XIINXALLOTE BIRXICHO 39
Banxeemmo Manni Yihowara Soqqama Aguranno Woyite
“Duucha higge dadillissinosi.”—FAR. 78:40.
FAARSO 102 ‘Wolqa Hoogginore Kaaˈle’
GUULCHO *
1. Maatete miili bohamanno woyite mayi macciishshamankera dandaanno?
BAXXINANNI manni songotenni bohaminoni? Kuni lowo geeshsha dadillisanno coyeeti! Hilda yinanni rodoo togo yitino: “Minaanniˈya adhammummohunni 41 diri gedensaanni reyi woyite, tenne saˈino busha dino yee hedoomma. * Beettiˈya songotenni bohami woyitenna galtesinna oososi agure haˈri woyite kayinni, coyi roore ayirrinoe.”
Yihowa banxanni manni halaalu mininni fulanno woyite mageeshshi geeshsha xissiisiˈnanniro afino (Gufo 2-3 lai) *
2-3. Faarso 78:40, 41 kultanno garinni, Yihowara soqqamaasinesi iso agurtanno woyite mayi macciishshamannosi?
2 Yihowa maatesi giddo noori mite sokkaasine iso agurtu woyite mageeshshi geeshsha dadillinoro hanni hedi! (Yih. 6) Qoleno baxanno mannisi Israeele xaa xaa isira finqiltu yannara Yihowa mageeshshi geeshsha xissiisiˈrinoro heda dandaatto. (Faarso 78:40, 41 nabbawi.) Baxillaanchu iimi Anninke, baxxinanni manni isira soqqama aguranno woyiteno dadillannoti dihuluullissannote. Isira dadilliˈnenna xissoˈne leeltannosi. Mararanno Anna ikkino daafira, hasiissannoˈne jawaante aannoˈne, hattono irkisannoˈne.
3 Konni birxichira, banxeemmo manni Yihowara soqqama aguranno woyite Yihowa aanno kaaˈlo afiˈrate maa assa dandiineemmoro ronseemmo. Qoleno songote giddo togoo coyi tuncu yiinonsa roduuwa kaaˈla dandiineemmo gara laˈneemmo. Hanni kayi balanxe hooˈla hasiissannonketa mitte gara ikkitinokki hedo laˈno.
KIˈNENEETO BUSHA ASSITINOONTE
4. Batinyu anninna amara beettinsa woy beettonsa Yihowara soqqama agurtanno woyite mayi macciishshamannonsa?
4 Annunna ama baxxanno beettinsa woy beettonsa Yihowara soqqama agurtanno woyite, beettonsa kaaˈlate assa hasiissannonsari gatinoha lawansara dandaanno. Luuki yinanni rodii beettinsa bohamihu gedensaanni togo yiino: “Bushu aneeti yee hedoommo. Qoleno goxoommowa bararraaqeemmo. Mito woyite wiˈleemmo; wodaniˈyano xissiisiˈranno.” Hattonni beettise bohaminoti Elizaabeeti yinanni rodoo togo yitino: “Ama assa hasiissannosere assoommaha dilawannoe. Qaaqqiˈya wodanira halaalu qaˈmanno gede assa didandoomma yaate yee hedoomma.”
5. Mittu manchi Yihowara soqqama aguranno woyite, hatti aye soˈrooti?
5 Yihowa ninke mittu mittunkura doodhate dandoo uyinonketa qaaga hasiissannonke. Hatto yaa Yihowara hajajama woy hajajama hooga doodha dandiineemmo yaate. Mite ooso anninsa woy amansa dancha lawishsha ikka hooggunsarono, Yihowara soqqamanna isira ammaname heeˈra doodhitino. Mite ooso kayinni anninsanna amansa insa Qullaawu Maxaafihu xintu seeri garinni lossate sharranturono, lophituhu gedensaanni Yihowara soqqama agura doodhitino. Konni daafira, mittu mittunku Yihowara soqqama woy soqqama hooga doodha dandiineemmo. (Iya. 24:15) Konnira, oosoˈne Yihowara soqqama agurtino daafira dadillitinoonni annuwanna amuuwa, bushu aneeti yitine heddinoonte!
