannonsata huwatino.

2. Faarso 33:18-20 kultanno garinni qarru iillannonke woyite waajja hasiissannonkekkihu mayiraati?

² Xaa yannara Sheexaanu alame addu Kiristaanira lowo qarra iillishshanno. Iillannonke qarri hexxo mudhineemmo gedenna Yihowara ammanama qarra ikkitannonke gede assara nafa dandaanno. Kayinni konni birxichira ronseemmonte gede waajjineemmo gede assannonkeri dino. Yihowa towaatannonkenna agarannonke qoleno iillannonke qarra laˈˈanno; hattono isi ninke kaaˈla hasiˈranno. Hanni Yihowa ‘waajjitannosire laˈˈannota’ leellishannoha lame Qullaawu Maxaafi lawishsha xiinxallino.—Faarso 33:18-20 nabbawi.

3. Callimma macciishshantannonkehu hiittoo woyite ikkara dandaanno?

³ Halaˈlado Yihowa magansidhanno maate wido ikkinummorono mito woyite callimma macciishshantannonke. Lawishshaho wedellu rosu mine ledonsa rossannorira ammanansa daafira kultanno woyite woy haaro songo hadhanno woyite callimma macciishshantansara dandiitanno. Ninke giddo mito dadillisannori woy yaachishannori waadankera dandaanno; qoleno togoo hedo qeeˈlate ninke callootinke sharrama hasiissannonkeha lawankera dandaanno. Qarrinke dileellannonsa yine yaandeemmo daafira wolootaho giddonketa hasaaphate hobbi ruxxi yinammora dandiineemmo. Qoleno mito woyite, addinta ane daafira hedannohu dino yine hendammora dandiineemmo. Callimma macciishshantannonke gede assanno coyi ikkihano ikkiro tini wolqa baˈneemmo  gedenna yaandeemmo gede assitankera dandiitanno. Yihowa horo togo ikkinammora dihasiˈranno. Hatto yineemmohu mayiraati?

4. Masaalaanchu Eeliyaasi “ani callu gatoommo” yiinohu mayiraati?

⁴ Hanni ammanamino manchi Eeliyaasi lawishsha laˈno. Iso Elzaabeeli shitannosita kulte waajjishiishshinosi; hakko daafira isi lubbosi gatisiˈrate xooqanna 40 barra sainosi. (1 Mot. 19:1-9) Jeefote isi godu giddo heeˈre “Ani callu gatoommo” yee Yihowawa raarino. (1 Mot. 19:10) Hatte gobbara wolootu masaalaano no; Abidiyu Elzaabeeli shite guddannokki gede 100 masaalaano maaxe gatisino. (1 Mot. 18:7, 13) Ikkina Eeliyaasira callimma macciishshantinosihu mayiraati? Isi Abidiyu maaxe gatisino masaalaano xa shine gundoonni yeeti ikka? Yihowa Qermeloosi Ilaalira halaalaancho Magano ikkasi leellishihu gedensaanni nafa wolootu isi ledo Yihowara soqqama hooggino daafiraati ikka? Isi mageeshshi qarri giddo noommoro afinohu dino woy ane daafira hedannohu dino yeeti ikka? Qullaawu Maxaafi Eeliyaasira togoori macciishshaminosihu mayiraatiro xawise dikulanno. Kayinni Yihowa Eeliyaasira callimma macciishshantinosihu mayiraatironna iso kaaˈlannohu hiittoonniitiro afinota dihuluullammeemmo.

