LOPHOOMMAHU Ostiriyaho Giratisi yinanniwaati. Lamala diro ikkieta ammaꞌnote rosi minira eessinoonnie. Ikkollana qeesootunna meya molokosooti foorannota afummati lowo geeshsha masumma. Konni daafira, amaꞌya hakko rosi mininni fuleemma gede fajjitue.Yannate gedensaanni hakko gallanni ronsanni rosi minira eumma. Mitto hashsha Giratisira bomba tungoonni daafira anniꞌya daye haaꞌrie. Hakkiinni Shilaadimingi yinanni katama haꞌnummo. Hakko katama iilline mitto buusa tayinse saꞌnanni heeꞌneenna buusu aana bomba tungi. Wole wote ahaaheꞌya ledo nafara heeꞌneenna mule buuwanni no horophilli tokkose shee hooginonke. Olu uurrita ammaꞌnono ikko gashshoote ammaꞌna qarra ikkitinonke.

Mitte Yihowa Farciꞌraasincho 1950nni amaꞌya Qullaawa Maxaafa xiinxallisa hanaffu. Anino insa hasaawanno wote macciishsheemma, hattono mito wote amaꞌya ledo songote gambooshshe haꞌreemma. Amaꞌya Yihowa Farciꞌraasine rosiissanno rosi halaale ikkinota huwattino daafira, 1952nni cuuantu.

Hatte yannara ninke qooxeessira mule noo songo geerru gamba yaanno kilawe labbannoe. Yannate gedensaanni mitte hinge wole songo haꞌnummo; hakkiicho lowo wedelli noo daafira songo geerru kilawe ikkitinokkita wodanchumma! Giratisi hingummota baalanka gambooshshe haꞌra hanafumma; mulenni rosanni noommari halaale ikkinoti leeltue. Qoleno Maganu Yihowa soqqamaasinesi woꞌmanka wote irkisannota huwatumma. Iillinonke qarra qeelle saꞌꞌa dandiineemmokkihanna mittuno kaaꞌlannonkehu nookkiha lawannonke woyite Yihowa irkisannonke.—Far. 3:5, 6.

Rosoomma halaale woleho kula hasiꞌrumma. Konnira roduuwiꞌyara halaale rosiisa hanafumma. Shoole bayiruuddu roduuwiꞌya rosiisaano ikke wolewa haꞌrino. Konnira insa haꞌriwa mare Qullaawa Maxaafa xiinxallanno gede jawaachisheemmansa.  Yannate gedensaanni baalunku roduuwiꞌya Qullaawa Maxaafa xiinxalle Yihowa Farciꞌraasine ikkino.

Minunni mine haꞌre soqqama hanafummahunni layinki lamalara 30 diri balla ikkannose manchonni xaade Qullaawa Maxaafa xiinxallisa hanafumma. Ise ayyaanaamittetenni jawaatte cuuantu; yannate gedensaanni minaannisenna lame oosose Yihowa Farciꞌraasine ikkitino. Ise Qullaawa Maxaafa xiinxallisaꞌya ayyaanaamitteꞌya kaajjitanno gede assitino. Togo yoommahu mayiraati? Ane hakkuyira albaanni Qullaawa Maxaafa biddiitto xiinxallisinoehu dino. Konni daafira, ise xiinxallisammara albaanni seekke qixxaaweemma. Balaxe aneneeto rosiise hakkunni gedensaanni ise rosiiseemma yaa dandiinanni. Hatto assa halaale seekke huwateemma gede kaaꞌlitinoe. Dotteessa 1954nni cuuame heeshshoꞌya Yihowara sayise oommata leellishumma.

