Yannankera Phaawuloosi hiittoohoro afinohu mittu manchino dino. Borronke aana fultanno misilla Phaawuloosi xawisate worroonni xawishshaati ikkinnina, arkiyolojete taje aana xintantinota diˈˈikkitino.

Ikkirono Phaawuloosi dani hiittoohoro kultanno taje no. Lawishshaho, Badheessa 1, 1902nnite Tsiyooniti Agarooshshu Shae togo yitanno: “Phaawuloosi dana lainohunni: ‘Aktis ovi Powuli Endi Tekila’ yinanniti 150 M.D. balla qixxeessinoonni borro isi dani daafira wolu baalunkunni woyyanno garinni kultanno; tini borro albinni kayinse horoonsiˈnanni keeshshinoonnite. Tenne borro giddo Phaawuloosi ‘haranchu, baddaamu, lekka wiraminohu, duˈmu, lamenka widoonni noohu gaaru dananchisi xaadinohunna koonkoonaamu gede assine xawinsoonni.”

Ze Oxifordi Dikishineerii ovi ze Kirischiyaani Cherchi [1997 ittime] togo yitanno: “Xagge leellishshanno garinni ‘Ze Aktis ovi Powuli Endi Tekila’ yinanni borro kultannori giddo mitu halaaleho.” Tini borro qixxaabbu gedensaanni lowo xibbe ikkanno diro mannu naadannota ikkitino; xaa yannara Giriikete Afiinni qixxaabbinoti 80 ikkitannoti angatenni galchinoonniti tini borro heeˈrasenna wolu afiira qolle tirroonnita ikkase tenne leellishshanno. Konni daafira borronke aana fultanno misilla, mite hundi borro Phaawuloosi dani daafira kultannori ledo sumuu yitannote.

Kayinni Phaawuloosi daninni roore wodancha hasiissannonkehu wolu coyi no. Phaawuloosi soqqamanni heeˈreenna mitu manni ‘manninatesi laˈnanni woyite wolqiweeloho; hasaawisino ditidhinoho’ yee coyiˈrino. (2 Qor. 10:10) Ikkollana Phaawuloosi Kiristaancho ikkinohu Yesuusi maalaletenni leellinosi daafira ikkinota dea dihasiissannonke. Hattono ‘Kiristoosi suˈma egensiisate dooramino uduunnicho’ ikke assinore heda dandiineemmo. (Soq. 9:3-5, 15; 22:6-8) Phaawuloosi Yihowa ayyaaninni borreessino maxaaffano lowo geeshsha kaaˈlitannonkete.

Phaawuloosi Kiristaancho ikkara albaanni assinore naaxxatenni dicoyiˈrino; woy qole danisi daafira dikulino. (Soq. 26:4, 5; Fil. 3:4-6) Isi togo yiino: “Ani soqqamaasine duuchantera woriidiho. . . . Soqqamaasincho ikke woshshamate diˈikkoommoho.” (1 Qor. 15:9) Yannate gedensaanni qole isi togo yee borreessino: “Ani Maganu manni baalaho woriidiha ikkummorono, dannu nookkita Kiristoosi jiro dagate kuleemmo gede tenne elto uyinoonnie.” (Efe. 3:8) Phaawuloosi dani hiittoohoro hendanni qarrama agurre, isi duduwino sokka illachisha dandiineemmo.