1. Muli diri kawa mite gobbuwara mannaho ammaꞌnote noonsa lao soorrantinohu hiittoonniiti?

 BIꞌREERA alamete aana heeꞌrannohu batinyu mannira uminsa ammaꞌno noonsa. Muli diri kawa kayinni, coyi dibashsho gedeeti. Xaa yannara ammaꞌno dinoe yaanno manni batiꞌranni haꞌrino. Isinni mite gobbuwara, rooriidi manni ammaꞌno noonsakkita coyiꞌranno. b—Mat. 24:12.

2. Batinyu manni ammaꞌno noonsakkiha ikkinohu mayiraati?

² Ammaꞌno noonsakkita coyiꞌranno manni kiiro lexxitanni noohu mayiraati? c Mitootu qiniite afiꞌrate kabbi facci yitannoha woy qarransa calla illachishshannoha ikkara dandaanno. (Luq. 8:14) Alba ammaꞌno noonsahu mitu manni, Maganu dino yaannoha ikkino. Wolootu Maganu noota ammantannoha ikkirono, ‘Ammaꞌno saꞌino faashineeti, yannankera kaaꞌlitannori dino, hattono sayinsetenna halaalu ledo sumuu diyitanno’ yite ammantanno. Insa jaallansa, rosiisaanonsa woy xaadooshshu buussa kalaqamu dayinohu suutu soorronniiti yitanna macciishshitannoha ikkara dandaanno; ikkirono Maganu no yine ammannanni gede assannori maatiro seekkite dixiinxallitino. Wolootu kayinni ammaꞌnote marooti woxehonna silxaanete hagaagganno daafira ammaꞌno effidhe gibbanno. Mite gobbara, gashshootu ammaꞌnote looso hoolanno seera fushshanno.

3. Konni birxichira maa ronseemmo?

³ Yesuusi, “Gosa baala . . . rosaanoꞌya asse” yee hajajinonke. (Mat.  28:19) Ikkina ammaꞌno noonsakki manni Magano baxannonna Kiristoosi rosaano ikkanno gede kaaꞌla dandiineemmohu hiittoonniiti? Mittu manchi lophino qooxeessi kulleemmo sokka macciishshanno gede woy macciishshannokki gede assara dandaannota huwata hasiissannonke. Lawishshaho, farciꞌneemmo woyite Awuroppaho lophino manni Iisiyu manni geeshsha macciishsha hoogankera dandaanno. Mayira? Batinyu Awuroppu manni Qullaawu Maxaafi daafira mitore afino, hattono baalankare kalaqinohu Maganoho yinanna macciishshino. Iisiyaho kayinni, rooru manni Qullaawu Maxaafi daafira horo diafino yaa dandiinanni; qoleno insa Kalaqaanchu noota ammantannokkiha ikkara dandaanno. Konni birxichira, soqqammeemmo woyite xaandeemmo manni lophino gobba woy ammanannori ikkihano ikkiro, insara Maganunnire kula dandiineemmo gara ronseemmo.

4. Gara ikkitino lao heedhannonke gede assiꞌra hasiissannonkehu mayiraati?

⁴ Gara ikkitino lao heedhohe. Diru diruku ammaꞌno noonsakki manni Yihowa Farciꞌraasine ikkanno. Insa giddo batinyu albanni danchu amanyooti noonsareeti; qoleno ammaꞌno rosiissannorinna assitannori babbaxxinoha ikkino daafira dibaxxanno. Wolootu kayinni alba assitannoha gara ikkinokki coye agura hasiissinonsa. Yihowa kaaꞌlonni suwashshu wodani noonsa manninni xaandeemmota dihuluullammeemmo.—Soq. 13:48; 1 Xim. 2:3, 4.