5. Yihowa Eeliyaasi callasi ikkinokkita buuxisinosihu ma garinniiti?

⁵ Yihowa Eeliyaasi duucha doogganni kaaˈlinosi. Isi Eeliyaasi giddosita fushshe hasaaphanno gede jawaachishinosi. Yihowa, “Konniicho maˈˈassitanni nootto?” yee lame hige xaˈminosi. (1 Mot. 19:9, 13) Lamente yannara Yihowa, Eeliyaasi giddosita fushshe hasaaphi woyite macciishshinosi. Yihowa Eeliyaasira ledosi nootanna lowo wolqa noosiha ikkinota afanno gede assino. Qoleno Yihowa Eeliyaasira Iso magansiˈrannohu lowo manni noota buuxisinosi. (1 Mot. 19:11, 12, 18) Eeliyaasi giddosita fushshe Yihowara hasaaphihu gedensaanninna Yihowa kulinosire macciishshihu gedensaanni fooliishsho afiˈrinoti dihuluullissannote. Yihowa Eeliyaasira lowo geeshsha hasiisannoha haammata looso uyinosi. Isi Azaheeli Sooriyaho moohanno gede Iyu qole Israeelete moohanno gede buurara kulinosi; hattono Elsai masaalaancho asse shoomanno gede kulinosi. (1 Mot. 19:15, 16) Yihowa Eeliyaasira konne looso oye  dancha danchare hedanno gede kaaˈlinosi. Qoleno muli jaala ikkannosi gede Elsai qixxeessinosi. Callimma macciishshantannohe woyite Yihowa kaaˈlo afiˈra dandaattohu hiittoonniiti?

6. Callimma macciishshantannohe woyite mayi daafira huucciˈra dandaatto? (Faarso 62:8)

⁶ Yihowa iso huucciˈratto gede koyisinohe. Isi iillannohe qarra afanno hattono woˈmanka woyite huuccattokki macciishshannota buuxisinohe. (1 Tes. 5:17) Yihowa magansidhannosiri huuccatto macciishsha baxanno. (Law. 15:8) Callimma macciishshantannohe woyite mayi daafira huucciˈra dandaatto? Eeliyaasi gede Yihowara giddokkita fushshite hasaaphi. (Faarso 62:8 nabbawi.) Yaachishinohe coyenna kuni coyi mayi macciishshamannohe gede assinohero hasaaphi. Callimma macciishshantannohe woyite maa assattoro afatto gede kaaˈlahera Yihowa huucciˈri. Lawishshaho rosu mine farciˈratto woyite callimma macciishshantannohehanna waajjattoha ikkiro, ammanakki daafira kula dandaatto gede hasiissannohe jawaante afiˈrate Yihowa huucciˈri. Ammanakki xawisse kula dandaatto gede hayyo aahera nafa huucciˈra dandaatto. (Luq. 21:14, 15) Gara ikkitinokki hedo waaddanni nooheha ikkiro ayyaanaamittetenni gikki yiino Kiristaanchira hasaapha dandaatto gede kaaˈlahera Yihowa huucciˈri. Yihowa hasaaphatto manchi kuˈlattore wodanchanno gede kaaˈlaasi gedeno huucca dandaatto. Giddokkita gudisse Yihowara hasaaphi; isi huuccattokkira dawaro qolino gara wodanchi; hattono wolootu kaaˈlo maahoyye yite adhi. Hatto assittoro callimma macciishshantannohe gede assannore ajisha dandaatto.

