1, 2. Zakkaariyaasi lamalki ajuuja lai gedensaanni, Yerusaalamete noohu Yihudu manni hiitto ikke no?

 ZAKKAARIYAASI lamalki ajuuja lae kai gedensaanni lowohu yaachishannosi coyi no. Yihowa ammanaminokki manna bushu assootinsara qorichisheemmo yee qaale eino. Tini Zakkaariyaasira jawaante ikkitinositi egennantinote. Ikkirono woyyaawe yiinori dino. Ammanama xeꞌinore assannohunna bushu manni xaano noolla. Qoleno Yerusaalamete wirro mina hananfoonnihu qullaawu mini umo nafa dihigino. Yihudu manni bayichonko hexxo mudhe Maganu uyinonsa looso loosa agurinohu mayiraati? Insa Yerusaalame higginohu uminsa injo hasidheetini?

² Zakkaariyaasi Baabiloonetenni Yerusaalame higino mannira kaajjado ammana noonsata afino. Insa qaensara noonsa qiniitenna loosonsa facci assite agurte, Yerusaalame higganno gede ‘kakkayisinonsahu Maganoho.’ (Izi. 1:2, 3, 5) Insa rossino gobbanni agurte higgino; insa giddo rooru Yerusaalame affe diegentinoreeti. Yihudu manni Yihowa mine wirro mina hasiꞌra hoogoommero, 1,600 km meddi yitannota ilaalaamenna eaafulcho doogo tayise didaanno!

3, 4. Baabiloonetenni higinohu Yihudu mannira mayi qarri iillinonsa?

 ³ Hanni Yihudu manni Baabiloonetenni Yerusaalame higi wote ikkinore hedi. Insa doogote heedhe, haaro qaensa daafira heddukki digattino. Insa Yerusaalamete katami alba biifadoho yinanna macciishshitino. Mereeronsa noohu jajjabbu manni qullaawu mini ayirrado ikkinota affinoreeti. (Izi. 3:12) Ati ledonsa hadhanni noottoha ikkoommero, xeertote heedhe konni kaꞌa qaekki ikkannoha Yerusaalamete katama laittoro mayi macciishshamannohe? Katamu giddo noota diigantino minnanna dubbino ishine laittoro dadillatto? Yerusaalamenniha diigamino huxxa Baabiloonennihu seedunna kaajjadu huxxi ledo heewisiisatto? Yihudu manni umi qara hexxo dimudhino. Mayira? Insa Baabiloonetenni Yerusaalame higgu wote Yihowa kaaꞌlinonsa gara laꞌino. Insa hakkira iillitanni heedhenni alba qullaawu mini noowa kakkallanni bayicho qixxeessitino; hakkiinni barru baala Yihowara kakkalo shiqishiꞌra hanaffino. (Izi. 3:1,  2) Umi qara insa looso hanafate quqquxantino gara hendiro, badhera higgannoha dilawanno.

⁴ Israeele qullaawa mine mintannotano agurranna katamansano wirro miꞌna hasiissinonsa. Insa uminsa mine miꞌna, gate loosiꞌranna maatensara hasiisannore shiqisha hasiissannonsa. (Izi. 2:70) Yihudu mannira lowo loosi noonsa. Shiima yanna gedensaanni mitu manni insa loossanno looso hoola hanafino. Umi qara insa hinko gaꞌmidhe loossinoha ikkirono, mannu 15 diro woꞌma waadinonsa daafira hexxo mudhitino. (Izi. 4:1-4) Hakkiinni 522 K.A. Faarsi moote Yerusaalamete giddo mitto mineno minnannita hoolino. Hatte yannara xaate Yerusaalamete katama horo minnannikkiha lawino.—Izi. 4:21-24.

5. Yihowa mannisi hexxo mudhi yannara maa assino?

⁵ Yihowa dagasira hasiisinnonsare afino. Maganu Zakkaariyaasira jeefote ajuuja leellishinosi; tenne ajuujara Isi mannasi baxannotanna assitino coye naadannota buuxisinonsa, hattono uyinonsa looso wirro loosa hanaffuro agarannonsata kule jawaachishinonsa. Yihowa qullaawa mine wirro minate daafira coyiꞌranni anera ‘hajajantiniro kuni baalunku woꞌmanno’ yiino.—Zak. 6:15.