5. Duucha woyite mannu kulleemmo sokka macciishshanno gede assannohu maati?

⁵ Shaqqadonna hayyicha ikki. Duucha woyite mannu kulleemmo sokka macciishshanno gede assannohu coyiꞌneemmo coye ikkikkinni coyiꞌneemmo garaati. Shaqqillunninna hayyotenni, hattono insara godowinta hendeemmota leellishanno garinni coyiꞌneemmoha ikkiro macciishshitankera dandiitanno. Mannu kulleemmo sokka macciishshanno gede diokkineemmo. Hatteentenni, ammaꞌnote daafira noonsa lao huwatate woꞌnaalleemmo. Lawishshaho, mitootu egentinokki manni ledo ammaꞌnonnire hasaawa dibaxxanno. Wolootu manna Maganu daafira xaꞌma busha amanyooteeti yite heddanno. Mitu manni, hakko iso Yihowa Farciꞌraasine ledo Qullaawu Maxaafire hasaawanna mannu laꞌꞌannonsata saalanno. Ikkihano ikkiro, hedonsa huwatate woꞌnaala hasiissannonke.—2 Xim. 2:24.

6. Soqqamaasinchu Phaawuloosi mannu macciishshannosi garinni sabbakinohu hiittoonniiti? Ninke isi lawishsha harunsa dandiineemmohu ma garinniiti?

⁶ Mitu manni, “Qullaawa Maxaafa,” “kalaqama,” “Magano” woy “ammaꞌno” yitanno qaalla macciishsha baxannokkiha ikkiro maa assa dandiineemmo? Soqqamaasinchu Phaawuloosi lawishsha harunsine insa wolu garinni hasaawisa dandiineemmo. Phaawuloosi Yihudu manna hasaawisanno woyite Qullaawa Borronni qummi assanno. Ariyofagoosi yinanniwa Giriikete egennaamma hasaawisanno woyite kayinni Qullaawa Maxaafa xaaddotenni qummi diassino. (Soq. 17:2, 3, 22-31) Phaawuloosi lawishsha harunsa dandiineemmohu hiittoonniiti? Qullaawa Maxaafa ammanannokki manchinni xaandummoro, hasaawinseemmosi woyite Qullaawa Maxaafa xaaddotenni qummi assa hoongummoro danchaho. Hakku manchi ate ledo Qullaawu Maxaafire hasaabbanna mannu afasira hasiꞌrannokkita huwatittoro, qummeeshsha wole doogonni lawishshaho mobayile woy taabileete horoonsidhe nabbawate woꞌnaali.

7. Umi Qorontoosi 9:20-23 kultanno garinni Phaawuloosi gede maa assa hasiissannonke?

⁷ Mannu hedo huwati, hattono macciishshi. Xaandeemmo mannira addi addi hedo heedhannonsa gede assinori maatiro huwatate woꞌnaala hasiissannonke. (Law. 20:5) Hanni xaano Phaawuloosi lawishsha laꞌno. Isi lophinohu Ayihudete mereerooti. Ikkirono, isi dagate wolu garinni sabbaka hasiissinosi; korkaatuno insa Yihowanna Qullaawa Borro daafira affe yitinori dino. Qoqqowinkera heeꞌranno manna mararatenna hedonsa huwatate borronke xiinxallanna songonke giddo noore gikki yitino roduuwa amaaꞌla dandiineemmo.—1 Qorontoosi 9:20-23 nabbawi.

8. Mannu ledo Qullaawu Maxaafire kayinse hasaawa dandiineemmo doogga giddo mitte hiittenneeti?

 ⁸ Mixonke halaale afa hasidhannore hasate. (Mat. 10:11) Soqqanshonkenni dancha guma afiꞌrate, mannu hedonsa kulannonke gede xaꞌmanna seekke macciishsha hasiissannonke. Mittu Ingilizete heeꞌranno rodii xaadanno manna, galte hagiirru noota assiꞌra dandiinanni gara, ooso danchu garinni lossiꞌra dandiinanni gara woy mannu miicinkero dandiine heeꞌneemmo gara xaꞌmanno. Isi, mannu qolanno dawaro macciishshi gedensaanni, “Mitu 2,000 diri albaanni borreessinoonni amaale leellishohe?” yaanno. Hakkiinni Qullaawu Maxaafi giddonni nabbawanni noota kulikkinni, doorino qummeeshsha mobayilesinni nabbawanno.

