SAI diro alamete doyichora noote Yihowa Farciꞌraasine songo giddo lowo kume ikkannohu labballu roduuwi songote cimeeyyenna soqqamaano ikke shoomamino. Atino muli yannara shoomamoottoha ikkiro, afiꞌroottote haaro soqqanshote qoossonni hagiidhattoti egennantinote.

Ikkollana tenne qoosso uyinihe yannara waajjoottoha ikkara dandaanno. Jaasooni yinannihu wedellichu cimeessi togo yiino: “Cimeessa ikke shoomamummo woyite, uyinoonnieha konne haaro looso loosa dandeemmokkiha lawinoe.” Musenna Ermiyaasino Yihowa uyinonsa looso loosse affannokkiha lawinonsa. (Ful. 4:10; Erm. 1:6) Aterano hatto lawannoheha ikkiro, waajja qeelte woꞌmante yannara ayyaanaamittetenni lopha dandaattohu hiittoonniiti? Rosaanchu Ximootewoosi lawishsha xiinxallakki tennera kaaꞌlitannohe.—Soq. 16:1-3.

Phaawuloosi ledosi haꞌre soqqamanno gede koyisisi yannara, Ximootewoosira 20 diri balla ikkannosi. Ximootewoosi wedellicha ikkino daafira umi qara Phaawuloosi ledo haꞌra waajjinoha woy haaro looso loosa qarrissinosiha ikkara dandaanno. (1 Xim. 4:11, 12; 2 Xim. 1:1, 2, 7) Ikkollana tonnu diri gedensaanni Phaawuloosi Filiphisiyusi noo songora togo yee borreessino: “Kiꞌne heedhinoonni gara macciishshe hagiidhate, rahe Ximootewosi kiꞌnewa soyeemmo. . . . Kiꞌne daafira ane gede yaadannohu iso agurranna wolu dinoe.”—Fil. 2:19, 20.

Ximootewoosi dancha cimeessa ikkanno gede kaaꞌlinosiri maati? Hanni isi lawishshinni ronseemmoha lee roso laꞌno.

1. Wolootaho wodaninni hedannoho. Phaawuloosi Filiphisiyuusi heedhanno roduuwira “[Ximootewosi] kiꞌne daafira . . . hedanno” yiino. (Fil. 2:20) Ee, Ximootewoosi wolootaho hedanno. Isi ayyaanaamittensa daafira hedanno, hattono umosi qooffatikkinni insa kaaꞌlate isonooto shiqishino.

Songote giddo loonsanni loosi aana calla illachishshooti; hatteentenni roduuwaho hasiisannonsari maatiro hedi. Wiiliyaami yinannihu 20 saꞌꞌanno diro cimeessa ikke soqqamino rodii, mitto haarote shoomamino rodoo togo yee amaalino: “Roduuwaho baxille leellishi. Songote giddo looso qineessate aana calla illachisha agurte, roduuwaho hasiisannonsari aana illachishi.”

2. Ayyaanaamittete coye balaxisiisino. Phaawuloosi, Ximootewoosi assinore wolu manni assannori ledo heewisiisanni, “Wolootu baalu, Yesuusi Kiristoosire ikkikkinni uminsa qiniite calla shorritannoreeti” yiino. (Fil. 2:21) Phaawuloosi tenne sokka borreessinohu Roomaho heeꞌreeti. Hakko heedhanno roduuwi uminsa dilgora calla kabbi facci yitanno. Insa ayyaanaamittete coye woꞌmu wodaninni diassitanno. Ximootewoosi kayinni insa gedeeha diꞌꞌikkino! Isi dancha duduwo halashshanno tunceenya afiꞌri yannara Isayaasira noosi gedee lao noosita leellishino; Isayaasi “Ani haꞌreemmona, ane soqqie” yiino.—Isa. 6:8.

Umikki loosono loossanni, ayyaanaamittete coye balaxisiisa dandaattohu hiittoonniiti? Umihunni, balaxisiisa hasiissannohe coye badde afi. Phaawuloosi “woyyanno [woy, roore hasiissano] coye baddine [affe]” yee amaalinonke. (Fil. 1:10) Maganu balaxisiisanno coye atino balaxisiisi. Layinkihunni, bikku heeshsho heeꞌri. Yannakkinna  wolqakki gudannore hooꞌli. Phaawuloosi Ximootewoosi togo yee amaalino: “Qeedhichimmate yortowiinni xooqi. . . . Keeraanchimma, ammana, baxillenna keere harunsi.”—2 Xim. 2:22.

