• “Minaanniꞌya duucha hige foorinohu gede asse hedoomma.”

• “Shollishinoehu, xuma ikkoommakkihunna waagu nooekkihu gede asse hedoomma.”

• “Tenne daafira mittohono dikuloomma. Callaꞌya xissiisiꞌroomma.”

• “Yihowa ane daafira dihedanno yee hedoomma.”

Aleenni kulli hedo mitte minaamara minaannise teeda baꞌino misilla lairo ise mageeshshi geeshsha xissiisidhannoro leellishshanno. Isi anfikkinni boode aganna woy diro teeda baꞌino misilla laꞌꞌanni keeshshinoha ikkiro, isera hakkuyi gedensaanni iso ammana qarra ikkitasera dandiitanno. Mitte minaama minaannase horo egentinokkihu gede assite heddinota coyidhino. Ise, ‘Isi ani afummakki assanni noohu wolu coyino nookka?’ yitino.

Konne birxicho qixxeessinoonnihu minaannise teeda baꞌino misilla laꞌꞌanno minaama kaaꞌlateeti. a Konni birxichira, sheshifachishannoseha, Yihowa baxannosetanna kaaꞌlannoseta buuxxanno gede assannoseha hattono giddoyidi keere afidhanno gedenna Yihowawa gamba yite heedhanno gede kaaꞌlannoseha Qullaawu Maxaafiha xintu seera kulloonni. b

Minaannikki assannoha baalanka coye hoola dandaattakkiha ikkirono, giddoyidi keere afiꞌrate kayinni assa dandaattari no. Hanni aante noo hedo laꞌno.

Ateneeto busha assitooti. Mitte minaama, ‘Minaanniꞌya teeda baꞌino misilla laꞌꞌannohu anewa gattino daafiraati’ yite heddara dandiitanno. Aliise c yinanni minaama, ani xuma diꞌꞌikkoomma yite heddino. Ise, ‘Minaanniꞌya ane agure wole meyata laꞌꞌannohu mayiraati?’ yitino. Mitootu minaamuwi, coyi roore bushanno gede assinanni heeꞌnoommori ninkeeti yee hede insaneeto busha assanno. Daaniyeeli yinanni minaama togo yitino: “Hanqaꞌyanna caaccaawaꞌya adhamanke diigganni noohu gede asse hedoomma.”

Atino hatto yite hedattaha ikkiro, minaannikki loosino soꞌrora Yihowa ate busha assannohekkita deꞌooti. Yaiqoobi 1:14, “Mittu mittunku manchi jifamannohu umisi yortonni goshooshamanninna dogamanniiti” yitanno. (Rom. 14:12; Fil. 2:12) Yihowa  ate busha assantenni isira ammanamakki lowori gede asse laꞌꞌanno.—2 Dud. 16:9.

Mittu minaanni teeda baꞌino misile laꞌꞌannohu minaamasi xuma ikkitinokki daafiraati yaa diꞌꞌikkino. Tenne hajo daafira xiinxallitino fullahaano, teeda baꞌino misilla laꞌꞌa mittu manchira aye meyatino kassi assitara dandiitannokki hasatto heedhannosi gede assitannota coyidhino.

Quwa saꞌe yaaddooti. Katiriina yinanni minaama minaannise teeda baꞌino misilla laꞌꞌannota calla hedase wolere heddannokki gede assitinoseta coyidhino. Firanseesi yinanni minaama togo yitino: “Minaanniꞌya hiikko nooro afa hoogummaro lowo geeshsha yaadeemma. Barra woꞌma dadillanni hoseemma.” Wolootu minaamuwi, minaanninsa assannore afara dandaanno roduuwi noowa heeꞌranno woyite yaadannota coyiꞌrino. Wolootu minaamuwi kayinni qarranke afara dandaannohu dino yee hedanno daafira, callimma macciishshantannonsata coyiꞌrino.

Hatto yee heda nooreentilla. Ikkirono tenne daafira calla heda roore yaandanni gedella assitanno. Hatteentenni Yihowa ledo noohe jaalooma illachishi. Hatto assakki jawaante afiꞌratta gede kaaꞌlitannohe.—Far. 62:2; Efe. 6:10.

