1. Cincanno manna naadattohu mayiraati?

 NINKE baalunku cincanno manna naandeemmo. Mayira? Mitto coye caaccaawikkinni cince agadhanno manna ayirrinseemmo. Soꞌro loonseenna wolootu cincitunkero insa naandeemmo. Qoleno Qullaawa Maxaafa rosiisinke rodii, Qullaawu Maxaafi halaale rosate, ammanne adhate woy ronsoommore loosu aana hosiisate sharrammummo yannara cince kaaꞌlinonke daafira tashshi yiinonke. Baalunkunni roore Maganu Yihowa cincannonke daafira lowo geeshsha galanteemmosi!—Rom. 2:4.

2. Cinca qarra ikkitannonkehu hiittoo woyite ikkara dandaanno?

² Cincanno manna naandeemmoha ikkirono, ninke uminkera cinca duucha woyite shota ikka hooggankera dandiitanno. Lawishshaho mittu coyira salfinoommowa tarinke rahe iilla hooganno woyite roorenkanni muddammoommoha ikkiro cinca qarra ikkitankera dandiitanno. Mitu manni caacceessannonke woyite hanqo eemadha qarra ikkitankera dandiitanno. Qoleno mito woyite Yihowa haaro alame abbate eino qaale cincine agadha qarra ikkitankera dandiitanno. Ati albinni roore cincattoha ikka hasiꞌratto? Konni birxichira cincate yaa mayyaateronna lowo geeshsha hasiissannota ikkitinohu mayiraatiro ronseemmo. Qoleno albinni roore cincineemmore ikkineemmo gede kaaꞌlannonkeri maatiro ronseemmo.

3. Cincanno manchi wolootu hanqissannosi woyite maa assanno?

³ Hanni cincineemmore ikkinoommota leellisha dandiineemmota shoole doogga laꞌno. Umihunni, cincanno manchi hanqoho dimuddamanno. Isi wolootu hanqissannosi woyite dirabbisiꞌranno; hattono yaachishanno coyi tuncu yaannosi woyite wodanaaꞌmate woꞌnaalanno. ‘Hanqoho muddamannokkiha’ yitanno yaatto umo Qullaawu Maxaafi giddo kulloonnihu Yihowa “maarannohanna hanqoho muddamannokkiha; mararaancho Magano,  ammanamasinna bagamannokkihu baxillisi batiꞌra” ikkinota kulli woyiteeti.—Ful. 34:6.

4. Cincanno manchi mitto coye ma garinni agadhanno?

⁴ Layinkihunni, cincanno manchi mitto coye wodanaaꞌme agadhanno. Togoo manchi mittu coyi isi hedino yanna sae keeshshanno woyite dicaaccaawanno. (Mat. 18:26, 27) Wodanaaꞌmine agadha hasiissannonkehu batinyu coyi no. Lawishshaho mittu manchi coyiꞌranno woyite mereero eꞌnummokkinni cincine macciishsha hasiissannonke. (Iyo. 36:2) Rosaanchinke Qullaawu Maxaafi roso huwatanno gede woy busha gadesi qeeꞌlanno gede kaaꞌlineemmo woyiteno cinca hasiissannonkeha ikkara dandaanno.

5. Cincineemmore ikkinoommota leellinsheemmoti wole doogo hiittenneeti?

⁵ Sayikkihunni, cincanno manchi dimuddamanno. Hige mitu coyi ranke assa hasiissannonkeha ikkara dandaanno. Ikkirono cincanno manchi loosa hasiissannosiha mitto looso rahe hanafate woy rahe gudate dimuddamanno. Hatteentenni isi hakko loosira ikkitanno geeshshi yanna gaaꞌmate balaxe qixxaawanno. Hakkiinni konne looso hattee gaaꞌmino yanna giddo loose gudanno.

6. Cincanno manchi qarru woy fonqolu iillannosi woyite ma assanno?

⁶ Shoolkihunni, cincanno manchi iillannosi qarra gungumikkinni dandee saꞌꞌate woꞌnaalanno. Hige mittu muli jaalinkera iillinonke qarra hasaapha soꞌro diꞌꞌikkitino. Ikkirono cincanno manchi dancha danchare hedanno; hattono Yihowara hagiirrunni soqqamate dandiire baala assanno. (Qol. 1:11) Kiristaana ikkinoommo daafira tenne baalante doogganni cincineemmore ikkinoommota leellisha hasiissannonke. Mayira? Hanni mito korkaata laꞌno.