3. Qullaawa soqqansho diinaggaawe soqqamino. Phaawuloosi Filiphisiyuusi heeꞌranno Kiristaanira togo yiino: “Ximootewosi . . . ane ledo annunna beettu gede ikkineenna ledoꞌya Danchu Duduwi looso loosanni heeꞌrinota affinoonni.” (Fil. 2:22) Ximootewoosi ceeꞌmaleessa diꞌꞌikkino. Isi Phaawuloosi ledo diinaggaawe soqqamino; tini qolte jaaloominsa kaajjanno gede assitino.

Yannankera Maganu dirijjite giddo loonsannihu lowo loosi no. Kuni loosi addu hagiirre afiꞌneemmo gede assannohonna ammanate roduuwinkewa albinni roore shinqeemmo gede kaaꞌlannonkeho. Konnira woꞌmanka woyite ‘Mootichu loosi’ batiꞌrinoheha ikkate sharrami.—1 Qor. 15:58.

4. Rosinore loosunni leellishino. Phaawuloosi Ximootewoosira togo yee borreessino: “Ati kayinni rosoꞌya, heeꞌreemmo gara, hedoꞌya, ammanaꞌya, cincaꞌya, baxilleꞌya, noommowa kaajjaꞌya harunsootto.” (2 Xim. 3:10) Ximootewoosi rosinore loosunni leellishino daafira, wole qoosso afiꞌrate ikkado ikkino.—1 Qor. 4:17.

Atera dancha lawishsha ikkannohehu ayyaanaamittetenni gikki yiino jaali noohe? Togoo jaali noohekkiha ikkiro, mayira dihasiꞌratto? Lowo diro cimeessa ikke soqqaminohu Toomi yinanni rodii togo yiino: “Mittu gikki yiino cimeessi lowo geeshsha kaaꞌlinoe. Duucha hige iso amaale xaꞌmireemmo, hattono aannoe amaale loosunni leellisheemmo. Tini, worba ikkeemmo gede kaaꞌlitinoe.”

5. Isonooto qajeelsino. Phaawuloosi Ximootewoosi “Maganoho gala dandaatto gede ateneeto qajeelsi” yee amaalinosi. (1 Xim. 4:7, NW) Qolchantannore qajeelsannonsa manchi nooha ikkirono, qolchantannori insaneeto qajeelsa hasiissannosi. Phaawuloosi Ximootewoosi togo yee amaalino: “Qullaawa Maxaafa mannaho nabbawate, kulatenna rosiisate jawaati. Lophakki mannu baalu afanno gede kunni coyira diinaggaawi.”—1 Xim. 4:13-15.

Atino woꞌmanka woyite dandookki lexxitanno gede assiꞌrate sharrami. Ayyaanaamittetenni lopha agurtooti; songote giddo loonsanni looso lainohunni Yihowa dirijjite ledo taalo qaafi. Quwa saꞌe umokki addaxxitooti; ‘Lowo woꞌnaalshi nooe daafira, baalanka coye buuxa hoogummorono assa dandeemmo’ yite heddooti. Ximootewoosi gede “Ateneenna rosiisatto roso seekkite agadhi.”—1 Xim. 4:16.

6. Yihowa ayyaana addaxxino. Phaawuloosi Ximootewosi soqqamino soqqansho daafira coyiꞌranni togo yiino: “Uyinoonniheta dancha eeggo, ledonke noohu Qullaawu Ayyaani widoonni qolte agadhi.” (2 Xim. 1: 14) Ximootewosi soqqanshosinni kaajje uurrate, Maganu ayyaana addaxxino.

Lowo diro cimeessa ikke soqqaminohu Doonaaldi yinanni rodii togo yiino: “Shoomamino labballi Maganu ledo noonsa jaalooma naada hasiissannonsa. Togo assituro ‘jawaantete aana jawaante lexxitanno.’ Maganu qullaawa ayyaana aannonsa gede huuccidhannohanna qullaawu ayyaani guma laalate sharrantannoha ikkiro, roduuwinsara atoote ikkitanno.”—Far. 84:7; 1 Phe. 4:11.

Haarote shoomantinori duuchu roduuwi ayyaanaamittetenni lophitanna laꞌꞌa lowo geeshsha hagiirsiissanno. Aleenni qummi assinihu Jaasooni yinanni rodii togo yiino: “Cimeessa ikke soqqamaꞌya lowore roseemmo gede kaaꞌlitinoe, qoleno waajja qeela dandoommo. Xa uyinannie looso loosa hagiirsiissannoe, qoleno tenne qoosso lowo geeshsha naadeemmo!”

Atino woꞌmante yannara ayyaanaamittetenni lopha hasiꞌratto? Hatto ikkiro Ximootewoosi lawishsha harunsate sharrami. Tenne assittoro atino Maganu mannira atoote ikkatto.