HAGIIRRU noo heeshsho heeꞌra giwanno manchi dino. Ikkollana heeꞌnoommo yanna ‘qarrissannota’ ikkitinohura baalunkura qarru iillannonke. (2 Xim. 3:1) Iillitinonke miico, fayyimmate qarri, looso hooga, xissonna wolu yaachishanno coyi sunu sununni hagiirrinke baꞌꞌanno gede assara dandaanno. Maganu soqqamaano nafa hexxo mudhitaranna hagiirrinsa baꞌꞌara dandaanno. Atera togoori iillinoheha ikkiro, albi gede hagiirraamo ikkate kaaꞌlannoheri maati?

Tenne xaꞌmora dawaro afiꞌnammora albaanni, hanni addu hagiirri maatironna wolootu fonqolo ikkannori iillinsarono hagiirrinsa baikki heeꞌra dandiitino gara laꞌno. Hakkuunni gedensaanni hagiirrinke baꞌꞌannokki gedenna lexxanno gede assiꞌra dandiineemmohu hiittoonniitiro ronseemmo.

Mittu manchi duucha wote osoꞌlanno woy faasiiqanno daafira calla hakku manchi hagiirraamoho yaa diꞌꞌikkino. Hanni mitto lawishsha hedi: Age dimbino manchi osoꞌlara dandaanno. Dimbisi higanno wote kayinni osolisi baeenna dadillunna qarru woꞌmino heeshshosiwa higanno. Kuni manchi shiima yanna geeshsha osoꞌlino daafira calla addu hagiirre afiꞌrino yaa didandiinanni.—Law. 14:13.

Hagiirru wodanu giddonni burqanno akataati. Hagiirru “danchare afiꞌneenna woy afiꞌneemmo yine hexxineenna macciishshantanno hedooti.” Hagiirraamo ikkate yaa, heeshshonke giddo faffoteno ikko qarru yannara hagiidhate yaate. (1 Tes. 1:6) Mittu manchira qarru iillisirono hagiirraamo ikka dandaanno. Lawishshaho, Yesuusi soqqamaasine isi daafira, farcidhino daafira gannoonninsa. Insa kayinni “Yesuusi suꞌmira yite shollinye adha hasiissannonsata egentino daafira, tashshi yaannansa [Sanihediriini songo] albinni fulte” hadhino. (Soq. 5:41) Soqqamaasine hagiidhitinohu gannoonninsa daafira diꞌꞌikkino. Kayinni insa Maganu soqqamaasine ikkitino daafira, isira ammanamansa hagiirraamma ikkitanno gede assitinonsa.

Hagiirru adhine ilammannire woy mulla afiꞌnannire diꞌꞌikkino. Togo yineemmohu mayiraati? Korkaatuno addu hagiirri, Maganunnihu qullaawu ayyaani laalanno gumaati. Qullaawu ayyaani kaaꞌlonni, hagiirreno ikko wole “haaro mannimma” uddiꞌra dandiineemmo. (Efe. 4:24; Gal. 5:22) Hagiirraamma ikkanke, heeshshonke giddo iillannonke qarra dandee heeꞌrate kaaꞌlitannonke.

Yihowa hedo, uullate danchu coyi callu heeꞌraraati ikkinninna, xa heeꞌnoommo yanna gede bunshe batidhara diꞌꞌikkino. Ikkollana wolootu assitannohu bushu coyi Yihowa hagiirraamo ikkannokki gede diassinosi. Maganu Qaali “Jawaantenna hagiirru Qullaawa Minesi no” yaanno. (1 Dud. 16:27) Qoleno soqqaamaanosi assitannohu danchu coyi Yihowa ‘wodana hagiirsiisanno.’—Law. 27:11.