9. Maganu daafira hasaawa baxannokki manna kaaꞌla dandiineemmohu hiittoonniiti?

⁹ Maganu daafira hasaawa baxannokki manni halaale afanno gede kaaꞌlate, insa baxxanno hajo kayinse hasaawisa dandiineemmo. Lawishshaho, batinyu manni kalaqama naadanno. Hakko daafira togo yaa dandiineemmo: “Sayinsete fullahaano mitto haaro coye kalaqqannohu, wonanni noore laꞌe ikkinota huwatoottoha ikkara dandaanno. Lawishshaho, mayikirafoone seekkinoonnihu macca xiinxallineeti, hattono kaameera seekkinoonnihu ille xiinxallineeti. Atera maa lawannohe? Kalaqamu dayinohu hedeweelchootinso, kalaqinohu no?” Mannu qolanno dawaro seekkite macciishshitto gedensaanni togo yaa dandaatto: “Maandisootu maccanna ille xiinxallite haaro coye kalaqqannoha ikkina, illenna macca kalaqinohu ayetiyya? Mittu hundi wari borreessaanchi yiinori dhagge ikkannoe. Isi ‘Maccanke kalaqino Magani macciishshannoho; illenke kalaqinohu laꞌꞌannoho. . . . Manna woꞌmanka rosiisannohu isi egenno diafiꞌrinoho?’ yee borreessino. Mite sayinsete fullahaano tenne hedo ledo sumuu yitanno.” (Far. 94:9, 10) Hakkiinni jw.org^® aana “Qaalu Xaꞌmuwanna Woꞌnaalshuwa” yaannohu hunda aante aantete fultannota “Heeshshote Kaimi Daafira Noonsa Lao” yitanno viidiyubba giddonni mitte leellisha dandaatto. (ADDI ADDI BORRO > ADDI ADDI VIIDIYO yaannohu hunda lai.) Woy Heeshsho Dagginohu Kalaqanteeti? nna Heeshshote Kaima—Dawaronsa Afa Hasiissannota Onte Xaꞌmuwa (Amaaru Afoo) yitanno biroshere giddo mitte aattonsara dandaatto.

10. Maganu daafira hasaawa baxannokki mannira farciꞌra dandiineemmohu hiittoonniiti?

¹⁰ Batinyu manni albillitte dancha heeshsho heeꞌrate halchanno. Ikkirono, mitootu uulla baꞌanno woy heeꞌrate injiitannokkita ikkitanno yite yaaddanno. Mittu Noorweyi gobbara songuwa towaatanno rodii, Maganu daafira hasaawa baxannokki manni alamete aana ikkanni noori daafira hasaawa baxannota coyiꞌrino. Isi manna  keere haaꞌrihu gedensaanni togo yaanno: “Albillitte woyyitino heeshsho heeꞌneemmo gede assankera dandaannohu aye lawannohe? Poletiku gashshaanoti, sayinsete fullahaanositinso woleho?” Insa qoltanno dawaro seekke macciishshi gedensaanni, albillitte dancha yanna daggannota kulanno qummeeshsha fushshe nabbawanno woy afuunni kulanno. Mitu manni uulla baꞌannokkitanna danchu manni ise aana hegerera heeꞌrannota macciishshanno woyite dhagge assiꞌranno.—Far. 37:29; Ros. 1:4.

11. Dancha duduwo babbaxxino garinni kulate woꞌnaala hasiissannonkehu mayiraati? Roomu Sokka 1:14-16 kultanno garinni Phaawuloosi lawishsha harunsa dandiineemmohu hiittoonniiti?

