1. Cuuama hasiissannota ikkitinohu mayiraati? (Hanafote noo misile lai.)

 DIRU KIIRO lowo kume ikkitannoti Qullaawu Maxaafi rosaano cuuantanno. Insa giddo batinyu wedellaho. Insa lophitinohu halaalu mine ikkara dandaanno. Atino halaalu mine lophite cuuamootto wedellichaati? Hatto ikkiro, danchare doodhootto. Mittu manchi Kiristaancho ikkatenna gato afiꞌrate cuuama hasiissannosi.—Mat. 28:19, 20; 1 Phe. 3:21.

2. Heeshshokki Yihowara sayisse aa waajja woy giwa hasiissannohekkihu mayiraati?

² Cuuama lowo atoote afiꞌnanni gede assitannoha ikkirono, cuuammi gedensaanni assa hasiissannori no. Hatto yineemmohu mayiraati? Cuuamitto barra, “Yesuusi Kiristoosi kakkalo widoonni cubbiꞌnera maaro eꞌine Yihowa fajjo assate kiꞌneneeto sayissine uyitinoonni?” yine xaꞌmini yannara “Ee” yite qolootto. Cuuamakki heeshshokki Yihowara sayisse oottota leellishshanno. Qoleno Yihowa baxatenna baalunkurinni roorsite fajjosi wonshate qaale eootto. Kuni shotinse laꞌnanni qaale diꞌꞌikkino. Ateneeto Yihowara sayisse aakkinni gaabba  hasiissannohe? Dihasiissannohe! Heeshshokki Yihowara sayisse aakki garankolla. Hanni Yihowa magansiꞌra hoogoottoro mayi ikkannoro hedi! Mittu manchi Yihowa magansiꞌrannokkiha ikkiro, Sheexaanu alame wido ikkanno. Daawuloosi ati gato afiꞌrattora dihasiꞌranno. Isinni, Sheexaanu hegere heeshsho afiꞌrittokki gatittoronna isira haꞌlite Yihowa aliidimma irkisa giwittoro lowo geeshsha hagiidhanno.

3. Heeshshonke Yihowara sayinse uyinummoro mayi atoote afiꞌneemmo?

³ Hanni Sheexaanu wido ikka gibbe heeshshokki Yihowara sayisse uyite Kiristaancho ikkakkinni afiꞌrootto atoote hedi. Xa ateneeto Yihowara sayisse ootto daafira mitte giddonni “Kaaliiqi [“Yihowa,” NW] ledoꞌya heeꞌre kaaꞌlannoe daafira diwaajjeemmo; mannu assannoeri dino” yite coyiꞌra dandaatto. (Far. 118:6) Maganu jaala ikkanna iso hagiirsiisa roorino ayirrinyi dino!

4, 5. (a) Yihowara ninkeneeto sayinse uyineemmori ninke umonkeeti yineemmohu mayiraati? (b) Baalunku Kiristaanira hiittoo fonqoli iillannonsa?

⁴ Yihowa ledo noohe jaaloomi, maatekkiwiinni ragiꞌratto jajji woy baatto gede diꞌꞌikkino. Maatekki anga noottoha ikkirono, gato afiꞌrate sharrama hasiissannohehu ate umokkiiti. Tenne afa maaho kaaꞌlitanno? Albillitte mayi fonqoli iillannohero gudde afa didandaatto. Lawishshaho, qaaqqu heedhe cuuamittoro, wedellicha ikkatto wote haaru fonqolinna qarri iillahera dandaanno. Mitte 18 diri beetto togo yitino: “Mittu qaaqqi keeke ganne ilamino barra ayirrinsoonnisikki daafira calla, Yihowa Farciꞌraasincho ikkasinni gate bainosiri nooha lawa hoogasira dandaanno. Ikkollana, shiimu diri gedensaanni maalu yortosi lexxitanni hadhanno daafira, woꞌmanka wote Yihowa seera agadha hayyo ikkitinota seekke ammana hasiissannosi.”

