XIINXALLOTE BIRXICHO 34
FAARSO 107 Maganunnita Baxillu Doogo
Cubbo Loossinorira Baxillenna Maaro Leellisha
“Maganu shaqqillisinni maarote widira qolahera hedanni [no].”—ROM. 2:4.
GUULCHO HEDO
Songote cimeeyye jawa cubbo loossinore kaaꞌlate sharrantanno gara laꞌneemmo.
1. Mittu manchi jawa cubbo loosihu gedensaanni ma ikkara dandaanno?
SAI birxichira, soqqamaasinchu Phaawuloosi jawa cubbo loosino mancho Qorontoosi songo ma assitanno gede kulinoro laꞌnoommo. Cubbo loosino manchi maaro einokki daafira iso songotenni fushshinoonni. Ikkirono, cuꞌmote qummeeshshi leellishannonte gede, cubbo loossinore mitoota Maganu maarote widira qolansara dandaanno. (Rom. 2:4) Songote cimeeyye insa maaro eꞌanno gede kaaꞌla dandiitannohu hiittoonniiti?
2-3. Mittu ammanate rodiinke jawa cubbo loosinota anfummoro ma assa hasiissannonke? Mayira?
2 Songote cimeeyye cubbo loosino mancho kaaꞌlitara albaanni, kalaqamino coye afa hasiissannonsa. Hakko daafira, mittu ammanate rodiinke songotenni fushshinannisi gede assara dandaannoha jawa cubbo loosinota anfummoro ma assa hasiissannonke? Cubbo loosino manchi, cimeeyye kaaꞌlo xaꞌmiꞌranno gede jawaachisha hasiissannonke.—Isa. 1:18; Soq. 20:28; 1 Phe. 5:2.
3 Kayinni cubbo loosino manchi cimeeyyete kulalla giwi? Hatto ikkiro, hasiissannosi kaaꞌlo afiꞌranno gede, cimeeyyete ninke uminke kula dandiineemmo. Hatto assineemmoha ikkiro, rodoonke banxeemmota leellinshanni heeꞌnoommo; korkaatuno cimeeyye iso kaaꞌla dandiitannota anfoommo. Cubbo loosino manchi busha assootesi agurannokkiha ikkiro, Yihowa ledo noosi jaalooma huꞌnanno. Isi songonniha suꞌnaado suꞌmano hunara dandaanno. Hakko daafira, Yihowaranna cubbo loosino manchira noonke baxilli worbimmatenni qaafo adhineemmo gede assannonke.—Far. 27:14.
SONGOTE CIMEEYYE JAWA CUBBO LOOSSINORE KAAꞌLITANNOHU HIITTOONNIITI?
4. Songote cimeeyye jawa cubbo loosino mancho hasaawissanno woyite, mixonsa maati?
4 Songote giddo mittu rodii jawa cubbo loosanno woyite, cimeeyyete bisi insa giddonni, cimeeyyete komite ikkite soqqantanno gede sase roduuwa dooranno. a Kuri roduuwi dhukansa affinorenna umonsa heeshshi assitannore ikka hasiissannonsa. Insa cubbo loosino manchi maaro eanno gede kaaꞌlate woꞌnaaltannoha ikkirono, soorrame biddi yaanno gede giddeessa dandiitannokkita dideꞌanno. (Mar. 30:19) Songote cimeeyye, Moote Daawiti gede maaro eꞌannori cubbo loossinore baalanka ikkitinokkita affino. (2 Sam. 12:13) Cubbo loossinori mitootu Yihowa amaale macciishsha giwa doodhitara dandiitanno. (Kal. 4:6-8) Ikkirono, cimeeyyete mixo cubbo loosino manchi maaro eanno gede kaaꞌlate dandiiture baala assate. Songote cimeeyye cubbo loosino mancho hasaawissanno woyite maa qaaga hasiissannonsa?
