1. Ibiraawoota 12:1 kultanno garinni heeshsho afiꞌrate dondeemmo woyite jeefote bayicho iillate maa assa hasiissannonke?

 QULLAAWU MAXAAFI ninke Kiristaanu heeshsho qolchanshote ledo heewisiisanno. Jeefote geeshsha doddannori hegere heeshsho baꞌraaꞌra afidhanno. (2 Xim. 4:7, 8) Qolchanshonke jeefinseemmo yanna albinni roore gambisse daggino daafira woꞌmanka woyite jawaante dodate dandiinummore baala assa hasiissannonke. Heeshsho afiꞌrate jeefote geeshsha jawaate dodinohu soqqamaasinchu Phaawuloosi qolchanshonke jeefisate maa assa hasiissannonkero xawise kulino. Isi, “duha ikkannonkere baala . . . hunne, albankeenni noo qolchanshora cincatenni jawaante” dondeemmo gede kulinonke.—Ibiraawoota 12:1 nabbawi.

2. ‘Duha ikkannonkere baala hunate’ yaa mayyaate?

² Phaawuloosi ‘duha ikkannonkere baala hunno’ yaasi mittu Kiristaanchi duqqa hasiissannosi duhi dino yaateni? Deeꞌni. Isi hatto yiinohu hasiisannokki duha baala hooꞌla hasiissannonketa kulateeti. Togoo duhi gufiꞌneemmonna wolqa baꞌneemmo gede assankera dandaanno. Jawaante dodate, wolqa baꞌneemmo gede assannoha hasiisannokki duha baala bande afanna hooꞌla hasiissannonke. Ikkirono kayinni duqqa hasiissannonke duha huna dihasiissannonke. Hatto ikka hoogiro qolchanshote giddonni fullammora dandiineemmo. (2 Xim. 2:5) Duqqa hasiissannonke duhi hiikkonneeti?

3. (a) Galatiyu Sokka 6:5 kultanno garinni duqqa hasiissannonke duhi hiikkonneeti? (b) Konni birxichira maa ronseemmo? Mayira?

³ Galatiyu Sokka 6:5 nabbawi. Phaawuloosi duqqa hasiissannonkeha mito coye bade kulino. Isi “Mittu mittunku umisi duha duqqa hasiissannosi” yee borreessino. Phaawuloosi kowiicho  Maganu soqqamaanosi ikkinoommo daafira ninke mittu mittunku assinammora hasiꞌranno coyi daafira kulanni no; konne coye wolu manni assankera didandaanno. Konni birxichira duqqa hasiissannonke duhi giddo mitu maatironna duqqa dandiineemmohu hiittoonniitiro ronseemmo. Qoleno duqqinammora dandiineemmohu hasiisannokki duhi hiikkonneetironna konne duha huna dandiineemmohu hiittoonniitiro ronseemmo. Uminke duha duqqanna hasiisannokki duha huna heeshsho afiꞌrate jeefote geeshsha dondeemmo gede kaaꞌlitannonke.

4. Heeshshonke Yihowara sayinse uyinummo woyite eꞌnoommo qaale wonsha qarra diꞌꞌikkitannonke yineemmohu mayiraati? (Misileno lai.)

⁴ Ninkeneeto Yihowara sayinse uyinummo woyite eꞌnoommo qaale. Heeshshonke Yihowara sayinse uyinummo woyite iso magansiꞌratenna fajjosi wonshate qaale eꞌnoommo. Eꞌnoommo qaale agadha hasiissannonke. Heeshshonke Yihowara sayinse uyinummo woyite eꞌnoommo qaali garinni heeꞌra shota diꞌꞌikkitino; ikkirono assa dandiinannikkire diꞌꞌikkitino. Korkaatuno Yihowa kalaqinonkehu fajjosi  wonshinammoraati. (Aju. 4:11) Isi ayyaanaamittete hasatto heedhannonke gede assinonke hattono danisinni kalaqinonke. Hakko daafira isiwa shiqqi yaanna fajjosi wonshine hagiidha dandiineemmo. (Far. 40:8) Qoleno Maganu fajjo wonshinummoronna Beettisi lawishsha harunsinummoro ‘fooliishsho afiꞌneemmo.’—Mat. 11:28-30.