7. Yaiqoobi 5:7, 8 kultanno garinni cinca lowo geeshsha hasiissannota ikkitinohu mayiraati? (Misileno lai.)

⁷ Hegere heeshsho afiꞌrate cincineemmore ikka hasiissannonke. Hunda heedhinori  ammanantino soqqamaano gede Maganu uyino hexxo wonsha geeshsha cincine agadha hasiissannonke. (Ibi. 6:11, 12) Qullaawu Maxaafi ninke baatto loosiꞌre galino manchi ledo heewisiisanno. (Yaiqoobi 5:7, 8 nabbawi.) Baatto loosiꞌre galino manchi wixa wixatenna waa hayikkisate diinaggaawe loosannoha ikkirono wixino gidi lophannohu mamooteetiro kayinni diafanno. Ikkirono isi wixiꞌrino wixa mixxannota hexxe cince agadhanno. Hatteente gede ninkeno ‘Mootichu ma barra daannoro anfoommokkiha’ ikkirono ayyaanaamittete looso woꞌmanka woyite diinaggaambe loonseemmo. (Mat. 24:42) Yihowa uyino hexxo baala isi hedino yannara wonshannota addaxxine cincine agadhineemmo. Cincineemmokkire ikkinummoro, Yihowa barra agadha agurrammora hattono sunu sununni halaalu mininni fullammora dandiineemmo. Qoleno yannate geeshshi hagiirre shorra hananfammora dandiineemmo. Cincineemmore ikkinummoro kayinni goofimarchu geeshsha kaajjine uurranna hegere heeshsho afiꞌra dandiineemmo.—Mik. 7:7; Mat. 24:13.

8. Cinca wolootu ledo noonke aantera kaaꞌlitannonkehu hiittoonniiti? (Qolasiyaasi Sokka 3:12, 13)

⁸ Cinca wolootu ledo dancha aante heedhannonke gede kaaꞌlitannonke. Cincineemmore ikka wolootu coyidhanno woyite seekkine macciishshineemmo gede kaaꞌlitannonke. (Yai. 1:19) Qoleno keere kalanqeemmore ikkate kaaꞌlitannonke. Hattono yaachishannonke coyi tuncu yaannonke woyite muddamme gara ikkinokkire coyiꞌneemmokki gede kaaꞌlitannonke. Cincineemmore ikkinummoro mittu manchi xissiisannonkere coyiꞌriro hanqoho dimuddammeemmo. Togoo woyite dirabbisiꞌneemmo; hatteentenni ‘mimmito’ mulla gatona yineemmo.—Qolasiyaasi Sokka 3:12, 13 nabbawi.

9. Cinca mitto doorsha doodhineemmo woyite kaaꞌlitannonkehu hiittoonniiti? (Lawishsha 21:5)

⁹ Cinca dancha doorsha doodhineemmo gedeno kaaꞌlitannonke. Cincineemmore ikkinummoro mitto coye muddamme woy gara garimmo laꞌnummokkinni doodhantenni hiikku coyi woyyannoro xiinxallate yanna gaaꞌmineemmo. (Lawishsha 21:5 nabbawi.) Lawishshaho looso hasiꞌnanni heeꞌnoommoha ikkiro kuni loosi Yihowa magansiꞌneemmokki gede ataawe ikkannonkeha ikkiro nafa umo afiꞌnoommo looso loosate maahoyye yineemmoha ikkara dandaanno. Cincineemmore ikkinummoro kayinni konne looso mama loonseemmoro, mageeshshi saate loonseemmoro hattono kuni loosi maatenkenna ayyaanaamittenke gawajjannohoronna teꞌee hedate yanna gaaꞌmineemmo. Cincineemmore ikka busha doorsha doodhineemmokki gede kaaꞌlitannonke.

