1-2. (a) Lawishsha 16:31 kultanno garinni, geerra roduuwanke ma garinni laˈˈa hasiissannonke? (b) Konni birxichira hiittee xaˈmuwara dawaro afiˈneemmo?

AMEERIKAHO Arkansaasi paarke giddo almaazete yinanni shiilo mullawa afiˈnara dandiinanni. Ikkollana, tini shiilo umo laˈnanni woyite bushshunku noota ikkitino daafira xabbe dileeltanno. Hakko daafira, almaaze laˈˈannohu batinyu manni maa lainoro wodancha hooge, tenne muxxe jiro agure saˈˈara dandaanno.

² Mite doogonni laˈniro, ammanaminohu geerru roduuwinke tenne almaaze gedeeti; insa muxxe jirooti. Maganu Qaali togoohu jajjabbu roduuwi awuuwe baˈlattote gede ikkitinota kulanno. (Lawishsha 16:31 nabbawi; 20:29) Kuri roduuwi muxxe jiro ikkinota kayi wodancha hoongammora dandiineemmo. Geerru roduuwi muxxe jiro ikkinota wodanchitino wedellooti maalaamittete jironni roorinore afidhanno. Konni birxichira sase xaˈmora dawaro afiˈneemmo: Ammanaminohu geerru roduuwi Yihowa albaanni muxxe ikkinohu mayiraati? Togoo roduuwi Yihowa dirijjitera lowore kaaˈlitanno yineemmohu mayiraati? Insa lawishshinni roore rosate maa assa dandiineemmo?

3. Faarso 92:12-15 kultanno garinni, ammanaminohu geerru roduuwi Yihowa albaanni muxxe ikkinohu mayiraati?

³ Ammanaminohu geerru roduuwi Maganu Yihowa albaanni muxxete. Isi giddoyidi ayimmansa egennino; qoleno kaajja akattansa lowo geeshsha naadanno. Geerru roduuwi Yihowara lowo diro ammanante soqqante afidhino hayyo wedellu roduuwira kultanno woyite isi hagiidhanno. (Iyo. 12:12; Law. 1:1-4)  Yihowa kuri roduuwi cincite heedhino garano naadanno. (Mil. 3:16) Kore roduuwa mittu qarrino amade diegenninonsa yaa diˈˈikkino; ikkirono Yihowara noonsa ammana horo dishoshshoggitino. Insa halaale macciishshitu yannanni roore xa hexxonsa xabbe leeltannonsa. Qoleno insa, “geedhimmate yannara nafa” suˈmasi dudubbanno daafira Yihowa baxannonsa.—Faarso 92:12-15 nabbawi.

4. Geerru roduuwinke maa huwatansa jawaachishshannonsa?

⁴ Diru akkalle amaddinoˈneha ikkiro, Yihowa konni albaanni loossinoonni looso hawannokkita deˈinoonte. (Ibi. 6:10) Sabbakate looso diinaggaabbine loossinoonni; hatto assaˈne iimi Annanke lowo geeshsha hagiirsiissannosi. Addi addi qarri amadiˈnerono, mito woyite isinni lowo geeshsha dadillisanno coyi tuncu yiiˈnerono cincitine saˈinoonni; Qullaawu Maxaafihu xalalu seerira halantinoonni; Yihowa dirijjite uyitinoˈneha lowo geeshsha hasiisanno looso loossinoonni hattono woloota qajeelsitinoonni. Rakke rakke albillitte hadhanni noote Yihowa dirijjite ledo taalo qaafate dandiitinire baala assitinoonni. Woˈma yanna soqqansho giddo noore woloota roduuwa irkissinoonni hattono jawaachishshinoonni. Ammanantinoonnire ikkitinoonni daafira Maganu Yihowa lowo geeshsha baxannoˈne. Isi ‘Keeraano dihuneemmo’ yee qaale eino! (Far. 37:28) Qoleno togo yee hexxo uyinoˈne: “Geedhitine awuubbina geeshsha, duheemmoˈnehu aneeti.” (Isa. 46:4) Diriˈne akkalino daafira xaate Yihowa dirijjitera kaaˈleemmori dino yitine heddinoonte. Kaaˈlitinanniri lowori no!