5. Songote cimeeyye cubbo loosino mancho hasaawissanno woyite hiittenne amaale qaaga hasiissannonsa? (2 Ximootewoosi 2:24-26) (Misileno lai.)
5 Songote cimeeyye cubbo loosino mancho baꞌino geꞌrecho gede assite laꞌanno. (Luq. 15:4, 6) Hakko daafira songote cimeeyye, konne mancho hasaawissanno woyite kaajjishshe dicoyidhanno hattono shaqqillu xeinore diassitanno; qoleno gamba yitinohu seera wonshate geeshshira calla ikkinohu gede assite diheddanno. Hatteentenni insa 2 Ximootewoosi 2:24-26 kulloonni akatta leellishshanno. (Qummeeshsha nabbawi.) Cimeeyye cubbo loosino manchi hedosi biddi assiꞌrara hasidhanno daafira, awu afiinninna shaqqillunni hasaawisanno.
Hundi waro heedhanno allaalaasine gede cimeeyye songotenni ballekkinori higganno gede kaaꞌlate sharrantanno (Gufo 5 lai)
6. Cimeeyye cubbo loosino mancho hasaawissara albaanni wodanansa qixxeessidhannohu hiittoonniiti? (Roomu Sokka 2:4)
6 Cimeeyye wodanansa qixxeessidhanno. Insa soqqamaasinchu Phaawuloosi coyiꞌrinore qaagganno daafira, Yihowa lawishsha harunsate woꞌnaaltanno; Phaawuloosi, “Maganu shaqqillisinni maarote widira qolahera hedanni [no]” yiino. (Roomu Sokka 2:4 nabbawi.) Cimeeyye insahu qaru loosi, Kiristoosi aanno biddishsha harunsite roduuwa towaata ikkinota qaaga hasiissannonsa. (Isa. 11:3, 4; Mat. 18:18-20) Cimeeyyete komite cubbo loosino mancho hasaawissara albaanni, huuccatto assidhe mixonsa seekkite heddanno: Mixonsa cubbo loosinoha maarote widira qolate. Insa tennera kaaꞌlanno biddishsha afiꞌrate Qullaawa Maxaafanna borruwanke xiinxallitanno; hattono wodancha afiꞌrate huuccatto assidhanno. Cimeeyye cubbo loosino manchi gara ikkinokkire hedanno woy assanno gede assinosiri maatiro buuxate woꞌnaaltanno.—Law. 20:5.
7-8. Cimeeyye cubbo loosino mancho hasaawissanno woyite Yihowa gede cincitannore ikka dandiitannohu hiittoonniiti?
7 Cimeeyye Yihowa gede cincitannore ikkitanno. Insa hundi waro Yihowa cubbo loossinore hiissinoro heddanno. Lawishshaho Yihowa Qaayeeli cince hasaawisinosi, cubbu abbanno guma kule qorowisiisinosi hattono danchare assiro maassamannota kulinosi. (Kal. 4:6, 7) Yihowa masaalaanchu Naataani widoonni Daawiti amaalinosi; Naataani Daawiti wodanira coanno lawishsha horoonsiꞌrino. (2 Sam. 12:1-7) Qoleno Yihowa haxawarru Israeelete mannira, masaalaanosi duucha hige soyino. (Erm. 7:24, 25) Yihowa insa kaaꞌlate maaro eꞌa geeshsha diagarino. Hatteentenni isi balaxe insa maaro eꞌanno gede amaalinonsa.
8 Songote cimeeyye jawa cubbo loossinore kaaꞌlate sharrantanno woyite, Yihowa lawishsha harunsitanno. Insa 2 Ximootewoosi 4:2 kultannonte gede, qarru giddo uwinoha ammanate rodoonsa kaaꞌlitanno woyite, ‘cincitannore’ ikkitanno. Konni qummeeshshira qixxeessinoonniti xiinxallote kaaꞌlitanno borro, togoo cimeessi daafira kultanni togo yitanno: “Isi woꞌmanka woyite coye heeshshi gotti asse hedanna, [cubbo loosino manchira] gara ikkinore assate hasatto heedhannosi gede cince kaaꞌla hasiissannosi. Isi hanqannohanna caaccaawannoha ikkiro, cubbo loosino manchi maaro ea hoogara wole agurina gufiꞌrara dandaanno.”