Coyi ninke hendoommo gede ikka hoogiro yaada dihasiissannonke; hatto ikkiro Yihowa  lawishsha harunsineemmo. Tenne yannara hagiirrinke baꞌꞌara wodhantenni, noonkeha dancha coye illachishanna albillitte daggannota dancha yanna cincatenni agadha dandiineemmo. a

Qullaawu Maxaafi fonqolu iillinsarono hagiirrinsa baikkinni heeꞌrino manni lawishsha kulannonke. Buutote qarri iille heeꞌreennansa kaajje saino manni giddo mittu Abirihaamiiti. (Kal. 12:10-20; 14:8-16; 16:4, 5; 20:1-18; 21:8, 9) Abirihaami fonqolu iillinosiha ikkirono hagiirrisi dibaino. Tennera kaaꞌlinosiri maati? Haaro alamera Mesihichu gashshooti hunda heeꞌranno heeshsho xabbe leeltinosi. (Kal. 22:15-18; Ibi. 11:10) Yesuusi togo yiino: “Anniꞌne Abirihaami ane barra lae hagiidhate halchino; afe kae hagiidhino.” (Yoh. 8:56) Ninkeno albillitte afiꞌneemmoha hagiirsiisanno coye hiincine hagiidha dandiineemmo.—Rom. 8:21.

Abirihaami gede, soqqamaasinchu Phaawuloosino ikko soqqanshote jaalisi Silaasi Maganu eino qaale illachishshino. Insa kaajjado ammana noonsareeti; qoleno fonqolu iillinonsaha ikkirono hagiirrinsa baikki heedhino. Lawishshaho ganne kaꞌne usuru minira eessininsahu gedensaanni, “Hashshu taalootira Phaawuloosinna Silaasi huuccattotenninna faarsotenni Magano [galaxxitino].” (Soq. 16:23-25) Insa hexxonsa illachishansanna qarru iillinonsahu Kiristoosi suꞌmira yiteenna ikkinota afansa hagiirraamma assitinonsa. Ninkeno Phaawuloosinna Silaasi gede Maganoho ammanamme soqqamme afiꞌneemmo atoote woꞌmanka wote heda dandiineemmo.—Fil. 1:12-14.

Yannankerano alamete doyichora noo roduuwinke giddo, qarru iillinsarono hagiirraamma ikkitinori no. Lawishshaho, Bocaasa 2013nni Filippiinsi gobbara Hayaani yinanniti wolqaataame hombobalatte kaꞌu yannara 1,000 saꞌannori Yihowa Farciꞌraasine minensa hooggino. Takiloobaani yinanni katamira heeꞌrannohu minesi hooginohu Joorji yinanni rodii togo yiino: “Hatte yannara roduuwu qarrantinoha ikkirono hagiirraammaho. Macciishshaminonke hagiirre xawisa didandeemmo.” Baxi geeshshi qarri iillinkerono Yihowa assinonkere hendeemmoha ikkiro woꞌmanka wote hagiirraamma ikka dandiineemmo. Yihowa hagiirsiisannonkere maa uyinonke?

Yihowa jaalla ikkanke hagiidhineemmo gede assitannonke. Hanni hedi: Kalqete Alame Mooticha egenninoommo. Isi Annankeeti, Maganonkeetinna, Jaalankeeti!—Far. 71:17, 18.

Heeshsho uyinonkehu Yihowaati; qoleno hagiidhinanni heeꞌra dandiineemmo gede asse kalaqinonke. (Ros. 3:12, 13) Yihowa isiwa woshshinonke daafira isi mannu oosora hedinore wodanchinoommo. (Qol. 1:9, 10) Konnira heeshshonke hagiirru noota ikka dandiitanno. Qoleno uullate aana noohu rooru manni kalaqammoommohu mayiraatiro diafino. Phaawuloosi tenne daafira coyiꞌranni togo yiino: “‘Ille laꞌinokkiha, macca macciishshitinokkiha, mannu wodani hedinokkiha, Maganu baxxannosirira qixxeessino’ yine borreessinoonni. Maganu goꞌlino coye Ayyaanisinni leellishinonke. Ayyaanu, Maganu giddo noori baalu gatikkinni qonqolche afanno.” (1 Qor. 2:9, 10) Yihowa mannu oosora hedinore afanke hagiirsiissannonketa diꞌꞌikkitino?

