1, 2. Mittu rodii ayyaanaamittesi daafira maa huwatino? Hakkiinni isi maa assino?

 ROOBERTI cuuaminohu wedellichu heeꞌre ikkirono, isi rosino halaale seekke dicuꞌmirino. Isi togo yiino: “Busha coye asseemmokkiha ikkirono, ayyaanaamittete coye asseemmohu rosichu geeshshira callaati. Gambooshshe hoseemmokkihuranna dirunni mite agannara kaaꞌlaancho suwisaancho ikke soqqameemmo daafira, laꞌꞌannohura kaajjado ammana nooeha laweemmo. Kayinni xeinori nooeta huwatoommo.”

² Rooberti xeinosiri maatiro huwatinohu seenne adhi gedensaanniiti. Isinna minaamasi yanna afiꞌranno wote mimmito Qullaawu Maxaafi xaꞌmo xaꞌmanno. Minaamasi ayyaanaamittetenni kaajjado ikkitino daafira, xaꞌmo qola dihoogganno; Rooberti kayinni duucha xaꞌmora dawaro qola hooganno daafira saalanno. Isi togo yiino: “Mittore afoommokkiha lawinoe. ‘Maatete umo ikkoommo daafira, galteꞌya ayyaanaamittetenni massagate mitore assa hasiissannoe’ yee hedummo.” Hakkiinni isi ayyaanaamittesi kaajjishiꞌrate murciꞌrino. Rooberti togo yiino: “Qullaawa Maxaafa seekke xiinxalloommo; hakkiinni Qullaawu Maxaafi isi isiniiwa afiꞌrino xaadooshshi leellinoe. Qullaawu Maxaafi sokka xabbe leeltinoe; baalunkunni roore Yihowa ledo nooe jaaloomi kaajjino.”

3. (a) Rooberti lawishshinni maa ronseemmo? (b) Konni birxichira hiikkuri xaꞌmuwara dawaro afiꞌneemmo?

³ Rooberti lawishshinni maa ronseemmo? Shiima Qullaawu Maxaafi  egenno noonkeha woy ganyine gambooshshe haꞌneemmoha ikkara dandaanno; ikkollana togo assinoommo daafira calla ayyaanaamittenke kaajjadote yaa diꞌꞌikkino. Woy qole ayyaanaamittenke kaajjishiꞌrate sharrammanni keeshshinoommoha ikkara dandaanno; ikkollana ninkeneeto fonqolle laꞌneemmo wote ayyaanaamittenke woyyeessiꞌrate xaano sharrama hasiissannonkeha ikkara dandaanno. (Fil. 3:16) Ayyaanaamittetenni lopha agurreemmokki gede, konni birxichira sase xaꞌmora dawaro afiꞌneemmo: (1) Ayyaanaamittenke kaajjadoteronna teꞌee afate mayi kaaꞌlannonke? (2) Agurrummokkinni ayyaanaamittetenni lophate kaaꞌlannonkeri maati? (3) Ayyaanaamittenke kaajjado ikkituro, tini barru barrunkunni kaaꞌlitannonkehu hiittoonniiti?

4. Efesooni Sokka 4:23, 24 te no amaale harunsa hasiissannonsari ayeooti?

⁴ Maganu soqqamaasine ikkinummo wote, heeshshonke soorrine biddi assiꞌnoommo. Cuuammummo gedensaannino tenne assa diagurreemmo. Qullaawu Maxaafi “hedoꞌne haarooꞌmito [“haarooꞌmitanni hadho,” NW]” yaanno. (Efe. 4:23, 24) Cubbaataamma ikkinoommo daafira, woꞌmanka wote heeshshonke biddi assiꞌra hasiissannonke. Yihowara lowo diro soqqantanni keeshshitinori nafa, ayyaanaamittensa baꞌannokki gede qoropha hasiissannonsa.—Fil. 3:12, 13.

