XIINXALLOTE BIRXICHO 35
FAARSO 123 Tiokiraasete Wodho Ayirrise Heeꞌra
Songotenni Fushshinoonnire Kaaꞌla Dandiinanni Gara
“Maaro ea hasiissannonsakkiri 99 keeraanonni roore, maaro eannohu mittu cubbaataaminni kainohunni gordoho lowo hagiirri [ikkanno].”—LUQ. 15:7.
GUULCHO HEDO
Mito manna songotenni fushsha hasiissannohu mayiraatironna songote cimeeyye togoo manni maaro eanno gedenna galagale Yihowa hagiirsiisanno gede kaaꞌla dandiitannohu hiittoonniitiro ronseemmo.
1-2. (a) Yihowa affanni heedhenni cubbo loossannore ma garinni laꞌꞌanno? (b) Yihowa cubbo loossinori ma assitara hasiꞌranno?
YIHOWA cubbo loossannore lashshi asse diaguranno; isi cubbo giwanno. (Far. 5:4-6) Isi Qaalisi giddo borreessiisinoha keeraancho biddishshasi ayirrinsammora hasiꞌranno. Hige Yihowa guuntete xeꞌne noonsa manni guuta ikka hasiissannonsa diyaanno. (Far. 130:3, 4) Ikkirono isi, ‘eltosi ragimalete ikkitora soorrite’ saalimale coye assitannore lashshi asse diaguranno. (Yih. 4) Isinni Qullaawu Maxaafi, “Magano magansidhannokkiri” Maganu oli yaano Armagedooni oli yannara baꞌannota kulanno.—2 Phe. 3:7; Aju. 16:16.
2 Ikkirono, Yihowa ayino baꞌꞌara dihasiꞌranno. Tenne metseetera aante aantete fultino birxichuwara ronsummonte gede, Qullaawu Maxaafi Maganu “baalunku aagintaawe higara” hasiꞌrannota xawise kulanno. (2 Phe. 3:9) Songote cimeeyye Yihowa lawishsha harunsite, cubbo loossinori hedonsa biddi assidhanno gedenna galagalte Yihowa hagiirsiissanno gede cincite kaaꞌlate sharrantanno. Ikkirono, cubbo loossinori baalunku maaro eꞌanno yaa diꞌꞌikkino. (Isa. 6:9) Songote cimeeyye insa maarote widira qolate duucha higge sharranturono, mitootu busha assootensa diagurtanno. Togoo woyite songote cimeeyye ma assa hasiissannonsa?
“BUSHA MANCHO MEREERIꞌNENNI FUSHSHE”
3. (a) Qullaawu Maxaafi cubbo loosse maaro eꞌannokkire ma assa hasiissannota kulanno? (b) Cubbo loosino manchi songotenni fushshinannisi gede doodhinohu iso umosiiti yineemmohu mayiraati?
3 Cubbo loosino manchi maaro ea giwiro, cimeeyye 1 Qorontoosi 5:13 noo biddishsha harunsa agurranna assa dandiitannori dino; qummeeshshu, “Busha mancho mereeriꞌnenni fushshe” yaanno. Noore coyiꞌniro, tini isi umisi doodhinote yaa dandiinanni; isi wixiꞌrinore mixxino. (Gal. 6:7) Hatto yineemmohu mayiraati? Korkaatuno isi cimeeyye maaro eanno gede duucha higge kaaꞌlate woꞌnaalturono maahoyye yaa giwino. (2 Mot. 17:12-15) Konni manchi assooti, isi Yihowa biddishshira hajajama hasiꞌrinokkita leellishanno.—Mar. 30:19, 20.
4. Cubbo loose maaro einokki mancho songotenni fushshinanni woyite egensiishsha kullannihu mayiraati?
4 Cubbo loose maaro einokki mancho songotenni fushshinanni woyite egensiishsha kullannihu, isi xaate Yihowa Farciꞌraasincho a ikkinokkita songo affanno gede assateeti. Konne egensiishsha kullannihu cubbo loosino mancho saalsiisate diꞌꞌikkino. Hatteentenni halashshaano, Qullaawa Borro kultanno garinni ‘hakko manchi ledo aana agurtanno gede woy togoo manchi ledo sagale nafa ittannokki gedeeti.’ (1 Qor. 5:9-11) Konne biddishsha uyinoonnihu dimullaati. Soqqamaasinchu Phaawuloosi, “Shiima irsho lixe gudisse kayissanno” yee borreessino. (1 Qor. 5:6) Cubbo loosse maaro eꞌannokkiri Yihowahu keeraanchu biddishshi garinni heeꞌrate sharrantanni noore huntara dandiitanno.—Law. 13:20; 1 Qor. 15:33.
