1. Kiristaana ikkino anninna ama oosonsa cuuantara albaanni maa buuxa hasiissannonsa?

BILOOSOOMI Biraanti yinanni rodoo cuuantara albaanni ikkinore coyidhanni togo yitino: “Anniˈyaranna amaˈyara cuuama hasiˈreemmata duucha hige kuloommansa; insano duucha wote tenne haja daafira kulannoe. Insa cuuama shota coye ikkitinokkita huwatoommaronna teˈee afa hasiˈrino. Hakkiinni Sadaasa 31, 1934nni cuuamoomma.” Kiristaana ikkino anninna ama oosonsa togooha hayyote doorsha doodhitanno gede kaaˈla hasiˈranno. Insa oosonsa cuuantukkinni mulla keeshshitanno gede assa, ayyaanaamittensa gawajjitannota huwattanno. (Yai. 4:17) Ikkirono, annuwunna amuuwu oosonsa cuuantara albaanni insa Kiristoosi harunsaancho ikkate qixxaabbinoronna teˈee buuxansa hayyote.

2. (a) Mite woradu aliidi laˈˈaano maa wodanchitino? (b) Konni birxichira maa ronseemmo?

² Mite woradu aliidi laˈˈaano, halaalu mine lophe heeˈreenni xaa geeshsha cuuaminokkihu 20 diri balla ikkannonsa wedelli noota  wodanchitino. Kuri wedelli giddo rooru songote gambooshshe hadhanno, hattono soqqansho fultanno. Insa umonsa Yihowa Farciˈraasine gede assite laˈanno. Ikkirono insa heeshshonsa Yihowara sayisse uyite dicuuantino. Cuuantinokkihu mayiraati? Mitu anninna amara oosonsa cuuantukki keeshshituro woyyannoha lawannonsa. Konni birxichira, Kiristaana ikkino anninna ama oosonsa cuuantanno gede kaaˈlannokki gede assannonsaha shoole korkaata ronseemmo.

3. Biloosoomi anninna ama mayyee huluullamino?

³ Hanafote gufora kulliri Biloosoomi anninna ama, ‘Qaaqqonke cuuamate yaa mayyaateronna cuuama shota ikkitinokkita huwattanno geeshshita ikkitino?’ yee huluullamino. Annunna ama oosonsa heeshshonsa Yihowara sayise aate qixxaabbinoronna teˈee afa dandiitannohu hiittoonniiti?

4. Yesuusi Maatewoosi 28:19, 20 aana hajajino hajajo annuwunna amuuwu oosonsa rosiisanno wote kaaˈlitannonsahu hiittoonniiti?

⁴ Maatewoosi 28:19, 20 nabbawi. Sai birxichira ronsummonte gede, Qullaawu Maxaafi mittu manchi meu dirisinni cuuama hasiissannosiro dikulanno. Ikkirono, annuwunna amuuwu Kiristoosi rosaancho ikkate yaa mayyaatero seekke hedansa kaaˈlitansara dandiitanno. Maatewoosi 28:19 aana kulloonniti ‘rosaano assa’ yitannoti Giriikete Afii yaatto, harunsaancho woy rosaancho assate hende rosiisa yitanno tiro afidhino. Rosaanchoho yaa Yesuusi rosiisinore huwate, hakko garinni heeˈrate murciˈrinoho yaate. Konni daafira, Kiristaana ikkino annuwinna amuuwi, anjenni kayise oosonsa rosiisa hasiissannonsahu cuuante Kiristoosi rosaano ikkitanno yee hedeeti. Shiimmaaddu qaaqquulli cuuamannokkiti egennantinote. Ikkirono, Qullaawu Maxaafi shiimaadda ooso nafa Qullaawu Maxaafi halaale huwatanna naada dandiitannota kulanno.

5, 6. (a) Qullaawu Maxaafi Ximootewoosi daafira kulannori cuuamasi daafira mayine hendeemmo gede assannonke? (b) Xiinxallu anninna ama oosonsa danchu garinni kaaˈla dandaannohu hiittoonniiti?

