1, 2. Mitu annuwinna amuuwi oosonsa heeshshonsa Yihowara sayisse uyite cuuama hasidhanno wote huluullamannohu mayira ikkara dandaanno?

 DIRU KIIRO lowo kume ikkitannoti Qullaawu Maxaafi rosaano heeshshonsa Yihowara sayisse uyite cuuantanno. Kuri giddo batinyu halaalu mine lophino wedellaati; insa togo assansanni woyyitino doogo doodhitino. (Far. 1:1-3) Ati ooso ilootto Kiristaanchootiro, qaaqqikki woy qaaqqokki cuuantanno barra quqquxante agadhattoti dihuluullissannote.—Sayikki Yohaannisi kiiro 4te ledo heewisiisi.

² Ikkirono, huluullisannohe coyi nooha ikkara dandaanno. Mitu cuuamino wedelli yannate gedensaanni Maganu biddishsha harunsa kaaꞌlitannota huluullantinota afoottoha ikkara dandaanno. Batinyu wedelli isinni halaalu mininni fulino. Konninni kainohunni, ate qaaqqino Yihowa magansiꞌra hanafirono, yannate gedensaanni halaaleho noosi baxilli qiidanno yite huluullamattoha  ikkara dandaanno. Qaaqqikki woy qaaqqokki umi xibbi diro Efesooni songora heeꞌrino Kiristaani gede ikkara dandaanno; Yesuusi insa “Albiha baxillekki agurootto” yiinonsa. (Aju. 2:4) Oosoꞌnera halaaleho noonsa baxilli qiidannokki gedenna ‘gatote widira lophitanno gede’ kaaꞌla dandiitinannihu hiittoonniiti? (1 Phe. 2:2) Tenne xaꞌmora dawaro afiꞌrate hanni Ximootewoosi lawishsha laꞌno.

3. (a) Ximootewoosi Kiristaancho ikkinohu hiittoonniiti? Isi rosinore loosunni leellishinohu hiittoonniiti? (b) Phaawuloosi Ximootewoosi ma assanno gede amaalinosi?

³ Soqqamaasinchu Phaawuloosi umo Lisxira haꞌrinohu 47 M.D.; Ximootewoosi Yesuusire rosinohu hatte yannara ikkara dandaanno. Hatte yannara Ximootewoosi wedellicha ikkirono, isi rosinore loosunni leellishanno. Lamu diri gedensaanni isi Phaawuloosira soqqanshote jaala ikkino. Phaawuloosi mitu 16 diri gedensaanni Ximootewoosi togo yiino: “Rosoottohunninna afootto [“ammante adhootto,” NW] halaalinni kaajjite heeꞌri. Anjekkinni kayisse Kiristoosa Yesuusa ammanatenni, gato afiꞌnanni roso [“hayyo,” NW] uyitannota Qullaawa Borrono afootto.” (2 Xim. 3:14, 15) Phaawuloosi Ximootewoosira (1) Qullaawa Borro afanno gede, (2) ammane adhanno gedenna (3) Kiristoosi Yesuusi widoonni gato afiꞌnanni gede assitanno hayyo heedhannosi gede amaalinosi.

4. Ati qaaqquullekki qajeelsate hiikkuri uduunne horoonsirootto? (Hanafote noo misile lai.)

⁴ Kiristaancho ikkootto daafira, oosokki Qullaawa Borro affara hasiꞌrattoti egennantinote; xaa yannara Qullaawa Borro yinanniti Ibiraawootu Afiite Qullaawa Borrootinna Giriikete Afiite Qullaawa Borrooti. Dandoonsa garinni baalunku qaaqquulli Qullaawu Maxaafi giddo kulloonni xaggenna manni daafira rosa dandiitanno. Yihowa dirijjite, annuwunna amuuwu qaaqquullensa qajeelsate horoonsidhannoha addi addi uduunne qixxeessitino. Kuri uduunni giddo ate afiinni qixxaawinohu no? Qaaqqikki Yihowa ledo muli jaalooma kalaqiꞌranno gede, Qullaawu Maxaafi egenno hasiissannosita deꞌooti.

5. (a) ‘Ammane adhate’ yaa mayyaate? (b) Ximootewoosi Yesuusi daafira rosino halaale ammane adhinota mayinni anfeemmo?

