ARMAATIYU YOOSEEFI Roomu gashshaanchi albira mareemmo yee hede diegennino. Phaanxiyosi Philaaxoosi kakkacha manchooti. Ikkirono, Yesuusa ayirrinyunni madaarranni gede, Philaaxoosiwa mare reeshsha xaꞌmanno manchi hasiisanno. Yooseefi Philaaxoosiwa mari wote, iso hasaawisa waajjishinosiha ikkara dandaanno; ikkollana coyi isi hedino geeshsha diꞌꞌikkino. Philaaxoosi mitto wottaaddaru roorricha Yesuusi reyinoronna teꞌee xaꞌme buuxi gedensaanni, Yooseefi Yesuusi reeshsha adhanno gede fajjino. Yooseefi Yesuusi reyonni lowo geeshsha dadillino daafira, iso shinoonni bayicho rahe marino.—Maq. 15:42-45.

• Armaatiyu Yooseefi ayeti?

• Isira Yesuusi ledo mayi xaadooshshi noosi?

• Isi xagge xiinxalla hasiissinonkehu mayiraati?

Maarqoosi, Yooseefi “Ayihudete Aliidi Yoo Gaamo” miila ikkinota qullaawu ayyaaninni borreessino. Kowiicho ‘Yoote Gaamo’ yiniti Sanihediriini shongooti; Sanihediriini, Ayihudenniha aliidi yoo minenna dagoomu, gashshootunna ammaꞌnote haja laꞌanno gaamo riqiwanno. (Maq. 15:1, 43) Konni daafira, Yooseefino dagate sooreeyye widooti; isi Roomu gashshaancho hasaawisa dandiinohu iseraati. Qoleno, Yooseefi dureessa ikkasi dhagge diꞌꞌikkitannonke.—Mat. 27:57.

Sanihediriini shongo, gaamote deerrinni Yesuusa effidhe gibbanno. Yesuusa shinanni gede gano gantinori insaati. Ikkirono, Qullaawu Maxaafi Yooseefi “keeraanchohonna dancha manchooti” yaanno. (Luq. 23:50) Isi wole Sanihediriini shongo miilla gede ikkikkinni, ammanaminohonna danchu amanyooti noosi manchooti, hattono isi Maganu hajajo wonshate dandiire baala assanno. Qullaawu Maxaafi Yooseefi “Maganu Gashshooti daa galaalchanni heeꞌranno manchooti” yaanno; isi Yesuusi rosaancho ikkinohu isera ikkara dandaanno. (Maq. 15:43; Mat. 27:57) Yooseefi Yesuusi roso baxinohu, halaalenna taashsho baxanno daafira ikkikki digatino.

Yohaannisi 19:38 Yesuusi ‘rosaancho ikkinohu Yooseefi Ayihude waajjinota’ kultanno. Isi insa waajjinohu mayiraati? Yooseefi Ayihude Yesuusa gibbannotanna Yesuusa ammananno mancho shongotenni fushshite huntannota afino. (Yoh. 7:45-49; 9:22) Mittu manchi shongotenni shorramiro qole, Ayihude mishshasiranna bokkasira dandiitanno. Konni daafira, Yooseefi Yesuusa ammanannota xawise coyiꞌra waajjino. Hatto assiro silxaanesinna ayirrinyesi hoogara dandaanno.

Yesuusi rosaancho ikkinota xawise coyiꞌra waajjinohu Yooseefi calla diꞌꞌikkino. Yohaannisi 12:42 togo yitanno: “Ayihudete roorrooti giddonni nafa batinyu Yesuusa ammaꞌnitino. Ikkollana, ‘Farisootu xaadu mininni fushshite huntannonke’ yite waajjitino daafira konne coye xawoho dihasaabbino.” Yesuusi rosaancho ikkinota xawise coyiꞌra waajjinohu wolu manchi Niqoodimoosiiti; isino Sanihediriini shongo miilaati.—Yoh. 3:1-10; 7:50-52.

Yooseefi Yesuusi rosaancho ikkirono, isi tenne xawise dicoyiꞌrino. Kuni ajinshe laꞌnanni coye diꞌꞌikkino; korkaatuno Yesuusi togo yiino: “Mannu albaanni farciꞌrannoe baalira anino gordoho heeꞌrannohu Anniꞌya albaanni farciꞌreemmosi. Mannu albaanni, ‘Diegennoommohe’ yaannoeha baala anino gordoho heeꞌrannohu Anniꞌya albaanni, ‘Diegennoommohe’ yeemmosi.” (Mat. 10:32, 33) Yooseefi Yesuusa kaadinokkiha ikkirono, Yesuusi rosaancho ikkinota xawise coyiꞌra waajjino. Ati Yesuusi rosaancho ikkoottota xawisse coyiꞌra waajjatto?

 Qullaawu Maxaafi Yooseefi dancha coye assinota kulanno; isi Sanihediriini shongo Yesuusa shaate gano gantu yannara anga diwodhino. (Luq. 23:51) Mitootu yitanno gede ikkiro, Yesuusi yoote minira shiqi wote Yooseefi ledo dino. Ikkihano ikkiro, Yesuusi aana konne taashsho xeꞌino coye assini wote, Yooseefi lowo geeshsha dadillikki digatino; kayinni hige isi ma asse afanno!