5. Heeshshokki Yihowara sayisse uyitto woyite eootto qaale wonshatto gede kaaꞌlannoheri maati? (1 Yohaannisi 5:3)

⁵ Duha duqqa dandaattohu hiittoonniiti? Tennera lamu coyi kaaꞌlahera dandaanno. Umihunni woꞌmanka woyite Yihowara noohe baxilli lexxanno gede assiꞌri. Yihowa assinoheha dancha coye baalanna albillitte qixxeessinohe atoote hiincite tenne assa dandaatto. Maganoho noohe baxilli lexxanni haꞌri kiiro isira hajajama roore shota ikkitannohe. (1 Yohaannisi 5:3 nabbawi.) Layinkihunni Yesuusi lawishsha harunsi. Isi kaaꞌlannosi gede Yihowa huucciꞌrino daafiranna albillitte afiꞌranno baꞌraaꞌra illachishino daafira Maganu fajjo wonsha dandiino. (Ibi. 5:7; 12:2) Yesuusi gede jawaante afiꞌrate Yihowa huucciꞌri; hattono hegere heeshsho hexxo xabbe leeltannohe gede assiꞌri. Maganoho noohe baxilli lexxanni haꞌranno gede assiꞌrittoronna Beettisi lawishsha harunsittoro heeshshokki Yihowara sayisse uyitto woyite eootto qaale agadha dandaatto.

6. Maatenkera hasiisannore wonsha hasiissannonkehu mayiraati? (Misileno lai.)

⁶ Maatenkera hasiisannore wonsha. Heeshsho afiꞌrate dondeemmo woyite Yihowanna Yesuusa fiixinkenni roorsine baxa hasiissannonke. (Mat. 10:37) Ikkirono tini Maganonna Kiristoosa hagiirsiinseemmokki gede assitannonke yine, maatenkera hasiisannore wonsha lashshi assineemmo yaa diꞌꞌikkitino. Kayinni Maganonna Kiristoosa hagiirsiisate, maatenkera hasiisannore wonsha hasiissannonke. (1 Xim. 5:4, 8) Hatto assineemmoha ikkiro hagiirraamma ikkineemmo. Qoleno Yihowa minaanninna minaama mimmito baxannohanna ayirrisannoha, annuwunna amuuwu oosonsa baxxannohanna qajeelsitannoha hattono ooso annahonna amate hajajantannoha ikkiro maate hagiirraame ikkitannota afino.—Efe. 5:33; 6:1, 4.

7. Maatekki giddo noohe qeecha Yihowa hasiꞌranno garinni wonsha dandaattohu hiittoonniiti?

⁷ Duha duqqa dandaattohu hiittoonniiti? Maatekki giddo noohe qeechi ikkihano ikkiro, umikki hedo, qooxeessikkira noo manni yaannore woy egennaammaho yinanniri coyidhannore agurte Qullaawu Maxaafi hayyo addaxxi. (Law. 24:3, 4) Borruwanke dancha gede horoonsiꞌri. Borruwanke giddo Qullaawu Maxaafiha xintu seera loosu aana hosiinseemmo gara afate kaaꞌlitannonke hedo no. Lawishshaho Maatekki Hagiirru Noota Ikka Dandiitanno! yitanno biroshereranna Hegerera Hagiidhitanni Heeꞌra Dandaatto! yaanno maxaafira roso 49 nna 50te minaannuwanna minaamuwa, annuwanna amuuwa hattono wedelloota kaaꞌlannoha xintu seera kulloonni. Wolu manni hatto assannokkiha ikkiro nafa Qullaawu Maxaafiha xintu seera loosu aana hosiisate murciꞌri. Hatto assittoro maatekki horo afidhanno; hattono Yihowa atoote afiꞌratto.—1 Phe. 3:1, 2.