9-10. Cimeeyye cubbo loosino manchi assootesi layiꞌranno gede kaaꞌla dandiitannohu hiittoonniiti?
9 Songote cimeeyye mittu manchi cubbo loosanno gede assinosiri maatiro afate woꞌnaaltanno. Lawishshaho kuni Kiristaanchi sunu sununni ayyaanaamittetenni shoshshogginohu hojju xiinxallo woy soqqansho lashshi assino daafiraati? Yihowa ganye huucciꞌra agurinokka? Isi busha yorto xaxxabbe amaddasira wodhinokka? Busha jaalla woy boohaarsha doodhinokka? Togoo doorshi hedosinna hasattosi daafinohu hiittoonniiti? Isi doodhino doorshinna assootisi Annasi Yihowa dadillisino gara wodanchino?
10 Songote cimeeyye afa hasiissannonsakki hajora eꞌukkinni, kaaꞌlitannosi xaꞌmuwa xaꞌmite cubbo loosino manchi giddosita fushshe kuꞌlanno gedenna assootesi galagale layiꞌranno gede shaqqillunni kaaꞌlitasira dandiitanno. (Law. 20:5) Qoleno insa cubbo loosino manchi assootisi gara ikkinokkita huwatanno gede kaaꞌlate, Naataani gede lawishsha horoonsiꞌra dandiitanno. Insa umo xaadde hasaawissannosi woyite, cubbo loosino manchi assootisira gaabbara dandaanno. Hattono woꞌmunni woꞌma maaro eara nafa dandaanno.
11. Yesuusi cubbo loossinore ma assino?
11 Cimeeyye Yesuusi lawishsha harunsate sharrantanno. Reyotenni kainohu Yesuusi Xerseesi mancho Saaooli, isonooto layiꞌranno gede assitanno xaꞌmo xaꞌmino; togo yiino: “Saaooli, Saaooli, mayira shorrattoe?” Konni garinni Yesuusi Saaooli assootisi gara ikkinokkita huwatanno gede kaaꞌlinosi. (Soq. 9:3-6) Qoleno Yesuusi, Elzaabeeli yinanni mancho “Aagintaabbe higganno gede yanna oommose” yiino.—Aju. 2:20, 21.
12-13. Cimeeyye cubbo loosino manchi aagintaawe higanno gede yanna aa dandiitannohu hiittoonniiti? (Misileno lai.)
12 Songote cimeeyye Yesuusi lawishsha harunsitanno daafira, muddante cubbo loosino manchi maaro dieannoho yite diheddanno. Mitootu, cimeeyyete komite umo hasaawissannonsa woyite maaro eꞌara dandiitanno; wolootaho kayinni yanna hasiissannonsaha ikkara dandaanno. Hakko daafira cimeeyye cubbo loosino mancho lame sase higge hasaawisate qixxaawo assitara dandiitanno. Cubbo loosino manchi cimeeyye umo xaadde hasaawissusi woyite kultinosire seekke heda hanafara dandaanno. Isi umosi heeshshi asse Yihowa huucciꞌrara dandaanno. (Far. 32:5; 38:18) Konni garinni cubbo loosino manchi, cimeeyye wole yannara xaadde hasaawissannosi woyite aagintaawe higate hasatto noosita leellishara dandaanno.
13 Cimeeyye cubbo loosino manchi maarote widira higanno gede kaaꞌlate, marartannorenna shaqqadda ikka hasiissannonsa. Insa, Yihowa assitannore maassiꞌrannonsa gede huuccatto assidhanno hattono cubbo loosino manchi wodanisi raga higeenna maaro eannota hexxitanno.—2 Xim. 2:25, 26.
