1. Soqqamaasinchu Phaawuloosi Ibiraawete Kiristaani ‘mimmitonsa albinni roorse jawaachishanno’ gede kulinohu mayiraati?

 MIMMITONKE albinni roorsine jawaachishate sharrama hasiissannonkehu mayiraati? Soqqamaasinchu Phaawuloosi Ibiraawete Kiristaanira sokka borreessi woyite tenne assa hasiissannonkehu mayiraatiro xawisino. Togo yiinonsa: “Baxille afiꞌratenna dancha looso loosate mimmitonke kakkayinso. Mitu mitu agurtunte gede, ronsoommoha xaadonke agurroonke. Roorenka Mootichu daanno barri gamba yiinota qaagginanna, mimmitonke albinni roorsine jawaachinsho.” (Ibi. 10:24, 25) Yerusaalamete heeꞌrannohu Ayihudete Kiristaani onte diro meddi yitanno yanna giddo Yihowa “barri” gambisinota leellishanno malaate laꞌꞌaraati; hattono Yesuusi kulinonsa garinni heeshshonsa gatisirate katamunni fultanno yanna gambissinota huwatanno. (Soq. 2:19, 20; Luq. 21:20-22) Yihowa hajajino garinni 70 M.D. Roomu Yerusaalame huni yannara hakku barri dayino.

2. Yannankera mimmito albinni roore jawaachisha hasiissannonkehu mayiraati?

² Yannankerano ‘wolqaataamunna waajjishannohu’ Yihowa barri  gambisinota leellishshannoti baca taje no. (Iyu. 2:11) Masaalaanchu Soffooniyaasi “Jawu Mootichu [“Yihowa,” NW] barri gambisino; daasino addintanni rakkino” yee coyiꞌrino. (Sof. 1:14) Kuni qorowishshi yannankerano loosanno. Heeꞌnoommohu Yihowa barri gambisino yannara ikkino daafira xaa yannarano Phaawuloosi “Baxille afiꞌratenna dancha looso loosate mimmitonke kakkayinso” yee amaalino amaale harunsa hasiissannonke. (Ibi. 10:24) Konni daafira, roduuwinkera jawaante hasiissannonsa yannara jawaachisha dandiineemmo gede insa daafira albinni roore heda hasiissannonke.

3. Phaawuloosi woloota jawaachishate daafira mayyiino? (Hanafote noo misile lai.)

³ Qullaawu Maxaafi, “Wodanu yaaddo dadille abbitanno; danchu hasaawi kayinni hagiirsiisanno” yaanno. (Law. 12:25) Konni daafira, ninke baalunkura jawaante hasiissannonke woti no. Phaawuloosi woloota jawaachishshannorira nafa jawaante hasiissannonsata coyiꞌrino. Isi Roomaho heeꞌranno Kiristaanira togo yee borreessino: “Ammaꞌnatenni kaajjishannoꞌneha ayyaanaamo afansha beehammoꞌnera hasiꞌroommo daafira laꞌꞌammoꞌnera quqquxamoommo. Hatto yaaꞌyano ani kiꞌne ammananni, kiꞌneno ane ammananni mimmitonke jawaachinsheemmo gedeeti.” (Rom. 1:11, 12) Ee, Phaawuloosi woloota jawaachishinoha ikkirono, isi umisira jawaante hasiissinosi woti no.—Roomu Sokka 15:30-32 nabbawi.

4, 5. Yannankera ayeoo jawaachisha dandiineemmo? Mayira?

⁴ Uminsa horo agurte Yihowara soqqantannore galanteemmonsa. Kuri giddo mitu ammanantino suwisaanooti. Batinye suwisaano Maganoho soqqamate yite uminsa horo facci assite agurtino. Misiyoone ikkite soqqantannori, Beeteelete soqqantannori, woradu aliidi laꞌꞌaanonna minaamuwinsa, hattono tirote biirora loossannorino hatto assitino. Kuri roduuwi qullaawa soqqansho soqqantanno yanna afiꞌrate uminsa horo agurtino. Konni daafira insarano jawaante hasiissannonsa. Woꞌma yanna soqqansho giddo soqqama hasidhe heedhe, babbaxxino korkaatinni tenne assa agurtinorirano jawaante hasiissannonsa.