⁵ Rosaanchu Ximootewoosi halaale seekke cuˈmirinohu anje heeˈrenniiti. Soqqamaasinchu Phaawuloosi, Ximootewoosi Qullaawa Borro anjesinni kayise rosinota coyiˈrino. Ximootewoosi anni Yihowa magansiˈrannokkiha ikkirono, amasinna ahaahesi Qullaawa Borro baxanno gede assite lossitinosi. Konni daafira, isi kaajjado ammana noosiha ikkino. (2 Xim. 1:5; 3:14, 15) Ximootewoosira 20 diri balla ikke heeˈreennasi, songote giddo baxxitino qoosso uyinoonnisi.—Soq. 16:1-3.

⁶ Baalunku qaaqquulli babbaxxitinore ikkitino daafira, ayyaanaamittetenni gikki yitannohu babbaxxino diri giddo heedheeti. Mitu qaaqquulli anje heeˈreenni ayyaanaamittetenni gikki yaaranna cuuama hasiˈrara dandaanno. Mitu kayinni naggi yaa geeshsha cuuamate qixxaawa hoogara dandaanno. Konni daafira, xiinxallu anninna ama oosonsa cuuantanno gede digiddeessanno. Hatteentenni, mitto mittonka qaaqqonsa dandoosi garinni ayyaanaamittetenni lophanno gede kaaˈla hasiissannonsa. Annuwunna amuuwu oosonsa dancha doorsha doodhitanno wote hagiidhitanno. (Lawishsha 27:11 nabbawi.) Ikkirono, mixonsa oosonsa Kiristoosi rosaano ikkitanno gede kaaˈla ikkitinota dea dihasiissannonsa. Konni daafira annuwunna amuuwu insaneeto togo yite xaˈma hasiissannonsa: ‘Qaaqqiˈyara heeshshosi Maganoho sayise oye cuuamanno gede assitannosi geeshshi egenno noosi?’

7. Mittu manchi cuuamara albaanni Qullaawu Maxaafi giddo noore gude afa hasiissannosi? Xawisi.

⁷ Annuwunna amuuwu oosonsa rosiissanno wote halaale seekkite huwattanno gede assa hasiissannonsa; togo assansa oosonsa heeshshonsa Yihowara sayisse uyitanno gede kakkayissannonsa. Hatto yaa kayinni mittu manchi heeshshosi Maganoho sayise oye cuuamara albaanni Qullaawu Maxaafi giddo noore baala afe guda hasiissannosi yaa diˈˈikkino. Baalanti rosaano cuuantu gedensaannino gara ikkitino egenno afiˈrate sharrama hasiissannonsa. (Qolasiyaasi Sokka 1:9, 10 nabbawi.) Ikkina cuuammara albaanni mageeshshi egenno hasiissanno?

8, 9. Phaawuloosinna usuru mini agaraanchi xaggenni maa ronseemmo?

⁸ Umi xibbi diro heedhinote mitte maate lawishshi annuwanna amuuwa kaaˈlansara dandaanno. (Soq. 16:25-33) Phaawuloosi 50 M.D. balla layinkite misiyoonete harinshosi yannara, Filippi yinanni katama haˈrino. Hakkiicho heeˈreenna isonna soqqanshote jaalasi Silaasi beebbate kassanse usuru minira eessinoonninsa. Hakko hashsha, baattote huxano kaˈe usuru mine shashshaffeenna baalunku cufani faˈnamino. Usuru mini agaraanchi usuranyu fule bainoha laweennasi isonooto shaate woˈnaalino; Phaawuloosi kayinni isonooto shaannokki gede kulinosi. Hakkiinni Phaawuloosinna Silaasi usuru mini agaraanchiranna minisi mannira dancha gede farcidhino. Usuru mini agaraanchinna minisi manni rosino halaale baxino daafira maa assino? Insa keeshshitukkinni cuuantino. Tenne xaggenni maa ronseemmo?

⁹ Kuni manchi usuru mine agarara albaanni olamaancho ikkikki digatino; korkaatuno hatte yannara noo budi garinni xurata fulino olamaanchi duucha wote usuru mine agarannoha ikkanno. Togoo manni Maganu Qaale gari geeshsha diafino. Konnira kuni manchi gara ikkitinota Qullaawa Borro egenno afiˈrate, Qullaawu Maxaafi halaale rosa, Maganu soqqamaancho ikkate yaa mayyaatero huwatanna Yesuusi roso harunsate murciˈra hasiissannosi. Kuni manchi Qullaawa Borroha xintu roso rosasinna rosino halaale naadasi, shiima yanna giddo cuuamanno gede kakkayissinosi. Isi cuuami gedensaannino Qullaawa Borro rosa agurinokkiti egennantinote. Ikkina, kiˈneno qaaqqiˈne Yihowa baxanno daafiranna Isira hajajama hasiˈranno daafira heeshshosi Maganoho sayise oye cuuama hasiˈrannota kulannoˈne wote maa assa dandiitinanni? Kiristaana ikkino anninna ama, qaaqqinsa cuuamate ikkado ikkinoronna teˈee buuxate songote cimeeyye hasaawisanno gede kultasira dandiitanno. * Wole cuuantino rosaanonte gede, qaaqqinsano hegere geeshsha Yihoware rosa diaguranno.—Rom. 11:33, 34.