10. Mittu Kiristaanchi albinni roore cincannoha ikka dandaannohu hiittoonniiti?

¹⁰ Albinni roore cincitinannire ikkate huuccatto assidhe. Cinca ayyaanu laalo widooti. (Gal. 5:22, 23) Hakko daafira qullaawa ayyaana afiꞌratenna qullaawu ayyaani laalo wido ikkitino akatta heedhannonke gede kaaꞌlankera Yihowa huucciꞌra dandiineemmo. Cinca qarra ikkitannonke gede assanno fonqoli iillinkero cincineemmo gede kaaꞌlannonkeha qullaawa ayyaanasi aannonke gede agurrummokkinni Yihowa ‘huucciꞌra’ hasiissannonke. (Luq. 11:9, 13) Qoleno Yihowa mitto coye isi laꞌꞌanno garinni laꞌneemmo gede kaaꞌlankera huucciꞌra dandiineemmo. Huuccatto assiꞌnummohu gedensaanni barru baala cincineemmore ikkate dandiinummore baala assa hasiissannonke. Albinni roore cincineemmore ikkate huuccatto assiꞌneemmohanna konne akata leellishate sharrammeemmoha ikkiro, konni albaanni cincineemmokkire ikkinummoro nafa Yihowa woꞌmanka woyite cincineemmore ikkineemmo gede kaaꞌlannonke.

11-12. Yihowa cincannoha ikkasi leellishinohu hiittoonniiti?

 ¹¹ Qullaawu Maxaafi giddo kulloonni manni lawishsha hiince. Qullaawu Maxaafi giddo cincatenni lawishsha ikkannoha batinye manna kulloonni. Konni manni xagge hiincine cincineemmore ikkinoommota leellinsheemmo doogga rosa dandiineemmo. Hanni konni mannita mite xagge laꞌnammora albaanni, Yihowa cincatenni kaajja lawishsha ikkinonkehu hiittoonniitiro laꞌno.

¹² Sheexaanu Edenete kaashshu basera, Yihowa taashshannohanna baxillaancho Gashshaancho diꞌꞌikkino yee suꞌmasi hunino. Yihowa isi gashshooti baalunkunni woyyinoha ikkinota leellishate yanna hasiissannota afino daafira, suꞌmasi huninoha Sheexaane bayichonkonni dihunino; Yihowa konni garinni cincannohanna isonooto eemadhannoha ikkasi leellishino. Qoleno isi Sheexaane huna geeshsha suꞌmasi hunate assinoonnire baala cince no. Yihowa cince agare noohu rooru manni hegere heeshsho afiꞌrara yeeti. (2 Phe. 3:9, 15) Tini xaa yannara lowo miliyoone ikkanno manni iso afanno gede assitino. Yihowa cincasi abbitanno guma illachinshummoro isi tenne busha alame hunanno yanna agadha qarra diꞌꞌikkitannonke.

13. Yesuusi cincannoha ikkate woꞌmunni woꞌma Annisi lawishsha harunsinohu hiittoonniiti? (Misileno lai.)

¹³ Yesuusi cincannoha ikkate woꞌmunni woꞌma Annisi lawishsha harunsino; hattono uullate aana noo yannara konne akata leellishino. Roorenkanni lawisiisaano borreessaanonna Farisoota cinca, isira woꞌmanka woyite shota ikkitinosikkiti dihuluullissannote. (Yoh. 8:25-27) Ikkirono Yesuusi Annisinte gede hanqoho dimuddamannoho. Isi wolootu xontusi woy mishshusi woyite dirabbisiꞌrino. (1 Phe. 2:23) Yesuusi gungumikkinni iillinosi fonqolo cince saino. Qullaawu Maxaafi, “Cubbaataammu  baalu gibbannasi cincinoha Yesuusa qaagge” yaannohu iseraati. (Ibi. 12:2, 3) Yihowa kaaꞌlonni ninkeno iillannonke fonqolo baala cincine saꞌꞌa dandiineemmo.