5. Geerru roduuwi maa qaaga hasiissannonsa?

⁵ Geerru roduuwi wolootaho aa dandiitannori lowori noonsa. Kuri roduuwira alba noonsate geeshshi jawaante xa noonsakkiha ikkara dandaanno; ikkirono seeda diro heedhe afidhinohu lowo woˈnaalshi noonsa. Xaano ikkiro Yihowa insara dirijjitesi giddo addi addi looso aansara dandaanno; aanchine laˈneemmoti hundi waritinna dirinke lawishshuwa tenne leellishshanno.

6-7. Geedhimmate diro Yihowara ammaname soqqame atootesi afiˈrino manni lawishsha Qullaawu Maxaafinni kuli.

⁶ Qullaawu Maxaafi geedhimmate yannara Yihowara diinaggaawe soqqaminohu  ammanamino manni lawishsha kulanno. Lawishshaho Muse, Yihowa masaalaanchonna Israeelete albisa ikke soqqama hanafi woyite 80 diri balla ikkannosi. Daanieelira 90 diri ale ikke noosi yannarano Yihowa iso masaalaancho asse soqqa diagurino. Soqqamaasinchu Yohaannisino qullaawu ayyaaninni Ajuujate maxaafa borreessi woyite 90 diro ale ikkisikki digatino.

⁷ Wolootu batinyu ammanantino soqqamaasine hakkeya egennantinore ikkitinokki daafira, mannu hakkeeshsha wodancha hoogansara dandaanno. Ikkirono Yihowa seekke egenninonsa; hattono ammanantinore ikkitino daafira kiisinonsa. Lawishshaho Qullaawu Maxaafi, ‘Maganoho galinohu keeraanchu’ manchi Simiooni daafira shiimarella kulanno; Yihowa kayinni isi hiittoo manchootiro seekke egennino; qoleno qaaqqo Yesuusa laˈˈatenna qaaqqunna amate daafira masaalo coyiˈrate qoosso uyinosi. (Luq. 2:22, 25-35) Minaanna shiidhinote himanaancho Haanna lawishshano laˈˈa dandiineemmo. Isera 84 diri ale ikkannoseha ikkirono, “Qullaawu Mininni baxxitukkinni” Maganoho soqqantino. Ise “gambooshshe hossannokki” daafira Yihowa iserano qaaqqo Yesuusa laˈˈate qoosso oye maassiˈrinose. Simioonino Haannano Yihowa albaanni muxxete.—Luq. 2:36-38.

8-9. Mitte minaanna shiidhino rodoo Yihowa dirijjite giddo soqqantanni noohu hiittoonniiti?

⁸ Yannankera noohu batinyu ammanaminohu geerru roduuwi, wedellootaho kaajja lawishshaati. Hanni Rodoo Loyisi Diideri woˈnaalsha laˈno. Ise Kanaadaho baxxitino suwisaancho ikkite soqqama hanaffu woyite 21 dirolla ikkannose. Hakkuyi gedensaanni, isenna minaannise Jooni songuwa towaatanni lowo diro soqqamino. Insa gedensoonni Kanaadu Beeteelera 20 saˈˈanno diro soqqamino. Loyisira 58 diro ikkiseta, isenna Jooni Yukireenete gobba haˈre soqqamara koyinsinsa. Insa hakkawote ma assiyya? ‘Dirinke akkalino daafira wole gobba haˈne soqqama didandiineemmo’ yiinokka? Insa sonkoonninsawa maahoyye yee haˈrino; qoleno hakkiicho Jooni Sinu Biiro Komite miila assine shoommoonni. Lamalu diri gedensaanni Jooni reyita, Loyisi worroonnisewa soqqantanni heeˈrate murcidhu. Loyisira xa 81 diro ikkinose; ikkirono ise xaano Yukireenete, Beeteelete maate ledo Yihowara ammanante soqqantanni no; qoleno hakko noo roduuwi baalunku lowo geeshsha baxxannose.