6. Annu woy ama Maganoho soqqama agurtanno woyite oosote mayi macciishshamansara dandaanno?
6 Mito woyite, annu woy ama halaalu mininni fularanna maatensa nafa agure haˈrannoha ikkara dandaanno. (Far. 27:10) Kuni annansanna amansa danchu lawishshi gede assite layidhanno oosora lowo geeshsha xissiisanno coyeeti. Annise bohaminoti Isteri yinanni rodoo togo yitino: “Anniˈya halaalu mininni fulinohu sunu sununni doogame diˈˈikkino; isi Yihowa facci asse agurinohu baxe doodheeti. Tenne afoomma daafira duucha woyite wiˈleemma. Annaˈya baxeemma daafira, bohamita isi keeri daafira woˈmanka woyite yaadeemma. Qoleno hedeweelcho baasa masisannoe.”
7. Annu woy ama bohantinonsa wedellooti daafira Yihowara mayi macciishshamannosi?
7 Wedelloota, anniˈne woy amaˈne bohantinoha ikkiro, lowo geeshsha mararreemmoˈne! Yihowarano xissoˈne leeltannosita horo huluullantinoonte. Yihowa lowo geeshsha baxannoˈne; qoleno ammanantine soqqantinannisi daafira tashshi yaannosi. Ninke roduuwiˈneno banxeemmoˈne. Anniˈne woy amaˈne assitannorira xaˈmantinanniri kiˈne ikkitinoonnikkitano qaagge. Aleenni laˈnummonte gede, Yihowa mittu mittunku manchira doodhate dandoo uyino. Heeshshosi Maganoho sayise oye cuuaminohu “mittu mittunku [manchi] umisi duha duqqa” woy assannore umisi doodha hasiissannosi.—Gal. 6:5.
8. Ammanantinori maatete miilla bohaminohu Yihowawa higanno yanna agadhitanno woyite maa assa dandiitanno? (“ Yihowawa Higi” yitanno saaxineno lai.)
8 Baxxinanni manni bohamiro, barrunni mitto barra higanno yitine hexxaˈne nooreentilla. Hakka geeshsha kayi maa assa dandiitinanni? Umiˈne ammana kaajjishiˈrate sharrama dandiitinanni. Hatto assitiniro, maatete giddo wolootaho, wole agurina bohamihura nafa dancha lawishsha ikkitinanni. Qoleno xissoˈne dandiitine heedhinanni gede kaaˈlitannoˈne jawaante afidhinanni. Hanni ammanaˈne kaajjishiˈrate assa dandiitinanniha mito coye laˈno.
AYYAANAAMITTEˈNE KAAJJISHIˈRATE ASSA DANDIITINANNIRE
9. Yihowawiinni jawaante afiˈra dandaattoti mite doogga hiikkuriiti? (“ Baxxinanni Manni Bohaminoha Ikkiro, Jawaachishshannoˈne Qummeeshshuwa” yitanno saaxineno lai.)
9 Ammanaˈne kaajjite heedhanno gede dandaamiˈnere baala asse. Kiˈnetano ikko maateˈne ayyaanaamitte kaajjishate sharrama agurtinoonte. Tenne assa dandiitinannihu hiittoonniiti? Ganyitine Qullaawa Maxaafa nabbabbinenna hiincitine, hattono woˈmanka woyite songote gambooshshe hadhine Yihowawiinni jawaante afiˈrate sharramme. Annisenna rodoose bohaminoti Joaana yinanni rodoo togo yitino: “Qullaawu Maxaafi giddonni Abigayeeli, Asteeri, Iyyoobi, Yooseefi, Yesuusinna woleno togoo xagge nabbaweemma woyite, wodaniˈya gaˈlabbi yaanno. Insa lawishshi jawaachishannoe, hattono xissoˈyanni beedho afiˈreemma gede kaaˈlannoe. Baxxitino faarsonkeno lowo geeshsha jawaachishshannoe.”
