1-3. (a) Ammanankehu qaru rosi giddo mittu hiikkonneeti? (b) Kaote hexxo hasiissannota ikkitinohu mayiraati? (Hanafote noo misile lai.)

 MITTU manchi ‘Ammanakkihu qaru rosi maati?’ yee xaꞌmihero mayite qolatto? Yihowa Kalaqaanchonna Heeshsho Uyinonkeha ikkinota ammanattota kulattositi egennantinote. Wodo ikke reyinonkeha Yesuusi Kiristoosi ammanattota kulattora dandaatto. Qoleno albillitte uulla gannate ikkitannotanna hakkiicho Maganu manni hegerera heeꞌrannota hagiirrunni kulattosira dandaatto. Kayinni kaote hexxo ammanankehu qaru rosi wido ikkitinota kulatto?

² Bayira qarra lubbotenni heeꞌne saꞌne hegerera heeꞌrate hexxineemmoha ikkirono, kaote hexxo ammanankehu qaru rosi wido ikkitinota ammanneemmo gede assannonkeri no. Soqqamaasinchu Phaawuloosi kaote hexxo ammanankera qara coye ikkitinota xawisanni togo yiino: “Reyotenni kaꞌꞌa nookkiha ikkiro, Kiristoosino reyotenni dikaino yaate.” Yesuusi reyotenni kainokkiha ikkiro, isi xa iima Maganu Mangiste Moote ikke gashsha didandaanno; hatto ikkiro qole Yesuusi gashshooti daafira rosiinseemmo rosi waaga diafiꞌranno. (1 Qorontoosi 15:12-19 nabbawi.) Ninke kayinni Yesuusi reyotenni kainota anfoommo. Ninke Yesuusi kainota ammanneemmo daafira, Ayihudete Saduqooti gede diꞌꞌikkinoommo; insa Yesuusi reyotenni kainota kaaddino.  Mannu mishannonkeha ikkirono, Maganu reyitinore kayisannota ammana diagurreemmo.—Maq. 12:18; Soq. 4:2, 3; 17:32; 23:6-8.

³ Phaawuloosi “reyotenni kaꞌꞌa” ‘Kiristoosi daafira uyinoonnihu umi rosi’ wido ikkitinota coyiꞌrino. (Ibi. 6:1, 2) Qoleno isi reyino manni reyotenni kaꞌꞌannota ammanannota xawisino. (Soq. 24:10, 15, 24, 25) Kaote hexxo “Maganu qaaliha umi roso” ikkiturono, tenne hexxo daafira seekkine xiinxalla hasiissannonke. (Ibi. 5:12) Mayira?

4. Kaote daafira hiikkuri xaꞌmuwa xaꞌminammora dandiineemmo?

⁴ Mannu Qullaawa Maxaafa xiinxalla hanafanno wote, hunda reyotenni kaino mannire rosanno; kuri manni giddo mittu Aliaazaariiti. Qoleno kuni manni Abirihaami, Iyyoobinna Daanieeli albillitte reyitinori kaꞌannota ammantinota rosanno. Kayinni mittu manchi mannu reyotenni kaꞌꞌanno yine qaale eꞌnihunni lowo xibbi diri gedensaanni reyitinori kaꞌannota leellishshanno taje kulattosira xaꞌmihero mayite qolatto? Qullaawu Maxaafi reyitinori kaꞌanno yanna kulanno? Kuri xaꞌmuwara dawaro afiꞌranke ammananke kaajjishshanno; hanni tenne haja daafira Qullaawu Maxaafi mayyaannoro xiinxallino.

5. Balanxe hiittenne kaore ronseemmo?

⁵ Reyino manchi bayichonko reyotenni kaino yiniro tenne ammane adha diqarrissannonke. (Yoh. 11:11; Soq. 20:9, 10) Kayinni albillitte lowo xibbi diri albaanni reyitinori kaꞌanno yiniro tenne ammana dandiineemmo? Muli yannara reyino manchino ikko alba reyino manchi kaꞌꞌanno yine lowo diri albaanni eꞌnoonninke qaale ammana dandiineemmo? Lowo xibbi diri albaanni masaalloonniti woꞌmite kaꞌino kao no; tini kao ninkeno ammanneemmote. Tini kao hiittenneeti? Tini kao albillitte reyino manni kaꞌꞌannota ammanneemmo gede kaaꞌlitannonkehu hiittoonniiti?