7. Maarisiyo lawishshinni maa rosootto?

⁷ Yihowa baalunkura loonseemmoha kaajja looso uyinonke. Isi songote giddo uyinanninke looso loosateno ikko qanchoho soqqamate assineemmore baala laˈˈannotanna naadannota addaxxa dandiineemmo. (Far. 110:3) Konne looso diinaggaabbine loosaˈne callimma macciishshantannoˈne woyite kaaˈlitannoˈnehu hiittoonniiti? Hanni Maarisiyo yinannihu mittu wedellichu rodii woˈnaalsha laˈno. * Maarisiyo cuuamihunni shiima yanna gedensaanni muli jaallasi giddonni mittu sunu sununni halaalu mininni agure fulino. Maarisiyo togo yiino: “Isi Yihowa mininni agure fulanna laˈˈaˈya aneneeto ammaneemmokki gede assitinoe. Heeshshoˈya Yihowara sayise uyummo woyite eoommo qaale wonsheemmoronna Yihowa maate wido ikke heeˈra dandeemmoro huluullama hanafoommo. Callimma macciishshantinoe hattono ane qarra afannohu dino yee hedoommo.” Maarisiyo kaaˈlinosiri maatiyya? Isi togo yiino: “Soqqanshoˈya halashshiˈroommo; tini umiˈya daafira calla hedeemmokki gedenna gara ikkitinokki hedo gargadheemmo gede kaaˈlitinoe. Wolootu ledo soqqamaˈya hagiirraamo ikkeemmo gedenna callimma macciishshantannoekki gede kaaˈlitinoe.” Roduuwu ledo mitteenni xaande soqqama dandiineemmokkiha  ikkiro nafa, borrote sokka borreessinenna silketenni insa ledo farciˈranke jawaachishshannonke. Maarisiyo kaaˈlinosiri woluri maati? Isi lede togo yiino: “Songote giddo uyinannie looso diinaggaawe loosoommo. Qoleno gambooshshunniwa uyinannie kifile seekke qixxaawe shiqisha hanafummo. Uyinannie loosi Yihowanna wolootu albaanni waagu nooeta wodancheemmo gede assinoe.”

8. Buutote qarri iillannonke woyite mayi macciishshamankera dandaanno?

⁸ Tenne goofimarchu yannara qarru iillannonketa anfoommo. (2 Xim. 3:1) Ikkirono hendoommokki woyite hedeweelchu qarri amadankera dandaanno. Hedeweelcho angate anje amaddankera, buutote dhibbi amadinonketa kullankera woy shiiˈne xissiisiˈnammora dandiineemmo. Togoo woyite roorenkanni qarru aana aanaho iillannonke woyite woy mitte hige duuchu qarri iillannonke woyite yaandammoranna hexxo mudhinammora dandiineemmo. Ikkirono Yihowa laˈˈannonketanna iillannonke qarra baala isi kaaˈlonni qeelle saˈˈa dandiineemmota qaango.

9. Iyyoobira iillinosiha mito qarra kuli.

⁹ Hanni Yihowa ammanamino mancho Iyyoobi kaaˈlinosi gara laˈno. Isira shiima yanna giddo calla lowohu buutote qarri iillinosi. Iyyoobira mittu barri giddo calla saadasinna soqqamaasinesi shine gundoonnita, wole agurina baxanno oososi nafa reyitinota kulloonnisi. (Iyo. 1:13-19) Iyyoobi tennenni lowo geeshsha xissiisiˈre heeˈreenna mulenni buutote dhibbi amadinosi. (Iyo. 2:7) Iyyoobi lowo geeshsha xissiisiˈrino daafira “Heeshshoˈya mishoommo; heeˈrammora horontanni dihasiˈreemmo” yiino.—Iyo. 7:16.

10. Yihowa Iyyoobi iillinosi qarra dandee saˈˈanno gede kaaˈlinosihu hiittoonniiti? (Aaniidi qoolira noo misile lai.)

¹⁰ Yihowa Iyyoobira iillinosire laˈˈanni no. Isi Iyyoobi baxanno daafira iillinosi qarra dandee saˈˈate hasiisannore uyinosi. Yihowa Iyyoobi hasaawise, Isi taalle nookki hayyo noosiha ikkinotanna kalaqamasi towaatannoha ikkinota qaagiissinosi. Isi batinye dhagge ikkitanno saada daafira kulinosi. (Iyo. 38:1, 2; 39:9, 13, 19, 27; 40:15; 41:1, 2) Qoleno Yihowa Eelihu yinannihu ammanamino wedellichi Iyyoobi jawaachishannosinna sheshifachishannosi gede assino. Eelihu Yihowa qarra cincite saˈanno soqqamaasinesi woˈmanka woyite kiisannonsata buuxisinosi. Qoleno Yihowa Eelihu Iyyoobi baxillunni amaalannosi gede assino. Eelihu kalqete alame Kalaqaancho Yihowa hendiro ninke garire ikkinoommokkita qaaganno gede asse, Iyyoobi umisi daafira quwa sae hedannokki gede kaaˈlinosi. (Iyo. 37:14) Yihowa Iyyoobira looso uyinosi; isi cubbo loossinori sase jaallasira huuccatto assanno gede kulinosi. (Iyo. 42:8-10) Xaa yannara Yihowa qarru amadannonke woyite kaaˈlannonkehu hiittoonniiti?