5. Ayyaanaamittenke kaajjadoteronna teꞌee afate ninkeneeto hiikkuri xaꞌmuwa xaꞌma dandiineemmo?

⁵ Ayyaanaamittetenni lophatenna ammananke shoshshoggitannokki gede, woꞌmanka wote ninkeneeto fonqolle layiꞌra hasiissannonke. Dirinke ikki geeshshihano ikkiro, ninkeneeto togo yine xaꞌma dandiineemmo: ‘Ayyaanaamittetenni lophanni noommo? Kiristoosi faale haꞌranni noommo? Kiristaanu gambooshshira nooe laonna gambooshshe haꞌreemmo wote nooe amanyooti ayyaanaamitteꞌya kaajjado ikkitinota leellishanno? Hasaaweemmo hasaawi maa balaxisiiseemmota leellishanno? Xiinxallote rosichiꞌya, uddiꞌreemmonna seeseemmo gari, woy amaallannie wote asseemmori, ayyaanaamitteꞌya kaajjado ikkitinota leellishanno? Fonqolu iillannoe wote maa asseemmo? Xintu rosiwiinni sae ayyaanaamittetenni gikki yoommo Kiristaanchooti?’ (Efe. 4:13) Tenne xaꞌmora qolleemmo dawaro, ayyaanaamittenke kaajjadoteronna teꞌee afate kaaꞌlitannonke.

6. Ayyaanaamittenke kaajjadoteronna teꞌee afate wolere maa assa dandiineemmo?

⁶ Ayyaanaamittenke kaajjadoteronna teꞌee afate, wolootu kaaꞌlo xaꞌmira dandiineemmo. Soqqamaasinchu Phaawuloosi maalu coye illachishanno manchi Magano dadillisannore assanni noota wodancha dandaannokkita coyiꞌrino. Maganu ayyaaninni massagamanno manchi kayinni Maganu hedo afanno, hattono maalu coye illachisha gara ikkitinokkita wodanchanno. (1 Qor. 2:14-16; 3:1-3) Kiristoosi hedo noonsa cimeeyye, mittu manchi maalu coye illachisha hanafinota afa dandiitanno. Insa tenne kulte amaaltannonke wote, amaaltinonke amaale macciishshine loosunni leellinsheemmo? Hatto assineemmoha ikkiro, ayyaanaamittetenni gikki yaa hasiꞌneemmota leellinsheemmo.—Ros. 7:5, 9.

7. Ayyaanamittetenni lophate Qullaawu Maxaafi egenno afiꞌra calla dikaaꞌlitanno yineemmohu mayiraati?

⁷ Mittu manchira Qullaawu Maxaafi egenno noosi daafira calla ayyaanaamittesi kaajjadote yaa diꞌꞌikkino. Moote Selemooni Yihowa daafira seekke afino. Qoleno Yihowa Selemooni coyiꞌrinore Qullaawu Maxaafi giddo borreessinanni gede assino. Ikkollana, yannate gedensaanni Selemooni Yihowara ammanaminokkiha ikkino. (1 Mot. 4:29, 30; 11:4-6) Ikkina, Qullaawu Maxaafi egennono agurranna, woluri mayi hasiisannonke? Woꞌmanka wote ayyaanaamittetenni lopha hasiissannonke. (Qol. 2:6, 7) Ikkina togo assa dandiineemmohu hiittoonniiti?

8, 9. (a) Kaajjado ammana heedhannonke gede kaaꞌlannonkeri maati? (b) Qullaawa Maxaafa xiinxallineemmohunna hiincineemmohu mayiraati? (Hanafote noo misile lai.)

 ⁸ Phaawuloosi umi xibbi diri Kiristaana ‘woꞌma ikkino rosiwa saꞌe’ yee amaalino. (Ibi. 6:1) Yannankera Phaawuloosi uyino amaale harunsate maa assa dandiineemmo? Tenne assa dandiineemmo doogga giddo mitte, “Maganu Baxillinni Fultinikki Heedhe” yaanno maxaafa xiinxallate. Konne maxaafa xiinxallite gudakki, Qullaawu Maxaafi giddo nooha xintu seera heeshshokki giddo harunsa dandaatto gara afate kaaꞌlitannohe. Konne maxaafa xiinxallite gudoottoha ikkiro, ammanakki kaajjishiꞌrate kaaꞌlitannoheta wole maxaaffa xiinxalla dandaatto. (Qol. 1:23) Xiinxalloottore heeshshokki giddo loosunni leellisha dandaatto gara huuccatto assidhe hiinci.