Hakkiinni 1955nni Jarmanete, Faransayetenna Ingilizete assinoonniha daga dagiyyote gambooshshe haꞌrumma. Lendenete katamira heeꞌre Roduu Alberti Shirooderinni xaadoomma. Hatte yannara isi Giliyaadi Rosi Mini rosiisaanchooti; yannate gedensaanni qole Aliidi Bisi miila ikke soqqamino. Biritaaniyunniha Donu Mine daaꞌꞌantanni heeꞌneenna Roduu Shirooderi angatenni galchinoonnita mite hundita Qullaawu Maxaafi borro leellishinonke. Tenne borro giddo Maganu suꞌma riqibbannoti Ibiraawootu Afii fidalla no; Roduu Shirooderi tini borro lowo geeshsha kaaꞌlitannota ikkitinota kulinonke. Tenne afaꞌya Qullaawu Maxaafi halaale albinni roore naadeemma gedenna Maganu Qaali giddo noo halaale sabbakeemma gede kakkayissinoe.

Arfaasa 1, 1956nni suwisaancho ikke soqqama hanafumma. Shoolu agani gedensaanni, Ostiriyaho baxxitino suwisaancho ikke soqqameemma gede sonkie. Sonkoonniehu Mistelibahi katamira mittuno Yihowa Farciꞌraasinchi dino. Ikkollana woluno fonqolo ikkannori iillinoe. Suwisaancho ikkite ledoꞌya soqqantanno jaalaꞌyanna ane akati lowo geeshsha babbaxxinoho. Hatte yannara ani 19 dirite, ise qolte 25 dirite; ani ilamoommahu katamahooti, ise ilantinohu kayinni gaxareteeti. Ani soodo goxoommawiinni rahe dikaeemma; ise kayinni gutte kaꞌanno. Ani hashshiishiꞌre goxeemma; ise kayinni yannante goxxanno. Ikkirono, Qullaawu Maxaafi amaale harunsanke mereeronke noo badooshshe dandiine suwisaano ikkine mitteenni soqqammeemmo gede kaaꞌlitinonke.

Wolu fonqolo ikkannorino iillinonke. Hatte yannara mannu xiiwinonkeha ikkirono Yihowa ‘dihawinonke.’ (2 Qor. 4:7-9) Mitte hinge gaxarete sabbankanni heeꞌneenna mannu woshshansa jisi yee ninkera aanaho shorrino. Hakkiinni anenna jaalaꞌya jajjabba woshsha duttanni doyissitunke. Jaalaꞌya ledo mimmito anga amande “Yihowa, shentummokki ranke reyineemmo gede assinke!” yee huucciꞌrumma. Woshshu mulinkera shiqqi yiiti, farro calla milli assanni uurri; hakkiinni kisinkekki agure haꞌri. Hatte yannara Yihowa agarinonke. Hakkunni gedensaanni hakko qooxeessi woꞌmaho sabbankummo; qoleno mannu kulloommonsa sokka macciishshino daafira hagiidhinoommo. Insa woshshu itinonkekki daafiranna togoohu waajjishanno coyi iillinke gedensaannino hakko qooxeessira sabbaka agura hoogankenni dhagge assidhinoha ikkara dandaanno. Kuri manni giddo mitu yannate gedensaanni Yihowa Farciꞌraasine ikkino.

Woluno waajjishannori tuncu yiinonke. Mitto  barra mine karaayyainonke manchi age dimbe daye qooxeessu manna qarrissinoonni yee shaankera kai. Minaamasi iso hayi yite hooggino. Hatte yannara ninke fooqete heeꞌne macciishshinanni heeꞌnoommo. Konni daafira ranke minenke seekkine cufiꞌnummo gedensaanni haꞌnammora uduunnenke gamba assiꞌra hananfummo. Saanqa fanneemmo wote, manchu anga seeda billawa adhe dirimu aana uurre no. Konnira uduunnenke baala adhine shuurete widoonni hinge fulle haꞌnummo; qoleno layinkita hakkira galagalle dimarroommo.

