1. Dartu iillannonke woyitira qixxaawa hasiissannonkehu mayiraati?

 YESUUSI shinasira albaanni noo hashsha, rosaanosi ikka hasidhannore baala gimbanninsata coyiꞌrino. (Yoh. 17:14) Hatte yannanni kayise halaalu magansiꞌra baxannokki manni, ammanantinota Yihowa Farciꞌraasine xiiwanni keeshshino. (2 Xim. 3:12) Alamete goofimarchi gambisanni haꞌranno woyite, diinnanke albinni roore gibbannonketa anfoommo.—Mat. 24:9.

2-3. (a) Waajja gawajjitanno yineemmohu mayiraati? (b) Konni birxichira maa ronseemmo?

² Dartu iillannonke woyitira xaanni qixxaawa dandiineemmohu hiittoonniiti? Albillitte iillankera dandaanno qarra baala heda hasiissannonke yaa diꞌꞌikkino. Hatto assinummoro, waajjanna yaaddo wolqa huntankera dandiitanno. Albillitte iillankera dandaanno qarra hendanni yaandeemmoha ikkiro, hexxo mudhine xa nafa Yihowara soqqama agurrammora dandiineemmo. (Law. 12:25; 17:22) ‘Diininke Daawuloosi’ ninke gawajjate wolqaataamo uduunnicho asse horoonsiꞌrannoti waajjate. (1 Phe. 5:8, 9) Ikkina albillitte iillannonke darte dandee saꞌꞌate xa maa assa dandiineemmo?

³ Konni birxichira, Yihowa ledo noonke jaalooma kaajjishiꞌra dandiineemmo garanna xaanni hatto assa hasiissannonkehu mayiraatiro ronseemmo. Qoleno albinni roore worbuulle ikkate maa assa dandiineemmoro laꞌneemmo. Hakkiinni, mannu giwannonketa dandiine heeꞌneemmo gara ronseemmo.

4. Ibiraawoota 13:5, 6 kultanno garinni maa addaxxa hasiissannonke? Mayira?

⁴ Yihowa baxannonketanna horo tuge agurannonkekkita addaxxino. (Ibiraawoota 13:5, 6 nabbawi.) Lowo diri albaanni  qixxaabbinote mitte Agarooshshu Shaera togo yitanno hedo no: “Magano seekke afino manchi, qarru barra Iso addaxxanno.” Addanko, darte dandee saꞌꞌate Yihowa baxanna woꞌmunni woꞌma iso addaxxa hasiissannonke; hattono Yihowa baxannonketa huluullama dihasiissannonke.—Mat. 22:36-38; Yai. 5:11.

5. Yihowa baxannoheta huwatate mayi kaaꞌlannohe?

⁵ Albinni roore Yihowawa shiqate mixiꞌne Qullaawa Maxaafa barru baala nabbambo. (Yai. 4:8) Nabbambeemmo woyite Yihowa akatta lawishshaho, baxillesi, maarosinna shaqqillesi huwanto. Isi coyiꞌrinonna assinori daafira nabbambeemmo woyite, mageeshshi geeshsha baxannonkero wodanchate woꞌnaallo. (Ful. 34:6) Mitootaho horonta baxille leellinshe egenninoonninsakki daafira, Maganu baxannonsata ammana qarra ikkitansara dandiitanno. Aterano hatto lawannoheha ikkiro, barru baala Yihowa maaronna shaqqille leellishinohe gara borreessiꞌri. (Far. 78:38, 39; Rom. 8:32) Yihowa ate umikkira assinohere hedittoronna Qaalisi giddo nabbawoottore hiincittoro, isi assinoheha batinye coye huwatattora dandaatto. Yihowa assinoherira galatattosiha ikkiro, isi ledo noohe jaaloomi lexxanni haꞌranno.—Far. 116:1, 2.

6. Faarso 94:17-19 kultanno garinni, huuccattotenni wodanikkita Yihowara hasaapha kaaꞌlitannohehu hiittoonniiti?

⁶ Ganyine huuccatto assiꞌno. Hanni annisi anga cuꞌmiꞌre noo qaaqqo hedi. Kuni qaaqqi iillinosiha danchano ikko busha coye annisira waajjikkinni hasaaphanno. Atino barru baala giddokkita Yihowara huuccattotenni kuꞌlattoha ikkiro, isi ledo noohe jaaloomi hakko anninna qaaqqi gedeeha ikkara dandaanno. (Faarso 94:17-19 nabbawi.) Huuccatto assiꞌratto woyite, ‘wodanikkira noore coꞌo assite’ Yihowara hasaaphi, hattono waajjishinoherenna yaachishinohere baala isira kuꞌli. (Erq. 2:19) Tini maaho kaaꞌlitannohe? Hatto assittoro, ‘mannu hedora aleenni ikkinoha Maganu keere’ afiꞌratto. (Fil. 4:6, 7) Konni garinni huucciꞌrattoha ikkiro, albinni roore Yihowawa shiqatto.—Rom. 8:38, 39.