Yesuusi reyi yannara, Yooseefi waajja qeeꞌle Yesuusi harunsaano kaaꞌlate murciꞌrinoha ikkara dandaanno. Maarqoosi 15:43 tenne daafira kultanni togo yitanno: “[Yooseefi] Ruxxi yiikkinni Philaaxoosiwa mare, Yesuusi reeshsha aannosi gede huucciꞌri.”

Yesuusi reyi wote Yooseefi afikki digatino. Isinni Yesuusi reyinota Philaaxoosi nafa afikki balaxe isi afino. Yooseefi, Philaaxoosi Yesuusi reeshsha aannosi gede xaꞌmiri yannara Philaaxoosi “Yesuusi rahe reyinota macciishshe [maalaꞌlino].” (Maq. 15:44) Yooseefi, Yesuusi qarru haqqira sutame qarramanna lainoha ikkiro, tini tiiasi layiꞌrannonna Yesuusi rosaancho ikkinota xawise coyiꞌranno gede assitinosiha ikkara dandaanno. Ikkihano ikkiro, Yooseefi mittore assate murciꞌre kaꞌino. Xaate isi Yesuusi harunsaancho ikkinota dimaaxanno.

Ayihudete seeri garinni reyote yoo yine shinoonni mancho arrishsho eꞌukki madaara hasiissanno. (Mar. 21:22, 23) Roomu daga kayinni reyote qoricha qorichinshoonni manni, sutaminowa haqqu iima sholanno gede, woy hakkiinni hoolle gutu  waamma giddo tunganni gede assitanno. Yooseefi kayinni Yesuusi reeshsha hatto assinara dihasiꞌrino. Yesuusa shini qooxeessiꞌra, Yooseefira kincho kurkurre seekkinoonni waamma noosi. Tenne waammara hakkuyira albaanni manna madaarre egenninookki daafira, Yooseefi Armaatiyu a kataminni Yerusaalame dayinohu muli yannara ikkikki digatino; qoleno waamma maatesira qixxeessiꞌrinota ikkitara dandiitanno. (Luq. 23:53; Yoh. 19:41) Yooseefi albillitte madaarrannisi waammara Yesuusa madaarranni gede assasi, shaqqado ikkinota leellishshanno; qoleno tini Mesihicha ‘dureeyyete ledo madaarranni’ yine masaalloonni masaalo woꞌmitanno gede assitino.—Isa. 53:5, 8, 9.

Shoolunku Wongeeli giddo, Yooseefi Yesuusi reeshsha haqqu aaninni dirrise dancha gede asse kafane umisira qixxeessiꞌrino waammara madaarinota kulloonni. (Mat. 27:59-61; Maq. 15:46, 47; Luq. 23:53, 55; Yoh. 19:38-40) Yooseefi Yesuusa madaari wote kaaꞌlinosita kulloonnihu Niqoodimoosi callaati; Niqoodimoosi reeshshaho buurranni shitto abbino. Kuri lamunku manni maccare ikkitino daafira, reeshsha insa dukke hadhino yaa didandiinanni. Insa reeshsha wole soqqamaasine kafantannonna madaartanno gede assitukki digattino. Hatto yaa kayinni, insa garire diassitino yaa diꞌꞌikkino. Hatte yannara mittu manchi reeshsha kisiro, lamala barra woꞌma battaawanno; qoleno hakku manchi kisino coyi baalu battaawanno. (Kir. 19:11; Hag. 2:13) Konni garinni battaawino manchi qole, mannunniwa gamba yaa hasiissannosikki daafira, Faasika ayirrinsanni yannara, isi ayirrisikki gatanno. (Kir. 9:6) Yooseefi, Sanihediriini shongo miilla mishshannosiha ikkirono, Yesuusi reeshsha madaarranni gede coye biddi assino. Yooseefi, Yesuusa ayirrinyunni madaarasinna Yesuusi rosaancho ikkinota xawise coyiꞌrasi abbitannosi qarra dandee saꞌꞌate sumuu yiino.

Qullaawu Maxaafi, Yesuusa madaarri gedensaanni, Armaatiyu Yooseefi daafira dikulanno; tini qolte ‘Hakkunni gedensaanni Yooseefi hiikkiyya?’ yine hendeemmo gede assitannonke. Tenne daafira ninke anfoommori dino. Xaa geeshsha laꞌnummo taje leellishshanno garinni kayinni, isi Yesuusi harunsaancho ikkinota xawise coyiꞌrikki digatino. Qoleno, isira fonqolo ikkanno coye iillisi yannara, ammanasinna worbimmasi baꞌinokkita laꞌnoommo. Tini qolte isi hakkunni gedensaanni ammanatenni kaajje heeꞌrino yine hendeemmo gede assitannonke.

Yooseefi xagge ninkeneeto togo yine xaꞌmineemmo gede assitannonke: Silxaane, loosu, jiro, maate, woy wolu aye coyino Yihowa ledo noonke jaalooma roorannoni?