⁵ Haaru fonqoli iillanonsari wedella calla diꞌꞌikkitino. Jajjabbu heedhe cuuantinorirano heddinokkihu ammanansa fonqolanno coyi iillansara dandaanno. Galtensa giddo qarru kalaqamara, fayyimmate qarri amadansara woy looso hooggara dandiitanno. Dirinsa ikkiha ikkirono, baalunku Kiristaanira hedikkinni Yihowara ammanamannokki gede assanno coyi iillansara dandaanno.—Yai. 1:12-14.

6. (a) Yihowara eootto qaale agadhattohu injaannohe wote calla diꞌꞌikkino yaa mayyaate? (b) Isayaasi 12:2 te aana noo hedonni maa ronseemmo?

⁶ Yihowara eootto qaale agadhattohu injaannohe wote calla diꞌꞌikkino; tenne qaagakki woꞌmanka wote isira ammanante heeꞌratto gede kaaꞌlitannohe. Maatekki woy jaallakki kalqete alame giddo Aliidiha ikkino Magano Yihowa magansiꞌra agurturono, ati kayinni iso magansiꞌra diagureemmo yite qaale eootto. (Far. 27:10) Woꞌmanka wote Yihowa isira eootto qaale agadhite heeꞌratto gede kaaꞌlahera huucciꞌra dandaatto.—Filiphisiyusi Sokka 4:11, 12; Isayaasi 12:2 nabbawi.

7. “Waajjatenninna huxiꞌratenni” gatonke woꞌma ikkitanno gede assiꞌrate yaa mayyaate?

⁷ Yihowa jaalasi ikkattora hasiꞌranno. Ikkollana, isi jaala ikke heeꞌratenna gato afiꞌrate sharrama hasiissanno. Isinni Filiphisiyusi 2:12 “Waajjatenninna huxiꞌratenni gatoꞌne woꞌma ikkitanno gede assidhe” yitanno. Kuni qummeeshshi leellishanno garinni, Yihowa ledo noohe jaaloomi baꞌꞌannohekki gede assiꞌranna aye fonqoli iilliherono isira ammanante heeꞌra dandaatto gara heda hasiissannohe. Mittoreno ikkeemmori dino yite heda dihasiissannohe. Maganoho lowo diro soqqantanni keeshshitinori nafa yannate gedensaanni isira ammanantukki gattino. Ikkina, gatokki woꞌma ikkitanno gede assiꞌra dandaattohu hiittoonniiti?

8. Hojju xiinxallo yaa mayyaate? Togo assa maaho kaaꞌlitanno?

⁸ Yihowa jaalla, isira hasaaphanna isi coyiꞌranna macciishsha hasiissannonsa. Yihowa coyiꞌranna macciishsha dandiineemmoti qara doogo, hojju xiinxallo assiꞌrate. Maganu Qaalenna Qullaawu Maxaafi aana xintantino borro nabbabbenna hiincite egenno afiꞌra hasiissannohe. Hatto assatto wote kayinni, Qullaawa Maxaafa xiinxalla rosu mine ronsanni rosi gede ikkitinokkita deꞌooti. Qullaawa Maxaafa rosu mine fonqolo saꞌꞌate geeshshira calla yine egenno afiꞌrate xiinxallinanni maxaafi gede assite laꞌꞌa dihasiissannohe. Dancha xiinxallo, hagiirsiisanno coye daaꞌꞌantanni haꞌrate gedeeti; togoo xiinxallo Yihowa daafira haarore ronseemmo gede kaaꞌlitannonke. Tini qolte Maganunniwa shiqatto gede kaaꞌlitannohe, hakkiinni isino atewa shiqanno.—Yai. 4:8.