6. (a) Zakkaariyaasi settikki ajuujara maa laino? (Umi misile lai.) (b) Faradu addi addi dana afiꞌrinoha ikkinohu mayiraati?

⁶ Zakkaariyaasi laino ajuuja baalantenni roore ammana kaajjishshannoti jeefote lainote settikki ajuujaati yaa dandiinanni. (Zakkaariyaasi 6:1-3 nabbawi.) Hanni tenne ikkito hedi: Shoolu saragalli “lame camote ilaalla mereerinni” fulanni no; saragallu olunniha ikkikki digatino. Saragalla goshooshanno faradi addi addi dana afiꞌrinoho. Tini saragalla guluffinore bade afate kaaꞌlitanno. Zakkaariyaasi “Kuri maati?” yee xaꞌmino. (Zak. 6:4, NW) Ninkeno isinte gede, kuri coyi maatiro afa hasiꞌneemmo; korkaatuno tenne ajuujara kulloonniri ninkerano kaaꞌlannonke.

7, 8. (a) Zakkaariyaasi lainoti lame ilaalla maa riqibbanno? (b) Ilaalla camonnita ikkase maa leellishshanno?

⁷ Qullaawu Maxaafi garinni, ilaalla mangistuwa woy gashshoote riqibbara dandiitanno. Zakkaariyaasi maxaafira kulloonni ilaalla, Daanieeli maxaafira kulloonnite lame ilaalla ledo mittete. Mittu ilaali, Yihowaha hegeriha kalqete alame gashshoote riqiwanno. Wolu ilaali qole, Yesuusi moote ikkinoha Mesihichu Gashshoote riqiwanno. (Dan. 2:35, 45) Yesuusi 1914nni moohi yannanni kayise, lamenti ilaalla uullate  aana Maganu fajjo woꞌmitanno gede assitanni no.

⁸ Ilaalla camonnita ikkase maa leellishshanno? Culkate gede, camono lowo waaga afidhino. Yihowa xaadooshshu dunkaananna Yerusaalamete qullaawa mine minni wote camo horoonsiꞌnanni gede hajajino. (Ful. 27:1-3; 1 Mot. 7:13-16) Konni daafira, lamenti lawishshu ilaalla camonnita ikkase, Yihowati kalqete aliidimmanna Mesihichu Mangiste dhaggennita ikkitinota qaangeemmo gede assitannonke. Kuni lamunku gashshooti mannu ooso baala teesse heedhannonna atoote afidhanno gede assanno.

9. Saragalla guluffinori ayeooti? Insa loosi maati?

⁹ Xa hanni saragallu daafira laꞌno. Saragallunna konne saragalla guluffinori maa riqibanno? Saragalla guluffinori sokkaasinete; insa addi addi gaamo ikkitara dandiitanno. (Zakkaariyaasi 6:5-8 nabbawi.) Insa mitto baxxino looso loosate ‘Maganuwiinni fulte’ hadhino. Kuni loosi maati? Saragallunna saragalla guluffinori hadhanno qoqqowo kulloonninsa. Loosinsa Yihowa manna agarate; roorenkanni insa mannasi ‘aliyye gobbanni’ yaanno Baabiloonetenni agartanno. Yihowa tenne ajuujanni Baabiloone wirro mannasi gadachitannokkita buuxisino. Tini ajuuja Zakkaariyaasi waro heeꞌrinoha qullaawa mine minanno manna lowo geeshsha sheshifachishshinonsati dihuluullissannote! Insa xaate diinnansa loossannota hooltannonke yite diyaaddanno.

10. Zakkaariyaasi saragallunna saragalla guluffinori daafira laino ajuuja, xaa yannara Maganu manna jawaachishshannohu hiittoonniiti?

¹⁰ Zakkaariyaasi waro assinte gede, olantote mootichi Yihowa xaano mannasi agaratenna jawaachishate sokkaasinesi soyanno. (Mil. 3:6; Ibi. 1:7, 14) Ayyaanaamittete Israeele 1919nni Bayira Baabiloone borojjimmanni fultu yannanni kayise, mannu giwannoha ikkirono halaalu magansiꞌra baasa halaꞌlitanni no. (Aju. 18:4) Sokkaasine Yihowa dirijjite agartanno daafira, wirro kaphu ammaꞌnora borojje ikkineemmo yine dimanseemmo. (Far. 34:7) Hatteentenni, alame woꞌmate Maganu soqqamaano ayyaanaamittetenni lophitannota addaxxa dandiineemmo. Zakkaariyaasi laino ajuuja hedanke, lamente ilaalla hunda heeꞌnummo geeshsha waajjishannonkeri nookkita huwanteemmo gede assitannonke.

