1, 2. (a) Mitu Kiristaana ikkino anninna ama qaaqquullinsa cuuama hasiꞌrannota kulannonsa wote mayyee hedanno? (b) Cuuamate qixxaabbinore heeshshonsa Yihowara sayisse uyitinoronna teꞌee xaꞌminannihu mayiraati? (Hanafote noo misile lai.)

 MAARIYA anninna ama qaaqqonsa cuuamate qixxaabbinori ledo uurrite heedheenna laꞌꞌanni no. Ise lallawo shiqishino rodii xaꞌminonsate lame xaꞌmora huurose naggi assite dawaro qoltino. Hakkunni gedensaanni Maariya cuuantu.

² Maariya anninna ama, qaaqqonsa heeshshose Yihowara sayisse uyite cuuantino daafira lowo geeshsha hagiidhino. Ikkirono hakkuyira albaanni amase huluullinoseri no. Ise togo yite heddino: ‘Qaaqqoꞌya cuuamate iillitino? Ise cuuama shota coye ikkitinokkita huwattino? Shiima geeshsha keeshshituro woyya ikka?’ Batinyu anninna ama qaaqquullinsa cuuama hasiꞌrannota coyiꞌranno wote togo yee huluullamanno. (Ros. 5:5) Heeshshonke giddo doodhineemmo doorsha baalanka roorannohu ninkeneeto Yihowara sayise aatenna cuuamate.—“ Heeshshokki Yihowara Sayisse Ootto?” yitanno saaxine lai.

3, 4. (a) Soqqamaasinchu Pheexiroosi cuuama hasiissannota lawishshunni kulinohu hiittoonniiti? (b) Pheexiroosi cuuama Nohi seekkino markaawe ledo heewisiisinohu mayiraati?

 ³ Soqqamaasinchu Pheexiroosi cuuamate daafira borreessi wote Nohi seekkino markaawe daafira coyiꞌrino. Isi togo yiino: “Hatteente gede tenne [markaawete] ledo mitte ikkitinoti cuuama Yesuusi Kiristoosi kao widoonni gatissanni nooꞌne. Cuuama mannimmate xure huntannota ikkitukki, keeraancho tiia afiꞌrate Maganoho shiqishiꞌnanni huuccattooti.” (1 Phe. 3:20, 21, NW) Markaawe, Nohi Maganu fajjo wonshate murciꞌrinota leellishshanno. Nohi Yihowa loosi yiinosi looso ammaname umo fushshino. Nohi ammanatenni assinori, umisitanna maatesi heeshsho Baote Wayinni gatisino. Pheexiroosi konne lawishsha qummi assinohu mayiraati?

⁴ Nohi markaawe seekkasi ammana noosita leellishshanno; hatteente gede mannu mittu manchi cuuamanna laꞌꞌanno wote, hakku manchi Kiristoosi reyotenni kainota ammane heeshshosi Yihowara sayise aanni noota wodanchanno. Nohinte gede, heeshshonsa Yihowara sayise aanno Kiristaani Maganu aannonsa looso loosanno. Cuuamino Kiristaani goofimarchu geeshsha Maganoho ammanamiro Nohi Baote Wayinni gatinte gede, tini busha alame baꞌanno wote gate saꞌꞌanno. (Maq. 13:10; Aju. 7:9, 10) Cuuama lowo geeshsha hasiissannota ikkitinohu iseraati. Mulla cuuamikki keeshshanno manchi hegere heeshsho afiꞌranno faro huꞌnanno.

5. Konni birxichira maa ronseemmo?

⁵ Cuuama shota coye ikkitinokki daafira konni woroonni noote sase xaꞌmora dawaro afiꞌra hasiissannonke: ‘Qullaawu Maxaafi cuuamate daafira mayyaanno? Mittu manchi cuuamara albaanni maa assa hasiissannosi? Oosonke woy Qullaawa Maxaafa xiinxallinseemmo manna rosiinseemmo wote cuuama hasiissannota huwattanno gede kaaꞌla dandiineemmohu hiittoonniiti?’

6, 7. (a) Yohaannisi cuuinohu mayiraatiro xawisi. (b) Yohaannisi cuuino manni baalunku giddo baxxinohu ayeti? Togo yineemmohu mayiraati?