5. Songotenni fushshinoonni mancho ma garinni laꞌꞌa hasiissannonke? Mayira?
5 Ikkina, songotenni fushshinoonniha ammanate rodoonke ma garinni laꞌꞌa hasiissannonke? Isi ledo xaada agurreemmoha ikkirono, isira hexxo dinosi yine heda dihasiissannonke. Hatteentenni iso hoshshatewiinni ballekke baꞌinote higgara dandiitanno geꞌrecho gede assine laꞌneemmo. Kuni manchi heeshshosi Yihowara sayise uyinoha ikkinota qaango. Ikkirono isi xa heeꞌranni noohu heeshshosi Yihowara sayise uyi woyite eino qaali garinni diꞌꞌikkino; tini qolte gawajjitannote. (Hiz. 18:31) Yihowa maaro noo geeshsha konni manchira galagale songo higate hexxo noosi. Ikkina cimeeyye, songotenni fushshinoonni manchi tini hexxo noosita huwatanno gede kaaꞌla dandiitannohu hiittoonniiti?
CIMEEYYE SONGOTENNI FUSHSHINOONNIRE KAAꞌLITANNO GARA
6. Cimeeyye songotenni fushshinoonni mancho kaaꞌlate maa maa assitanno?
6 Songotenni fushshinoonni mancho, Yihowawa higanno doogo umisinni hasiꞌro yine facci assine agurranni yaateni? Hatto yaa diꞌꞌikkino! Cimeeyyete komite cubbo loose maaro einokki manchi, songotenni fulinota kultanno woyite isi galagale songo higate maa maa assa hasiissannosirono kultannosi. Kayinni insa tenne calla kulte diagurtanno. Cimeeyye isi hedosi biddi assiꞌrinoronna teꞌee afate boodu agani gedensaanni wirro xaadde hasaawissannosita kultannosi. Kuni manchi wirro insa ledo xaadate maahoyye yiiro, cimeeyye aagintaawe higanno gede shaqqillunni amaaltannosi. Isi hakkawoyite hedosi biddi assiꞌrinokkiha ikkiro nafa, cimeeyye galagalte isi ledo xaade hasaawate sharrama diagurtanno.
7. Cimeeyye Yihowa gede songotenni fushshinoonni mancho marartannota leellishshannohu hiittoonniiti? (Ermiyaasi 3:12)
7 Cimeeyye songotenni fushshinoonni manna mararannohu Yihowa lawishsha harunsate sharrantanno. Lawishshaho Yihowa, haxawarra Israeelete manna kaaꞌlate insa maaro eꞌa geeshsha diagarino. Hatteentenni isi insa maaro eꞌinota leellishannore nafa assitukkinni kaaꞌlinonsa. Tenne metseetera layinki birxichira ronsummonte gede, Yihowa mannasi mararanno gara kulate Hoosei lawishsha horoonsiꞌrino; Yihowa, Hoosei minaamasi jawa cubbo loosa agurtinokkiha ikkirono, maarannosenna galagale baxannose gede kulinosi. (Hos. 3:1; Mil. 3:7) Cimeeyye Yihowa lawishsha harunsitanno daafira, cubbo loosino manchi isiwa higgara halchitanno; qoleno insa Yihowawa higa qarra ikkitannonsa gede diassitanno.—Ermiyaasi 3:12 nabbawi.
8. Qaetenni fule baino beetti daafira kulanno lawishshi, Yihowa mararronna maaro roore huwanteemmo gede kaaꞌlannonkehu hiittoonniiti? (Luqaasi 15:7)
8 Layinki birxichira ronsummoha Yesuusi qaetenni fule baino beetti daafira kulino lawishsha qaango. Annu beettisi qaera higanni nooha xeertote heeꞌre lae, “Dodanni mare hanqafe kimmi asse sunqisi.” (Luq. 15:20) Annu beettisi maarie yee huucciꞌra geeshsha agarinokkita wodanchi. Hatteentenni annisi baxannosi daafira dodanni beettisiwa marino. Songote cimeeyyeno Yihowawiinni ballekke baꞌinorira togoo maaro leellishate sharrantanno. Insa Yihowawiinni ballekke baꞌinori galagalte isiwa higgara hasidhanno. (Luq. 15:22-24, 32) Cubbo loossinori galagalte higganno woyite gordohono baattoteno lowo hagiirri ikkanno!—Luqaasi 15:7 nabbawi.