Qullaawu Maxaafi giddo kulloonnita qarru iilleennansa Yihowa huucciꞌre shesho afiꞌrino meenti daafira kultanno xagge nabbawakki kaaꞌlitahera dandiitanno. Yihowa iillinonsa qarra dihoolino; kayinni keere afidhanno gede kaaꞌlinonsa. Lawishshaho Haanna iillinose qarrinni kainohunni ‘hururante wiꞌlitino.’ Ikkirono ise ‘uurrissukkinni Yihowa huuccidhuhu’ gedensaanni, qarrise hoꞌlannohu hiittoonniitiro afa hooggurono giddoyidi keere afidhino.—1 Sam. 1:10, 12, 18; 2 Qor. 1:3, 4.

Kaaꞌlo afiꞌrate songote cimeeyye amaaꞌli. Insa ‘bubbetenna wishotenni goꞌlinanni’ bayichi gede ikkitahera dandiitanno. (Isa. 32:2) Qoleno fojokki hasaaphattatanna sheshifachishshannohe rodoo qummi assitahera nafa dandiitanno.—Law. 17:17.

Minaannikki teeda baꞌino misilla laꞌꞌate rosicho qeeꞌlanno gede kaaꞌla dandaatta? Kaaꞌlattasiha ikkara dandaanno. Qullaawu Maxaafi qarra woy wolqaataamo diina qeelate “mitto calla ikkantenni lame ikka woyyitanno” yaanno. (Ros. 4:9-12) Minaanninna minaama teeda baꞌino misilla laꞌꞌate araado qeeꞌlatenna galagale mimmito addaxxate lamunku mitteenni sharrama dancha guma abbitannota xiinxallo leellishshanno.

 Hige dancha guma afidhinannihu minaannikki teeda baꞌino misilla laꞌꞌa agurate sharramannohanna murciꞌrinoha ikkirooti. Isi jawaante afiꞌrate eeggifate Yihowa huucciꞌrino? Hattono songote cimeeyye kaaꞌlo xaꞌmiꞌrino? (2 Qor. 4:7; Yai. 5:14, 15) Isi teeda baꞌino misilla laꞌꞌanno gede assannosiriwiinni xeertiꞌrino? Lawishshaho elektirooniksete uduunnicho horoonsiꞌranno yanna ajishino? Hattono fonqolo ikkannosi coye qorophino? (Law. 27:12) Isi kaaꞌlattasi gede maahoyye yiino? Woꞌmunni woꞌma atera ammanamino? Hatto ikkiro iso kaaꞌlattaha ikkara dandaanno.

Hiittoonni? Hanni mitto lawishsha laꞌno. Feelisha yinanni mancho anjesinni hanafe teeda baꞌino misilla laꞌꞌate rosichi noosihu Eetaani yinanni manchira assidhino. Feelisha, Eetaanira teeda baꞌino misilla laꞌꞌate hasatto wirro waaddannosi woyite ise ledo hasaawa shota ikkitannosi gede assitino. Eetaani togo yiino: “Minaamaꞌyara giddoꞌyata maaxummokkinni fane kuleemmose. Ise fonqolo ikkannoe coye hooꞌleemmo gedenna konne woyyeessiꞌranni noommoronna teꞌee woꞌmanka woyite xaꞌmitanni baxillunni kaaꞌlitinoe. Qoleno ise interneete horoonsiꞌreemmo yanna ajisheemmo gede kaaꞌlitinoe.” Feelisha, Eetaani teeda baꞌino misilla laꞌꞌanno daafira xissiisiꞌrase garankolla. Ise togo yitino: “Hanqaꞌyanna xissiisiꞌraꞌya kayinni minaanniꞌya tenne busha gade hooꞌlanno gede dikaaꞌlitannosi. Isi qarra ikkinosi coye hasaambummohu gedensaanni, xissiisiꞌreemma gede assannoe coye agurate sumuu yiino.”

Konni garinni hasaawa minaanni teeda baꞌino misilla laꞌꞌa qorophanno gede calla ikkikkinni, minaamasino iso galagalte addaxxitanno gede kaaꞌlitannose. Minaanni minaamasira laanfesi, hattono mamira haꞌrannoronna maa loosannoro kulannoseha ikkiro, minaamasi mittoreno maaxannosekkita affino daafira iso addaxxa qarra diꞌꞌikkitannose.

