XIINXALLOTE BIRXICHO 33
FAARSO 130 Gatona Yiiyye
Songo Cubbo Loossinore Yihowa Laˈˈanno Garinni Laˈˈa Dandiitanno Gara
“Ayino cubbo loosiro . . . ninkera sae coyiˈramannohu noonke.” —1 YOH. 2:1.
GUULCHO HEDO
Umi xibbi diro Qorontoosi songora mittu manchi jawa cubbo loosita assinoonnire xiinxalline maa ronseemmoro laˈneemmo.
1. Yihowa baalunku manni ma ikkara hasiˈranno?
YIHOWA mannu oosora doodhate qoosso oye kalaqino. Heeshshonke giddo mitto doorsha doodhineemmo woyite, woˈmanka woyite tenne qoosso horoonsiˈneemmo. Mittu manchi doodhannohu baalanka rooranno doorshi, heeshshosi Yihowara sayise aatenna Iso magansidhanno maate wido ikkate. Yihowa baalunku manni hatto assara hasiˈranno. Mayira? Korkaatuno isi manna baxanno; hattono baalunku coyi seyansara hasiˈranno. Yihowa mannu isi ledo dancha jaalooma kalaqiˈraranna hegerera heeˈrara hasiˈranno.—Mar. 30:19, 20; Gal. 6:7, 8.
2. Yihowa jawa cubbo loosse maaro eˈannokkiri hiikkitara hasiˈranno? (1 Yohaannisi 2:1)
2 Ikkirono, Yihowa aye manchino isira soqqamanno gede digiddeessanno. Isi mittu mittunku manchi maa assannoro doodhanno gede fajjino. Mittu cuuamino Kiristaanchi Maganu seera diige jawa cubbolla loosi? Isi maaro eannokkiha ikkiro, songotenni fushsha hasiissanno. (1 Qor. 5:13) Ikkirono hakkuyi gedensaanni Yihowa cubbo loosino manchi isiwa higannota hexxa diaguranno. Isinni Yihowa wodo qixxeessinohu qaru korkaati, cubbo loosse maaro eˈannore gatona yinanninsa gedeeti. (1 Yohaannisi 2:1 nabbawi.) Baxillaanchu Maganinke cubbo loossinori maaro eˈanno gede shaqqillunni amaalannonsa.—Zak. 1:3; Rom. 2:4; Yai. 4:8.
3. Konni birxichira maa ronseemmo?
3 Yihowa cubbonna cubbo loossannore isi laˈˈanno garinni laˈnammora hasiˈranno. Konni birxichira tenne assa dandiineemmo gara ronseemmo. Konne birxicho nabbawatto woyite, (1) umi xibbi diro Qorontoosi songora mittu manchi jawa cubbo loosita maa assinoonniro, (2) cubbo loosino manchi maaro eita soqqamaasinchu Phaawuloosi mayinoronna (3) tini xagge, Yihowara jawa cubbo loosino Kiristaanchira noosi lao huwanteemmo gede kaaˈlitannonkehu hiittoonniitiro wodanchi.
UMI XIBBI DIRO JAWA CUBBO LOOSINO MANCHO MA ASSINOONNI?
4. Umi xibbi diro Qorontoosi songora mayi kalaqamino? (1 Qorontoosi 5:1, 2)
4 Umi Qorontoosi 5:1, 2 nabbawi. Phaawuloosi misiyoone ikke sayikkimeeshsho haˈri yannara, haarote xintantinote Qorontoosi songora shagaggiˈnanni gede assannori kalaqaminota macciishshino. Hatte songora heeˈranno rodii annisi minaama ledo foorino. Kuni coyi shagaggiˈnanni gede assannoho; qoleno “dagate mereero nafa” anfe diegenninoonniho! Songo tenne lashshi assitino; hattono togoo cubbo loosino manchi songote heeˈrara sammi yite agurtino. Insa giddo mitu, tini Maganu lowo geeshsha maarannoha ikkinota leellishshannote yite heddinoha ikkara dandaanno. Kayinni Yihowa cubbo loossinori mannisi mereero heedhara wore dilaˈˈanno. Kuni manchi togooha mancaˈˈa coye asse suˈnaadu songote suˈmi baˈˈanno gede assinoti dihuluullissannote. Qoleno isi, isiwa aanannoha wole Kiristaana hunara dandaanno. Hakko daafira Phaawuloosi songo ma assitanno gede kulino?