⁶ Qullaawu Maxaafi giddo umo manna cuuinota kulloonnihu Cuuaancho Yoohaannisiiti. (Mat. 3:1-6) Mannu cuuamara Yoohaannisiwa dayinohu Muse Higge diigino daafira maaro einota leellishateeti. Ikkollana Yohaannisi cuuino manni giddo mittu baxxino manchi cuuaminohu maaro eate diꞌꞌikkino. Yohaannisi guuta Maganu Beetto ikkinoha Yesuusa cuuate qoosso afiꞌrino. (Mat. 3:13-17) Yesuusi cubbo loosinokki daafira, maaro ea dihasiissannosi. (1 Phe. 2:22) Yesuusi cuuamasi Maganu fajjo assate maahoyye yiinota leellishshanno.—Ibi. 10:7.

⁷ Yesuusi uullate aana noo yannara rosaanosi woloota cuuꞌino. (Yoh. 3:22; 4:1, 2) Kuni mannino cuuaminohu Muse Higge diigansanni maaro einota leellishateeti. Ikkollana, Yesuusi reyihunna kaihu gedensaanni harunsaanosi cuuantannohu tennera diꞌꞌikkino.

8. (a) Yesuusi reyotenni kai gedensaanni harunsaanosi mayyee hajajino? (b) Kiristaanu cuuama hasiissannonsahu mayiraatiro xawisi.

⁸ Yesuusi 33 M.D. reyotenni kai gedensaanni 500 saꞌꞌanno labballira, hattono meentoho leellino; qoleno isi qaaqquulleho nafa leellinoha ikkara dandaanno. Isi aante noo hajajo hajajinohu hatte yannara ikkara dandaanno: “Hadhine duuchante daga manna Annu, Beettunna Qullaawu Ayyaani suꞌminni cuuꞌinanni rosaano asse; hajajoommoꞌnere baalankareno agadhitanno gede rosiissensa. Kuneeti! Ani alamete gumulo geeshsha ayewoteno kiꞌne ledo noommo.” (Mat. 28:19, 20; 1 Qor. 15:6) Yesuusi ‘manna rosaano asse’ yee hajaji yannara harunsaanosi giddo batinyu macciishshitukki digattino. Yesuusi rosaanchosi ikka woy ‘qambarasi’ duqqa hasiꞌranno manchi balaxe cuuama hasiissannosita coyiꞌrino. (Mat. 11:29, 30) Maganoho hagiirsiisanno garinni soqqama hasiꞌranno manchi, Yesuusi Yihowa hedinori woꞌmanno gede assannota huwatanna ammana hasiissannosi. Mittu manchi cuuama dandaannohu tenne assi gedensaanniiti. Qoleno wayinni cuuammanni cuuama giddo Magano hagiirsiissannoti togoo cuuama callate. Qullaawu Maxaafi umi xibbi diro Kiristoositi haaro rosaano nafa cuuama hasiissannota huwattinota xawisanno. Insa cuuantukkinni mulla dikeeshshitino.—Soq. 2:41; 9:18; 16:14, 15, 32, 33.

9, 10. Cuuamate daafira Itiyophiyu manchiwiinninna soqqamaasinchu Phaawuloosiwiinni maa ronseemmo?

⁹ Soqqamaasinete Looso 8:35, 36 nabbawi. Hanni mittu Itiyophiyu manchi magansiꞌrate Yerusaalame haꞌre higanna ikkinore hedi. Yihowa sokkaasinchi Filiphoosi hakkonne mancho mare hasaawisanno gede kulisita, Filiphoosi Itiyophiyu manchiwa mare ‘Yesuusi daafira kulannoha dancha duduwo’ kulinosi. Itiyophiyu manchi maa assiyya? Isi Yihowa fajjo wonsha hasiꞌrino daafira, keeshshikkinni cuuamino. Isi hatto assasi, rosino halaale lowo geeshsha baxinota leellishshanno.