7. Maganu Mangiste abbitanno atooti woꞌmannota ammana kaaꞌlitannohehu hiittoonniiti?

⁷ Maganu Mangistesi widoonni atoote abbeemmo yee eino qaali woꞌmannota addaxxino. (Kir. 23:19) Maganu eino qaale wonshannota huluullamattoha ikkiro, Sheexaanunna miillasi shabbarsitahera dandiitanno. (Law. 24:10; Ibi. 2:15) Maganu Mangistera noonke ammana xaanni kaajjishiꞌra dandiineemmohu hiittoonniiti? Yihowa Mangistesi widoonni abbeemmo yee qaale eino coyenna isi qaalesi wonshannota huluullammeemmokkihu mayiraatiro haja assite xiinxalli. Tini kaaꞌlitannohehu hiittoonniiti? Hanni ammanasinni kainohunni lamala diro usuraminohu Istenilii Joonisi yinanni rodii lawishsha laꞌno. b Kuni rodii kaajjenna ammaname heeꞌranno gede kaaꞌlinosiri maati? Isi togo yiino: “Maganu Mangiste daafira nooe egenno ammanaꞌya  kaajjishshino, hattono Mangistesi abbitanno atooti woꞌmasi gattannokkita buuxaꞌyanna hili geeshsha nafa huluullama hoogaꞌya, kaajje uurreemmo gede kaaꞌlitinoe.” Atino Maganu eino qaali woꞌmannota addaxxakki, albinni roore Yihowawa shiqatto gedenna waajjite sheke yaattokki gede kaaꞌlitannohe.—Law. 3:25, 26.

8. Gambooshsheho noonke lao maa leellishshanno? Xawisi.

⁸ Gambooshshe ganyine haꞌno. Gambooshshu albinni roore Yihowawa shinqeemmo gede kaaꞌlannonke. Gambooshsheho noonke lao, albillitte iillannonke darte dandiine saꞌneemmoronna teꞌee leellishshanno. (Ibi. 10:24, 25) Hatto yineemmohu mayiraati? Xa shiimu coyi gambooshshe hosiisannonkeha ikkiro, heeshshonke qarru giddo tunge gambooshshe assiꞌneemmo yanna dagganno woyite hiitto ikkineemmo? Xaa yannara gambooshshe hosa hoogate murciꞌnummoro, gibbannonkeri gamba yineemmota hoolate woꞌnaaltanno woyite hexxo mudhine gamba yaa diagurreemmo. Gambooshsheho noonke baxilli lexxanno gede assiꞌneemmo yanna xaati. Gambooshshe haꞌra banxeemmoha ikkiro, gashshaano nafa gamba yineemmota hoolate woꞌnaalturo, mannaho ikkikkinni Maganoho hajajammeemmo.—Soq. 5:29.

9. Qummeeshshuwa wodanaho wodhineemmoha ikkiro albillitte iillannonke dartira qixxaambanni heeꞌnoommo yineemmohu mayiraati?

⁹ Banxeemmo qummeeshshuwa wodanaho wodhino. (Mat. 13:52) Surrenke guuta ikka hooggurono, Yihowa wolqaataamu ayyaanisinni wodanaho wodhinoommo qummeeshshuwa qaangeemmo gede kaaꞌlannonke. (Yoh. 14:26) Mittu Soojjaati Jarmanera callichosi usurroonni rodii togo yiino: “Hatte yannara wodanaho wodhoommota lowo xibbe ikkitanno qummeeshshuwa qaagaꞌya baasa hagiirsiissinoe. Calliꞌya noommoha ikkirono, babbaxxinoha Qullaawu Maxaafi roso hiinca dandoommo.” Kuni rodiinke wodanaho wodhino qummeeshshuwa, Yihowawa shiqanno gede hattono ammanamenna kaajje heeꞌranno gede kaaꞌlitinosi.