Atino konni garinni minaannakki kaaꞌla dandaattaha lawannohe? Hatto ikkiro, konne birxicho mitteenni nabbabbine hasaabbe. Isi teeda baꞌino misilla laꞌꞌa aguranna galagalte addaxxattasi gede assiꞌra hasiisannosi. Isi tenne hajo kayisse hasaawootta daafira hanqa agure kuni coyi ate mageeshshi geeshsha xissiisinohero huwatate woꞌnaala hasiissannosi. Minaannikki teeda baꞌino misilla laꞌꞌannokki gedenna ati ammanattasi gede assate sharramanno woyite kaaꞌlisi. Lamunku mannu teeda baꞌino misilla laꞌꞌanno gede xixxiiwannori maatironna konne rosicho qeeꞌla dandiinannihu hiittoonniitiro mitteenni hasaawa dandiitinanni. d

Minaannikki ledo togoo hajo kayissine hasaabbinanni woyite lamunku mimmitoho hanqitinanniha  laweennahe waajjittaro, hasaabbinanni woyite ledoꞌne ofolle macciishshanno gede roore aantinanniha songote cimeessa amaaꞌla dandiitinanni. Minaannikki teeda baꞌino misilla laꞌꞌa agurihu gedensaanni nafa, galagalte iso addaxxate mito geeshshi yanna hasiissannoheha ikkara dandaannota deꞌooti. Hexxo mudhitooti. Minaannikki ledo noohe aante kaajjitanno gede assiꞌrate isi woyyeessiꞌrinoha shiimmaadda coye illachishi. Cincitiniro adhamaꞌne galte hosse albi gede kaajjado ikkitannota hexxa dandiitinanni.—Ros. 7:8; 1 Qor. 13:4.

Minaannikki galagale teeda baꞌino misilla laꞌꞌa hanafiro isi maaro dieannoho woy konne rosicho horo qeeꞌla didandaanno yaatenni? Hatto yaa diꞌꞌikkino. Roorenkanni teeda baꞌino misilla laꞌꞌa araado ikkitinosiha ikkiro, isi konne rosicho qeeꞌlate heeshshosi diro woꞌma sharrama hasiissannosiha ikkara dandaanno. Minaannikki teeda baꞌino misilla laꞌꞌa agurihunni lowo diri gedensaanni nafa galagale laꞌꞌara dandaanno. Albillitte togoori kalaqamannokki gede, wole agurina tenne busha gade qeeꞌlinoha lawisiro nafa, albinni roore lowo geeshsha qoropha hasiissannosiha ikkara dandaanno. (Law. 28:14; Mat. 5:29; 1 Qor. 10:12) Qoleno ‘wodanisinna hedosi haarooꞌmitanno’ gede assiꞌranna busha coye yaano teeda baꞌino misillanna battaawinoha aye coyeno lawishshaho maasterbeeshiinete gade ‘giwa’ hasiissannosi. (Efe. 4:23; Far. 97:10; Rom. 12:9) Isi togoo coye qorophate maahoyye yiino? Hatto ikkiro isi tenne gade sunu sununni woꞌmunni woꞌma qeeꞌla dandaanno. e

Kayinni minaannikki konne rosicho qeeꞌlate sharrama hasiꞌrannokkihalla ikki? Hexxo mudhattara, hanqattaranna kaandoonnihehu gede assite hedattara dandaattati dihuluullissannote. Yaaddokki Yihowara hasaaphi; hatto assakki giddoyidi keere afiꞌratta gede kaaꞌlitannohe. (1 Phe. 5:7) Huuccatto assidhe, xiinxallitenna hiincite Yihowawa gamba yite heeꞌri. Hatto assittaro isino atewa shiqqi yaannota huluullantooti. Faarso 34:18 kultannonte gede Yihowa “dadillunni hiiqqantinorira mule no”; hattono insa galagalte hagiirraamma ikkitanno gede kaaꞌla hasiꞌranno. Dancha Kiristaancho ikkate dandiittare baala assi. Kaaꞌlitannohe gede songote cimeeyye amaaꞌli. Qoleno albillitte minaannikki soorrame biddi yaara dandaannota hexxi.—Rom. 2:4; 2 Phe. 3:9.