⁹ Xiinxallineemmohunna hiincineemmohu Magano hagiirsiisatenna seerasi agadhate hasatto heedhannonke gede ikkinota deꞌooti. (Far. 40:8; 119:97) Qoleno ayyaanaamittetenni lophineemmokki gede assannonke coyiwiinni xeertiꞌra hasiissannonke.—Tit. 2:11, 12.

10. Wedellu ayyaanaamittensa kaajjishiꞌrate maa assa dandiitanno?

¹⁰ Ati wedellichahoro, ayyaanaamittete mixo fushshiꞌrootto? Mittu Beeteelete soqqamanno rodii, duucha wote woradu gambooshshiwa gambooshshu hanafara albaanni cuuamate qixxaabbinore hasaawisanno. Insa giddo rooru wedellaho. Kuni rodii mixonsa maatiro xaꞌmannonsa. Insa giddo rooru qoltino dawaro ayyaanaamittete mixo fushshidhinota leellishshanno; insa woꞌma yanna soqqansho woy sabbakkannori roore hasiissannowa hadhe soqqamate mixo fushshidhinota coyidhino. Insa giddo mitu wedelli kayinni sammi yitanno. Insa sammi yitinohu ayyaanaamittete mixo fushshiꞌra hasiissannonsaha lawa hooginonsa daafira ikkara dandaanno. Ati wedellichahoro ateneeto togo yite xaꞌmi: ‘Ayyaanaamittete coye asseemmohu anniꞌyanna amaꞌya togo assammora hasiꞌranno daafira callaati? Maganu ledo jaalooma kalaqiꞌratenna isiwa albinni roore shiqate sharramanni noommo?’ Kayinni ayyaanaamittete mixo fushshiꞌra hasiissannonsari wedella calla diꞌꞌikkitino. Baalunku Yihowa soqqamaano ayyaanaamittete mixo fushshiꞌranke, ammananke kaajjitanno gede assitano.—Ros. 12:1, 13.

11. (a) Ayyaanaamittetenni gikki yaate maa assa hasiissannonke? (b) Qullaawu Maxaafi giddo kulloonniha aye lawishsha harunsa dandiineemmo?

¹¹ Biddi assiꞌra hasiissannonke coyi noota anfummoro, ranke hakko coye biddi assiꞌra hasiissannonke. Maganu ayyaaninni massagama lowo geeshsha hasiissannote! Heeshsho afiꞌra hasiꞌnummoro tenne assa hasiissannonke! (Rom. 8:6-8) Ikkollana, ayyaanaamittetenni gikki yaate yaa, guuta ikkate yaa diꞌꞌikkino. Yihowa ayyaani biddi assiꞌra hasiissannonkere biddi assiꞌneemmo gede kaaꞌlannonke. Ikkirono, ninkeno sharrama hasiissannonke. Aliidi Bisi miila ikke soqqaminohu Roduu Jooni Baari Luqaasi 13:24 xawisanni togo yiino: “Batinyu manni ruukkashsho waalcho ea hoogannohu ayyaanaamittetenni lophate sharramannokki daafiraati.” Yaiqoobi lawishshinni dancha roso ronseemmo; isi sokkaasinchu maassiꞌrannosi gede hexxo mudhikkinni sharramino. (Kal. 32:26-28) Qullaawa Maxaafa xiinxalla hagiirsiissannoha ikkirono, qalote borro gede Qullaawa Maxaafa nabbambeemmohu boohaarate yine diꞌꞌikkino. Kaaꞌlitannonketa ayyaanaamittete jiro afiꞌrate sharrama hasiissannonke.

12, 13. (a) Roomu Sokka 15:5 harunsate kaaꞌlannonkeri maati? (b) Soqqamaasinchu Pheexiroosi lawishshinna amaale kaaꞌlitannonkehu hiittoonniiti? (c) Ayyaanaamittekki kaajjishiꞌrate maa assa dandaatto? (“ Ayyaanaamittetenni Gikki Yaate Kaaꞌlannohere” yitanno saaxine lai.)