10. Faarso 32:6-8 xisso dandiine heeˈnanni gara kultannohu hiittoonniiti?
10 Yaachishannoˈnere baalankare Yihowara hasaaphe. Lowo geeshsha dadillitinanni yannarano Yihowa huucciˈra agurtinoonte. Baxillaanchu Maganinke coye isi hedanno garinni heddinara kaaˈlannoˈne gede eeggifatte; qoleno ‘rosiisannoˈne gedenna hadhinanni doogo kulannoˈne gede’ huuccidhe. (Faarso 32:6-8 nabbawi.) Hige giddoˈneta Yihowara hasaaphitinanni woyite, lowo geeshsha xissiisidhinanniha ikkara dandaanno. Ikkirono, wodaniˈne xisso Yihowara gudisante leeltannosi. Isi lowo geeshsha baxannoˈne; hattono giddoˈneta gudissine hasaaphitinasira koyisinoˈne.—Ful. 34:6; Far. 62:7, 8.
11. Ibiraawoota 12:11 kultanno garinni, Yihowa baxillunni seejjanno seejjo addaxxa hasiissannonkehu mayiraati? (“ Boha Yihowa Baxille Leellishshanno” yitanno saaxineno lai.)
11 Cimeeyye murtino muro ayirrisse. Boha Yihowa mitto mancho baxillunni seejjanno doogooti. Qoleno bohami manchirano ikko wolu baalunkura kaaˈlitanno qixxaawooti. (Ibiraawoota 12:11 nabbawi.) Songote giddo mitootu, ‘Cimeeyye ewela bohansa digaraho’ yitara dandiitanno; ikkollana, duucha woyite hatto yitannori cubbo loosino mancho bushiisha hasidhannokkire ikkitinota qaaga danchate. Anfoommokkihu lowo coyi heeˈrara dandaanno. Konni daafira, yoote komite ikkite loossu cimeeyye addaxxanke hayyote; mayira yiniro, cimeeyye Qullaawa Borroha xintu seera harunsatenna ‘Kaaliiqa hagiirsiissanno yoo’ yaate dandiiture baala assitanno.—2 Dud. 19:6.
12. Mitootu Yihowa seejjora halamansanni mayi horo afidhino?
12 Cimeeyye baxxinanni manchi bohamanno gede murteenna hatteera halamaˈne, bohamino manchi Yihowawa higanno gede kaaˈlitasira dandiitanno. Aleenni kulliti Elizaabeeti togo yite noore coyidhino: “Beettinke ledo noonke aante facci asse agura lowo geeshsha qarra ikkitinonke.” Ise ledde togo yitino: “Ikkollana, isi Yihowawa higihu gedensaanni, bohama hasiissinoenkulla bohamoommo yiino. Gedensoonni isi tennenni lowore rosinota coyiˈrino. Yihowa seejjo woˈmanka woyite gara ikkitinota huwatoomma.” Minaannise Maarki qole togo yiino: “Lowo yanna saˈu gedensaanni, beettinke Yihowawa higanno gede kaaˈlinosiri giddo mittu ninke isi ledo noonke aante aguranke ikkitinota kulinonke. Yihowa hajajammeemmosi gede kaaˈlinonke daafira lowo geeshsha galaxxeemmosi.”