11. Maganu manna siꞌannore waajja hasiissannonkekkihu mayiraati?

¹¹ Muli yanna giddo, Sheexaanu alame gashshooti, Maganu manna gudate mixiꞌre mitteenni kaꞌꞌanno. (Hiz. 38:2, 10-12; Dan. 11:40, 44, 45; Aju. 19:19) Hiziqeeli masaalora, insa Maganu manna gawajjate farado guluffe baatto guggushshino gomichi gede ikkite daggannota kulloonni. (Hiz. 38:15, 16) a Ikkina waajjishannonkeri nooyya? Dino! Ninke agarte noo olanto no. Bayiru qarri yannara, Yihowati sokkaasinete olanto Maganu daga agaratenna Yihowa aliidimma gibbannore hunate mitteenni dagganno. (2 Tes. 1:7, 8) Hakku baxxino barraati! Ikkina, Yihowata iimi olanto massagannohu ayeti?

12, 13. (a) Zakkaariyaasi maa assi yinoonnisi? (b) Sina woy Ciiro yini manchi Yesuusi Kiristoosi leellishannoho yineemmohu mayiraatiro xawisi.

¹² Zakkaariyaasi settenta ajuuja lainohu callisi heeꞌreeti. Xa qole wolootu laꞌꞌa dandiitannohanna Maganunniha qullaawa mine wirro mintannore jawaachishanno coye assaraati. (Zakkaariyaasi 6:9-12 nabbawi.) Zakkaariyaasi Heldayi, Xobbiyanna Yidaiya uyitino culkanninna birrinni “ayirrado baꞌlatto” loosanno gede hajanjoonnisi; kuri sasunku Baabiloonetenni higginoreeti. (Zak. 6:11) Zakkaariyaasi tenne baꞌlatto woranno gede hajanjoonnisihu, Yihudu mootenna Daawiti sircho ikkinohu Zerubaabeeliraatini? Deeꞌni. Zakkaariyaasi baꞌlatto Kakkalaanote Biilo ikkinohu Iyyaasu umira woranna laino manni dhagge assiꞌrinoha ikkara dandaanno.

¹³ Kakkalaanote biilo ikkinohu Iyyaasura umoho baꞌlatto worroonnisi daafira calla moote ikkannoni? Diꞌꞌikkanno; korkaatuno Iyyaasu ilaminohu Daawiti maatenni ikkinokki daafira, moote ikka didandaanno. Konni daafira, Iyyaasu umira baꞌlatto worroonnihu albillitte daannoha hegere mootenna kakkalaancho leellishateeti. Moote assinoonni kakkalaancho Sinaho woy Ciiꞌroho yinoonni. Qullaawa Borro Ciiro yinihu Yesuusi Kiristoosi ikkinota xawisse kultanno.—Isa. 11:1; Mat. 2:23.

14. Mootenna Kakkalaanote Biilo ikkinohu Yesuusi Kiristoosi maa assanno?

¹⁴ Yihowata iimi olanto massagannohu Mootenna Kakkalaanote Biilo ikkinoho Yesuusi Kiristoosiiti. Maganu daga heedhannohu bunshe woꞌmitino alamera ikkirono, isi gaamote deerrinni agarannonsa daafira, beꞌe yitukki heeꞌra dandiitanno. (Erm. 23:5, 6) Muli yanna giddo, isi gashshoote baala qeele, Maganu aliidimma irkisanno, hattono Yihowa daga gatisanno. (Aju. 17:12-14; 19:11, 14, 15) Ikkirono, Yesuusi bunshe baala hunara albaanni loosannohu mittu lowo loosi no.

15, 16. (a) Yannankera hiikkonne xalashshatenna wirro xintate looso loonsoonni? (b) Kiristoosihu Kumu Diri Gashshooti yannara mayi ikkanno?