¹² Ayyaanaamittenke kaajjishiꞌrate sharrammeemmoha ikkiro, qullaawu ayyaani hedonke biddi assiꞌneemmo gede wolqa aannonke. Maganu ayyaani, albinni roore Kiristoosira noosi gedee hedo heedhannonke gede kaaꞌlannonke. (Rom. 15:5) Qoleno, maalu yorto fushshine hunne, Magano hagiirsiissanno akatta lossiꞌneemmo gede kaaꞌlannonke. (Gal. 5:16, 22, 23) Maalaamittete coye  balaxisiinseemmoha woy maalu yorto illachinsheemmoha ikkiro hexxo mudha dihasiissannonke. Yihowa gara ikkino coye illachisha dandiitinanni gede kaaꞌlannoꞌneha qullaawa ayyaana aannoꞌne gede ganyitine huuccidhe. (Luq. 11:13) Soqqamaasinchu Pheexiroosi lawishsha qaagge. Isi duucha hige ayyaanaamittetenni gikki yiino manchi assannokkire assino. (Mat. 16:22, 23; Luq. 22:34, 54-62; Gal. 2:11-14) Ikkollana isi hexxo dimudhino. Pheexiroosi Yihowa kaaꞌlonni sunu sununni Kiristoosira noosi gedee hedo heedhannosi gede assiꞌrino. Ninkeno hatto assiꞌra dandiineemmo.

¹³ Yannate gedensaanni Pheexiroosi ninke lossiꞌra hasiissannonke akatta xawisino. (2 Pheexiroosi 1:5-8 nabbawi.) Ninkeneeto qeeꞌlineemmoha, cincineemmoha, roduuwu gede ikkine baxammeemmohanna wole togoo akatta heedhannonke gede ‘jawaante’ sharrammeemmoha ikkiro ayyaanaamittetenni lopha dandiineemmo. Barru baala ateneeto togo yite xaꞌmi: ‘Ayyaanaamitteꞌya kaajjishiꞌrate techo ma assa dandeemmo?’

14. Maganu ayyaaninni massagama barru barrunku kaaꞌlitannonkehu hiittoonniiti?

¹⁴ Kiristoosira noosi gedee hedo heedhunkero coyiꞌneemmorinni, rosu minenna loosu bayicho noonke amanyootinni, hattono doodhineemmo doorshinni isi lawishsha harunsineemmo. Doodhineemmo doorshi Kiristoosi harunsaano ikkate sharrammeemmota leellishannoha ikka hasiissannosi. Maganu ayyaaninni massagantannori, mitturino iimi Anninsa Yihowa ledo noonsa jaalooma hunansara diwodhitanno. Kiristoosira noosite gedee hedo heedhunkero, fonqolu iillannonke wote iillannonke fonqolo qeelle saꞌneemmo. Mitto doorsha doodhinammora albaanni ninkeneeto togo yine xaꞌma hasiissannonke: ‘Dancha doorsha doodhate kaaꞌlannoehu Qullaawu Maxaafihu xintu seeri hiikkonneeti? Kiristoosa ikkoommero maa assanno? Yihowa hagiidhannohu hiittoo doorsha doodhummorooti?’ Mitto doorsha doodhineemmo wote kuri xaꞌmuwa heda roso assiꞌra hasiissannonke. Hanni mito lawishsha laꞌno. Mitto mittonka lawishsha laꞌneemmo wote dancha doorsha doodhate kaaꞌlannonkeha Qullaawu Maxaafiha xintu seera ronseemmo.

15, 16. Kiristoosira noosi gedee hedo heedhannonke gede assiꞌra, (a) galte doodhineemmo wote (b) jaalla doodhineemmo wote kaaꞌlitannonkehu hiittoonniiti?

¹⁵ Galte dhoodhineemmo wote. Tenne daafira kulannoha Qullaawu Maxaafiha xintu seera 2 Qorontoosi 6:14, 15 te aana afiꞌra dandiineemmo. (Qummeeshsha nabbawi.) Phaawuloosi coyiꞌrinori, Maganu ayyaaninni massagamanno manchi maalaamittete coye illachishanno manchi ledo jaalooma hasiissannosikkita leellishanno. Galte doodhineemmo wote tenne amaale harunsa dandiineemmohu hiittoonniiti?