13. Xissoˈne dandiitine heedhinanni gede mayi kaaˈlaˈnera dandaanno?
13 Qarraˈne huwata dandiitanno jaallaˈnera giddoˈneta hasaaphe. Hexxo mudhitinannikki gede jawaachishshaˈnera dandiitannori gikki yitino roduuwiwa aanne. (Law. 12:25; 17:17) Aleenni qummi assiniti Joaana togo yitino: “Callimma amaddinoe woyiti no. Ammaˈneemma jaallaˈyara hasaaphaˈya kayinni lowo geeshsha kaaˈlitinoe.” Ikkina songote giddo mitu roduuwi roore dadillitinanni gede assannoˈnere coyidhuro maa assa dandiitinanni?
14. ‘Mimmitu soˈro aguranna mimmito cinca’ hasiissannonkehu mayiraati?
14 Roduuwaˈne cincitine saˈe. Baalunku manni gara ikkinore coyiˈranno yine heda didandiineemmo. (Yai. 3:2) Ninke baalunku guuntete xeˈne noonkereeti; hakko daafira, mitootu yitannore habbe gurchaabburo woy heddukkinni xissiisannoˈnere coyidhuro dhagge assidhinoonte. Soqqamaasinchu Phaawuloosi togo yee amaalinonketa qaagge: “Kiˈne kiˈneneewa koffi yitinoonni coye baala cincatenni agurre. Kiristoosi agurinoˈnente gede, kiˈneno mimmitiˈnera agurre.” (Qol. 3:13) Fiixise bohaminoti mitte rodoo togo yitino: “Yihowa, sheshifachinsheemmo yite dadillissinoe roduuwa gatona yeemma gede kaaˈlinoe.” Songo ammanantinore maatete miilla kaaˈla dandiitannohu hiittoonniiti?
SONGO KAAˈLA DANDIITANNO GARA
15. Baxxanno manni muli yannara bohaminonsa maate ma garinni kaaˈla dandiineemmo?
15 Ammanantinore maatete miilla anga fantine haadhensa. Miiriyaami yinanni rodoo, rodiise bohamihu gedensaanni gambooshshe haˈra waajjitinota coyidhino. Ise togo yitino: “Mannu mayyaaekka yee waajjoomma. Ikkollana batinyu roduuwi anente gede dadillitino; qoleno insa bohamino rodiiˈyara koffi yitinota leellishannore mittoreno dicoyidhino. Roduuwaho Maganu ikkonsana, xissiisiˈre noomma woyite callate diegennoomma.” Wole rodoo qolte togo yitino: “Beettinke bohamihu gedensaanni, roduuwu dagge sheshifachishshinonke. Mitu roduuwi yineemmori leella giwinonke yitino. Insa ledoˈya wiˈlitino, hattono jawaachishshanno sokka borreessite sokkinoe. Insa assinori lowo geeshsha kaaˈlinoe!”
16. Songo shesho hasiissannonsare agurtukki kaaˈla dandiitannohu hiittoonniiti?
16 Ammanantinore maatete miilla kaaˈla agurtinoonte. Wolu woyitinni roore insara kiˈne baxillinna jawaante hasiissannonsahu xaati. (Ibi. 10:24, 25) Mito woyite, bohamino manchi maate songote giddo mitootu insano bohantinohu gede assite kiirte gambo gibbannonsata wodanchitino. Togoori kalaqamanno gede assinoonke! Roorenkanni anninsa woy amansa bohamino wedelloota galatanna jawaachisha hasiissanno. Minaannise bohame maatesi agure haˈrinoti Maariya togo yitino: “Mitu roduuwi minira dagge sagale wortinonke; hattono maatete magansiˈra assiˈneemmo gede kaaˈlitinonke. Insara xissoˈya leeltinonsa; hakko daafira ledoˈya wiˈlitino. Mannu ane daafira gara ikkinokkire coyiˈri woyiteno insa anera haˈlite coyidhino. Insa addinta wodanaˈya diggi assitinoe.”—Rom. 12:13, 15.
