1-2. (a) Maatewoosi 28:18-20 Yesuusi hajajino garinni Kiristaanu songohu qaru loosi maati? (b) Konni birxichira hiikkuri xaꞌmuwara dawaro afiꞌneemmo?

 YESUUSI reyotenni kaihu gedensaanni, rosaanosi Galiilu Ilaalira gamba yitanno gede kulinonsa. Soqqamaasinesi hakkiicho gamba yitu yannara, baasa quqquxante no. (Mat. 28:16) Yesuusi “onte xibbe roortino rosaanora mitte hige [leellinohu]” hattee yannara ikkikki digatino. (1 Qor. 15:6) Ikkina Yesuusi rosaanosi hakko gamba yitanno gede kulinonsahu mayiraati? “Hadhine gosa baala . . . rosaanoꞌya asse” yitannota hagiirsiissanno hajajo aansaraati.—Maatewoosi 28:18-20 nabbawi.

² Yesuusi hatto yee hajaji woyite macciishshitu rosaano, gedensoonni hundite Kiristaanu songo miilla ikkitino. Tenne songohu qaru loosi, manna Kiristoosi rosaano assate. b Xaa yannara alamete doyichora lowo kume ikkitanno songuwa no; kuri songuwahuno qaru loosi manna Kiristoosi rosaano assate. Konni birxichira, aante noote shoole xaꞌmuwara dawaro afiꞌneemmo: Manna rosaano assate loosi lowo geeshsha hasiisannoho yineemmohu mayiraati? Manna rosaano assate maa maa assa hasiissannonke? Baalunku Kiristaani konni loosiꞌra kaaꞌlama dandaanno? Konne looso loosate cinca hasiissannonkehu mayiraati?

3. Yohaannisi 14:6 nna 17:3 kultanno garinni manna rosaano assate loosi lowo geeshsha hasiisannoho yineemmohu mayiraati?

³ Manna rosaano assate loosi lowo geeshsha hasiisannoho yineemmohu mayiraati? Korkaatuno mittu manchi Maganu jaala ikka dandaannohu Kiristoosi rosaancho ikkiro callaati. Qoleno, Kiristoosi harunsitannori xaa yannara hagiirru noo heeshsho heedhanno; hattono albillitte hegerera heeꞌrate hexxo afidhanno. (Yohaannisi 14:6; 17:3 nabbawi.) Addanko, Yesuusi taalle nookki looso eeggo uyinonke; ikkirono konne looso loonseemmohu uminke wolqanni diꞌꞌikkino. Soqqamaasinchu Phaawuloosi, isonootonna ledosi soqqantannore, “Ninke Maganu ledo loonseemmoreeti” yiino. (1 Qor. 3:9) Guuntete xeꞌne noonkeha ikkirono, Yihowanna Kiristoosi ayirrado looso uyitinonke!

4. Ivaaninna Metildi woꞌnaalshinni maa ronseemmo?

⁴ Manna rosaano assate loosi lowo hagiirre afiꞌnanni gede assanno. Hanni Kolombiyaho heeꞌrannori Ivaaninna minaamasi Metildi lawishsha laꞌno. Insa Diiveri yinanni wedellichira farcidhino; hatte yannara Diiveri, “Heeshshoꞌya woyyeessiꞌra hasiꞌreemmoha ikkirono, hatto assa didandoommo” yiinonsa. Diiveri alba bokisanyaho, jingilli assitanno xagga adhannohonna ago quwa sayise agannoho; qoleno isi meya jaalasi Eriika ledo heeꞌranno. Ivaani togo yiino: “Diiveri heeꞌrannohu fafowa ikkino daafira, iso xiinxallisate sabbu batiꞌrino doogo giddoonni biskilliitetenni seeda saate haꞌneemmo. Diiveri akatasi woyyeessiꞌrinota laꞌe, Eriikano Qullaawa Maxaafa xiinxalla hanaffino. Gedensoonni Diiveri jingilli assitanno xagga adha, ago quwa sayise aganna tuntuꞌmote heewo heewisama agurino. Qoleno isinna Eriika adhamino.” Metildi togo yitino: “Diiverinna Eriika 2016nni cuuantu yannara alba Diiveri ‘Heeshshoꞌya woyyeessiꞌra hasiꞌreemmoha ikkirono, hatto assa didandoommo’ yiinoti qulli yiteennanke hindiiddo qalxitinonke.” Addanko, mannu Kiristoosi rosaano ikkanno gede kaaꞌlanke lowo hagiirre afiꞌneemmo gede assitannonke.