⁹ Loyisi gede minaanna shiiˈrinore meya roduuwa, minaanninsa lubbote noo wari geeshsha qaaga hoongansara dandiinanni; ikkirono, insa xaano muxxete. Minaannansa lowo diro kaaˈlanni keeshshinorinna xaano ammaname soqqamanni noori meya roduuwi Yihowa albaanni lowo waaga afiˈrino. (1 Xim. 5:3) Qoleno, kuri roduuwi lawishshi wedelloota jawaachishanno.

10. Tooni dancha lawishsha ikkinonkehu hiittoonniiti?

¹⁰ Mininni fule afannokkihu batinyu ammanamino  geerrino muxxete. Lawishshaho, Tooni yinanni rodii geerra towaantanni uurrinshara heeˈranno. Isi Yunayitidi Isteetisete, Pensiliveeniyaho Woxawaajje 1942nni 20 dirihu heeˈre cuuamino. Hakkuyi gedensaanni mulenni, poletikaho anga wodha giwino daafira lame dironna darate usurroonnisi. Isinna minaamasi Hilda lame ooso ile halaalu mine lossiˈrino. Tooni lowo diro sase songo giddo qineessaancho aliidi laˈˈaancho (xa cimeeyyete bisi qineessaancho yinanni), hattono woradu gambooshshi aliidi laˈˈaancho ikke soqqamino. Isi usuru mine gambooshshe massagino, hattono Qullaawa Maxaafa xiinxallisino. Toonira xa 98 diro ikkinosiha ikkirono, Yihowa looso loosa diagurino. Isi Yihowara soqqamatenna songosi roduuwi ledo gamba yee loosate dandiire baala assanno!

11. Mininni fule afannokki geerra banxeemmotanna ayirrinseemmota leellisha dandiineemmohu hiittoonniiti?

¹¹ Mininni fule afannokkiha geerra roduuwa ayirrinseemmota leellisha dandiineemmohu hiittoonniiti? Cimeeyye dandaami deerrinni, kuri roduuwi songote gambooshshe macciishshitanno woy beeqqitanno gede, hattono soqqantanno gede kaaˈlitannonsa. Qoleno insa noowa marre woy viidiyotenni xaande hasaawinse insa daafira hendeemmota leellisha dandiineemmo. Roorenkanni, songo noo bayichinni xeertiˈre heeˈrannoha geerra roduuwanke deˈnummokkinni towaata hasiissannonke. Insa xeertote noo daafira calla dea dihasiissannonke. Mitu geerru roduuwi uminsa daafira hasaawa baxannokkiha ikkara dandaanno. Ikkirono, yanna gaaˈmine xaˈmo xaˈmineemmohanna insa Yihowa dirijjite giddo afiˈrino atoote kulannanke macciishshineemmoha ikkiro, lowo horo afiˈneemmo.

12. Uminke songo giddono hiittoo roduuwi heedhara dandiitanno?

¹² Ninke uminke songora ammanaminohunna kaajja lawishsha ikkannohu geerru roduuwi noota huwanteemmo woyite dhagge assiˈnammora dandiineemmo. Hariyeti yinanni rodoo, Yunayitidi Isteetisete Niwu Jeerziira noote mitte songo giddo lowo diro Yihowara ammanante soqqantino. Hakkiinni ise beettose ledo heedhara wolewa hadhino. Haarote martinowa noo songo roduuwi tenne rodoo seekkite egennate woˈnaaltino; hakkiinni insa tini rodoo muxxe ikkitinota wodanchitino. Ise 1925 balla halaale macciishshitu waro afidhinota soqqanshote woˈnaalshuwa kulte kore roduuwa jawaachishshino. Hakkawaro, ise amande usurreenna minira higa hooggara dandiitanno daafira, soqqansho fultanno woyite ayewoteno hinkote burushe adhite fultanno. Isinni, 1933nni lame hinge mitte lamala geeshsha usurroonnise. Ise usurantanno woyite, Yihowa Farciˈraasincho ikkinokki minaannise sasenka qaaqquullensa towaatanni kaaˈlannose. Addanko, Hariyeti gedeehura ammanaminohu geerru roduuwinkera ayirrinyu hasiisannonsa!