Songo ammanantinore maatete miilla baxillunni kaaˈla dandiitanno (Gufo 17 lai) *
17. Cimeeyye shaqqillunni kaaˈla dandiitannohu hiittoonniiti?
17 Cimeeyye, ammanantinore maatete miilla jawaachishate afidhini faro baala horoonsidhe. Baxxanno manni Yihowara soqqama agureenna dadillitino roduuwa sheshifachishate baxxino hadari nooˈne. (1 Tes. 5:14) Gambooshshu hanafara albaanninna gambooshshu gedensaanni insa jawaachishate faro hasidhe. Qaensa martine hasaawissensa, hattono huuccatto assensa. Ledonsa soqqamme; woy mito woyite maatete magansiˈrara koyissensa. Cimeeyye dadillinoha Yihowa geˈreewo towaata, hattono insara baxillenna shaqqille leellisha hasiissannonsa.—1 Tes. 2:7, 8.
HEXXO MUDHITINOONTE, WOˈMANKA WOYITE YIHOWA ADDAXXE
18. Layinki Pheexiroosi 3:9 kultanno garinni, Yihowa cubbo loossinori ma assitara hasiˈranno?
18 Yihowa “baalunku aagintaawe higara” ikkinnina ‘ayino baˈˈara dihasiˈranno.’ (2 Pheexiroosi 3:9 nabbawi.) Mittu manchi jawa cubbo loosinoha ikkirono, heeshshosi Maganu albaanni muxxete. Yihowa ninke cubbaataammu daafira yee lowo waaga yaano Beettisi wodo baatinota qaagge. Yihowa iso agurtinori wirro isiwa higganno gede baxillunni kaaˈla hasiˈranno. Isi insa higganno yee hexxanno; Yesuusi qaetenni fule baino beetti daafira coyiˈrino lawishshi tenne leellishanno. (Luq. 15:11-32) Halaalu mininni fulinohu batinyu manni gedensoonni baxillaanchu iimi Anninsawa higino. Songono insa anga fante haadhinonsa. Aleenni kulliti Elizaabeeti beettise songo higeenna lowo geeshsha hagiidhitino. Ise hakkawarita qaagge togo yitino: “Batinyu roduuwi hexxo mudhineemmokki gede jawaachishshinonke daafira galaxxeemmansa.”
19. Woˈmanka woyite Yihowa addaxxa hasiissannonkehu mayiraati?
19 Woˈmanka woyite Yihowa addaxxa dandiineemmo. Isi aannonke biddishshi ninke kaaˈlannonkeho ikkinnina gawajjannonkeha diˈˈikkino. Isi baxxannosirenna magansidhannosire baala lubbora baxannoho shaqqado Annaati. Xissiisidhinanni woyite Yihowa horonta tuge diagurannoˈne. (Ibi. 13:5, 6) Aleenni kullihu Maarki togo yiino: “Yihowa horo tuge diagurinonke. Isi qarru amadannonke woyite ninkewiinni horo dixeertiˈranno.” Yihowa mannu hedora aleenni ikkitinota “jawa wolqa” kiˈnera aa diaguranno. (2 Qor. 4:7) Addanko, baxxinanni manni Yihowara soqqama aguriro nafa, ammanantinenna hexxo mudhitinikki heeˈra dandiitinanni.
FAARSO 44 Qarramino Manchi Huuccatto
^ GUFO 5 Banxeemmo manni Yihowara soqqama aguranno woyite lowo geeshsha dadillineemmo. Konni birxichira, togoori ikkanno woyite Yihowara mayi macciishshamannosiro laˈneemmo. Qoleno ammanantinori maatete miilla shesho afiˈratenna ayyaanaamittetenni kaajjite heeˈrate maa assa dandiitannoro ronseemmo. Songote giddo noohu baalunku togoo qarri amadino maate sheshifachishanna kaaˈla dandaanno garano ronseemmo.
^ GUFO 1 Konni birxichi giddo kulloonni suˈmuwa soorrinoonni.