9. Hojju xiinxallo assiꞌratto yannara kaaꞌlinohe uduunnichi hiikkonneeti?

⁹ Yihowa dirijjite Qullaawa Maxaafa danchu garinni xiinxalla dandaatto gede kaaꞌlate, lowo uduunnicho qixxeessitino. Lawishshaho, jw.org aana “Wedella” yaannohu hunda noohu “Qullaawa Maxaafa Xiinxallate Kaaꞌlitanno Rosiishshuwa” yaanno gafi Qullaawu Maxaafi giddo noo xaggenni roso afiꞌratto gede kaaꞌlannohe. Qoleno, jw.org aana nooti, “Qullaawu Maxaafi Addinta Mayyee Rosiisanno?” yitannoti xiinxallate kaaꞌlitanno borro, ammanatto coye seekkite buuxatto gede kaaꞌlitannohe. Tini xiinxallote borro ammanatto coye wolu mannira xawisa dandaatto gara afate kaaꞌlitannohe. Qoleno Dotteessa 2009nnite Baqqi Yiiyye! yinanni metseetera fulinohu “Wedellu Xaꞌmanno Xaꞌmo. . . Qullaawu Maxaafi Niwaawe Hagiirsiissannoe Gede Maa Asso?” yaanno birxichi aanano kaaꞌlitanno hedo afiꞌra dandaatto. Ee, Maganu Qaale xiinxallanna hiinca gatokki woꞌma assiꞌratto gede kaaꞌlitannohe.—Faarso 119:105 nabbawi.

10. Mittu cuuamino Kiristaanchi huuccatto assiꞌra hasiissannosihu mayiraati?

¹⁰ Yihowa coyiꞌranna macciishsha dandiineemmo doogga giddo mitte hojju xiinxallo assiꞌrate; Yihowa hasaawisa dandiineemmohu qole huuccattote widoonniiti. Kiristaanu, huuccatto mulla rosichu geeshshira calla assinanniri gede woy digintete wolqa  afidhinohu gede asse laꞌꞌa dihasiissannonsa. Hatteentenni huuccatto Kalaqaanchinke ledo hasaambeemmo doogooti. Yihowa ati coyidhanna macciishsha hasiꞌranno. (Filiphisiyusi Sokka 4:6 nabbawi.) Yaachishanno coyi iillannohe wote Qullaawu Maxaafi amaalannohe garinni ‘yaaddokki Maganu aana tuqqi.’ (Far. 55:22) Tini amaale ate kaaꞌlitannoheha lawannohe? Lowo miliyoone ikkanno roduuwi tenne amaale harunsansa kaaꞌlitinonsata coyiꞌrino. Togo assakki ateno kaaꞌlitannohe!

11. Woꞌmanka wote Yihowa galata hasiissannohehu mayiraati?

¹¹ Ikkollana huuccatto assiꞌra hasiissannohehu Yihowa kaaꞌlo hasiꞌratto wote calla diꞌꞌikkino. Qullaawu Maxaafi ‘galattinanire ikke’ yaanno. (Qol. 3:15) Mito wote qarru xaxxawe amadannonke daafira, noonke coye hambammora dandiineemmo. Barru baala ajayi ajeenna afiꞌroottoha sase coye hedde, hakko coyiꞌra Yihowa galata dandaatto. Abigayeeli yinanniti 12 dirinni heedhe cuuantino wedellitte togo yitino: “Kalqete alame giddo baalunkunni roore galatu hasiisannosihu Yihowaati. Afiꞌnummo faro baalantenni uyinonke eltora iso galata hasiissannonke. Mitte hige togo yinanna macciishshoomma: Yihowa oyennanke galantoommosikki coye baala haaꞌre hoolannoha ikkoommero, mayi gatannonke?”

12, 13. Yihowa danchumma qamasse laootto yanna hedakki kaaꞌlitannohehu hiittoonniiti?