¹⁵ Yesuusi Mootenna Kakkalaanote Biilo ikke loosanno loosono agurranna, Yihowaha “Qullaawa Mine” minate looso uyinoonnisi. (Zakkaariyaasi 6:13 nabbawi.) Yannankera, Yesuusi Magano halaalunni magansiꞌranno manna Bayira Baabiloonenni fushshenna Kiristaanu songo wirro xinte qullaawa mine minino; isi konne looso loosinohu 1919nniiti. Hattono Yesuusi ayyaanaamittennihu qullaawu minite uullayidi hoowera loonsanni loosira albisa ikkanno gede “ammanaminohanna wodanaamo borojjicho” shoomino. (Mat. 24:45, NW) Qoleno Yesuusi Maganu daga qullaawa soqqansho soqqama dandiitanno gede kaaꞌlate, insa xalashshate looso loosanni keeshshino.—Mil. 3:1-3.

¹⁶ Kumu Diri Gashshooti yannara, Yesuusinna ledosi mookkannori 144,000 kakkalaano ammanantinori mannu ooso guuta ikkitanno gede assitanno. Kuni ikkanno wote, uullate aana Magano halaalunni magansiꞌranno manni calla heeꞌranno. Jeefote, halaalu magansiꞌra xintate loosi woꞌmunni woꞌma gumulamanno!

17. Yihowa Yihudu mannira mayyee qaale eino? Tini insa jawaachishshinonsahu hiittoonniiti?

¹⁷ Zakkaariyaasi sokka hatte yannara noohu Yihudu manni maa assanno gede kakkayissinonsa? Yihowa insa qullaawa mine mintanno wote kaaꞌlannonsatanna agarannonsata kule jawaachishinonsa. Tini wodaninsa hagiidhanno gede assitinonsa. Kayinni shiimu Yihudu manni konne looso umo fushsha dandaannohu hiittoonniiti?  Zakkaariyaasi hakkiinni aanche coyiꞌrinori insa waajjitannokkinna mittoreno huluullantannokki gede assannoreeti. Heldayi, Xobbiyanna Yidaiyano aguranna Maganu batinyu “fafowa heeꞌranno manni” Yihowaha qullaawa mine mina kaaꞌlara daannota coyiꞌrino. (Zakkaariyaasi 6:15 nabbawi.) Yihudu manni Maganu kaaꞌlannonsata addaxxe, bayichonko looso hanafino; giwannonsa manni heeꞌrirono insa loosa diagurino. Yihowa ilaalu gede ikkino guficho hooleenna shiima yanna gedensaanni qullaawa mine 515 K.A. minne gundoonni. (Izi. 6:22; Zak. 4:6, 7) Yihowa eino qaali yannankerano loosannoho.

18. Zakkaariyaasi 6:15 yannankera woꞌmitinohu hiittoonniiti?

¹⁸ Yannankera lowo miliyoone ikkanno manni halaalu magansiꞌrawa dayino; insa giddonsanni kaꞌe yannansa, wolqansanna woxensa uyite, ayyaanaamittennihu qullaawu minira loonsanni loosira kaaꞌlantanni no. (Law. 3:9) Yihowa ammanamme assineemmore naadannota mayinni anfeemmo? Zakkaariyaasi baꞌlatto seekkinohu Heldayi, Xobbiyanna Yidaiya abbitinorinni ikkinota qaagi. Hatti baꞌlatto insa halaalu magansiꞌrara assitinore ‘qaanganni’ gede assitino. (Zak. 6:14) Hatteente gede, Yihowa isira assineemmorenna leellinsheemmo baxille horo dihawanno. (Ibi. 6:10) Yihowa konne coye hegere geeshsha qaaganno.

19. Zakkaariyaasi laino ajuuja maa assineemmo gede kakkayissannonke?

¹⁹ Konni goofimarchu dirira, Yihowa daga loossinohu dhagge ikkanno coyi, Isi maassiꞌranni noonketanna Massagaanchinke Kiristoosi ikkinota leellishanno. Salaametenni hegerera teesse heedhanno dirijjite miilla ikkankenni tashshi yaannonke. Yihowa halaalu magansiꞌra daafira hedinori “woꞌmanno.” Yihowa daga mereero nooꞌne bayicho naadde, hattono Maganiꞌne Yihowara ‘hajajamme.’ Hatto assitinoro, Mootenna Kakkalaanote Biilo ikkinohu Yesuusi, hattono iimi saragalla guluffinori agartannoꞌne. Halaalu magansiꞌra irkisate dandaamiꞌnere baala asse. Hatto assitiniro, olantote mootichi Yihowa, tenne gatte noote shiima yanna giddono ikko hegerera salaametenni teessine heedhinanni gede assannoꞌne!