Qullaawu Maxaafi aana xintantino borruwanke mannaho woxe baatikki uyineemmo daafira, mitootu webisayitenke aana fulinore uminsa webisayitera wora woy wole dagoomittete webisayite widoonni tuqisa dandiinanniha lawannonsa. Ikkollana togo assa webisayitenke aana noo Sheemaate * diigate; qoleno tini lowo qarra kalaqqino. Sheemaatu hunda kulloonni garinni “tenne webisayitera noo misilla, borro, daddalu malaate, muuziiqa, fotta, viidiyubba woy wolere haaˈne Interneetete aana (lawishshaho aye webisayitera, fayilla guto horoonsiˈnanni webisayitera, woy dagoomittete webisayite aana) wora difajjinanni.” Togo assa fajjinannikkihu mayiraati?

Webisayitenke aana fulannori baaluri qoosso higgetenni agarantinote. Gibbannonkeri borronke uminsa webisayitera fushshite Yihowa Farciˈraasineno ikko wole manna sorisiisate woˈnaaltanno. Insa webisayite qixxessidhinohu mannu huluullamanno gede assateeti. (Far. 26:4; Law. 22:5) Wolootu qolte borronke aana fulannore woy jw.org malaate egensiishshaho, shaqaxensa hiratenna elekitiroonikisete aana noo appilikeeshiinensa aana horoonsidhino. Ninkeno koppete qoossonkenna daddalu malaatenke higge affinoha assanke, mitootu webisayitenke aana fulannorenna malaatenke garimale horoonsidhannokki gede higgete doogonni gargadhineemmo gede kaaˈlitinonke. (Law. 27:12) Ikkollana wolu manni wole agurina ammanate roduuwinke nafa elekitiroonikisete uduunnichinni horoonsiˈnara fushshinoommore uminsa webisayitera wortara woy jw.org malaate horoonsidhe shaqaxensa egensiisidhara fajjinummoro yoote minna gibbannonkerinna wole daddalu dirijjitta  webisayitenke garimale horoonsidhannokki gede hooltankera xaˈmiˈnummoro maahoyye yaa gibbankera dandaanno.

Borronke jw.org aaninni agurranna wole webisayitenni dirrisiˈra gawajjitannote. Yihowa ayyaanaamittete sagale shiqishanno gede shoominohu “ammanaminohonna wodanaamo borojjicho” callaho. (Mat. 24:45, NW) Kuni “borojjichi” ayyaanaamittete sagale shiqishate higge affino webisayittanke yaano, www.pr418.com, tv.pr418.com nna wol.pr418.com calla horoonsiˈranno. Qoleno higge affino appilikeeshinuwanke, JW Languweji,^® JW Layibirerii^® nna JW Layibirerii Sign Language^® yinanni appilikeeshiine callate. Kuri webisayituwanna appilikeeshinuwa alamete egensiishshinninna Sheexaanu alamenni dibooraabbinote. Kuri webisayituwankenna appilikeeshinuwanke agurranna wolewa fultannoti ayyaanaamittete sagale dibattaabbinote yaa didandiinanni.—Far. 18:26; 19:8.

Qoleno kaihu baalu hedosi xawisanno webisayitera borronke wora, kaadaasinenna wolu ninke daafira totaˈannori Yihowa dirijjite daafira mannu wodanira huluullo kalaqqanno faro fantara dandiitanno. Mitu roduuwi interneetete widoonni heewisantanno; tini qolte Yihowa suˈmi lede xonamanno gede assitanno. Qoleno interneetete widoonni ‘gibbannonkere shaqqillunni amaalate’ woˈnaala gara diˈˈikkitino. (2 Xim. 2:23-25; 1 Xim. 6:3-5) Qoleno mitootu dirijjitenke, aliidi bisinna, aliidi bisi miilla suˈminni dagoomittete webisayitera uminsa akkaawunte faˈnitino. Ikkollana mittuno aliidi bisi miilira umisi webisayite dinosi, woy dagoomittete webisayite horoonsiˈrannohu mittuno aliidi bisi miili dino.

Wolootu jw.org horoonsidhanno gede jawaachisha “Dancha Duduwo” halashshate kaaˈlitanno. (Mat. 24:14) Soqqanshote horoonsiˈneemmota elekitiroonikisete uduunnichi aana fultanno borro yannate kiiro woyyeessinanni. Baalunku manni tennenni horo afiˈrara hasiˈneemmo. Konni daafira, webisayitenkera noo Sheemaati leellishanno garinni, borro, viidiyonna qoonqotenni qaddaˈnoonniri noo linke wolootaho imeeletenni soya dandiinanni. Hasatto noonsa manni higge affino webisayitenke horoonsiˈranno gede jawaachinsheemmoha ikkiro, ayyaanaamittete sagalera addu buicho ikkinohu “ammanaminohunna wodanaamu borojjichi” qixxeessanno sagale afidhanno gede kaaˈlineemmo.