14. Abirihaami cincanni maa ronseemmo? (Ibiraawoota 6:15) (Misileno lai)

¹⁴ Tenne alame goofimarchi ninke hendoommo yannara daalla hoogi? Goofimarchu daanno yine hendoommohu lowo dirira albaanni ikkara dandaanno. Qoleno lubbotenni heeꞌne tini busha alame baꞌanna laꞌnummokki ganteemmo yine waajjinoommoha ikkara dandaanno. Ikkina woꞌmanka woyite cincine agadhineemmo gede kaaꞌlannonkeri maati? Hanni Abirihaami lawishsha laꞌno. Abirihaami ooso ilikki 75 dirihu heeꞌreenna “Wolqaataame gosa asseemmohe” yee Yihowa hexxo uyinosi. (Kal. 12:1-4) Abirihaami tini hexxo woꞌmitanna laino? Woꞌmunni woꞌma dilaino. Efiraaxisi Laga tayise saihunna 25 diro cince agadhihu gedensaanni Abirihaami, beettisi Yisihaaqi maalale ikkanno garinni ilamanna laino; qoleno 60 diri gedensaanni beettisi ooso Eesawunna Yaiqoobi ilantanna laino. (Ibiraawoota 6:15 nabbawi.) Kayinni Abirihaami sirchisi wolqaataame gosa ikkanna hattono Hexxote Gobba ragiꞌranna horo dilaino. Ikkirono kuni ammanamino manchi Kalaqaanchisi ledo muli jaaloomi heeꞌrannosi gede assiꞌrino. (Yai. 2:23) Qoleno Abirihaami reyotenni kae, ammanasinna cincasi baalanti gosa atoote afidhanno gede assitinota afanno woyite lowo geeshsha hagiidhanno! (Kal. 22:18) Ninke tennenni maa ronseemmo? Ninkeno xaa yannara Yihowa uyinoti baalanti hexxo woꞌmitanna laꞌneemmokkiha ikkara dandaanno. Ikkirono Abirihaami gede cincineemmoha ikkiro, Yihowa xaa yannara baꞌraasannonketanna abbate qaale einote haaro alamera lowo  atoote afiꞌneemmota addaxxa dandiineemmo.—Maq. 10:29, 30.

15. Hojju xiinxallonke yannara mayi daafira xiinxalla dandiineemmo?

¹⁵ Qullaawu Maxaafi cincatenni dancha lawishsha ikkannoha wole batinye manna kulanno. (Yai. 5:10) Konni manni xagge xiinxallate pirogiraame fushshiꞌri. b Lawishshaho Daawiti Israeelete moote ikkate buuraminohu anje heeꞌre ikkirono moote ikke gashshate lowo diro agadha hasiissinosi. Simiooninna Haanna daanno yine kulloonniha buuramino Moote agadhe noo yannara Yihowara ammaname soqqamino. (Luq. 2:25, 36-38) Tenne xagge xiinxallatto woyite aante noo xaꞌmuwara dawaro afiꞌrate woꞌnaali: Kuni manchi cincannoha ikkanno gede kaaꞌlinosiri maati? Cincasi kaaꞌlitinosihu hiittoonniiti? Isi lawishsha harunsa dandeemmohu ma garinniiti? Cincinokki manni xagge xiinxallakkino kaaꞌlitannohe. (1 Sam. 13:8-14) Ateneeto togo yite xaꞌma dandaatto: ‘Insa cincitannokki gede assinonsari maati? Cinca hoogansa mayi qarra abbitinonsa?’

16. Cincineemmore ikkinummoro afiꞌneemmoti mite horo maati?

¹⁶ Cincineemmore ikkinummoro afiꞌneemmo horo hedi. Cincineemmore ikkinummoro hagiirraammanna wodanaaꞌmineemmore ikkineemmo. Cincineemmore ikkanke surrenkeranna ordu fayyimmankera kaaꞌlitannonke. Woloota cincineemmoha ikkiro insa ledo dancha aante heedhannonke. Songote giddo albinni roore mittimma heedhanno gede assineemmo. Mittu manchi hanqisannonke woyite hanqoho muddammeemmokkire ikkanke coyi roore bushannokki gede assitanno. (Far. 37:8; Law. 14:29) Baalunkunni roore cincineemmo woyite iimi Anninke lawishsha harunsineemmo hattono albinni roore isiwa shinqeemmo.

17. Maa assate murciꞌra hasiissannonke?

¹⁷ Cinca lowo geeshsha baxisannohonna kaaꞌlannoho kaajja akataati! Cinca woꞌmanka woyite shota ikkitannonkekkiha ikkirono Yihowa kaaꞌlonni woꞌmanka woyite kuni akati heeꞌrannonke gede assiꞌra dandiineemmo. Haaro alame dagganno yanna cincine ‘agadhineemmo’ woyite Yihowa kaaꞌlannonketanna agarannonketa addaxxa dandiineemmo. (Mik. 7:7) Baalunku woꞌmanka woyite cinca uddiꞌrate murciꞌno.