5. Phaawuloosi songo ma assitanno gede kulino? Isi hatto yiinohu mayyaateeti? (1 Qorontoosi 5:13) (Misileno lai.)
5 Umi Qorontoosi 5:13 nabbawi. Phaawuloosi qullaawu ayyaani massageennasi cubbo loose maaro eannokki mancho songotenni fushsha hasiissannota borreessino. Ammanamino Kiristaani konne mancho ma garinni laˈˈa hasiissannonsa? Phaawuloosi ‘isi ledo sumuu yitinoonte’ yiinonsa. Isi tenne assinanni doogga giddo mitte kulanni, ‘Togoo manchi ledo sagale nafa mitteenni ittinoonte’ yiino. (1 Qor. 5:11) Mittu manchi ledo ofolline sagale ita, isi ledo jaalooˈminanni gede assitanno. Hakko daafira Phaawuloosi songo konni manchi ledo jaalooˈma hasiissannonsakkita xawisa kulanni no. Tini konni manchi assooti songo daafannokki gede agartanno. (1 Qor. 5:5-7) Qoleno insa konni manchiwa gambo giwansa, isi Yihowa doogowiinni mageeshsha xeertiˈrinoro huwatanno gedenna gaabbe maaro eanno gede assitasira dandiitanno.
Phaawuloosi, qullaawu ayyaani massageennasi cubbo loose maaro eannokki mancho songotenni fushshinanni gede kultanno sokka borreessino (Gufo 5 lai)
6. Phaawuloosi borreessino sokka songonna cubbo loosino mancho kaaˈlitinohu hiittoonniiti?
6 Phaawuloosi Qorontoosi Kiristaanira sokka soyihu gedensaanni, isi insa tenne sokka baxxannoronna teˈee heda hanafino. Gedensoonni Tiito isira hagiirsiisanno duduwo kulinosi. Songo Phaawuloosi borreessino sokka baxxino. (2 Qor. 7:6, 7) Insa kulinonsa biddishsha harunsitino. Qoleno Phaawuloosi sokka borreessihunni boodu agani gedensaanni, cubbo loosino manchi maaro eino! Isi akatasinna amanyootesi biddi assiˈrino; hattono Yihowaha keeraancho biddishsha harunsa hanafino. (2 Qor. 7:8-11) Hakkiinni aane Phaawuloosi songo ma assitanno gede kuliyya?
SONGO MAARO EINO KIRISTAANCHO MA ASSITINO?
7. Cubbo loosinoha songotenni fushsha abbitinohu danchu gumi maati? (2 Qorontoosi 2:5-8)
7 Layinki Qorontoosi 2:5-8 nabbawi. Phaawuloosi, “Hakko manchira, kiˈne giddonni rooru manni yiino qorichi ikkannosi” yiino. Hatto yaa seejjo hendoonniri woˈmanno gede assitino yaate. Hendoonniri maati? Hakkonne mancho maarote widira qolate.—Ibi. 12:11.
8. Phaawuloosi hakkiinni aane songo ma assitanno gede kulino?
8 Hakko daafira Phaawuloosi songote togo yiino: ‘Saosi kiira agurtine jawaachishshesi’; qoleno isi, ‘baxxinannisita afanno gede asse’ yiino. Phaawuloosi songo kuni manchi Yihowa manniwa higanno gede calla assite agurtara kulinokkita wodanchi. Phaawuloosi insa konne maaro eino mancho coyidhannorinninna assitannorinni addinta gatona yitinositanna baxxannosita buuxissasira hasiˈrino. Konni garinni insa kuni rodii songo higino daafira hagiidhitinota leellisha dandiitanno.
9. Mitootaho cubbo loose maaro eino mancho gatona yaa qarra ikkitinonsaha ikkara dandaanohu mayiraati?
9 Songote giddo noori mitootu cubbo loose maaro eino mancho anga fane haaˈrate hobbi ruxxi yitinokka? Qullaawu Maxaafi tenne daafira kulannori dino; kayinni ikkara dandaanno. Konni manchi assooti songo woˈmate qarra kalaqinoha woy mitoota saalsiisinoha ikkara dandaanno. Mitootu, amanyootunni xuru nookkire ikkite heeˈrate lowo geeshsha sharrantino; hakko daafira konne mancho anga fanne haaˈra digaraho yite heddinoha ikkara dandaanno. (Luqaasi 15:28-30 ledo heewisiisi.) Ikkina songo konne maaro eˈˈe higino rodoo godowinta baxxannota leellisha hasiissannohu mayiraati?
10-11. Cimeeyye cubbo loose maaro eino mancho gatona yaa hoogguro mayi kalaqamara dandaanno?
10 Hanni addinta maaro eino mancho cimeeyye songo higanno gede fajja gibburo woy higihu gedensaanni songo isira baxille leellisha gibburo mayi ikkara dandaannoro hedi. Kuni manchi ‘dadillunni kainohunni hexxo mudhara’ dandaanno. Isi xaate hexxo dinoe yee hedara dandaanno. Wole agurina Maganu ledo noosi jaalooma haaroonsiˈrate sharrama agurara dandaanno.
11 Roore busha, songote giddo noo roduuwi cubbo loose maaro eino mancho gatona yaa gibburo insa uminsa Yihowa ledo noonsa jaalooma huˈnitanno. Mayira? Korkaatuno insa leellishshanni noohu maaranno Magani Yihowa akata ikkikkinni kaajjadunna maaro egenninokkihu Sheexaanu akataati. Konni garinni insa, Daawuloosi konni manchi ayyaanaamitte hunate horoonsiˈranno uduunnicho ikkitara dandiitanno.—2 Qor. 2:10, 11; Efe. 4:27.