10, 11. (a) Mitu annuwinna amuuwi mayyee hedanno? (b) Annuwunna amuuwu roore illachisha hasiissannonsari maati?

¹⁰ Mitu annuwinna amuuwi oosonsa kaffi yiino roso rossuhunna lowo damooza baantanni looso afidhu gedensaanni cuuanturo woyyanno yite heddanno. Annuwunna amuuwu hatto yite heddannohu oosonsara yiteeti; ikkirono tini oosonsa addu hagiirre afidhanno gede assitannoni? Hatto yee heda Qullaawa Borro ledo sumuu yitannoni? Yihowa Qaali maa assineemmo gede jawaachishannonke? —Rosiisaancho 12:1 nabbawi.

¹¹ Tini alamenna giddose noori Maganu hedonna fajjo ledo sumuu yaannokkita qaaga hasiissannonke. (Yai. 4:7, 8; 1 Yoh. 2:15-17; 5:19) Mittu qaaqqi Yihowa ledo jaalooma kalaqiˈrasi, Sheexaanunna alamesi, hattono alamete hedo gawajjitannosikki gede kaaˈlitannosi. Annuwunna amuuwu oosonsa roso calla illachishshanno gede jawaachishshannoha ikkiro, oosonsara maa balaxisiisa hasiissannonsaro gurchaawansaranna alamete giddo noo coyi Yihowa ledo noonsa jaalooma roorannohu gede assite heddara dandiitanno. Baxillaano annuwinna amuuwi oosonsa alamete hedo harunsitara hasidhannoni? Addu hagiirrenna harshammo afiˈneemmohu heeshshonke giddo Yihowa balaxisiinsummoro callaati.—Faarso 1:2, 3 nabbawi.

12. Mitu anninna ama oosonsa cuuantukki keeshshitara hasiˈrannohu mayiraati?

¹² Mitte rodoo qaaqqose cuuantannota hooltanno gede assinosere coyidhanni togo yitino: “Qaaqqoˈya cuuantannota hooloommahu bohantannoe yeeti; hatto assaˈya kayi salsiissannoe.” Tenne rodoo gede mitu anninna ama oosonsa naggi yita geeshsha cuuantukki keeshshituro woyyanno yee hedanno. (Kal. 8:21; Law. 22:15) Insa ‘Qaaqqiˈya cuuama hoogiro dibohamanno’ yee hedannoha ikkara dandaanno. Hatto yee hedansa soˈrote yineemmohu mayiraati?—Yai. 1:22.

13. Mittu manchi cuuama hoogasi Yihowa albaanni xaˈmamannokki gede assitannosi? Xawisi.

¹³ Kiristaana ikkino anninna ama oosonsa heeshshonsa Yihowara sayisse aate qixxaabbukki cuuantara hasidhannokkiti egennantinote. Ikkirono, mittu manchi cuuaminokki daafira loosanno soˈrora Yihowa albaanni dixaˈmamanno yee heda soˈrote. Mayira? Mittu manchi Yihowa albaanni xaˈmamannohu cuuamino daafira calla diˈˈikkino. Mittu qaaqqi Yihowa albaanni gara ikkinorenna gara ikkinokkire afanni heeˈre soˈro loosiro cuuama hoogirono xaˈmamasi digattanno. (Yaiqoobi 4:17 nabbawi.) Konni daafira, hayyoota ikkino annuwinna amuuwi oosonsa cuuantannota dihooltanno; hatteentenni, insa uminsa dancha lawishsha ikkate sharrantanno. Annuwunna amuuwu, oosonsa anjensanni kayisse Yihowa fushshino biddishsha baxxanno gede assate woˈnaaltanno. (Luq. 6:40) Oosoˈne Yihowa biddishsha baxxannoha ikkiro, cubbo loosa agurte Iso seekkite cuˈmidhanno.—Isa. 35:8.