9. Yihowa cubbo loossinore shaqqillunni amaalannohu hiittoonniiti?
9 Xaa geeshsha ronsummonte gede Yihowa cubbo loosse maaro eꞌannokkire lashshi asse diaguranno. Ikkirono isi cubbo loossinorira badhe diwodhannonsa. Insa isiwa higgara hasiꞌranno. Cubbo loossinori maaro eꞌanno woyite Yihowara mayi macciishshamannosiro Hoosei 14:4te kulloonni; qummeeshshu togo yaanno: “Manniꞌyata ammana hoogansa hurse, anewa qoleemmonsa. Woꞌmu wodaninni baxeemmonsa, hanqoꞌyano insawiinni fafiseemmo.” Tini, songote cimeeyye mittu manchi maaro einota leellishannore assanni nooronna teꞌee seekkite laꞌanno gede jawaachishshannonsa. Qoleno Yihowawiinni xeertidhinori keeshshitukkinni isiwa higganno gede jawaachishshannonsa.
10-11. Cimeeyye konni albaanni songotenni fushshinoonnire kaaꞌla dandiitannohu hiittoonniiti?
10 Konni albaanni woy miteekkite lowo diri albaanni songotenni fushshinoonniri hiikkitannoyya? Insa songotenni fushshinanninsa gede assinonsa cubbo loosa agurtinoha ikkara dandaanno. Insa giddo mitootu, songotenni fushshinoonninsahu mayiraatiro nafa habbinoha ikkara dandaanno. Mittu manchi songotewiinni xeertiꞌre keeshshino yanna ikkitu geeshshitano ikkituro, cimeeyye iso xaadde hasaawisate sharrantanno. Insa togoo manna marte hasaawissanno woyite, ledonsa huuccatto assidhanno hattono songo higganno gede baxillunni amaaltannonsa. Hige mittu manchi songotewiinni xeertiꞌre lowo diro keeshshinoha ikkiro, ayyaanaamittetenni lowo geeshsha qiidinoha ikkara dandaanno. Hakko daafira kuni manchi songo higa hasiꞌriro, cimeeyye iso songo higikki nafa Qullaawa Maxaafa xiinxallinsannisi gede qixxaawo assitara dandiitanno. Togoo mannira Qullaawa Maxaafa xiinxallinsanni gede qixxaawo assitannori cimeeyye callate.
11 Cimeeyye cubbaataamma mararannohu Yihowa lawishsha harunsitanno daafira, dandaami deerrinni halaalu mininni fulinohu batinyu manni, galagale higate waalchu faꞌname noonsata huwatanno gede kaaꞌla hasidhanno. Cubbo loosino manchi maaro eironna busha assootesi aguriro, keeshshikkinni songo higa dandaanno.—2 Qor. 2:6-8.
12. (a) Cimeeyye roore qoropha hasiissannonsa coyi maati? (b) Cubbo loosinohu mitu manni Yihowa maaro horo diafiꞌranno yine heda hasiissannonkekkihu mayiraati? (Lekkaaliidi qaagiishshano lai.)
12 Mito woyite cimeeyye mitto mancho songo qoltara albaanni, lowo geya qoropha hasiissannonsa. Lawishshaho mitto mancho songotenni fushshinoonnihu qaaqquulle bushiishino daafira, kaadaasincho ikkino daafira, woy adhamasi diigate gano ganino daafira ikkiro, cimeeyye kuni manchi addinta maaro einoronna teꞌee buuxa hasiissannonsa. (Mil. 2:14; 2 Xim. 3:6) Insa hoshsha agara hasiissannonsa. Ikkirono Yihowa cubbo loose addu maaro einohanna busha assootesi agurinoha aye manchono gatona yaannota qaaga hasiissannonke. Hakko daafira cimeeyye, woloota xagartinorinna insara ammanantinokkiri addu maaro eꞌinoronna teꞌee buuxxanno woyite qoropha hasiissannonsaha ikkirono, togoo manchi horo Yihowa maaro diafiꞌranno yite heda dihasiissannonsa. b—1 Phe. 2:10.
SONGO MAA ASSA DANDIITANNO?
13. Cimeeyye seejjitino manchinna songotenni fushshinoonni manchi mereero noo badooshshi maati?
13 Sai birxichira ronsummonte gede, mito woyite, mitto mancho seejjinoonnita egensiishsha kullanni. Togoo woyite kuni manchi maaro einotanna busha assootesi agurinota anfoommo daafira isiwa aana diagurreemmo. (1 Xim. 5:20) Isi xaano songote miilaati; hattono ammanate roduuwisiwa aane jawaante afiꞌra hasiissannosi. (Ibi. 10:24, 25) Kayinni songotenni fushshinoonni mancho horonta hakko garinni dilaꞌneemmo. Togoo manchi ledo ‘diaanneemmo woy ledosi sagale nafa diꞌꞌinteemmo.’—1 Qor. 5:11.
14. Mitto mancho songotenni fushshiniro halashshaano Qullaawu Maxaafinni qajeelino tiiꞌꞌinsa kulannonsa garinni ma assa dandiitanno? (Misileno lai.)