⁵ Qaaqquulleho Qullaawu Maxaafi egenno hasiissannonsati egennantinote. Ikkirono, insara ayyaanaamittete roso rosiisate yaa, Qullaawu Maxaafi giddo kulloonni xaggenna mannire kula calla diꞌꞌikkitino. Ximootewoosi rosino coye ‘ammane adhino.’ “Ammane adha” yaannohu Giriikete Afii handaari “buuxa” woy “mittu coyi halaale ikkinota taje xiinxalline huwata” yitanno tiro afiꞌrino. Ximootewoosi Qullaawa Borro anjesinni kayise afino. Gedensaanni isi Yesuusi Mesihicha ikkinota ammane adhino. Isinni Ximootewoosi rosino halaale seekke ammanino daafira, gedensaanni cuuame Phaawuloosi ledo misiyoone ikke soqqama hanafino.

6. Oosoꞌne Maganu Qaalinni rossinore ammante adhitanno gede kaaꞌla dandiitinannihu hiittoonniiti?

⁶ Oosokki Ximootewoosi gede rossino halaale ammante adhitanno gede kaaꞌla dandaattohu hiittoonniiti? Umihunni, cinca hasiissannohe. Mitto coye seekke ammanate yanna hasiissanno; qoleno ati mitto coye ammante adhootto daafira calla oosokkino hakkonne coye ammante adhitanno yaa diꞌꞌikkino. Mittu mittunku qaaqqi, Qullaawu Maxaafinni rosino halaale ‘fonqole lae’ ammana hasiissannosi. (1 Teselonqe 5:21 nabbawi.) Hakko iso qaaqqikki xaꞌmo xaꞌmannohe wote, ammanasi kaajjitanno gede kaaꞌla dandaatto. Hanni mittu anni assinorinni maa ronseemmoro laꞌno.

7, 8. (a) Mittu anni qaaqqosi rosiisanno wote cincannohu hiittoonniiti? (b) Ati cinca hasiissannota huwatoottohu hiittoonniiti?

 ⁷ Toomaasi yinannihu 11 diri qaaqqo noosi rodii togo yiino: “Qaaqqoꞌya ‘Yihowa uullate aana heeshsho afiꞌrinore kalaqate suutu soorro horoonsiꞌrinohalla ikki? Dagoomu giddo mito coye woyyeessate sharrantannore mayira dikaaꞌlineemmo, lawishshaho mirca mayira ditungeemmo?’ yite xaꞌmitaera dandiitanno. Mito wote ani ammaneemmore iseno ammantanno gede xixiiweemmosekki gede qoropheemmo. Mitto halaale calla afa kaajjado ammana heedhannonke gede diassitanno. Mitto coye seekke ammanate addi addi taje xiinxalla hasiissanno.”

⁸ Toomaasi qaaqquulle rosiinsanni wote cinca hasiissannota huwatino. Hige baalunku Kiristaani cincannore ikka hasiissannonsa. (Qol. 3:12) Toomaasi mitte haja daafira duucha hinge hasaawa hasiissannota huwatino. Qaaqqosi rossino coye seekkite ammantanno gede Qullaawa Borronni taje shiqisha hasiissannosi. Toomaasi togo yiino: “Hakko iso shota ikkitinokki haja hasaambeemmo wote minaamaꞌyanna ani qaaqqonke rossino coye ammantannoronna kuni coyi leellinosero afa hasiꞌneemmo. Xaꞌmo xaꞌmitannonke wote tashshi yaannonke. Qaaqqonke mitto coye sammi yite ammante adhitanno wote huluullameemmo.”

9. Qaaqqulliꞌne wodanira halaalu qaꞌmiranno gede kaaꞌla dandiitinannihu hiittoonniiti?

⁹ Annuwunna amuuwu qaaqquullensa cincite rosiissannoha ikkiro, qaaqquullinsa galte hosse halaalu “mageeshshi geeshsha halaꞌladonna . . . diime” ikkinoro huwatanno. (Efe. 3:18) Dirinsanna dandoonsa ledo sumuu yaannore doorre rosiisa dandiineemmo. Insa rossino coye seekkite ammanturo, konne coye ledonsa rossannoriranna wolu mannira xawisa dandiitanno. (1 Phe. 3:15) Lawishshaho qaaqquullikki reyiniro ma ikkinanniro Qullaawu Maxaafinni xawisa dandiitanno? Qullaawu Maxaafi xawisannore ammantanno? a Ee, halaalu qaaqquulliꞌne wodanira qaꞌmiranno gede assate cincitine kaaꞌla hasiissannoꞌne; ikkirono togo assaꞌne gaabbissannota diꞌꞌikkitino.—Mar. 6:6, 7.

10. Oosoꞌne rosiisa dandiitinanniti wole doogo hiittenneeti?

¹⁰ Qaaqquulliꞌnera dancha lawishsha ikkaꞌne, ammanansa kaajjitanno gede kaaꞌlitannonsa. Istefaani yinanniti sase seenne afidhino rodoo togo yitino: “Qaaqquulliꞌya anje heeꞌreenna, ‘Yihowa nooha ikkinota, isi baxillaancho ikkinotanna doogosi keeraancho ikkitinota ammaneemmahu mayiraatiro kuleemmansa? Qaaqquulliꞌya ani addinta Yihowa baxeemmata affino?’ yee aneneeto xaꞌmeemma. Ani ammanoommakki coye qaaqquulliꞌya ammantanno yee heda didandeemmo.”