¹⁰ Hanni xa qole Kiristaanaho darte iillishannohu mittu Yihudichi lawishsha laꞌno. Isi ilaminohu Maganu doodhino daga giddooti. Ikkirono, Yihudu daga Yihowa ledo noonsaha baxxino jaalooma huꞌnitino. Hakku manchi Yihudu ammaꞌno budira diinaggaawannoha ikkirono, yannate gedensaanni halaalu doogo rosino. Isira farciꞌrinohu, reyotenni kainohonna Maganu albaanni ayirrinye afiꞌrinoho Yesuusa Kiristoosaati. Isi maa assiyya? Kiristoosi rosaanchi Hanaaniya mare hasaawisisi yannara, isi kulinosire macciishshino. Qullaawu Maxaafi isi daafira kulanni “Isi kae cuuami” yaanno. (Soq. 9:17, 18, NW; Gal. 1: 14) Kuni manchi yannate gedensaanni soqqamaasincho Phaawuloosi yinanniha ikkino. Phaawuloosi Yesuusi Maganu fajjo wonshannota ammane cuuamino. Isi keeshshikkinni cuuamino.—Soqqamaasinete Looso 22:12-16 nabbawi.

11. (a) Qullaawu Maxaafi rosaano cuuantanno gede assannonsari maati? (b) Mittu manchi cuuamanno wote mayi macciishshamannonke?

¹¹ Yannankerano Qullaawa Maxaafa xiinxallanno manni giddo batinyu yaano, ajuno akkaluno cuuamanno. Qullaawu Maxaafi halaale baxxannorinna ammana noonsari heeshshonsa Maganoho sayisse uyite cuuamate quqquxantanno. Woradunna qoqqowu gambooshshiwa cuuamate qixxaabbinorira shiqinshanni lallawo baxxitinote. Yihowa Farciꞌraasine Qullaawu Maxaafi rosaano rossinori halaale ikkinota ammante cuuantanno wote lowo geeshsha hagiidhitanno. Kiristaana ikkino anninna ama oosonsa wole haaro rosaano ledo cuuantanna laꞌꞌanno wote dihagiidhanno? Saihu 2017nnihu soqqanshote diri giddo, 284,000 saꞌꞌannohu haaru manni cuuame heeshshonsa Yihowara sayise uyinota leellishino. Kuri haaro rosaano Kiristaana ikkate cuuama hasiissannota huwattino. Insa cuuantara albaanni maa assitino?

12. Qullaawu Maxaafi rosaanchi cuuamara albaanni maa assa hasiissannosi?

¹² Mittu Qullaawu Maxaafi rosaanchi cuuamara albaanni, Maganu daafira, Isi mannu oosora hedinorenna Yihowa manna gatisate qixxeessino qixxaawo rose ammanasi kaajjishiꞌra hasiissannosi. (1 Xim. 2:3-6) Tini ammana Qullaawu Maxaafi rosaano Magano dadillisanno assoote agurtannonna Yihowahu xalalu seeri ledo sumuu yaanno garinni heedhanno gede assitannonsa. (Soq. 3:19) Mittu manchi Maganu Mangiste ragiꞌrannokki gede assanno assoote agurikkinni cuuamiro cuuamasi Magano dihagiirsiissanno. (1 Qor. 6:9, 10) Konni daafira Yihowaha amanyootu seera agadhe heeꞌrano agurranna wolurino assa hasiissannori no. Keeraanchimma hasiꞌranno manchi songote gambooshshe duuchanka wote haꞌra, heeshsho gatisannoha sabbakate loosonna rosaano assate looso diinaggaawe loosa hasiissannosi. Yesuusi, rosaanosi konne looso loosa hasiissannonsata kulino. (Soq. 1:8) Mittu Qullaawu Maxaafi rosaanchi kuri coyibba assihu gedensaanni heeshshosi Yihowara sayise uyinota huuccattotenni kulanno; hakkiinni heeshshosi sayise uyinota mannaho leellishate cuuamanno.

13. Qullaawa Maxaafa xiinxallinseemmo wote Kiristaana ikkate cuuama hasiissannota qaaga hasiissannonkehu mayiraati?

¹³ Oosonkenna wole manna Qullaawa Maxaafa xiinxallinseemmo wote Yesuusi rosaano ikkate cuuama hasiissannota qaaga hasiissannonke. Tenne qaaganke Qullaawa Maxaafa xiinxallinseemmori ledo danchu garinni hasaambeemmo gede kaaꞌlitannonke. Konni daafira heeshshonsa Maganoho sayise aanna cuuama hasiissannonsata kulate hobbi ruxxi yaa dihasiissannonke. Oosonkenna wolootu Qullaawu Maxaafi rosaano ayyaanaamittetenni lophite cuuantara hasiꞌneemmo!