¹¹ Soqqammeemmo woyite xaandeemmo mannira dancha duduwo babbaxxino garinni kulate woꞌnaala hasiissannonke. Mayira? Korkaatuno xaandeemmo manni baalu mitto diꞌꞌikkino. Mitto mancho baxisanno coye wolu kayinni macciishsha giwara dandaanno. Mitu manni xaaddotenni Maganu woy Qullaawu Maxaafi daafira kullummonsaro macciishshara dandaanno; wolootu kayinni balanxe wole hajo kayinse hasaawinsummoro macciishshitankera dandiitanno. Ikkihano ikkiro, duuchunku gari mannira farciꞌrate woꞌnaala hasiissannonke. (Roomu Sokka 1:14-16 nabbawi.) Ikkollana, suwashshu wodani noonsa manni wodanira halaalu wixi lophanno gede assannohu Yihowa ikkinota dea dihasiissannonke.—1 Qor. 3:6, 7.

12. Kalaqaanchu daafira hede egenninokkihu Iisiyu mannira farciꞌrate maa assa dandiineemmo?

¹² Alamete doyichora nooti batinye halashshaano Iisiyu manninni xaaddanno; konni manni giddo batinyu dayinohu gashshootu ammaꞌnote looso hoolino gobbuwanniiti. Mite Iisiyu gobbuwara heeꞌrannohu batinyu manni Kalaqaanchu nooronna teꞌee hede diegennino. Mitootu afate quqquxantanno daafira Qullaawa Maxaafa xiinxallitanno gede xaꞌminanninsa woyite sumuu yitanno; wolootu kayinni umi qara sumuu diyitanno. Ikkina insara farciꞌra dandiineemmohu hiittoonniiti? Mite woꞌnaalshu noonsa halashshaano faasiiqqe hasaawisansa, insara heddannota leellishansa hattono Qullaawu Maxaafiha xintu seera harunsa kaaꞌlitinonsa gara kulansa soqqanshonsanni dancha guma afidhanno gede assitinonsa.

13. Mannu Qullaawu Maxaafire afa hasiꞌranno gede assannori maa ikkara dandaanno? (Aaniidi qoolira noo foto lai.)

¹³ Batinyu manni umi qara Qullaawu Maxaafi giddo noo hayyo afa hasiꞌranno. (Ros. 7:12) Niwu Yorkete katamira Chayinu Afoo coyiꞌranno mannira farcidhanno rodoo togo yitino: “Insara hedeemmata leellishatenna coyidhanno woyite seekke macciishshate woꞌnaaleemma. Insa muli yannara dagginore ikkituro togo yee xaꞌmeemmansa: ‘Gobba rossinanni heedhinoonni? Looso afidhini? Qooxeessu manna fiile haadhini?’” Mito woyite hatto assa Qullaawu Maxaafi halaale kulate doogo fantanno. Hasiisannoha ikkiro hatti rodoo ledde togo yitanno: “Mannu ledo sumuu yee heeꞌrate kaaꞌlannohu qaru coyi maa lawannohe? Qullaawu Maxaafi giddonni mitto lawishsha leellishohe? Lawishshu togo yaanno: ‘Coye kayisa wayi gammala kurkure xullo fushshate ledo mittete; konnira gibbo kaꞌukkinni coyiꞌransho aguri.’ Tini amaale mannu ledo salaametenni heeꞌnanni gede kaaꞌlitannoha dilawannohe?” (Law. 17:14) Hatto assa, galagalle marre hasaawinsammonsara hasiꞌranno manna bade afate kaaꞌlitannonke.