11, 12. Hayyo maati? Mittu manchira hayyo noosita anfannihu dirisinni calla diꞌꞌikkino yineemmohu mayiraati?

¹¹ Aleenni laꞌnummonte gede Ximootewoosira (1)  Qullaawa Borro egenno noosi, hattono isi (2) rosino coye ammane adhino. Phaawuloosi Qullaawa Borro Ximootewoosira “gato afiꞌnanni hayyo” uyitannosita coyiꞌrino; ikkina hatto yaa mayyaate?

¹² Qullaawa Borro Seekke Huwata, Xiraaze 2 yinanni maxaafi togo yaanno: “Hayyote yaa, egennonna wodanchatenni qarra tirate, gawajjannonkere gargadhate, fushshiꞌnoommo mixo wonshiꞌratenna wolootuno mixonsa wonshidhanno gede amaalate dandooti. Hayyo gowimmate woy hambete gurchooti.” Qullaawu Maxaafi “oosote wodanira  hambe [woy, gowwimma] heedhanno” yaanno. (Law. 22:15) Konni daafira, mittu manchira gowwimmate gurcho ikkitinoti hayyo heedhusiro, tini kuni manchi gikki yiinota leellishshanno. Mittu manchi ayyaanaamittetenni gikki yiinota anfannihu dirisinni diꞌꞌikkino; hatteentenni Yihowa waajjannohanna woꞌmanka wote hajajosi agadhannoha ikkiro ayyaanaamittetenni gikki yiinoti leeltanno.—Faarso 111:10 nabbawi.

13. Qaaqquullu gato afiꞌnanni gede assitanno hayyo noonsata leellisha dandiitannohu hiittoonniiti?

¹³ Ayyaanaamittetenni gikki yitino qaaqquulli, yortonsanna darawonsa ‘kawanna kaꞌa shaffansaranna gatantarsitansara’ diwodhitanno. (Efe. 4:14) Hatteentenni insa “danchanna busha bade afate” dandoonsa qajeelsidhanno. (Ibi. 5:14) Insa annuwinsanna amuuwinsa woy wolu manni laꞌꞌannonsakkiwa noo yannarano danchare assitanno; tini insa, gikki yitinore woy hayyoota ikkitinota leellishshanno. (Fil. 2:12) Gato afiꞌrate hattoo hayyo hasiissanno. (Lawishsha 24:14 nabbawi.) Oosoꞌne togoo hayyo afidhanno gede kaaꞌla dandiitinannihu hiittoonniiti? Umihunni, kiꞌne Qullaawu Maxaafi biddishsha harunsitinannita affanno gede asse. Coyidhinannirinninna assitinannirinni Maganu Qaali giddo noohu Yihowa biddishshi garinni heedhinannita leellishshe.—Rom. 2:21-23.

14, 15. (a) Mittu qaaqqi cuuamara albaanni maa heda hasiissannosi? (b) Qaaqquulliꞌne Yihowa seera harunsiniro afiꞌnanni atoote hiincitanno gede kaaꞌla dandiitinannihu hiittoonniiti?

¹⁴ Ikkollana, qaaqquulliꞌnera garanna gara ikkinokkire kula calla kaajjado ammana heedhannonsa gede diassitanno. Aante noote gedee xaꞌmuwa hedanno gede assa dandiitinanni: ‘Qullaawu Maxaafi giddo mannu ooso baxisannnoha lawannoha mito coye assitinoonte yine hoolloonnihu mayiraati? Qullaawu Maxaafi giddo noo biddishshi baalu kaaꞌlannoha ikkinota ammaneemmo gede assinoeri maati?’—Isa. 48:17, 18.

¹⁵ Qaaqqiꞌne cuuamate hedanni nooha ikkiro, isi huwatanno gede kaaꞌla hasiissannoꞌne coyi no; Kiristaana ikkini gedensaanni maa assinanniro seekke afa hasiissannosi. Kiristaancho ikka mayi horo afidhino? Kiristaana ikkiniro maa agurranni? Afiꞌneemmo  atooti agurrreemmo coye roorannohu hiittoonniiti? (Maq. 10:29, 30) Cuuammara albaanni kuri coyibba heda hasiissanno. Qaaqquullu hajajama afidhino horonna hajajama hooga abbitanno gawajjo heddanno gede kaaꞌlineemmonsaha ikkiro, Qullaawu Maxaafi giddo noo biddishshi baalu kaaꞌlannonsaha ikkinota ammantanno.—Mar. 30:19, 20.