Cimeeyye cubbo loosino manchi maaro eanno gede yanna aate iso lame sase higge hasaawisara dandiitanno (Gufo 12 lai)
14. Cubbo loosino manchi maaro eiro galatu hasiisannohu ayeraati? Mayira?
14 Cubbo loosino manchi maaro eiro lowo geeshsha hagiidhineemmo! (Luq. 15:7, 10) Togoo woyite galatu hasiisannohu ayeraati? Songote cimeeyyeraati? Phaawuloosi cubbo loossinori daafira togo yiino: ‘Miteekke Maganu aagintaabbe higganno gede yanna aansara dandaanno.’ (2 Xim. 2:25) Konni qummeeshshira qixxeessinoonniti xiinxallote kaaꞌlitanno borro togo yitanno: “Doogo soꞌrinohu kuni manchi, hedosinna akatasi biddi assiꞌre higino daafira galata hasiissannohu kaaꞌlinosi Maganooti ikkinnina mancho diꞌꞌikkino. Phaawuloosi maaro ea abbitannoha dancha guma lede kulino: Cubbo loosinohu halaalunnita gara ikkitino egenno lede afiꞌranno gede assitanno, wodanisi raga higanno gede assitanno hattono Sheexaanu woshshaadonni gate fulanno gede assitanno.—2 Xim. 2:26.”
15. Songote cimeeyye cubbo loose maaro eino mancho agurtukki kaaꞌla dandiitannohu hiittoonniiti?
15 Cubbo loosino manchi maaro eanno woyite, cimeeyyete komite iso towaatate qixxaawo assitanno; tini Sheexaanu woshshaado giddonni gate fulanno gedenna lekkasira suwashsho doogo seekkiꞌranno gede kaaꞌlitannosi. (Ibi. 12:12, 13) Songote cimeeyye cubbo loosino manchi assinore ayerano kultannokkiti egennantinote. Ikkina songo afa hasiissannonsa coyi maatiyya?
“MANNU BAALU ALBAANNI SEEJJI”
16. Umi Ximootewoosi 5:20 kultanno garinni, Phaawuloosi “mannu baalu albaanni” yiinohu ayeoo kulateeti?
16 Umi Ximootewoosi 5:20 nabbawi. Phaawuloosi ledosi cimeessa ikke soqqamannohura Ximootewoosira tenne hedo borreessinohu, ‘cubbo loosa roso’ assidhinore ma assa hasiissannoro kulateeti. Isi hatto yiinohu mayyaateeti? Isi “mannu baalu albaanni” yiinohu songo woꞌma kulate ikka hoogara dandaanno. Hatteentenni isi, kuni manchi loosino cubbo afinoha mito manna kulanni no. Insa kuni manchi cubbo loosi woyite laꞌinoha woy isi umisi kulinonsaha ikkara dandaanno. Songote cimeeyye insara, hattenne hajo laꞌnoonnitanna cubbo loosino mancho seejjinoonnita hayyotenni kultansara dandiitanno.
17. Songo mittu Kiristaanchi jawa cubbo loosinota affinoha ikkiro, woy afansa gattannokkiha ikkiro mayyaanno egensiishsha kullanni? Mayira?
17 Mito woyite songote giddo noori batinyu roduuwi, mittu manchi jawa cubbo loosinota affinoha ikkara woy afansa gattannokkiha ikkara dandaanno. Togoo woyite, “mannu baalu albaanni” yaa songo woꞌma kultannote. Hakko daafira mittu cimeessi hakkonne cubbo loosino mancho seejjinoonnita songote egensiisanno. Mayira? Phaawuloosi kulinonte gede, cubbo loossannokki gede woloota ‘jiilchate’ woy qorowisiisateeti.