14. Qullaawa Maxaafa xiinxallinseemmo manna cuuamanno gede giddeessa hasiissannonkekkihu mayiraati?

¹⁴ Ikkollana oosonkenna Qullaawa Maxaafa xiinxallinseemmo manni cuuamanno gede giddeessa dihasiissannonke. Yihowano Isira soqqammeemmo gede digiddeessinonke. (1 Yoh. 4:8) Qullaawa Maxaafa xiinxallinseemmo mannira Maganu ledo noonsa jaalooma kaajjishiꞌra hasiissannohu mayiraatiro xawise kula hasiissannonke. Mittu Qullaawu Maxaafi rosaanchi halaale naadannohanna  Kiristoosi rosaancho ikke qambara duqqate hasatto noosiha ikkiro cuuamanno.—2 Qor. 5:14, 15.

15, 16. (a) Mittu manchi cuuama hasiissannosihu meu dirisinniiti? Xawisi. (b) Mittu Qullaawu Maxaafi rosaanchi bashsho wole ammaꞌno giddo cuuaminoha ikkirono Yihowa Farciꞌraasincho ikkate cuuama hasiissannosihu mayiraati?

¹⁵ Mittu manchi meu dirisinni cuuama hasiissannosiro kulanno biddishshi dino. Mittu mittunku Qullaawu Maxaafi rosaanchi ayyaanaamittetenni gikki yaanno deerri babbaxxara dandaanno. Duuchu manni cuuamannohu wedellu heeꞌreeti; qoleno Yihowara ammaname heeꞌranno. Wolootu kayinni Qullaawu Maxaafi halaale rossannohu jajjabba ikkituhu gedensaanni ikkirono cuuama hasiissannonsata huwatte cuuantanno.

¹⁶ Qullaawa Maxaafa xiinxallitannoti mitte jawa mancho, bashsho babbaxxitino ammaꞌno giddo cuuantino daafira Qullaawa Maxaafa xiinxallissannose rodoo xaano cuuama hasiissannoseronna teꞌee xaꞌmitino. Xiinxallissannose rodoo cuuama hasiissannoseta leellishshanno qummeeshshuwa Qullaawu Maxaafinni kultinose. Tini mancho Qullaawu Maxaafi cuuama hasiissannota kulannota huwattino daafira mulenni cuuantino. Dirise 70 balla ikkirono, cuuama dihasiissannoe yite diheddino. Ee, cuuamanke Yihowa hagiirsiissannohu Isi fajjo daafira gara ikkitino egenno heedhunkerooti. Konni daafira haaro Qullaawu Maxaafi rosaano bashsho wole ammaꞌno giddo cuuantinoha ikkirono, xaano cuuama hasiissannonsa.—Soqqamaasinete Looso 19:3-5 nabbawi.

17. Mittu manchi cuuamanno barra seekke heda hasiissannosiri maati?

¹⁷ Mittu manchi cuuamanno barra lowo geeshsha hagiidhanno. Ikkirono doodhino doorshi daafira seekke heda hasiissannosi. Heeshshonke Yihowara sayinse uyinummo wote eꞌnoommo qaale agadhe heeꞌrate sharrama hasiissanno. Yesuusi Kiristaana ikka qambara duqqate ledo heewisiisinohu iseraati. Qullaawu Maxaafi, Yesuusi rosaano “insa daafira ree, reyotenni kainohu daafira ikkinnina insaneete” heeꞌra hasiissannonsakkita kulanno.—2 Qor. 5:15; Mat. 16:24, NW.

18. Aananno birxichira hiikkuri xaꞌmuwara dawaro afiꞌneemmo?

¹⁸ Konni birxichira hanafote qummi assiniti Maariya ama cuuamate daafira huluullamase cuuama shota ikkitinokkita leellishshanno. Ooso iltinoonniha ikkiro togo yitine heddinanniha ikkara dandaanno: ‘Qaaqqiꞌya cuuamate qixxaawino? Heeshshosi Yihowara sayise aanno gede assitannosi geeshshi egenno noosi? Qaaqqiꞌya cuuamikkinni balaxe roso rose looso amadiro woyya ikka? Qaaqqiꞌya cuuamihu gedensaanni shota ikkinokki cubbolla loosi?’ Aananno birxichira kuri xaꞌmuwara dawaro afiꞌneemmo; qoleno annunna ama cuuamate daafira gara ikkitino lao heedhannonsa gede assiꞌra dandiitannohu hiittoonniitiro ronseemmo.