14 Ikkina xaa geeshsha ronsummonte gede, songotenni fushshinoonni mancho horo fiile hoolleemmo yaateni? Hatto yaa diꞌꞌikkino. Isi ledo aanneemmokkiti egennantinote. Kayinni halashshaano Qullaawu Maxaafinni qajeelino tiiꞌꞌinsa kulannonsa garinni, songotenni fushshinoonni mancho gambooshsheho koyissannoronna teꞌee doodha dandiitanno; kuni manchi fiixansa woy bashshora jaalansa ikkara dandaanno. Kuni manchi gambooshshe dayirona? Bashsho togoo manchi gambooshshe dayiro keere dihaaꞌneemmo. Xaano mittu mittunku Kiristaanchi Qullaawu Maxaafinni qajeelino tiiꞌꞌisi kulannosi garinni togoo mancho keere haaꞌrannoronna teꞌee doodha hasiissannosi. Mitu roduuwi togoo mancho keere haaꞌra woy hawalle keere dayitto yaa doodhitara dandiitanno. Ikkirono togoo manchi ledo seeda hasaawa dihasaambeemmo woy isiwa diaanneemmo.
Kiristaanu Qullaawu Maxaafinni qajeelino tiiꞌꞌinsa kulannonsa garinni, songotenni fushshinoonni mancho gambooshsheho koyisannoronna teꞌee woy gambooshshe dayiro haranse keere haaꞌrannoronna teꞌee doodha dandaanno (Gufo 14 lai)
15. Layinki Yohaannisi 9-11 kulloonni manni hiittoo cubbo loosinoho? (“ Yohaannisinna Phaawuloosi Kultinohu Mittu Gari Cubbooti?” yitanno saaxineno lai.)
15 Mitootu, ‘Qullaawu Maxaafi togoo mancho keere haaꞌranno Kiristaanchi busha loososi gutamanno diyaanno?’ yite heddara dandiitanno. (2 Yohaannisi 9-11 nabbawi.) Konni qummeeshshira qooxeessaho noo hedo leellishshannonte gede, kuni biddishshi kaadaasinenna busha amanyoote tareessanno manna kulannoho. (Aju. 2:20) Hakko daafira, mittu manchi egennamino kaadaasincho ikkiro woy busha amanyoote halashshanni nooha ikkiro, cimeeyye iso hasaawisate dimartanno. Hige kuni manchi wodanisi raga higeenna maaro eara dandaanno. Kayinni konne assootesi agura geeshsha keere dihaaꞌneemmo hattono gambooshsheho dikoyinseemmo.
YIHOWA LAWISHSHA HARUNSITINE MARARTINANNIRENNA MAARTINANNIRE IKKE
16-17. (a) Yihowa cubbo loossinori ma assitara hasiꞌranno? (Hiziqeeli 18:32) (b) Cimeeyye cubbo loossinore kaaꞌlate sharrantanno woyite Yihowa ledo loossannore ikkansa leellisha dandiitannohu hiittoonniiti?
16 Konni ontunku birxichira maa ronsummo? Yihowa ayino baꞌꞌara dihasiꞌranno! (Hiziqeeli 18:32 nabbawi.) Isi cubbo loossinori isi ledo araarantara hasiꞌranno. (2 Qor. 5:20) Yihowa hundinni kayise haxawarru mannisi maaro eꞌꞌe isiwa higanno gede duucha hige amaalinohu iseraati. Songote cimeeyyera cubbo loossinore maarote widira qolate sharrante Yihowa ledo loosate qoosso noonsa—Rom. 2:4; 1 Qor. 3:9.
17 Hanni cubbo loossinori maaro eꞌanno woyite gordoho ikkanno hagiirre hedi! Iimi Anninke Yihowa ballehino geꞌreewisi songo higi kiiro lowo geeshsha hagiidhanno. Yihowa mararro, maaronna danchumma hiincinummo kiiro isira noonke baxilli lexxanni haꞌranno.—Luq. 1:78.
FAARSO 111 Hagiidhineemmo Gede Assannonkere
a Xaate togoo manna songotenni bohamino diyineemmo. Phaawuloosi 1 Qorontoosi 5:13 kulinonte gede, songotenni fushshinoonni yineemmo.
b Qullaawu Maxaafi giddo gatona yinannikki cubbo yitanno yaatto, mitto baxxino cubbo ikkikki wodanu dillaawiro loonsanni cubbo leellishshanno; togoo cubbo loosanno manchi Magano hegerera giwa doodhino. Togoo cubbo loosino manchira yoo yineemmori ninke diꞌꞌikkinoommo.—Maq. 3:29; Ibi. 10:26, 27.