8. Doodhineemmo doorshi kaaꞌlankera woy gawajjankera dandaannohu hiittoonniiti?

⁸ Doodhinoommo doorshi abbanno guma. Yihowa mitto coye uminkenni doodhate qoosso uyinonke; hattono isi dancha doorsha doodhine hagiidhinammora hasiꞌranno. Ikkirono isi busha doorsha doodhineenna iillannonke coye dihoolanno. (Gal. 6:7, 8) Hakko daafira, gara ikkinokkire doodhineenna, gara garimmo laꞌnummokki coyiꞌneenna woy mitto coye muddamme assineenna iillannonke qarra dandiine saꞌꞌa hasiisannonke. Assinoommohu gara ikkinokki coyira tiiꞌꞌinke bushiishanni waadankera dandaanno. Ikkirono assinoommohu gara ikkinokki  coyira xaꞌmammeemmota afanke cubbonke kulle maaro eꞌneemmo gede, soꞌronke biddi assiꞌneemmo gedenna tenne soꞌro wirro loonseemmokki gede kakkayissannonke. Tenne assanke heeshsho afiꞌrate qolchammeemmo qolchansho agurre fulleemmokki gede kaaꞌlitannonke.

9. Gara ikkinokki doorsha doodhiteenna iillannohe qarra dandiite saꞌꞌatto gede kaaꞌlannoheri maati? (Misileno lai.)

⁹ Duha duqqa dandaattohu hiittoonniiti? Doodhoottoha gara ikkinokki doorsha biddi assa dandaattokkiha ikkiro, iillinohe coye ammante adhi. Saino coye qola dandaattokkita wodanchi. Loosootto soꞌro gara lawisate, ateneeto woy woloota bushiishate woꞌnaaltanni yannakkinna wolqakki beebba guxxitooti. Hatteentenni soꞌrokki ammante adhi; hattono danchare assate dandiittore baala assi. Loosootto soꞌrora ateneeto busha assitanni noottoha ikkiro, umokki heeshshi assite huuccattotenni Yihowawa shiqi, soꞌrokki xawisse kuli hattono gatona yaannohe gede iso huucciꞌri. (Far. 25:11; 51:3, 4) Koffi assootto manni heeꞌriro maaro xaꞌmiꞌri; hattono hasiisannoha ikkiro, kaaꞌlitannohe gede songote cimeeyye amaaꞌli. (Yai. 5:14, 15) Loosootto soꞌronni rosi; hattono tenne soꞌro wirro loosattokki gede sharrami. Hatto assittoro Yihowa gatona yaannohetanna hasiisannohere asse kaaꞌlannoheta addaxxa dandaatto.—Far. 103:8-13.

10. Ikkannokki coye heda lowo duhaati yineemmohu mayiraati? (Galatiyu Sokka 6:4)

¹⁰ Ikkannokki coye heda. Ninkeneeto wolootu ledo heewisiinseemmo woyite ikkannokki coye hendanni duha lexxinanni heeꞌnoommo. (Galatiyu Sokka 6:4 nabbawi.) Woꞌmanka woyite ninkeneeto wolootu ledo heewisiinseemmoha ikkiro, hinaansammoranna heewisammammora dandiineemmo. (Gal. 5:26) Heeꞌneemmo gari fajjinkekkinna dandoo heedhunkekkinni wolootu assitannore assate sharrammeemmoha ikkiro ninkeneeto gawajjinammora dandiineemmo. “Woꞌmitukkinni keeshshitanno hexxo wodana [daafursitannoha]” ikkiro, horo woꞌmitannokki hexxo roore daafursitannoti dihuluullissannote! (Law. 13:12) Tini wolqa baꞌneemmo gedenna heeshsho afiꞌrate qolchammeemmo qolchanshonni badhera hingeemmo gede assitankera dandiitanno.—Law. 24:10.