10. Faarso wodanaho wodhate woꞌnaala hasiissannonkehu mayiraati?

¹⁰ Ayyaanaamittete faarso wodanaho wodhino, hattono faarsino. Phaawuloosinna Sillaasi Filiphisiyusi katamira usurantu yannara, wodanaho wodhitinota ayyaanaamittete faarso faarsitino. (Soq. 16:25) Sooviyeeti Yuneenete gashshooti yannara roduuwanke Sayibeeriya gadachine haaꞌne haꞌninsa yannara insa kaajjitanno gede kaaꞌlinonsari maati? Rodoo Maariya Fedeni hakkawarita qaagge togo yitino:  “Faarsote maxaafi giddo noota qaangeemmo faarso baala faarsinoommo.” Ise ‘Tini faarso ninke baalanka jawaachishshinonke, hattono Yihowawa shinqeemmo gede kaaꞌlitinonke’ yite coyidhino. Atino baxatto faarso faarsatto woyite jawaante afiꞌrattoti dihuluullissannote. Hakko daafira, faarso wodanaho wodhate xaanni woꞌnaallo!—“ Worba Assie” yitanno saaxine lai.

11-12. (a) Umi Saamueeli 17:37, 45-47 kultanno garinni Daawiti worba ikkanno gede kaaꞌlinosiri maati? (b) Daawiti lawishshinni hiikkonne kaajja roso ronseemmo?

¹¹ Iillannonke darte dandee heeꞌrate, worbuulle ikka hasiissannonke. Ani worba diꞌꞌikkoommo yite hedattoha ikkiro maa assa dandaatto? Addu worbimma afiꞌneemmohu geeshshinkenni, wolqankenni woy dandoonkenni ikkinokkita deꞌooti. Hanni wedellichu Daawiti Gooliyaadi ledo gereerami woyite ikkinore hedi. Jigeessa mancho Gooliyaadi laꞌne Daawiti laꞌnanni woyite, isi shiimiccohonna gari dhuka diafiꞌrinoho; qoleno Daawitira olu uduunni dinosi yaa dandiinanni. Isira bise nafa dinosi. Ikkirono Daawiti worbaho. Daawiti hakkonni booꞌnaleessu manchi Gooliyaadiwa witiitanni mare gane karino.

¹² Daawiti worba ikkanno gede kaaꞌlinosiri maati? Isi Yihowa ledosi noota addaxxino. (1 Saamueeli 17:37, 45-47 nabbawi.) Daawiti, isonooto jigeessu manchi Gooliyaadi ledo diheewisiisino. Hatteentenni Yihowa albaanni Gooliyaadi bukicho ikkinota huwatino. Tenne xaggenni maa ronseemmo? Yihowa ledonke noota addaxxankenna giwannonke manni Woꞌmanka Dandaanno Magani albaanni bukicho ikkinota huwatanke worbuulle ikkineemmo gede kaaꞌlitannonke. (2 Dud. 20:15; Far. 16:8) Ikkina dartu iillankera albaanni xaanni worbimmanke lexxitanno gede assiꞌra dandiineemmohu hiittoonniiti?

13. Albinni roore worbuulle ikkate mayi kaaꞌlannonke? Xawisi.

¹³ Xa Maganu Mangisteha dancha duduwo faajjetenni sabbankeemmoha ikkiro, worbimmanke lexxitanno. Hatto yineemmohu mayiraati? Korkaatuno sabbaka Yihowa addaxxa ronseemmo gedenna manna waajjineemmokki gede kaaꞌlitannonke. (Law. 29:25) Ispoorte loosa hirrenke kaajjishshannonte gede, minunni mine haꞌne, gudumaaleho, farciꞌrate fulloommokki woyite, hattono daddalu basera sabbakanke albinni roore worbuulle ikkineemmo gede kaaꞌlitannonke. Xa worbimmatenni farciꞌra rosanke, gashshaano sabbakate loosonke  hooltanno woyite nafa farciꞌra agurreemmokki gede kaaꞌlitannonke.—1 Tes. 2:1, 2.

14-15. Naansii Yuweninna Vaalentiina Garnoviskaya lawishshinni maa ronseemmo?

¹⁴ Worbuulle ikkinota leellishinori lame ammanamino roduuwi lawishshinni lowore ronseemmo. Rodoo Naansii Yuweni hojja harancho (1.5 m) ikkiturono, hawa gede bashshi diyitannote. c Ise Maganu Mangisteha dancha duduwo sabbaka hoolliserono sabbaka diagurtino. Hakko daafira, Chayinaho 20 saꞌꞌanno diro usurroonnise. Qortannoseri ise gobbansara noohu wolu manninni roore “mokkookkate” yitinose.

¹⁵ Vaalentiina Garnoviskaya yinanni rodoono Sooviyeeti Yuneenete gashshooti yannara sase higge xaphoomunni 21 meddi yaanno diro usurantino. d Mayira? Ise sabbakate lowo geeshsha murcidhino daafira qortannoseri “gobba huntino finqilaati” yitinose. Kuri ammanamino roduuwi worbuulle ikkanno gede kaaꞌlinonsari maati? Insa Yihowa ledonsa noota addaxxino.