11. Qarru iillannonke woyite Qullaawu Maxaafi sheshifachishannonkehu hiittoonniiti?

¹¹ Yihowa Iyyoobi hasaawisi gede xaa yannara ninke xaaddotenni dihasaawisannonke; ikkirono isi Qaalisi Qullaawu Maxaafi widoonni hasaawisannonke. (Rom. 15:4) Isi albillittete hexxo oye sheshifachishannonke. Hanni qarru iillannonke woyite sheshifachishshannonketa mite Qullaawu Maxaafi hedo laˈno. Yihowa Qullaawa Borro giddo, ayi coyino iillannonkehu buutote qarri nafa isi ‘baxilliwiinni badankera dandaannokkita’ buuxisinonke. (Rom. 8:38, 39) Qoleno isi, huuccattotenni ‘woshshidhannosirira baalaho mule’ noota buuxisinonke. (Far. 145:18) Yihowa iso addaxxineemmoha ikkiro iillannonke qarra dandiine saˈneemmotanna qarru giddo heeˈne nafa hagiirraamma ikka dandiineemmota kulinonke. (1 Qor. 10:13; Yai. 1:2, 12) Maganu Qaali albillitte afiˈneemmoha hegere atoote hendiro iillannonke qarri shiima yanna calla keeshshannoha ikkinota qaagiissannonke. (2 Qor. 4:16-18) Yihowa iillannonke  qarri baalaho kaima ikkinoha Sheexaane Daawuloosinna isi lawishsha harunsannoha busha manna hunannota kule huluullissannokki hexxo uyinonke. (Far. 37:10) Albillitte qarru iillannohe woyite dandiite saˈˈatto gede kaaˈlitannoheta sheshifachishshannota mite Qullaawu Maxaafi hedo qaagatto?

12. Yihowa Qaalisinni horo afiˈrate maa assinammora hasiˈranno?

¹² Yihowa Qullaawa Maxaafa ganyine xiinxallatenna nabbamboommore seekkine hiincate yanna gaaˈminammora hasiˈranno. Ronsoommore loosu aana hosiinseemmo woyite ammananke kaajjitanno hattono albinni roore iimi Anninkewa shinqeemmo. Tini iillannonke qarra dandiine saˈneemmo gede jawaante ikkitannonke. Qoleno Yihowa Qaalesi addaxxitannorira qullaawa ayyaanasi aannonsa. Kuni ayyaani qole aye fonqolono dandiine saˈneemmo gede “jawa wolqa” aannonke.—2 Qor. 4:7-10.

13. “Ammanaminohunna wodanaamu borojjichi” qixxeessannoti ayyaanaamittete sagale iillannonke qarra dandiine saˈneemmo gede kaaˈlitannonkehu hiittoonniiti?