16. Annuwunna amuuwu qaaqqinsa cuuami gedensaanni ammanasi huluullamiro maa assa hasiissannonsa?

¹⁶ Qaaqqikki cuuami gedensaanni mito geeshsha ammanasi huluullamalla hanafi? Lawishshaho, cuuamino qaaqqi, alamete noo coyibba baxa hanafinoha woy Qullaawu Maxaafi biddishsha harunsa hayyo ikkitinota huluullama hanafinoha ikkara dandaanno. (Far. 73:1-3, 12, 13) Annuwunna amuuwu tenne yannara assitannori, qaaqqinsa Yihowawa shiqanno gede woy halaalu mininni xeertiꞌranno gede assara dandaanno. Qaaqqiꞌne jawa woy shiima ikkirono tenne haja kayissine giwantinannikki gede qorophe. Mixoꞌne iso baxillunninna shaqqillunni kaaꞌla ikkitinota deꞌinoonte.

17, 18. Annuwunna amuuwu qaaqqinsa ammanasi huluullama hanafiro iso kaaꞌla dandiitannohu hiittoonniiti?

¹⁷ Cuuamino qaaqqi heeshshosi Yihowara sayise uyinoho. Isi Magano baxatenna baalunkurinni roorse fajjosi wonshate qaale eino. (Maarqoosi 12:30 nabbawi.) Yihowa konne qaale mulluri gede asse dilaꞌꞌanno; Yihowara qaale einohu aye manchino eino qaale shotise laꞌꞌa dihasiissannosi. (Ros. 5:4, 5) Hasiissanno yannara shaqqillunni tenne qaaqqiꞌnera qaagiissesi. Hatto assitinara albaanni Yihowa dirijjite annuwahonna amuuwaho qixxeessitino uduunne seekkitine horoonsidhe. Hatto assaꞌne, heeshshonke Yihowara sayise aanna cuuame Kiristaancho ikka ajinshe laꞌnannire ikkinokkitanna togo assa atoote afiꞌnanni gede assitannota xawissine kultinanni gede kaaꞌlitannoꞌne.

¹⁸ Wedellu Xaꞌmanno Xaꞌmonna Mala Ikkitanno Dawaro Xiraaze 1, yaanno maxaafira jeefote qooli balla “Annuwunna Amuuwu Xaꞌmitanno Xaꞌmo” yaanno guwuurshi hunda kaaꞌlitanno amaale afiꞌra dandiinanni. Lawishshaho hakkiicho togo yitanno hedo no: “Qaaqqiꞌne albi gede ayyaanaamittete coye assa agurinohu kiꞌne ammaꞌno harunsa giwino daafiraati yitine heddinoonte. Togo ikkanno gede assinohu wolu korkaati heeꞌrara dandaanno.” Ayyaanaamittete coye albi geeshsha naadannokki gede assitinositi darawosi ikkitara dandiitanno. Isi ayyaanaamittete coye albi gede naada hooginohu, callatino daafira woy songote giddo noori wolu wedelli isinni roore ayyaanaamittetenni lophitino daafira ikkara dandaanno. Hakkiinni aanche guwuurshu togo yaanno: “Kuri coyibba qaaqqiꞌne ammanaꞌne huluullama hanafinota leellishshannohu gede assitine heddinoonte. Hatteentenni, qaaqqiꞌne ayyaanaamittete coye albi geeshsha naada hooginohu, tenne ammana harunsa qarra ikkitannosi gede assannori iillinosi daafiraati. Hakkiinni aanche guwuurshu annuwunna amuuwu ammanansa shoshshoggitino qaaqquulle kaaꞌla dandaannohu hiittoonniitiro xawisanno.

19. Annuwunna amuuwu oosonsara gatote kaaꞌlitanno hayyo heedhannonsa gede kaaꞌla dandiitannohu hiittoonniiti?

¹⁹ Annuwanna amuuwa, oosoꞌne “Mootichu amaalenni seejjitinanni” lossate qeechinna qoosso nooꞌne. (Efe. 6:4) Kageeshsha ronsummonte gede, oosote Qullaawu Maxaafi yaannore rosiisa calla diguddanno; hatteentenni rossinore ammante adhitanno gede kaaꞌlensa. Insa heeshshonsa Yihowara sayise aatenna isira woꞌmu wodaninni soqqamate kaajjado ammana hasiissannonsa. Yihowa Qaali, qullaawu ayyaanisinna kiꞌne sharrantinanni sharro, oosoꞌnera gato afiꞌrate kaaꞌlitanno hayyo heedhannonsa gede assitannonsa.