¹⁶ Jaala. Umi Qorontoosi 15:33 aana nooha Qullaawu Maxaafiha xintu seera lai. (Qummeeshsha nabbawi.) Magano waajjanno manchi ayyaanaamittesi gawajjantanno gede assitannosiri ledo dijaaloomanno. Hanni tenne amaale harunsa dandiineemmo gara hedi. Lawishshaho, dagoomittete webisayite horoonsiꞌneemmo wote tenne amaale harunsa dandiineemmohu hiittoonniiti? Woy mittu afoottokki manchi interneetete widoonni geeme godoꞌlatto gede koyisihero ma assatto?

17-19. Maganu ayyaaninni massagamanke, (a) ayyaanaamittetenni lophineemmokki gede guficho ikkannore hooꞌlate, (b) dancha mixo fushshiꞌrate, (c) kawa kaꞌaa higino coye tirate kaaꞌlitannonkehu hiittoonniiti?

 ¹⁷ Ayyaanaamittetenni lophineemmokki gede guficho ikkannonke coye. Phaawuloosi ammanate roduuwasi qorowisiisino qorowishshi ninkerano kaaꞌlannonke. (Ibiraawoota 6:1 nabbawi.) Xeertiꞌra hasiissannonkehu ‘tidhinokki loosi’ maati? Ayyaanaamittenkera guficho ikkannonkehu haafu coyi baalu tidhinokkiho. Kuni xintu seeri ninkeneeto togo yine xaꞌmineemmo gede assannonke: ‘Kuni assooti maalu loosira karsameemmo gede assannoe? Shiima yanna giddo lowo woxe afiꞌnanni gede assanno yinanni looso loosa hasiissannoe? Gashshoote soorrate sharrantannori ledo karsama hasiissannoekkihu mayiraati?’

¹⁸ Ayyaanaamittete mixo fushshiꞌra: Yesuusi Ilaalu Sibikatesi yannara coyiꞌrinori, ma gari mixo fushshiꞌra hasissannonkero xawisanno. (Mat. 6:33) Maganu ayyaaninni massagamanno manchi ayyaanaamittete mixo fushshiꞌranno. Kuni xintu seeri ninkeneeto togo yine xaꞌmineemmo gede assannonke: ‘Kaffi yiino roso rosate mixo fushshiꞌra hasiissannoe? Konne looso loosa hasiissannoe?’

¹⁹ Kawa kaꞌaa higino coye tira: Phaawuloosi Roomaho noo songo amaalino amaale kawa kaꞌaa higino coye tirate kaaꞌlitannonkehu hiittoonniiti? (Rom. 12:18) Yesuusi harunsaano ikkinoommo daafira “mannu baalu ledo keere” heeꞌrate sharrama hasiissannonke. Coyi kawa kaꞌaa higannonke wote maa assa hasiissannonke? Wolootu coyidhannore macciishsha gimbeemmonso, ‘keere banxeemmore’ ikkate sharrammeemmo?—Yai. 3:18.

20. Ayyaanaamittetenni lophate murciꞌroottohu mayiraati?

²⁰ Qullaawu Maxaafiha xintu seera hiincanke Maganu ayyaaninni massagammeemmota leellishshanno mixo fushshineemmo gede kaaꞌlitannonke gara leellishanno lawishshuwa laꞌnoommo. Maganu ayyaaninni massagamanke hagiirru noo heeshsho heeꞌneemmo gede kaaꞌlitannonke? Konni birxichi hanafora kullihu Rooberti togo yiino: “Yihowa ledo nooe jaaloomi kaajjado ikkita, dancha minaannanna dancha anna ikkoommo. Xa hagiirru noo heeshsho heeꞌranni noommo.” Ninkeno ayyaanaamittetenni lophate sharrammeemmoha ikkiro hattoo atoote afiꞌneemmo. Maganu ayyaaninni massagamanke xaa yannara hagiirru noo heeshsho, albillitte qole, “halaalaancho heeshsho” heeꞌrate kaaꞌlitannonke.—1 Xim. 6:19.