5. Mannu Yesuusi rosaano ikkanno gede kaaꞌlate assa hasiissannonkehu umi coyi maati?

⁵ Mannu Yesuusi rosaano ikkanno gede kaaꞌlate assa hasiissannonkehu umi coyi, Yihowa daafira rosa hasiꞌranno manna hasate. (Mat. 10:11) Xaandeemmo manni baalunkura farciꞌneemmoha ikkiro, addanka Yihowa Farciꞌraasine ikkinoommota leellinsheemmo. Qoleno Yesuusi sabbakke yee hajajinonke hajajo wonshanke, addu Kiristaana ikkinoommota leellishshanno.

6. Soqqanshonkenni dancha guma afiꞌrate mayi kaaꞌlannonke?

⁶ Mitu manni Qullaawu Maxaafi halaale rosate quqquxamannoha ikkirono, lowo manni kulleemmonsa sokka umi qara macciishsha hoogara dandaanno. Togoo manna halaale rosanno gede jawaachisha hasiissannonkeha ikkara dandaanno. Soqqanshonkenni dancha guma afiꞌrate, seekkine qixxaawa hasiissannonke. Mannu macciishsha baxanno yite hedatto hajo doori. Hakkiinni tenne hajo ma garinni xawisattoro hedi.

7. Mannu ledo hasaawa hanafa dandaattohu hiittoonniiti? Mannu coyiꞌrannore macciishshanna hedonsa misha hooga hasiissannote yaattohu mayiraati?

⁷ Lawishshaho hasaawissanni nootto mancho togo yite xaꞌma dandaatto: ‘Mitte hajo daafira hasaambammora hasiꞌreeti. Xaa yannara alame woꞌmate aana qarru batiꞌrino. Mannu oosora iillanno qarra baala huntannoti  alame woꞌma gashshitanno mangiste hasiissannonkeha dilawannohe?’ Hakkiinni Daanieeli 2:44 nabbabbe xawisa dandaatto. Woy hasaawissanni nootto mancho “Ooso danchu garinni lossiꞌrate kaaꞌlannohu qaru coyi maa lawannohe?” yite xaꞌma dandaatto. Hakkiinni Marro 6:6, 7 nabbabbe xawisi. Doodhootto hajo ikkitutano ikkituro, hasaawisatto manchi daafira hedi. Qullaawu Maxaafi halaale rosansa kaaꞌlitannonsa gara hedi. Hasaawisatto woyite coyidhannore macciishshi, hattono hedonsa mishshooti. Tini hedonsa huwatatto gede kaaꞌlitannohe; qoleno insa kulattonsare macciishshitara dandiitanno.

8. Manna galagalle marre hasaawisa agura hasiissannonkekkihu mayiraati?

⁸ Mittu manchi Qullaawa Maxaafa xiinxallate sumuu yaannohu, haammata higge hasaawisitto gedensaanni ikkara dandaanno. Hatto yineemmohu mayiraati? Korkaatuno hasaawinsoommo manni galagalle marreemmo woyite mine hoogara dandaanno. Qoleno mittu manchi ninke fiile haare kae Qullaawa Maxaafa xiinxalla hanafa geeshsha, haammata hinge mara hasiissannonkeha ikkara dandaanno. Muro lophitannohu waa ganyine hayikkinsirooti. Hatteente gede, hasatto noosi manchi ledo Maganu Qaale ganyine hasaambeemmoha ikkiro, Yihowaranna Kiristoosira noosi baxilli lexxara dandaanno.

9-10. Baalunku Kiristaani suwashshu wodani noonsare hasate loosiꞌra kaaꞌlama dandaanno yineemmohu mayiraati?

⁹ Mittu mittunku Kiristaanchi suwashshu wodani noonsa manni Kiristoosi rosaano ikkanno gede kaaꞌla dandaanno. Konne looso, baino qaaqqo hasanno manni ledo lawisa dandiinanni. Hiittoonni? Hanni mitte halaalaancho xagge laꞌno. Mittu sasu diri qaaqqi qaetenni bai. Konne qaaqqo 500  meddi yaanno manni hasino. Jeefote qaaqqu baihunni 20 saate meddi yitanno yanna gedensaanni hakko qaaqqo badalate irshi giddo mittu manchi afino. Hakku manchi qaaqqo afinotera naandasira dihasiꞌrino. Isi, “Qaaqqo afinohu hasi manna baalanko” yee coyiꞌrino.