Hakkiinni hoteele haꞌne mitte kifile karaayyaꞌnummo. Hatte hoteelera mitto diro meddi yitanno yanna keeshshinoommo; hakko keeshshanke soqqanshonkera kaaꞌlitinonke. Hiittoonni? Hoteele noohu katamu mereerooti; qoleno Qullaawa Maxaafa xiinxallinseemmo manni giddo mitu hakko xiinxalla hasiꞌranno. Shiima yanna gedensaanni hakko maxaafu xiinxallonna lamalannita Agarooshshu Shae xiinxallo assiꞌra hananfummo; hakko gambooshshira 15 meddi yaanno manni gamba yaanno.

Mistelibahi katamira mitto diro saꞌanno yanna keeshshinoommo. Hakkiinni Giratisiwa wodiidoonni noohu Feltibaaki yinanniwa sonkie. Ledoꞌya soqqantannoti wole suwisaancho nooha ikkirono songo kayinni dino. Galleemmohu haqqetenni minnoonni mini giddo mitte shiima kifileraati. Xarrate mereero xulluwa noo daafira tenne xulluwa gaazeexunni beeshshineemmo. Waa dirriꞌneemmohu baletenniiti. Kayinni uminke horo aguranke gaabbissannota diꞌꞌikkitino. Shiimu agani giddo hakkiicho gaamo xintantino. Yannate gedensaanni Qullaawa Maxaafa xiinxallinsoommoti mitte maate miilla giddo 30 halaalu minira daggino.

Kuni woꞌnaalshi Yihowa Mangistesi balaxisiissannore woꞌmanka wote irkisannota addaxxeemma gede assinoe. Mannu kaaꞌla dandaannonkekkiwa heeꞌnummorono Yihowa irkisannonke.—Far. 121:1-3.

Niyu Yorkete katamira 1958nni Yaankinna Poopo Girawundisi yinanni istaadiyeemera daga dagiyyote gambooshshe assate hendoonni. Hakko gambooshshe harate forme wonshumma; Ostiriyunniti sinu biiro Giliyaadi Rosi Mine 32^ki kifile eꞌꞌe qajeela hasiꞌreemmaronna teꞌee xaꞌmitue. Tenne labbino qoosso mayyee giweemma! Bayichonko “Ee hasiꞌreemma” yuumma.

Giliyaadi Rosi Mine rosumma wote Maartini Potistingeri yinanni rodii mule ofolloomma. Isi Naatsi kaampera buutote fonqolo qeele saino rodooti. Yannate gedensaanni isino Aliidi Bisi miila ikke  soqqamino. Mito wote Maartini kifilete ronsanni heeꞌneenna “Eerika, togo yaa Jarmanete Afiinni mayyaate?” yee hashaashe xaꞌmannoe?

Giliyaadi keeshshineemmo yanna mereedhituta, Naataani Noori haꞌneemmo gobba kulinke. Ani Paraguwa haꞌre soqqameemma gede sonkie. Hatte yannara wedellitte ikkoomma daafira, Paraguwa haꞌrate annaꞌya fajjishiishira hasiissinoe. Anniꞌya fajjieta, Badheessa 1959nni Paraguwa haꞌrumma. Asunsiyooni yinanni katamira noohu misiyoonete mine mitte rodoo ledo heeꞌra hanafumma.

Shiima yanna gedensaanni, Wolteri Birayiti yinannihu Giliyaadi Rosi Mine 30^ki kifilera qajeelinohu misiyoone ikkino rodii ledo egennamumma. Hakkiinni isi ledo adhammummo, hattono iillannonke fonqolo mitteenni dandiine saꞌꞌate sharrama hananfummo. Fonqolu iillannonke woyite Isayaasi 41:10 te aana Yihowa eino qaale nabbambeemmo; isi togo yiino: “Ani ledokki noommona waajjitooti; ani Maganokkiitina hexxo mudhitooti. Ani jawaachisheemmohe, kaaꞌleemmohe.” Tenne afanke, Maganoho ammanammummoronna Mangistesi balaxisiinsummoro isi tugannonkekkita buunxeemmo gede assitinonke.