13. Geerru roduuwira Yihowa dirijjite giddo noonsa bayichi daafira maa ronsoommo?

¹³ Geerru roduuwinke Yihowa dirijjitera lowore kaaˈlitanno. Insa Yihowa dirijjitesinna insa umonsa addi addi doogganni maassiˈranna illensanni laˈino. Insa loossino soˈronnino lowore rossino. Kuri roduuwa “egennote buicho” gede assitine hedde; qoleno insawiinni rosate woˈnaalle. (Law. 18:4) Yanna gaaˈmitine kore roduuwa egennate woˈnaaltinanniha ikkiro, ammanaˈne kaajjitanno, hattono lowore rosa dandiitinanni!

14. Marro 32:7 wedellootu ma assitanno gede jawaachishshanno?

¹⁴ Geerra roduuwa kiˈne umiˈne shiqqine hasaawisate woˈnaalle. (Marro 32:7 nabbawi.) Hige xaate insa xunsite laˈannokkiha, sunuutunni qaaffannoha, hattono coyidhanno  woyite huuronsa ajjannoha ikkara dandaanno; ikkirono, giddonsa wedellu gedeeti. Qoleno Yihowa albaanni “danchu suˈmi” noonsa. (Ros. 7:1) Insa Yihowa albaanni muxxe ikkitinohu mayiraatiro deˈinoonte. Insa ayirrisa agurtinoonte. Elsai gedeere ikke. Isi jeefote Eeliyaasi ledo hosi barra isiwiinni baxxa dihasiˈrino. Elsai sase hige “Ani atewiinni horonta baxxeemmokkita egensiiseemmohe” yiino.—2 Mot. 2:2, 4, 6.

15. Geerra roduuwa hiittee xaˈmuwa xaˈma dandiineemmo?

¹⁵ Geerra roduuwa shaqqillunni mite xaˈmo xaˈmitine insa daafira heddinannita leellishshe. (Law. 1:5; 20:5; 1 Xim. 5:1, 2) Togo yitine xaˈma dandiitinanni: “Wedellu heedhinoonni waro, halaale afidhinoonnita ammantinanni gede assinoˈneri maati?” “Heeshshoˈne giddo tuncu yiinoˈne coyi Yihowawa gamba yitinanni gede kaaˈlinoˈnehu hiittoonniiti?” “Yihowara hagiirrunni soqqantinanni heedhinanni gede kaaˈlinoˈne coyi maati?” (1 Xim. 6:6-8) Hakkiinni insa xaggensa kultannoˈne woyite seekkitine macciishshe.

16. Jawu rodiinna wedellichu rodii mitteenni hasaawansa lamunkura kaaˈlitannohu hiittoonniiti?

¹⁶ Jawu rodiinna wedellichu rodii mitteenni hasaawansa lamunkura kaaˈlitanno. (Rom. 1:12) Hatto assansa, wedellichu rodii Yihowa ammanantino soqqamaasinesi towaatannota albinni roore addaxxanno gede kaaˈlitanno, jawu rodii kayinni banxannisita huwatanno gede assitanno. Qoleno jawu rodii Yihowa maassiˈrinosi gara odeessanno woyite tashshi yaannosi.

17. Ammanaminohu geerru roduuwi dirinsa lexxi kiiro roore xuˈmanno yineemmohu mayiraati?

¹⁷ Duucha woyite, diru lexxanni haˈri kiiro danu xumme ajjanni hadhanno; Yihowara ammanamino manni kayinni dirinsa lexxi kiiro isi albaanni roore xuˈmanno. (1 Tes. 1:2, 3) Hatto yineemmohu mayiraati? Insa lowo diro Yihowa ayyaani quxannonsa gedenna akatansa biddi assannonsa gede assidhanni keeshshitino. Muxxe geerra roduuwanke albinni roore egennate, insa ayirrisatenna insawiinni rosate woˈnaallummo kiiro, insa albinni roore muxxe jiro gede assine hendeemmo!

18. Aananno birxichira maa ronseemmo?

¹⁸ Songo roore jawaattanno gede, wedellu roduuwi geerra roduuwa naada calla ikkikkinni geerru roduuwino wedella roduuwa naada hasiissannonsa. Aananno birxichira, geerru roduuwi songote giddo noore wedella roduuwa naaddannota leellisha dandiitannohu hiittoonniitiro ronseemmo.