¹⁰ Yannankera noohu batinyu manni hakkonni baino qaaqqi gedeeti. Insara hexxo noonsakki daafira, kaaꞌlannonsahu hasiisannonsa. (Efe. 2:12) Sette miliyoone saꞌannoti Yihowa Farciꞌraasine togoo manna hassanni no. Ati Qullaawa Maxaafa xiinxallisatto mancho afiꞌroottokkiha ikkara dandaanno. Ikkollana, ate qoqqowira soqqantannoti mite halashshaano Maganu Qaali giddo noo halaale rosa hasiꞌranno mancho afidhinoha ikkara dandaanno. Mittu rodii woy rodoo Kiristoosi rosaancho ikkanno mancho afidhuro, hasate loosiꞌra kaaꞌlantinori baalu hagiidha dandiitanno.

11. Atera Qullaawa Maxaafa xiinxallisattohu noohekkiha ikkiro, wolu garinni manna rosaano assate loosira kaaꞌlama dandaattohu hiittoonniiti?

¹¹ Atera Qullaawa Maxaafa xiinxallisattohu noohekkiha ikkiro nafa, wolu garinni manna rosaano assate loosira kaaꞌlama dandaatto. Lawishshaho, haaruuddu gambooshshe dagganno woyite faasiiqqe keere haaꞌranna insa kaaꞌla dandaatto. Konni garinni baxille leellishattonsaha ikkiro, addu Kiristaana ikkinoommota huwattanno. (Yoh. 13:34, 35) Gambooshshunniwa qolatto dawaro harancho ikkituro nafa, haaruuddu ammantannore ayirrinyunni xawisa dandiitanno gara rossanno gede kaaꞌlitannonsa. Qoleno haaru halashshaanchi ledo soqqansho fulanna manna hasaawisanno woyite Qullaawa Maxaafa horoonsiꞌranno gede kaaꞌlattosira dandaatto. Hatto assattoha ikkiro, Yesuusi faale haꞌranno gede rosiissanni noottosi.—Luq. 10:25-28.

12. Mannu Yesuusi rosaano ikkanno gede kaaꞌlate baxxitino dandoo hasiissannonke? Xawisi.

¹² Mannu Yesuusi rosaano ikkanno gede kaaꞌlate baxxitino dandoo afiꞌra hasiissannoe yine heda dihasiissannonke. Mayira? Hanni Boliiviyaho heedhannote Festiiniya yinanni rodoo lawishsha laꞌno. Ise Yihowa Farciꞌraasinenni xaaddu yannara nabbawa didandiitanno. Hatte yannanni kayise ise shiima shiima nabbawa rossino. Xa ise cuuantino, hattono wole manna rosiisa baxxanno. Duucha woyite ise lamalate kiiro onte manna Qullaawa Maxaafa xiinxallissanno. Festiiniya xaano seekkite nabbawa dandiitannokkiha ikkirono, lewu manni cuuame Yihowa Farciꞌraasine ikkanno gede kaaꞌlitino.—Luq. 10:21.

13. Diinagge batidhunkerono, manna rosaano assate looso loosanke mayi atoote afiꞌneemmo gede assitannonke?

¹³ Xaa yannara batinyu Kiristaanira diinagge batidhannonsa. Ikkirono, insa manna Qullaawa Maxaafa xiinxallissanno yanna gaaꞌmitino;  tini hagiirraamma ikkitanno gede assitinonsa. Hanni Alaaska yinanni gobbara heedhannote Melaani yinanni rodoo woꞌnaalsha laꞌno. Ise settu diri qaaqqo callase lossidhanno. Qoleno lamalate giddo onte barra loossanno, hattono kaansere amaddino annase dhiwansiisidhanno. Melaani heedhanno qooxeessira ise agurranna wole Yihowa Farciꞌraasine dino. Ise Qullaawa Maxaafa xiinxallissanno manna afiꞌra hasidhino daafira, qorra dandiite soqqansho fultanno gede jawaante afiꞌrate ganyite huuccatto assidhanno. Melaani, Saara yinanni manchonni xaaddino; Saara Maganu suꞌma afasenni lowo geeshsha hagiidhitino. Shiima yanna gedensaanni ise Qullaawa Maxaafa xiinxalla hanaffino. Melaani togo yitino: “Arbete hawarro lowo geeshsha daafursannoeha ikkirono, aninna qaaqqoꞌya haꞌne Qullaawa Maxaafa xiinxallisanke baasa kaaꞌlitinonke. Saara xaꞌmitanno xaꞌmuwara dawaro qolate seekkine xiinxallineemmo; qoleno ise Yihowa jaala ikkase lowo geeshsha hagiirsiissinonke.” Saara mannu giwiserono cincite heedhino, albi ammaꞌnose agurtino, hattono cuuantino.