Hanni Yihowa assinonkeha wole coye hedi. Cubbinkera maaro afiꞌneemmota afanke tashshi diassitannonke? (1 Yoh. 2:12) Maganu maarosinni, muli yanna giddo haaro alame abbeemmo yee qaale einonke. (Rom. 12:12) Xaa yannara nafa Yihowa ayyaanaamittete roduuwa uyinonke. (Far. 133:1) Qoleno Qullaawu Maxaafi Yihowa mannasi Sheexaanunna agaanintetewiinni agarannonsata kulanno. (Far. 91:11) Maganu uyinonkeha konne baalanka atoote hiincineemmoha ikkiro, albinni roore hagiirraamma ikkineemmo.—Fil. 4:4.

Hagiirraamo ikkino Kiristaanchi hagiirrisi lexxanno gede assiꞌra dandaanno? Yesuusi togo yiino: “Konne coye kuloommoꞌnehu hagiirriꞌya giddoꞌne heeꞌranno gedeetinna kiꞌne hagiirrino woꞌma ikkanno gedeeti.” (Yoh. 15:11) Tini hagiirrinke lexxanno gede assiꞌra dandiineemmota dileellishshanno? Hagiirrinke lexxanno gede assiꞌra, giira roore bubbanno gede haqqe worate gedeeti. Giira iibbitanno gede haqqe wora hasiissanno. Hatteente gede, hagiirrikki lexxara hasiꞌrittoro ayyaanaamittete sagale sagaꞌla hasiissannohe. Qullaawu ayyaani hagiirre afiꞌratto gede kaaꞌlannoheta deꞌooti. Konni daafira, Yihowa qullaawa ayyaana aannohe gede xaꞌmirattohanna qullaawu ayyaanisinni borreessinoonni Qaalesi huuccatto assidhe hiincattoha ikkiro, hagiirraamo ikka dandaatto.—Far. 1:1, 2; Luq. 11:13.

Yihowa hagiirsiisannore ganyite assattoha ikkiro, hagiirrikki lexxanno. (Far. 35:27; 112:1) Togo yineemmohu mayiraati? Korkaatuno ninke kalaqammoommohu ‘Magano waajjateetinna hajajosi agadhateeti;’ qoleno “kuni mannu woꞌmunkura hasiisannoho.” (Ros. 12:13) Wole yaattonni, kalaqammoommohu Maganu fajjo wonshateeti. Konni daafira, Yihowara soqqammeemmoha ikkiro, heeshshonkenni hagiirraamma ikka dandiineemmo. b

Heeshshonkenni hagiirraamma ikkinummoro, wole horono afiꞌneemmo. Baxi qarri iillinkerono iimi Anninkera hagiirrunni soqqammeemmoha ikkiro, Isi hagiidhanno. (Mar. 16:15; 1 Tes. 5:16-18) Hagiirraamma ikkinummoro, uminke horo agurre Maganu Mangiste balaxisiinseemmo. (Mat. 13:44) Togo assanke qolte hagiirrinke lexxanno gede, uminkera ayirrinyu heeꞌrannonke gede, hattono woloota hagiirsiinseemmo gede kaaꞌlitannonke.—Soq. 20:35; Fil. 1:3-5.

Ameerikaho Nibiraska yinanni yuniversite xiinxallaanchi, “Xa heeshshokkinni hagiirraamo ikkittoro, albillitte roore fayyimma afiꞌratto” yee borreessino. Qullaawu Maxaafino “Hagiirraamu wodani mannimmate fayyimma aanno” yaanno. (Law. 17:22) Ee, hagiirrikki lexxanni haꞌranno wote, fayyimmakkino woyyaabbanno.

Konni daafira, heeꞌnoommohu qarru woꞌmino alame giddo ikkirono, huuccattotenni, hattono Maganu Qaale xiinxallatenninna hiincatenni qullaawa ayyaana afiꞌnummoro hagiirraamma ikka dandiineemmo. Qoleno xa afiꞌnoommo atoote hiincineemmoha, dancha lawishsha ikkitinonkeri faale haꞌneemmohanna Maganu fajjo assineemmoha ikkiro hagiirrinke lexxanno. Togo assinummoro “Keeraanchoho Maganunni tashshi yoosi; isono golosi assiro” yitannoti Faarso 64:10 aana noo hedo adda ikkitinota uminke heeshshonni wodanchineemmo.