11. Ikkannokkire hedattokki gede kaaꞌlannoheri maati?

¹¹ Hasiisannokki duha huna dandaattohu hiittoonniiti? Yihowa assattora hasiꞌrannohunni aleenni assa hasiissannohehu gede assite heddooti. Isi horonta noohekkire aattosira dihasiꞌranno. (2 Qor. 8:12) Yihowa ati assattore wolootu assitannori ledo heewisiisannokkita addaxxi. (Mat. 25:20-23) Isi woꞌma lubbokkinni soqqamatto soqqanshokki, ammanamakkinna cincakki lowo geeshsha naadanno. Geedhimma, dhibbunna nootto gari xa assa hasiꞌrattore baala assattokki gede hoolahera dandaannota ammante adhi. Geedhimma woy dhibbu waadannoheha ikkiro, qoosso uyinannihe woyite didandeemmo yite Barzilayi lawishsha harunsi. (2 Sam. 19:35, 36) Muse gede kaaꞌlinannihe woyite maahoyye yii; hattono hasiisanno woyite looso wolootaho uyi. (Ful. 18:21, 22) Konni garinni dhukakki afoottoha ikkakki heeshshote qolchansho qolchamatto woyite daafuratto gede assannoheha ikkannokki coye hedattokki gede kaaꞌlitannohe.

12. Wolootu doodhitinohu gara ikkinokki doorshira xaꞌmammeemmori ninkeetini? Xawisi.

¹² Wolootu doodhitinohu gara ikkinokki doorshira ninkeneeto busha assa. Ninke wolootaho mitto doorsha doora didandiineemmo; qoleno insa doodhitinohu gara ikkinokki doorshi abbanno qarrinni woꞌmanka woyite gattanno gede assa didandiineemmo. Lawishshaho mittu beetti woy beetto sunu sununni Yihowara soqqama agurtara dandiitanno. Tini  annansanna amansa lowo geeshsha xissiissara dandiitanno. Kayinni oosonsa doodhitinohu gara ikkinokki doorshira insaneeto bushiishshanno annuwinna amuuwi lowo duha duqqitanni no. Yihowa insa konne duha duqqitara dihasiꞌranno.—Rom. 14:12.

13. Oosonsa gara ikkinokki doorsha doodhituro annuwunna amuuwu maa assa dandiitanno?

¹³ Konne duha huna dandiitinannihu hiittoonniiti? Yihowa baalunkura doodhate qoosso uyinonketa qaagge. Isi mittu mittunku manchi umisi doorsha doodhara fajjino. Hakko daafira isira soqqama woy soqqama hooga doodha dandiineemmo. Yihowa guuta annanna ama ikkitinoonnikkita afino; isi assa dandiitinannire calla assitinara hasiꞌranno. Oosoꞌne doodhitanno doorshira xaꞌmantinanniri kiꞌne ikkitinikkinni insa umonsaati. (Law. 20:11) Ikkirono annanna ama ikkitinoonni daafira, loossinoonni soꞌro calla heddinanniha ikkara dandaanno. Hatto ikkiro, giddoꞌneta fushshitine Yihowara hasaaphe; hattono gatona yaannoꞌne gede iso huuccidhe. Isi saino coye galagaltine biddi assa dandiitinannikkita afino. Qoleno Yihowa beettiꞌne doodhino doorshi abbanno qarrinni gatanno gede assa hasiissannoꞌne diyaanno. Hattono beettiꞌne Yihowawa higate dandiire baala assiro Yihowa anga fane haaꞌrasira quqquxamannota deꞌinoonte.—Luq. 15:18-20.