14. (a) Manna rosaano assate loosi qulxuꞌme woshshaadate gedeeti yineemmohu mayiraati? (b) Phaawuloosi 2 Ximootewoosi 4:1, 2 coyiꞌrinori, maa assatto gede kakkayisannohe?

¹⁴ Soqqanshokkinni dancha guma afiꞌroottokkiha lawiherono, Kiristoosi rosaano ikkara dandaanno manna hasa agurtooti. Yesuusi manna rosaano assate looso, qulxuꞌme woshshaadate ledo lawisinota qaagi. Qulxuꞌme woshshaxxitannori, mitte qulxuꞌmichono amaddukki lowo saate hasidhanni keeshshitara dandaanno. Insa duucha woyite hashshu  taalootira woy soodo calaalate kaꞌe woshshaaxxitanno; hattono qulxuꞌme hassanni yowolotenni faffe hadhara dandiitanno. (Luq. 5:5) Hatteente gede, mite halashshaano halaale afa hasiꞌranno manna babbaxxitino yannaranna qooxeessira cincite hassara dandiitanno. Mayira? Insa hatto assitannohu, dandiitu deerrinni lowo mannira farciꞌrateeti. Konni garinni diinaggaabbe farcidhanno roduuwi, duucha woyite sokkanke macciishsha hasiꞌranno manna afidhanno. Atino lowo manna afiꞌnanni saateranna qooxeessira farciꞌrate woꞌnaala dandaatto?—2 Ximootewoosi 4:1, 2 nabbawi.

15. Manna Qullaawa Maxaafa xiinxallisate cinca hasiissannonkehu mayiraati?

¹⁵ Manna Qullaawa Maxaafa xiinxallisate cinca hasiissannonkehu mayiraati? Korkaatuno loosinke Qullaawu Maxaafi rosaanchi Maganu Qaali giddo noo halaale afannonna baxanno gede kaaꞌla calla diꞌꞌikkino. Rosaanchu Qullaawu Maxaafi Anna ikkinoha Yihowa afannonna baxanno gede kaaꞌla hasiissannonke. Qoleno, Yesuusi rosaanosi maa assitara hasiꞌrannoronna addu Kiristaani Yesuusi hajajo harunsa dandaanno gara huwatanno gede kaaꞌla hasiissannonke. Qullaawu Maxaafiha xintu seera harunsate sharramanno woyiteno cincine kaaꞌla hasiissannonke. Mitootu akatansanna gadensa boodu agani giddo biddi assidhara dandiitanno. Wolootaho kayinni hatto assate lowo yanna hasiissannonsa.

16. Rowuli woꞌnaalshinni maa rosootto?

¹⁶ Peeru gobbara misiyoone ikke soqqamino rodii manna rosaano assate cinca hasiissannota huwatino. Isi togo yiino: “Rowuli yinannihu Qullaawu Maxaafi rosaanchira lame maxaafa xiinxallisoommo. Ikkirono, Qullaawu Maxaafinni rosinore harunsa qarra ikkitinosi. Qoleno maatesi giddo lowo qarri no; isi xonamannoho; konnira oososi diayirrissannosi. Ikkirono, isi gambooshshe ganye daanno; hakko daafira isonna maatesi kaaꞌlate mara diaguroommo. Isi ledo xaandummohunni sase saꞌꞌanno diri gedensaanni, cuuame Yihowa Farciꞌraasincho ikkino.”

17. Aananno birxichira maa ronseemmo?

¹⁷ Yesuusi “Hadhine gosa baala . . . rosaanoꞌya asse” yee hajajinonke. Konne looso loonseemmo woyite, ninketenni baxxitino hedo noonsa manninni lawishshaho, ammaꞌno noonsakki woy Maganu noota ammanannokki manninni xaandammora dandiineemmo. Aananno birxichira, togoo mannira dancha duduwo duduwa dandiineemmo gara ronseemmo.