Soqqamaasinchu Phaawuloosi Teselonqe heeꞌranno Kiristaanira togo yee borreessino: “Tenne sokkanni amaaleemmoꞌne amaale adhannokkihu heeꞌriro, wodana assitine laꞌe; [“malaatisse” NW].” (2 Tes. 3:14) Konni albaanni konne biddishsha uyinoonnihu cimeeyyeteeti yine ammanneemmo. Mittu manchi duucha hinge amaalle heeꞌneennanni, Qullaawu Maxaafiha xintu seera diiga agurannokkiha ikkiro, songote cimeeyye qorowishshu lallawo shiqqanno gede assitara dandiitanno. Hakkuyi gedensaanni, mittu mittunku halashshaanchi malaate worroonni manchiwa aana aguranno.

Ikkirono, tenne hedo taashsha hasiissino. Phaawuloosi tenne amaale uyinohu annu annu assineemmore kulateeti. Hakko daafira, cimeeyye qorowishshu lallawo shiqisha dihasiissannonsa. Tenne hedo taashsha hasiissinohu mayiraati? Hanni Phaawuloosi tenne amaale uyinohu mayiraatiro laꞌno.

Phaawuloosi hatte songora heedhannori mitootu, ‘ceeꞌmaleeyye’ woy amanyootunni heedhannokkire ikkitinota huwatino. Insa uyinoonninsata Qullaawa Borro amaale lashshi assitino. Isi hakkuyira albaanni hatte songo towaati yannara, “Loosa baxannokkihu itoonke” yee hajajino. Ikkirono, insa giddonni mitootu dandiite heedhenni hasiisannonsare afiꞌrate looso loosa gibbino. Qoleno insa manni coyi giddora eꞌanno. Kuri amanyootunni heedhannokkire Kiristaanu ma garinni laꞌꞌa hasiissanno?—2 Tes. 3:6, 10-12.

Phaawuloosi, “wodana assitine laꞌe” yiino. Kowiicho kulloonnihu Giriikete afii qaali, togoo manchi hunannonkekki gede seekkine qoropha hasiissannonketa kulannoho. Phaawuloosi tenne amaale cimeeyyete calla ikkikkinni songote giddo noohura baalunku Kiristaanira kulanni no. (2 Tes. 1:1; 3:6) Hakko daafira mittu mittunku Kiristaanchi, mittu manchi Qullaawa Borro amaale harunsannokkita wodanchiro, kuni manchi amanyootunni heeꞌrannokkiha ikkino daafira ‘isi ledo xaada hooga’ doodhara dandaanno.

Hatto yaa konne mancho songotenni fushshinoonnihu gede assine laꞌꞌa hasiissanno yaateni? Hatto yaa diꞌꞌikkino; korkaatuno Phaawuloosi lede, “Roduu gede amaallesi” yiino. Hakko daafira mittu mittunku Kiristaanchi malaate worroonni rodii ledo soqqanshote yannaranna gambooshshunniwa xaadannoha ikkirono, konni rodiiwa aana woy ledosi boohaara agura doodhara dandaanno. Mayira? Phaawuloosi, “saalfatona” yiino. Amanyootunni heeꞌrannokkihu kuni Kiristaanchi malaate worroonnisi daafira saale assootesinna doogosi biddi assiꞌrara dandaanno.—2 Tes. 3:14, 15.

Xaa yannara Kiristaanu tenne amaale harunsa dandaannohu hiittoonniiti? Umihunni, Phaawuloosi kulinonte gede kuni manchi ‘ceeꞌmaleessa’ woy amanyootunni heeꞌrannokkiha ikkasinna teꞌee buuxa hasiissannonke. Phaawuloosi ninke tiiꞌꞌinkenni kainohunni assineemmokkire assanno mancho kulanni nooha diꞌꞌikkino. Woy koffi assinonke manchi daafira coyiꞌranni noohano diꞌꞌikkino. Hatteentenni Phaawuloosi xabbe leeltannota Maganu hajajo affanni heedhenni diigganno mannooti daafira coyiꞌranni no.

Xaa yannara mittu Kiristaanchi Maganu hajajo diiga roso assiꞌrinota a wodanchinummoro, isiwa aananna ledosi boohaara agura uminke doodhineemmo. Tini annu annu doodhanno hajo ikkitino daafira, mininke mannira agurranna wolootaho dihasaambeemmo. Qoleno gambooshshunniwanna soqqanshote yannara konni rodiiwa gambo digimbeemmo. Kuni rodii amanyootesi biddi assiꞌriro bashshonte gede isiwa aana hananfeemmo.