14. Quwa saꞌne ninkeneeto bushiisha huna hasiissannonke duhaati yineemmohu mayiraati?

¹⁴ Quwa saꞌne ninkeneeto bushiisha. Cubbo loonsummoro ninkeneeto bushiisha nooreentilla. Ikkirono, quwa saꞌne ninkeneeto bushiisha horo duqqa hasiissannonkekki duhaati. Togoo duhi huna hasiissannonkeho. Ninkeneeto quwa saꞌne bushiinshanni heeꞌnoommota afa dandiineemmohu hiittoonniiti? Cubbonke kulle maaro eꞌnummoronna tenne soꞌro galagalle loonseemmokki gede sharrammummoro Yihowa gatona yiinonketa addaxxa dandiineemmo. (Soq. 3:19) Kuri coyibba assinummohu gedensaanni Yihowa ninkeneeto bushiinshammora dihasiꞌranno. Isi woꞌmanka woyite ninkeneeto bushiisha mageeshshi  geeshsha gawajjitannonkero afino. (Far. 31:10) Quwa saꞌne yaandeemmoha ikkiro, hexxo mudhine heeshsho afiꞌrate qolchama agurrammora dandiineemmo.—2 Qor. 2:7.

15. Quwa saꞌne ninkeneeto bushiinsheemmokki gede mayi kaaꞌlankera dandaanno? (1 Yohaannisi 3:19, 20) (Misileno lai.)

¹⁵ Konne duha huna dandiineemmohu hiittoonniiti? Quwa saꞌne ninkeneeto bushiinsheemmoha ikkiro Maganu ‘maaro’ illachisha hasiissannonke. (Far. 130:4) Isi addu maaro eꞌannore gatona yaannota kulanni, “cubbonsa diqaageemmo” yiino. (Erm. 31:34) Hatto yaa Yihowa gatona yiihu gedensaanni, alba loonsoommo cubbu horo diqaaganno yaate. Hakko daafira cubbo loosseenna qarru iillihero Yihowa gatona diyiinoe yite heddooti. Alba loosootto soꞌro xa Yihowara hasiꞌrootto geeshsha soqqamattokki gede assitinoheha ikkiro, ateneeto bushiishshooti. Yihowa alba loosootto cubbo dihedanno; atino heda dihasiissannohe.—1 Yohaannisi 3:19, 20 nabbawi.

16. Qolchammeemmore ikkinoommo daafira maa wodancha hasiissannonke?

¹⁶ Heeshsho afiꞌrate dondeemmore ikkinoommo daafira ‘baꞌraaꞌra adhineemmo gede ikkine doda’ hasiisannonke. (1 Qor. 9:24) Tenne assa dandiineemmohu duqqa hasiissannonke duhanna huna hasiissannonke duha bande anfummorooti. Konni birxichira, duqqa hasiissannonkehunna huna hasiissannonke duhi giddo gamalla laꞌnoommo. Qullaawu Maxaafi wolu duhi daafirano kulanno. Yesuusi, ‘itunna agu batinyinna heeshshote daafira yaada’ duha ikkitankera dandiitannota coyiꞌrino. (Luq. 21:34) Kuninna wolu qummeeshshi heeshsho afiꞌrate qolchamatto woyite biddi assiꞌra hasiissannohere badde afatto gede kaaꞌlahera dandaanno.

17. Heeshsho afiꞌrate qolchanshora qeelleemmota huluullammeemmokkihu mayiraati?

¹⁷ Yihowa hasiissannonke jawaante aannonke daafira heeshsho afiꞌrate qolchanshora qeelleemmota dihuluullammeemmo. (Isa. 40:29-31) Hakko daafira badhe higgooti! Soqqamaasinchu Phaawuloosi lawishsha harunsi; isi albillitte afiꞌranno baꞌraaꞌra adhate diinaggaawe dodino. (Fil. 3:13, 14) Tenne qolchansho atera qolchamannohehu dino; ikkirono Yihowa kaaꞌlonni tenne qolchansho guda dandaatto. Isi duqqa hasiissannohe duha duqqatto gedenna hasiisannokki duha hunatto gede kaaꞌlannohe. (Far. 68:19) Yihowa ledokki noo daafira tenne qolchansho jawaatte dodanna qeela dandaatto.