¹² Maganu, Moote Daawiti lowo qarra cince saꞌꞌanno gede kaaꞌlinosi; isi tenne daafira kulanni “Kaaliiqi shaqqado ikkinota shiqqine [“qamassine,” NW] laꞌe” yee faarsino. (Far. 34:8) Kuni qummeeshshi heeshshonke giddo Yihowa kaaꞌlinonketa wodancha lowo horo afidhinota leellishanno. Qullaawa Maxaafanna Yihowa dirijjite qixxeessitino borro nabbawatto wote hattono, Kiristaanu gambooshshiwa jawaachishshanno hedo macciishshatto wote Maganu soqqamaanosi ammanante heedhanno gede kaaꞌlinonsa gara wodanchatto. Ayyaanaamittetenni gikki yitanni haꞌratto wote kayinni, heeshshokkinni Yihowa kaaꞌlinohe gara wodancha hasiissannohe. Ati Yihowa danchumma qamasse laoottohu hiittoonniiti?

¹³ Baalunku Kiristaani Yihowa danchumma qamase laꞌꞌa dandaanno doogo no. Maganu, Kiristaana Isiwanna Beettisiwa daanno gede koyisino. Yesuusi, “Soyinoehu Anniꞌya daanno gede assikkinni anewa daa dandaannohu dino” yiino. (Yoh. 6:44) Yihowa ateno isiwa woshshe abbinoheha lawannohe? Mittu qaaqqi ‘Yihowa woshshe abbinohu annaꞌyanna amaꞌyaati; ani insa hoodella dayoommo’ yee coyiꞌrara dandaanno. Ikkollana heeshshokki Yihowara sayisse uyittonna cuuamitto wote, isi ledo jaalooma kalaqiroottohu ate umokki ikkoottota deꞌooti. Xa Maganu ate egenninohe. Qullaawu Maxaafi “Magano baxannoha . . . Maganu egenninosi” yaanno. (1 Qor. 8:3) Yihowa dirijjitesi giddo uyinohe bayicho woꞌmanka wote naadate woꞌnaali.

14, 15. Soqqansho ammanakki kaajjitanno gede kaaꞌlitannohehu hiittoonniiti?

¹⁴ Yihowa danchumma qamasse laꞌꞌa woy huwata dandaattoti wole doogo, ammanakki wolu mannira kulatto wote Isi irkisannohe gara huwatate. Ammanakki woleho kulattohu soqqansho fulte woy rosu mine ikkara dandaanno. Mitu wedelli rosu mine ledonsa rossannorira farciꞌra waajjanno. Atino darawokki macciishshitannoheronna teꞌee afoottokki daafira, rosu mine sabbaka waajjishahera dandaanno. Qoleno, lowo rosaano gamba yitinowa farciꞌra roore waajjattoha ikkara dandaanno. Ikkina togoo waajja qeelatto gede mayi kaaꞌlannohe?

¹⁵ Umihunni, rosoottore ammanatto gede assinoheri maatiro hedi. Jw.org aana nooti xiinxallote rosiishshuwa ati coyiꞌratto afiinni qixxaabbino? Ammanatto coye huluullamattoha  ikkiro, yanna gaaꞌmite seekkite xiinxalli. Xiinxallote kaaꞌlitanno rosiishshuwa, ammanatto coye seekkite hedatto gede, hakkonne coye ammanattohu mayiraatironna ammanattore wolootaho xawisa dandaatto gara afate kaaꞌlitannohe. Ammanakki kaajjishirittoronna seekkite qixxaawittoro waajjittokkinni Yihoware mannaho kula dandaatto.—Erm. 20:8, 9.