¹³ Yihowa kaaˈlonni “ammanaminohunna wodanaamu borojjichi” batinye borro, viidiyubbanna muuziiqa qixxeessannonke. Kuri coyibba ammananke kaajjishiˈratenna ayyaanaamittetenni baqqi yine heeˈneemmo gede kaaˈlitannonke. (Mat. 24:45, NW) Hasiissanno yannara shiqqannota tenne ayyaanaamittete sagale dancha gede sagaˈla hasiissannonke. Yunayitidi Isteetisete heedhannoti mitte rodoo tenne ayyaanaamittete sagale baala naaddannota coyidhino. Ise togo yitino: “Yihowara soqqamoommahu 40 diri giddo ammanaˈya fonqolannohu duuchu qarri iillinoe.” Isera buutote qarri iillinose; ahaahose dimbe makeena kadanni noo manchi shiino, annisenna amase buuto dhiwame reyino hattono ise lame hige kaanserete dhibbi amadinose. Ise tenne dandiite saˈanno gede kaaˈlinoseri maati? Ise togo yitino: “Yihowa woˈmanka woyite towaatinoe. Isi ammanaminohunna wodanaamu borojjichi widoonni shiqishino sagale iillinoe qarra dandee saeemma gede kaaˈlitinoe. Hakko daafira anino Iyyoobi yiinota yaa dandeemma. Isi, ‘reyammo geeshsha keeraanchimmaˈya diagureemmo’” yiino.—Iyo. 27:5.

14. Yihowa qarru iillannonke yannara ammanate roduuwinke widoonni kaaˈlannonkehu hiittoonniiti? (1 Teselonqe 4:9)

¹⁴ Yihowa mannisi qarru iillannonsa woyite mimmito baxannonna sheshifachishanno gede qajeelsinonsa. (2 Qor. 1:3, 4; 1 Teselonqe 4:9 nabbawi.) Eelihu lawishsha harunsite ammanate roduuwinke qarru iillannonke woyite ammanamme heeˈneemmo gede ninke kaaˈlate quqquxantanno.  (Soq. 14:22) Hanni lawishshaho Diyana yinanni rodoora minaannise baasa dhiwamita songose roduuwi ise ayyaanaamittetenni kaajjite heedhanno gede jawaachishinosenna kaaˈlinose gara laˈno. Ise togo yitino: “Iillinoe qarri dishiimaho; kayinni Yihowa hattee qarrissanno yannara baxillunni towaatinonke. Songonke roduuwi lowore assite kaaˈlitinonke. Insa dagge xaˈmitinonke, silke dowwoltinonke hattono rimmi assite hanqaffe jawaachishshinonke; tini iillinonke qarra dandiine saˈneemmo gede kaaˈlitinonke. Makeena kada dandeemmakki daafira roduuwu gambooshshe haˈreemma woyitenna soqqansho fuleemma woyite kaaˈlitinoe.” Tenne baxillu noote ayyaanaamittete maate wido ikka ninkera lowo atooteeti!

15. Iillannonke qarra dandiine saˈneemmota huluullammeemmokkihu mayiraati?

¹⁵ Ninke baalunkura qarru iillannonke woyiti no. Ikkirono kageeshsha ronsummonte gede qarru iillannonke woyite callootanke diˈˈikkinoommo. Baxillaanchu anni gede Yihowa woˈmanka woyite laˈˈannonke. Isi ledonke no; eeggifante huucciˈneemmota macciishshate qixxaawinoho hattono ninke kaaˈlate quqquxamanno. (Isa. 43:2) Isi shaqqillunni hasiisannonkere baala qixxeessinonke daafira iillannonke qarra dandiine saˈneemmota addaxxa dandiineemmo. Isi huuccattote qoosso, Qullaawa Maxaafa, falakkinota ayyaanaamittete sagalenna hasiissannonke yannara kaaˈlitannonkere ammanate roduuwa uyinonke.

16. Yihowa towaatannanke heeˈra dandiineemmohu hiittoonniiti?

¹⁶ Laˈˈannonkehu iimi Anni noonketa afa lowo geeshsha hagiirsiissannote! “Wodaninke isinni hagiidhanno.” (Far. 33:21) Isi ninke kaaˈlate qixxeessino qixxaawo baala horoonsiˈne, shaqqillunni towaatannonke towaanyora galanteemmosita leellisha dandiineemmo. Maganu towaatannanke heeˈrate ninkeno dandiinummore baala assa hasiissannonke. Wole yaattonni Yihowara hajajamatenna gara ikkinore assate dandiinummore baala assineemmoha ikkiro, isi hegerera towaatannonke!—1 Phe. 3:12.