Hakko birxichira, hedate dandoo noonsa kalaqami baalaho lowo geeshsha hasiissanno hajo yaano Yihowahu bayiru suꞌmi qullaambe daafira ronsoommo. Yihowa aliidimma yaano ‘Isi gashshanno gari baalunkunni woyyinohonso diwoyyinoho?’ yitanno hajo Yihowa suꞌmi qullaambe ledo xaadooshshe afidhinote. Hattono, ‘Mittu manchi Maganoho ammaname heeꞌrannonsa diheeꞌranno?’ yitanno hajo Yihowa suꞌmi qullaambe ledo xaadooshshe afidhinote.

Yihowa suꞌmanna suꞌmisi qullaambe lowori gede assine laꞌneemmohu mayiraati? Hanni sase korkaata laꞌno.

Umihunni, Edenete kaashshu basera Sheexaanu Yihowa suꞌma hunino. Sheexaanu Heewani xaꞌmino xaꞌmo Yihowa shaqqado diꞌꞌikkino hattono Addaamiranna Heewanira uyino biddishshi furro fuuqqo hoꞌlannoho yine hendanni gede assitannote. Hakkiinni Sheexaanu Yihowa yiinore hettise coyiꞌrino; isi hakko garinni coyiꞌrasi Magano kaphaancho assate gedeeti. Hakko daafira Sheexaanu Yihowa suꞌma hunino. Isi “Daawuloosi” ikkino; hatto yaa “suꞌma hunannoho” yaate. (Yoh. 8:44) Heewani Sheexaanu kapho ammantino daafira Maganoho hajajama gibbino; tini aliidimmasira finqiltinota leellishshanno. (Kal. 3:1-6) Xaa geeshsha Sheexaanu Yihowa daafira kapho tareessanni suꞌmasi hunanni no. Konne kapho ammananno manni roore woyite Yihowara dihajajamanno. Hakko daafira Yihowa manni, Yihowaha qullaawa suꞌma huna baalantenni roortino soꞌro gede asse laꞌꞌanno. Alamete aana qarrunna bunshe batidhanno gede assinohu qaru korkaati konneeti.

Layinkihunni, Yihowa suꞌmasi qullaawa assatenna minshe baalatenni keereensate murciꞌrinohu kalaqamu baalu horo afiꞌranno gedeeti. Tini Yihowa lowori gede asse laꞌꞌanno hajooti. Hakko daafira isi, “suꞌmiꞌya . . . ayirranno gede asseemmo” yiino. (Hiz. 36:23) Qoleno Yesuusi ammanantinoti Yihowa soqqamaano huuccatto assidhanno woyite balaxisiisa hasiissannonsa coye xawise kulanni, “Suꞌmikki qullaawa ikko” yiino. (Mat. 6:9) Qullaawu Maxaafi duucha hige Yihowa suꞌma ayirrisa hasiissannota kulanno. Hanni tenne leellishannoha mito lawishsha laꞌno: “Kaaliiqiha ayirrado suꞌma galatte.” (1 Dud. 16:29; Far. 96:8) “Suꞌmisi ayirrinyira faarse.” (Far. 66:2) “Suꞌmakkino hegere geeshsha ayirriseemmo.” (Far. 86:12) Yihowa gordoho heeꞌre xaaddote coyiꞌrino yanna giddo mitte, Yesuusi Yerusaalamete qullaawa mine heeꞌre, “Annaꞌya, suꞌmakki ayirrisi!” yee coyiꞌrino yannaati. Yihowano “Suꞌmaꞌya ayirrisoommo; ledeno ayirriseemmo” yee qolino.—Yoh. 12:28. a

Sayikkihunni, Yihowa assara hedinori baalu suꞌmisi ledo xaadooshshe afiꞌrinoho. Hanni tenne hedi: Kiristoosihu Kumu Diri Gashshooti jeefora heeꞌrannohu jeefote fonqolinni aane mayi ikkanno? Yihowa suꞌmi qullaambe daafira kaꞌino xaꞌmo hatte yannara hedate dandoo noonsa kalaqami mereero babbadooshshu heeꞌranno gede assitanno? Hanni tenne xaꞌmora dawaro afiꞌrate, lame xaadooshshe  afidhino hajo yaano mannu ooso ammanamanna Yihowa aliidimma daafira galagalle laꞌno. Ammanantinore ikkansa leellishshinori Yihowa soqqamaanora albillitte minshe noonsakkire ikkite heeꞌra qarra ikkitannonsa? Diꞌꞌikkitannonsa. Insa woꞌmunni woꞌma fonqolante saꞌinorenna guuta ikkitanno. Hattono hegere heeshsho afidhanno. Qoleno hatte yannara Yihowa gashshanno gari baalunkunni woyyinoha ikkinota leellisha dihasiissanno; hattono iimanna uulla noohu hedate dandoo noonsa kalaqami baalu mitto ikkanno qoleno Yihowa gashshootira maahoyye yaanno. Ikkina hatte yannara Yihowa suꞌmi mannisira lowo geeshsha hasiisannoha ikkanno?

Hatte yannara baalunku Yihowa daafira halaale ikkinore afanno; hattono suꞌmisi woꞌmunni woꞌma qullaawa ikkanno. Ikkirono iimano uullano noori ammanantino soqqamaano baala Yihowa suꞌma lowori gede assite laꞌꞌansa diagurtanno. Mayira? Korkaatuno insa Yihowa woꞌmanka woyite maalaꞌlinanni coye assanna laꞌanno. Hanni tenne hedi: Yesuusi umosi heeshshi asse gashshoote baala Yihowara qolanno daafira Yihowa “woꞌmunkurira guuta ikkanno.” (1 Qor. 15:28) Hakkunni gedensaanni uullate aana heedhannoti mannu ooso “Maganu oosota ayirrinyu wolapho” afidhe hagiidhitanno. (Rom. 8:21) Hatte yannara Yihowa lowo yannanni kayise hedanni keeshshinore yaano iimanna uulla heeꞌrannoha hedate dandoo noonsa kalaqama baala mitte maate assanno.—Efe. 1:10.

Kuni baalu coyi ikkihu gedensaanni iimano uullano heedhannote Yihowa maatera mayi macciishshamannonsa? Hatte yannarano Yihowa suꞌma guwisate lowo hasatto heedhannonketi dihuluullissannote. Faarsaanchu Daawiti qullaawu ayyaani massageennasi togo yee borreessino: “Israeelete Magani Kaaliiqi galatamo. Galataminohu suꞌmisi hegere hegerera maassamo.” (Far. 72:18, 19) Hegerera isi suꞌma guwisate woꞌmanka woyite haarunna dhagge ikkanno coyi heeꞌrannonke.

Yihowa suꞌmi Yihowa ayimma baala riqiwanno. Yihowa suꞌmi daafira hendeemmo woyite roore woyite baxillesi qaangeemmo. (1 Yoh. 4:8) Yihowa kalaqinonkehu, wodote kakkalo qixxeessinonkehunna keeraanchimmatenni gashshannonketa leellishinohu baxannonke daafira ikkinota woꞌmanka woyite qaangeemmo. Tenne calla ikkitukkinni woꞌmanka woyite Yihowaha gawalo nookki baxille afiꞌne heeꞌneemmo. Hegerera Anninkewa albinni roore shiqatenna ayirradu suꞌmisira guweenyu faarso faarsate kakkaꞌneemmo.—Far. 73:28.