⁵ “Ammaninohu” ledo calla adhamme yitannota Qullaawu Maxaafi hajajo ayirrisse adhantukki heedhanno roduuwirano jawaante hasiissannonsa. (1 Qor. 7:39) Worbu minaamuwi minaannuwinsa jawaachishannonsa woyite baasa hagiidhanno. (Law. 31:28, 31) Qoleno iillitannonsa miico woy xibba dandee sae ammaname soqqamanno Kiristaanira jawaante hasiissannonsa. (2 Tes. 1:3-5) Yihowanna Yesuusi kuri ammanantino roduuwa sheshifachishshannonsa.—2 Teselonqe 2:16, 17 nabbawi.

6. Isayaasi 32:1, 2 te kulli cimeeyye loosi maati?

⁶ Isayaasi 32:1, 2 nabbawi. Heeꞌnoommohu qarrissanno yannara ikkino daafira baalunku dadillineemmonna hexxo mudhineemmo woti heeꞌrara dandaanno; Yesuusi Kiristoosi buurantinonna wolootu geꞌreewi wido ikkitino cimeeyye yaano ‘gashshaanote’ widoonni jawaachishannonke, hattono biddishsha aannonke. Kuri cimeeyye ‘duha leddannonkere’ ikkitukki ‘hagiidhineemmo gede ledonke loossannore’ ikkitino daafira jawaachishshannonke.—2 Qor. 1:24.

7, 8. Cimeeyye coyidhannorinni calla ikkikkinni woloota ma garinni jawaachishate sharrama hasiissannonsa?

⁷ Soqqamaasinchu Phaawuloosi dancha lawishsha ikkinonke. Isi Teselonqe heeꞌrannohu dartu iillinonsa roduuwira togo yee borreessino: “Lowo geeshsha banxeemmoꞌne daafira, Maganunniha Dancha Duduwo kula  calla ikkikkinni, kiꞌnera lubbonke nafa aate qixxaambe heeꞌnoommo.”—1 Tes. 2:8.

⁸ Phaawuloosi jawaachishannore coyira calla ikkitannokkita xawisate, Efesooni heedhanno cimeeyyera togo yee borreessino: “Mootichu Yesuusi, ‘Adhannonkunni aannohu baꞌraaꞌrinoho’ yiinonte gede, angankenni loonse wolqa hoogginore kaaꞌla hasiissannonketa batinye doogonni kuloommoꞌne.” (Soq. 20:35) Phaawuloosi roduuwasi jawaachishate calla ikkikkinni, insara ‘woxesi aa agurina isonooto nafa sayise aate’ sumuu yiino. (2 Qor. 12:15) Konni daafira cimeeyye roduuwansa coyidhannorinni calla jawaachishanna sheshifachisha agurte, insara heddannota leellishannore assiteno kaaꞌla hasiissannonsa.—1 Qor. 14:3.

9. Cimeeyye woloota jawaachishanno garinni amaala dandiitannohu hiittoonniiti?

⁹ Woloota jawaachishate amaale aa hasiissanno woti heeꞌrara dandaanno; tenne yannarano cimeeyye woloota jawaachishanno garinni amaala dandiinanni gara afate Qullaawu Maxaafi biddishsha harunsa hasiissannonsa. Yesuusi Kiristoosi reyotenni kai gedensaanni uyino amaale tennera kaaꞌlitannonsa. Hanni isi Shiimiidi Iisiyira noo songuwara kaajjado amaale uyi yannara assinore hedi. Isi, Efesooni, Phergamooninna Tiyaxiroosi noo songuwa amaalansara albaanni balaxe galatinonsa. (Aju. 2:1-5, 12, 13, 18, 19) Yesuusi Loodooqiyu songora togo yiino: “Ani baxeemmoha baala seejjeemmo; qorichisheemmono. Kunni daafira diinaggaawoottoha ikki! Cubbokkino aagintaawi!” (Aju. 3:19) Cimeeyyeno woloota amaaltanno yannara Kiristoosi lawishsha harunsa hasiissannonsa.