Yannate gedensaanni, Biraazilete danni qooxeessira soqqammeemmo gede sonkinke. Hakkiicho qeesootu wedellu ninke galleemmohu wonanni gariha ikkinokki mini aana kinna olloltanno gede assitanno. Hakkiinni Wolteri mitto polisete roorricha Qullaawa Maxaafa xiinxallisa hanafi. Isi mannu qarrisannonkekki gede mitte lamala geeshsha polise ninke heeꞌnoommo qooxeessa agartanno gede assino; qoleno hakkuyi gedensaanni kisinonkehu dino. Shiima yanna gedensaanni Biraazilete dannira kaꞌaanni injaanno mine afiꞌne hakko heeꞌra hananfummo. Tini Biraazileteno Paraguwa gobbarano gambooshshe assiꞌneemmo faro fantinonke. Hakkiichinni haꞌnammora albaanni hakko lame shiimmaadda songuwa xintantino.

Akimootu ila didandaatta yitinoe; ikkirono 1962nni godowummata dhagge assiꞌnoommo! Yannate gedensaanni Filoorida Hooliiwudi yinanniwa Wolteri maate heedhanno qooxeessira heeꞌra hananfummo. Aninna Wolteri maatenke towaata hasiissinonke daafira suwisaano ikka didandiinoommo. Ikkirono Maganu Mangiste balaxisiisa diagurroommo.—Mat. 6:33.

Bocaasa 1962nni Filoorida haꞌnummo wote hakko qooxeessira faranje koliddu ledo heeꞌra dibaxxanno; tini qolte faranjenna koliddu roduuwi gambooshshe mitteenni assidhannokkinna mitteenni sabbakkannokki gede assitinota huwantummoti dhagge assiꞌnummo. Ikkollana Yihowa manna sirchunni babbadannokki daafira, shiima yanna gedensaanni faranjeno koliddu roduuwino mitte songora gamba yaa hanafi. Xa hakko qooxeessira duucha songuwa no; tini Yihowa tenne qixxaawo maassiꞌrinota leellishshanno.

Hige ma asseemma, minaanniꞌya Wolteri surrete kaansere amaddeennasi 2015 reyino. Isi Yihowa baxannohonna lowo roduuwa kaaꞌlino minaannaꞌyaati; isi ledo 55 diro heeꞌnoommo. Wolteri woꞌmunni woꞌma fayyo ikke reyotenni kaꞌꞌanno yanna quqquxame agadheemma.—Soq. 24:15.

Woꞌma yanna soqqansho giddo 40 saꞌꞌanno diro keeshshe hagiirrenna atoote afiꞌreemma gede kaaꞌlinoe daafira Magano galaxxeemmasi. Lawishshaho, Wolterinna ani Qullaawa Maxaafa xiinxallinsoommo manni giddo 136 ikkannohu cuuamanna laꞌꞌa dandiinoommo. Lowo fonqoli iillinonkeha ikkirono, kuni fonqoli ammanamino Maganinkera soqqammeemmokki gede guficho diꞌꞌikkinonke. Hatteentenni qarranke yannasira isi hedino garinni tirannota addaxxine isiwa shiqqi yinoommo. Qoleno Isi kaaꞌlinonke.—2 Xim. 4:16, 17.

Wolteri lowo geeshsha qalli assannoe; ikkirono suwisaancho ikke soqqamaꞌya tenne dandee heeꞌreemma gede kaaꞌlitinoe. Woloota rosiisaꞌyanna kaote hexxo daafira kulaꞌyano sheshifachishshannoe. Yihowa irko ikkinoe doogga kule gude diafeemma. Isi qaale einonte gede, ‘jawaachishinoe, kaajjishinoe, hattono wolqaataame angasinni’ irkisinoe.—Isa. 41:10.