14. Mittu Iisiyaho heeꞌranno rodii Maganu noota diammaneemmo yaanno manna kaaꞌlannohu hiittoonniiti?

¹⁴ Maganu noota diammaneemmo yaanno manninni xaandummoro ma assa hasiissannonke? Mittu duucha woyite Iisihayo ammaꞌno noonsakki mannira farciꞌranno rodii togo yiino: “Mittu manchi ‘Maganu noota diammaneemmo’ yaannohu hakko qooxeessira duuchu manni magansiꞌranno maganna dimagansiꞌreemmo yaateeti. Hakko daafira, roore maganna mannu seekkinotanna kapho ikkitinota kuleemmosi. Duucha woyite ‘Mannu umisira Magano kalaqiꞌre afannoni?’ yitannota Ermiyaasi 16:20 nabbaweemmonsa. Hakkiinni  ‘Ikkina halaalaancho Maganonna mannu seekkino maganna bade afa dandiinannihu hiittoonniiti?’ yee xaꞌmeemmo. Qoltanno dawaro seekke macciishshummo gedensaanni “Hanni kiꞌne magannatero, kunni kaꞌa ikkara noore kullenke” yitannota Isayaasi 41:23 nabbaweemmonsa. Hakkiinni Yihowa albillittete daafira masaalino masaalo leellisheemmonsa.

15. Soojjaati Iisiyira heeꞌranno rodii lawishshinni maa ronseemmo?

¹⁵ Mittu Soojjaati Iisiyira heeꞌranno rodii manna galagale mare hasaawisanno woyite maa assannoro coyiꞌranni togo yiino: “Qullaawu Maxaafi amaale hayyonnita ikkitinota leellishshanno lawishshuwa, konni albaanni woꞌmitinota Qullaawu Maxaafi masaalo, hattono kalqete alame galtanno seera leellisheemmonsa. Hakkiinni kuri coyibba halaalaanchunna hayyichu Kalaqaanchi noota leellishshanno gara xawiseemmonsa. Mittu manchi Maganu noota boode geeshsha nafa ammanannota leellishannoha ikkiro, Qullaawu Maxaafi Yihowa daafira yaannore kuleemmosi.”

16. Ibiraawoota 11:6 kultanno garinni, Qullaawu Maxaafi rosaano Maganohonna Qaalisira ammana heedhannonsa gede kaaꞌla hasiissannohu mayiraati? Ninke ammanansa lexxitanno gede kaaꞌla dandiineemmohu hiittoonniiti?

¹⁶ Ammaꞌno noonsakki manna Qullaawa Maxaafa xiinxallinseemmo woyite, Maganoho noonsa ammana lexxitanno gede ganyine kaaꞌla hasiissannonke. (Ibiraawoota 11:6 nabbawi.) Qullaawu Maxaafira noonsa ammana kaajjitanno gedeno kaaꞌla hasiissannonke. Hatto assate, mite Qullaawu Maxaafi hajo hinge hinge hasaawa hasiissannonkeha ikkara dandaanno. Xiinxallinseemmo yanna baalantera, Qullaawu Maxaafi Maganu Qaale ikkinota leellishshanno taje hasaawa hasiissannonkeha ikkara dandaanno. Lawishshaho, Qullaawu Maxaafi masaalo woꞌmitino gara, Qullaawu Maxaafi sayinsetenna xaggete ledo sumuu yaanno garanna, giddosi noo amaale heeshshonkera kaaꞌlitannonke gara haransine hasaawa dandiineemmo.

17. Mannaho baxille leellishanke mayi guma abbitanno?

¹⁷ Ammaꞌno heedhunsarono hooggunsarono mannaho baxille leellinshe Kiristoosi rosaano ikkitanno gede kaaꞌlineemmonsa. (1 Qor. 13:1) Rosiinseemmohu, Maganu baxannonketanna ninkeno banxammosira hasiꞌrannota huwattanno gedeeti. Diru kiiro alba ammaꞌno boonannokkihu lowo kume ikkanno manni Yihowara noonsa baxilli lexxanno daafira cuuamanno. Hakko daafira, gara ikkitino lao heedhoꞌne, hattono duuchunku gari mannira baxille leellishshe. Coyidhanno woyite seekkitine macciishshe. Hedonsa huwatate woꞌnaalle. Hattono Kiristoosi rosaano ikkitanno gede kaaꞌlate dancha lawishsha ikkensa.