10. Baalunku mimmitonke jawaachisha dandiineemmohu hiittoonniiti?

¹⁰ Woloota jawaachisha hasiissannonsari cimeeyye calla diꞌꞌikkitino. Phaawuloosi baalunku Kiristaani ‘Wole manna hasiisinonsa garinni dhaawannohanna macciishshitannorira qiniite ikkanno gede dancha coye’ coyiꞌranno gede kulino. (Efe. 4:29) Mitti mittinke woloota “hasiisinonsa garinni”  jawaachisha dandiineemmo gara heda hasiissannonke. Isayaasi togo yee borreessino: “Daafurtino anguwa jawaachishshe! Leqe leqe yitino gulubba kaajjishshe!” (Isa. 35:3; Ibi. 12:12, 13) Wedelluno ikko ninke baalunku woloota jawaachishannore coyiꞌne mimmito dhaawa dandiineemmo.

11. Mitte rodoo quwa saꞌino yaaddo amaddinoseta Maarti yinanni rodoo kaaꞌlitinohu hiittoonniiti?

¹¹ Maarti a yinanniti quwa saꞌino yaaddo amaddinose rodoo togo yitino: “Mitto barra jawaante afiꞌrate huuccatto assiꞌranni heeꞌre mitte jawa rodoonni xaadumma; ise hatte yannara hasiise nooe baxillenna mararro leellishshinoe. Iserano alba hattoo qarri iillinoseta kultueta macciishshantannoe callimmanni fooliishsho afiꞌroomma.” Hatti jawa rodoo, coyidhinori Maarti jawaachishanno yite heddinokkiha ikkara dandaanno.

12, 13. Filiphisiyusi Sokka 2:1-4 noo amaale harunsa dandiineemmohu hiitte doogganniiti?

¹² Phaawuloosi Filiphisiyusi noo songora togo yee sokka borreessino: “Mitte hedonni, baxillunni, ayyaanunninna gawalotenni sumuu yitine hagiirreꞌya wonshe. Umoꞌne roorsidhine haafu adawarshinni mittore nafa assitinoonte. Hatteentenni wolu manni kiꞌnenni roorinohu gede assitine hedde. Mittu mittunku woleho woyyannore hedo ikkinnina, umisira woyyannore calla laoonke.”—Fil. 2:2-4.

¹³ Ee, baalunku mimmitonke kaaꞌlineemmo faro hasiꞌra hasiissannonke. Roduuwanke jawaachishate, insa ‘baxillunni sheshifachisha,’ insara hendeemmota leellisha, hattono giddonkenni ‘baxanna mararro’ leellisha hasiissannonke.—Fil. 2:1, NW.

14. Jawaanteemmo gede assannonkeri maa ikkara dandaanno?

¹⁴ Konni albaanni kaaꞌlinoommonsa manni ammaname Yihowara soqqamanni noota macciishshanke lowo jawaante ikkitannonke. Soqqamaasinchu Yohaannisi tenne daafira coyiꞌranni, “Oosoꞌya halaalaancho heeshsho heedhannota macciishshatenni roorino hagiirri dinoe” yiino. (3 Yoh. 4) Batinye suwisaanono tini gara ikkitinota huwattino; lowo diri albaanni Qullaawa Maxaafa xiinxallissino manni xaa geeshsha Yihowara ammaname soqqamanni nootanna mitu isinni suwisaano ikke soqqamanna laꞌꞌansa lowo geeshsha jawaachishshannonsa. Mitto hexxo mudhino suwisaancho alba Yihowara ammaname hagiirrunni soqqamino gara qaagiissinummosiro lowo geeshsha jawaatanno.