18. Cuuantinori anje guddinokkiri jawa cubbo loossuro cimeeyye ma assitanno? (Misileno lai.)
18 Anje guddinokkiri yaano 18 diri woro noori cuuantino halashshaano jawa cubbo loossurona? Cimeeyyete bisi, lame cimeeyye konne halashshaancho Yihowa Farciꞌraasine ikkino annisinna amasi b noowa hasaawissanno gede qixxaawo assanno. Cimeeyye annunna ama qaaqqinsa aagintaawe higanno gede kaaꞌlate kageeshsha maa maa assitinoro afate woꞌnaaltanno. Kuni qaaqqi dancha lao nooha ikkironna annisinna amasi amaale macciishshe woyyaawanni nooha ikkiro, lamunku cimeessi coye hakkiinni sayisa dihasiissanno yite agurtara dandiitanno. Cimeeyye, Yihowa oosonsa baxillunni seejjitara qeecha uyinohu annahonna amate ikkinota affino. (Mar. 6:6, 7; Law. 6:20; 22:6; Efe. 6:2-4) Hige cimeeyye, kuni qaaqqi hasiissannosi kaaꞌlo afiꞌranni nooronna teꞌee buuxate, saꞌe saꞌe annasinna amasi hasaawissanno. Kayinni anje gudinokkihu mittu cuuamino halashshaanchi maaro ea giwironna cubbo loosa agura hoogirona? Hatto ikkiro, cimeeyyete komite Yihowa Farciꞌraasine ikkino annisinna amasi noowa iso hasaawissanno.
Mittu anje gudinokki qaaqqi jawa cubbo loosiro, lame cimeeyye Yihowa Farciꞌraasine ikkino annisinna amasi noowa hasaawissannosi (Gufo 18 lai)
‘YIHOWA SAO AGURANNOHONNA MARARANNOHO’
19. Cimeeyye cubbo loossinore hasaawissanno woyite, Yihowa lawishsha harunsate sharrantannohu hiittoonniiti?
19 Cimeeyyete komitera songo Yihowa albaanni xuru nookkita ikkitanno gede assate qeechi noonsa. (1 Qor. 5:7) Qoleno insa dandiitu deerrinni cubbo loosino manchi maaro eanno gede kaaꞌla hasidhanno. Tenne assate insa, cubbo loosino manchi maaro eanno yite hexxa diagurtanno. Mayira? Korkaatuno insa, ‘sao agurannohunna maaranno’ Magani Yihowa lawishsha harunsa hasidhanno. (Yai. 5:11) Hanni geedhinohu soqqamaasinchu Yohaannisi togoo akata leellishino gara wodanchi. Isi togo yee borreessino: “Oosoꞌya! Cubbo loossinannikki gede konne coye borreessoommoꞌne. Ayino cubbo loosiro kayinni, Maganu Annunniwa ninkera sae coyiꞌramannohu noonke; isino keeraanchu Yesuusa Kiristoosaati.”—1 Yoh. 2:1.
20. Aananno birxichira maa ronseemmo?
20 Ikkirono mito woyite mitu Kiristaani maaro ea giwanno; tini dadillissannote. Hatto ikkiro togoo Kiristaana songotenni fushsha hasiissanno. Togoori kalaqamanno woyite songote cimeeyye maa assitanno? Aanannohura jeefote birxichira tenne daafira ronseemmo.
FAARSO 103 Cimeeyye Elto Ikkitino Labballooti
a Konni albaanni, tenne gaamo yoote komite yinanni. Kayinni yoo yaa insa loossanno loosi giddo mitto calla ikkitino daafira, konni gedensaanni yoote komite yaa agurreemmo. Hatteentenni tenne gaamo cimeeyyete komite yineemmo.
b Aleenni annunna amate daafira yiniri, awuuttannorira woy annunna amate gede ikkite lossidhannorirano loosanno.