16. Addu worbimma afiꞌrate kaaꞌlannonkehu qaru coyi maati?

¹⁶ Aleenni laꞌnummonte gede, albinni roore worbuulle ikkate uminke wolqanna jawaante hexxa dihasiissannonke. Hatteentenni Yihowa ledonke nootanna ninkera gaaramannota ammana hasiissannonke. (Mar. 1:29, 30; Zak. 4:6) Addu worbimma afiꞌrate kaaꞌlannonkehu qaru coyi konneeti.

17-18. Yohaannisi 15:18-21 kultanno garinni, Yesuusi mayyee qorowisiisinonke? Xawisi.

¹⁷ Mannu ayirrisinkero tashshi yaannonke; ikkollana mannu giwinonke daafira calla ditidhinoommoreeti yine heda dihasiissannonke. Yesuusi togo yiino: “Ane Manchi Beettinni kainohunni mannu giwiꞌnero, giddonsanni fushshe huniꞌnero, mishiꞌneronna suꞌmaꞌne bushatenni kayisiro baꞌraadhinoonnireeti.” (Luq. 6:22) Yesuusi hatto yaasi mayyaate?

¹⁸ Yesuusi, Kiristaanu gimbanninsata baxanno yaanni nooha diꞌꞌikkino. Hatteentenni isi iillannonkere kule qorowisiisanni noonke. Ninke alamete wido diꞌꞌikkinoommo. Yesuusi rosiisino  rosi garinni heeꞌneemmo, hattono isi duduwino sokka dudumbeemmo. Konninni kainohunni alame gibbannonke. (Yohaannisi 15:18-21 nabbawi.) Yihowa hagiirsiisa hasiꞌneemmo. Annanke Yihowa banxeemmo daafira mannu giwinkero, tini ninke didhibbannonke.

19. Soqqamaasinete lawishsha harunsa dandiineemmohu hiittoonniiti?

¹⁹ Aye manchino coꞌyirannori woy assannori, Yihowa Farciꞌraasincho ikkakkinni saalatto gede assahera horo wodhitooti. (Mik. 4:5) Yesuusa shini gedensaanni soqqamaasinesi Yerusaalamete assitinore xiinxallanke, manna waajjineemmokki gede kaaꞌlitannonke. Insa Yihudunniri ammaꞌnote massagaano mageeshshi geeshsha gibbannonsaro affino. (Soq. 5:17, 18, 27, 28) Ikkollana insa barru baala qullaawu minira haꞌra diagurtino, hattono Yesuusi rosaano ikkitinota leellishshino. (Soq. 5:42) Insa waajjite loosonsa diagurtino. Ninkeno loosu basera, rosu mine hattono olliinkera Yihowa Farciꞌraasine ikkanke anfanni gede assanke, manna waajjineemmokki gede kaaꞌlitannonke.—Soq. 4:29; Rom. 1:16.

20. Yesuusi soqqamaasine mannu giwinsarono hagiirraamma ikkitinohu mayiraati?

²⁰ Yesuusi soqqamaasine hagiirsiisinonsari maati? Insa gimboonninsahu mayiraatiro affino; qoleno Yihowa fajjo assansanni miincoonninsata ayirrinyu gede assite laꞌino. (Luq. 6:23; Soq. 5:41) Soqqamaasinchu Pheexiroosi togo yee borreessino: “Dancha coye assatenni qarra adhitiniro nafa, baraadhinoonni.” (1 Phe. 2:19-21; 3:14) Mannu giwannonkehu gara ikkino coye assankenni ikkinota anfoommo daafira, tenne waajjine Yihowara soqqama diagurreemmo.

21-22. (a) Albillitte iillannohe dartira qixxaawate maa assate hedootto? (b) Aananno birxichira maa ronseemmo?

²¹ Dartu iillannonkehu woy gashshaano loosonke hooltannohu mamooteetiro dianfoommo. Ikkirono, xa Yihowa ledo noonke jaalooma kaajjishiꞌneemmoha, worbimmanke lexxitanno gede assiꞌneemmoha hattono mannu giwannonketa waajjinemmokkiha ikkiro, dartu iillannonke woyitira qixxaambanni heeꞌnoommo. Xa qixxaawanke albillitte kaajjine uurrineemmo gede kaaꞌlitannonke.

²² Ikkollana gashshaano loosonke hooltanno woyite maa assa hasiissannonke? Aananno birxichira, loosonke hoollanni woyite Yihowara soqqama agurreemmokki gede kaaꞌlannonkeha xintu seera ronseemmo.