15. Yihowara ammanante soqqantanni noore jawaachisha dandiineemmo doogga giddo mitte maati?

¹⁵ Batinyu woradu aliidi laꞌꞌaanonna minaamuwinsa songuwa towaati gedensaanni songuwa borreessitinonsati galatu sokka lowo geeshsha jawaachishshinonsata coyidhino. Ammanante soqqantanno cimeeyye, misiyoone ikkite soqqantannori, suwisaanonna Beeteelete maateno galantanninsa woyite jawaattanno.

16. Woloota jawaachishate maa assa dandiineemmo?

¹⁶ ‘Waajjishannoe daafira woloota jawaachisha didandeemmo’ yine heda soꞌrote. Woloota jawaachisha hakkeeshshi geeshsha qarrissannota diꞌꞌikkitino; mitto mancho keere haaꞌneemmo woyite faasiinqe hasaawisa calla jawaachishshasira dandiitanno. Mittu manchi ninke faasinqe hasaawinseemmosi woyite isi qole hatto assannokkiha ikkiro, tini qarru iillinosita leellishshara dandiitanno; tenne yannara hasaaphanno woyite seekke macciishsha jawaachishshasira dandiitanno.—Yai. 1:19.

17. Mittu wedellichi jawaante afiꞌrinohu hiittoonniiti?

 ¹⁷ Enirii yinannihu wedellichu rodii cimeessa ikkino annisinna wolu muli fiixisi halaalu mininni fuli yannara lowo geeshsha dadillino. Mittu woradu aliidi laꞌꞌaanchi Enirii shaete minira haaꞌre haꞌre Enirii giddosita kuꞌlanna seekke macciishshino; hatte yannara Enirii lowo geeshsha jawaatino. Qoleno fiixisi halaalu minira higanno gede kaaꞌlate, isi Yihowara ammaname heeꞌra hasiissannosita huwatino. Enirii Faarso 46; Soffooniyaasi 3:17 nna Maarqoosi 10:29, 30 nabbawasi lowo geeshsha jawaachishshinosi.

18. (a) Moote Selemooni mayyee borreessino? (b) Soqqamaasinchu Phaawuloosi maa assineemmo gede kulinonke?

¹⁸ Maartinna Enirii lawishshi, jawaante hasiissinonsa roduuwinkera jawaantete buicho ikka dandiineemmota leellishanno. Moote Selemooni togo yee borreessino: “Yannasira coyiꞌnoonni coyi hiittoo danchaati! Hisataamo alba laꞌꞌa wodana hagiirsiissanno; dancha duduwo macciishsha jawaachishshanno.” (Law. 15:23, 30) Agarooshshu Shaenni woy webisayitenke aaninni mite hedo nabbawano hexxo mudhinoha jawaachishshara dandiitanno. Phaawuloosi coyiꞌrinori, mitteenni Maganu Mangiste faarso faarsano jawaachishshannota leellishanno. Isi togo yee borreessino: ‘Egenno baaletenni mimmitoꞌne rosiissenna seejje. Faarsotenninna guwishshunni Magano wodaniꞌnenni galattinanni faarse.’—Qol. 3:16; Soq. 16:25.

19. Mimmitonke albinni roore jawaachisha hasiissannonkehu mayiraati? Hiittenne amaale harunsa hasiissannonke?

¹⁹ Yihowa barri “gamba yaanni” haꞌranno woyite, mimmitonke albinni roorsine jawaachisha hasiissannonke. (Ibi. 10:25) Phaawuloosi ammanate roduuwasi yiino garinni “xa assitinanni heedhinoonninte gede mimmitoꞌne jawaachishanna [dhaawa]” agurtinoonte.—1 Tes. 5:11.