14. Songote cimeeyye annuwanna amuuwa kaaˈla dandiitannohu hiittoonniiti?

¹⁴ Songote cimeeyye ayyaanaamittete allaalaasine ikkitino daafira, ayyaanaamittete mixo daafira gara ikkinore coyidhe annuwanna amuuwa kaaˈla dandiitanno. Mitte 70 saˈˈanno diro woˈma yanna suwisaancho ikkite soqqantino rodoo lewu diri qaaqqo heedheenna Roduu Chaarlisi Teezi Raasili kulinoseri kaaˈlinoseta coyidhino. Tini rodoo “Isi ledo ayyaanaamittete mixoˈya daafira, 15 daqiiqa hasaamboommo” yitino. Ee, woloota jawaachisha lowo geeshsha kaaˈlitanno. (Law. 25:11) Cimeeyye Gambooshshu Addaraashe giddo loossanno wote, mito coye annuwunna amuuwu hattono oosonsa ledo loosanna qaaqquulleho dandoonsanna dirinsa ledo sumuu yaanno looso aa dandiitanno.

15. Songote miilla qaaqquulle jawaachisha dandiitannohu hiittoonniiti?

¹⁵ Songote miillano wedellaho heddannota leellishshe annuwanna amuuwa kaaˈla dandiitanno. Mittu qaaqqi ayyaanaamittetenni lophanni noota leellishannore assanna wodanchitinoonniha ikkara dandaanno. Lawishshaho isi gambooshshunniwa dancha  dawaro qolinoha, woy Kiristaanu Heeshshonna Soqqansho Gambooshshiwa kifile shiqishinoha ikkara dandaanno. Woy qole iillinosi fonqolo qeele sainoha woy rosu mine afiˈrino faro horoonsiˈre farciˈrinoha ikkara dandaanno. Hatto assinota affinoonniha ikkiro wodaninni galattesi. Gambooshshu hanafara albaanninna goofihu gedensaanni, qaaqquullu ledo hasaawate mayira diwoˈnaaltinanni? Togo assitinanniha ikkiro, qaaqquullu “lowo songo” miilla ikkitinota huwattanno.—Far. 35:18.

16, 17. (a) Qaaqquullu cuuamansa kaaˈlitannonsahu hiittoonniiti? (b) Kiristaana ikkino anninna ama hagiidhanno gede assannonsari maati? (Hanafote noo misile lai.)

¹⁶ Kiristaana ikkino annuwinna amuuwi oosonsa ‘Yihowa amaalenni seejjitanni’ lossa lowo qoossooti. (Efe. 6:4; Far. 127:3) Hunda Israeelete gaˈre giddo ilamanno qaaqquulli, Yihoware ikke ilamanno. Xaa yannara noo qaaqquulli kayinni annuwinsanna amuuwinsa Yihowa magansiˈranno daafira calla, insano Yihowa baxxannore ikkitanno yaa diˈˈikkino. Annuwunna amuuwu oosonsa ilantu barrinni kayise, heeshshonsa Yihowara sayisse uyite cuuante Yesuusi rosaano ikkitanno gede kaaˈla hasiissannonsa. Tini kaajja qoossooti. Mittu mittunku manchi albillitte bayiru qarri yannara gatote malaate malaatinsasira hasiˈriro, heeshshosi Yihowara sayise oye cuuamanna Isira ammaname soqqama hasiissannosi.—Mat. 24:13.

¹⁷ Konni birxichi hanafora kulliti Biloosoomi Biraanti cuuama hasidhannota kultu yannara, annisenna amase ise cuuamate qixxaabbinoronna teˈee buuxa hasiˈrino. Ise qixxaabbinota buuxiti cuuantanno gede jawaachishinose. Ise cuuantara gaˈa gede hashsha annise mitto hagiirsiisanno coye assino. Biloosoomi togo yitino: “Isi ninke baalanka guluphe yee huuccatto assino. Isi qaaqqosi heeshshose Yihowara sayisse uyitino daafira hagiidhinota Maganoho kulino.” Biloosoomi 60 saˈˈanno diri gedensaanni togo yitino: “Heeshshoˈya giddo hakkonne hashsha horo dihaweemma!” Annuwanna amuuwa, oosoˈne heeshshonsa Yihowara sayisse uyite cuuantanna laˈine hagiidhitinara halchineemmo.