12. Songo Yihowa lawishsha harunsa dandiitannohu hiittoonniiti?
12 Ikkina, Qorontoosi songo Sheexaanu lawishsha ikkikkinni Yihowa lawishsha harunsa dandiitannohu hiittoonniiti? Yihowa gede cubbo loosse maaro eˈannore gatona yiteeti. Hanni mitu Qullaawu Maxaafi borreessaano Yihowa daafira mayitinoro laˈno. Daawiti, “Ati shaqqadohonna cubbono agurattoho” yiino. (Far. 86:5) Mikiyaasi, “Cubbo agurannohu . . . saonsa sayisiˈrannohu, . . . ate gedee Magani nooni?” yiino. (Mik. 7:18) Isayaasi qole togo yiino: “Bushu manchi bunshete doogonni higo; xagaraamuno xagarrosi aguro. Maarosi batiˈra ikkitino daafira cubbosi agurannosina, Maganinke Kaaliiqiwa higo.”—Isa. 55:7.
13. Cubbo loose maaro einoha songo qola hasiissannota ikkitinohu mayiraati? (“ Qorontoosi Songo manchi Songo Higinohu Mamooteeti?” yitanno saaxine lai.)
13 Qorontoosi songo Yihowa lawishsha harunsate maaro eino mancho anga fante haaˈranna baxxannosita buuxisa hasiissannonsa. Phaawuloosi kulinonsa garinni songo maaro eino mancho anga fante haadhe ‘baalunku coyira hajajantannota’ leellishshino. (2 Qor. 2:9) Hige cubbo loosino mancho songotenni fushshininku boode aganalla ikkino; ikkirono seejjo isi maaro eanno gede assitinosi. Hakko daafira iso songo qollikki keeshshinanni gede assannori dino.
TAASHSHANNONNA MAARANNO MAGANI YIHOWA LAWISHSHA HARUNSA
14-15. Hunda Qorontoosi songora ikkinorinni maa ronseemmo? (2 Pheexiroosi 3:9) (Misileno lai.)
14 Hunda Qorontoosi songora kalaqamino coye tirroonni gara, ninkera “roso ikkankera” Qullaawu Maxaafi giddo borreessinoonni. (Rom. 15:4) Tenne xaggenni, Yihowa mannisi mereero jawa cubbo loosannoha lashshi asse agurannokkita ronseemmo. Mitootu, Yihowa maarannoha ikkino daafira, cubbo loosse maaro eˈannokkiri songote giddo heedhara fajjanno yite heddara dandiitanno. Yihowa maarannoho; kayinni isi cubbo lashshi diassanno; qoleno biddishshasi disoorranno. (Yih. 4) Yihowa cubbo loosse maaro eˈannokkiri songote heedhanno gede fajjannoha ikkiro, tini songote noore baala gawajjitanno daafira maaro leellisha diˈˈikkitino.—Law. 13:20; 1 Qor. 15:33.
15 Ikkirono Yihowa aye manchino baˈˈara dihasiˈranno. Dandaami deerrinni isi baalunku manni gatara hasiˈranno. Isi hedonsa biddi assidhe galagalte isi ledo jaalooma hasidhannorira maarosi leellishanno. (Hiz. 33:11; 2 Pheexiroosi 3:9 nabbawi.) Qorontoosi songora noo manchi busha assootesi agure maaro eita, Yihowa Phaawuloosi horoonsiˈre songo iso gatona yaanna anga fante haaˈra hasiissannonsata kulino.
Songo Yihowa lawishsha harunsite, galagalte higginore anga fante haadhe baxillenna maaro leellishshanno (Gufo 14-15 lai)
16. Qorontoosi songora noo qarra ma garinni tirroonni?
16 Qorontoosi songora kalaqamino qarra tirroonni gara xiinxallanke, Yihowa baxille, keeraanchimmasinna taashshosi huwanteemmo gede kaaˈlitinonke. (Far. 33:5) Tini Maganonke albinni roore guwisate kaˈˈatto gede diassitinohe? Ninke mitu mittunku cubbo loonseemmore ikkinoommo daafira, isi maaro hasiissannonke. Maaro afiˈneemmo gede assitannote wodote kakkalora Yihowa galaxxineemmosi. Yihowa mannasi addinta baxannotanna insara danchare halchannota afa lowo geeshsha sheshifachishshannotenna jawaachishshannote!
17. Aananno birxichira maa xiinxallineemmo?
17 Ikkina, xaa yannara mittu manchi cubbo loosiro maa assinanni? Songote cimeeyye Yihowa lawishsha harunsite cubbo loosino manchi maaro eanno gede kaaˈla dandiitannohu hiittoonniiti? Cimeeyye cubbo loosino mancho songotenni fushshitanno woyite woy songo qoltanno woyite, songo maa assa hasiissannonsa? Aananno birxichira tenne xaˈmuwara dawaro qollanni.
FAARSO 109 Mimmito Godowinta Baxxe