16. Waajjittokkinni ammanakki woleho kulatto gede mayi kaaꞌlahera dandaanno?

¹⁶ Seekkite qixxaawittorono ammanakki wolu mannira kula waajjattoha ikkara dandaanno. Mitte 13 dirinni heedhe cuuantino wedellitte togo yitino: “Rosoomma coye seekke ammaneemma; ikkirono mito wote ammaneemmare woleho kula waajjishannoe.” Ise konne qarra qeeltanno gede kaaꞌlinoseri maati? Ise togo yitino: “Hasaawa shota ikkino garinni hanafate woꞌnaaleemma. Ledoꞌya rossanno ooso assitanno coye waajjitukkinni coyidhanno. Anino asseemmare waajjummakkinni coyiꞌra hasiissannoe yee hedoomma. Konni daafira, mito wote ‘Mitto barra Qullaawa Maxaafa rosiisanni heeꞌreenna . . . ’ yee hanafeemma. Hakkiinni yaammara hasiꞌroommare kuleemmansa. Hatte yannara Qullaawu Maxaafire hasaambeemmokkiha ikkirono, insa duucha wote Qullaawa Maxaafa rosiiseemma wote maa asseemmaro afa hasidhanno. Mito wote insa tenne daafira xaꞌmo xaꞌmitannoe. Tenne hayyo horoonsiꞌrumma kiiro, shota ikkitanni hadhinoe. Waajjummakkinni konni garinni farciꞌrumma kiiro lowo geeshsha tashshi yaannoe!”

17. Ammanakki woleho kulatto gede kaaꞌlannohehu wolu coyi maati?

¹⁷ Woloota ayirrisattohanna insara hedattota leellishattoha ikkiro, macciishshitahera dandiitanno. Qaaqqo heedhe cuuantinoti Oliiviya yinanniti 17 diri beetto togo yitino: “Hasaawu mereero Qullaawu Maxaafire kayisummaro, mannu ammaꞌnosera quwa saꞌannote yaannoe yee waajjeemma.” Hakkiinni ise waajjishannosere illachisha agurte togo yite heda hanaffino: “Lowo wedelli Yihowa Farciꞌraasine daafira diafino. Heeꞌnoommori Yihowa Farciꞌraasine ninke callaati. Konni daafira, assootinke insa halaale macciishshitanno gede woy macciishshitannokki gede assara dandaanno. Manna ille qanse laꞌꞌa dandiineemmokkiha, waajjineemmoha, ammananke kula saalleemmoha woy coyiꞌneemmo wote bata yineemmohala ikki? Hatto ikkiro, Yihowa Farciꞌraasine ikkankenni saalleemmoha lawansara dandaanno. Waajjineemmoha ikkiro, kulleemmonsare macciishsha gibbara dandiitanno. Ammanneemmo coye waajjinummokkinni coyiꞌneemmoha ikkiro kayinni ayyirrissankera dandiitanno.”

18. Gatokki woꞌma assiꞌratto gede mayi kaaꞌlannohe?

¹⁸ Kageeshsha ronsummonte gede gato afiꞌrate sharrama hasiissannohe. Maganu Qaale nabbawanna hiinca, Yihowa huucciꞌranna Isi uyinohe atoote heda tennera kaaꞌlitannohe. Kuri coyibba assakki, Yihowa ledo kalaqiꞌrootto jaalooma albinni roore naadatto gede kaaꞌlitannohe. Tini qolte ammanakki wolu mannira kulatto gede kakkayissannohe.—Faarso 73:28 nabbawi.

19. Gatokki woꞌma ikkitanno gede assiꞌrate sharrama hasiissannohehu mayiraati?

¹⁹ Yesuusi togo yiino: “Ane hoode haꞌra hasiꞌrannohu umosi kaado; masiqalasino [“qarru haqqasi,” NW] duqqe hoodeꞌya dayo!” (Mat. 16:24) Ee, Yesuusi harunsaancho ikkate, meessaneeto Yihowara sayise aanna cuuama hasiissanno. Togo assakki, xaa yannara bae atoote afiꞌratto gede, hattono albillitte haaro alamera hegerera heeꞌratto gede assitannohe. Konni daafira, gatokki woꞌma ikkitanno gede assiꞌrate sharrama agurtooti!