6. Faarso 118 Yesuusi aana woꞌmitinohu hiittoonniiti?

⁶ Lowo xibbi diri albaanni kulloonni kaore afate hanni Daawiti borreessino yine hendannita Faarso 118 xiinxallino. Tenne faarsora isi togo yee huucciꞌrino: “Kaaliiqa ballo eeggatena gatisinke! . . . Kaaliiqi [“Yihowa,” NW] suꞌminni daannohu maassaminoha ikko.” Tini Mesihichu daafira coyiꞌnoonni hedooti; Yesuusi reyara shiima yannara albaanni Niisaani 9nni Yerusaalame haꞌranna mannu tenne hedo qummi asse qeexaaꞌlino. (Far. 118:25, 26; Mat. 21:7-9) Faarso 118 lowo diri gedensaanni woꞌmitino kao kultannonkehu hiittoonniiti? Faarsaasinchu hatte fooliishshonkura togo yiino: “Mine mintannori mishshe agurtino kinchi woꞌmunkura umo ikkino.”—Far. 118:22.

7. Ayihude Mesihicha adha gibbinohu hiittoonniiti?

⁷ “Mine mintannori” yiniri Ayihudete murrooti Mesihicha adha gibbino. Insa iso buuraminoha ikkinota ammante adha gibbe calla diagurtino. Batinyu Ayihudete manni, Philaaxoosi Yesuusa shaanno gede xaꞌmirino. (Luq. 23:18-23) Ee, insa Yesuusa shinanni gede gano gantino.

8. Yesuusi “dhaawate kincho” ikkinohu hiittoonniiti?

⁸ Ayihude Yesuusa adha gibbinohanna shitinosiha ikkina, isi “woꞌmunkura umo” ikka dandaannohu hiittoonniiti? Kuni ikkannohu isi reyotenni kairo callaati. Yesuusi umisi tenne daafira coyiꞌrino. Isi togo yee lawishsha kulino: Mittu gawartichi loosaasinesiwa soqqamaasinchosi soyino; hakkiinni Israeele Maganu masaalaano assidhunte gede loosaasineno konne soqqamaasincho beebba assidhino. Jeefote gatu anni  baxanno beettosi soyino. Insa konne beetto macciishshituyya? Dimacciishshitino. Isinni loosaasine beetto shitino. Yesuusi lawishsha kule gudi gedensaanni, Faarso 118:22 aana noo hedo qummi asse coyiꞌrino. (Luq. 20:9-17) Soqqamaasinchu Pheexiroosino “Yihudu roorrootinna geerru, seeru rosiisanno Yerusaalamete” songite noowa konne qummeeshsha qummi assino. Isi “Kiꞌne suttinihunna Maganu reyotenni kayisisihu Naaziretete Yesuusi Kiristoosi” yee coyiꞌrino. Hakkunni gedensaanni Pheexiroosi togo yee xawise coyiꞌrino: “Kiꞌne mine mintinanniri mishshine agurtinoonni kinchi isooti; isi dhaawate kincho ikkino.”—Soq. 3:15; 4:5-11; 1 Phe. 2:5-7.

9. Faarso 118:22 te aana hiikkonne dhagge ikkanno coye kulloonni?

⁹ Ee, lowo xibbi diri albaanni Faarso 118:22 te aana kao heedhannota masaalloonni. Mesihicha gimbanni, hattono shinanni; ikkollana isi reyotenni kae woꞌmunkura umo woy dhaawate kincho ikkanno. Kuni reyotenni kaꞌꞌannohu Maganu beetti ‘gatote hasiissannonkeha mannaho uyinoonni’ suꞌma baala roorinoha afiꞌrinoha ikkanno.—Soq. 4:12; Efe. 1:20.

10. (a) Faarso 16:9 te aana mayine masaalloonni? (b) Faarso 16:9 Daawiti aana woꞌmitinokkita mayinni anfeemmo?

¹⁰ Hanni kao heedhannota balanxe masaalloonniha wole qummeeshsha laꞌno. Konne qummeeshsha borreessinoonnihu mitto kume saꞌꞌanno diri albaanniiti; tini qaale eꞌnihunni lowo diri gedensaannino reyino manni kaꞌꞌannota ammanneemmo gede assitannonke. Faarso 16te aana Daawiti togo yiino: “Lubboꞌya jeennaateho [woy, waammate] diagurattose. Qullaawikki hoqara worte diagurattosi.” (Far. 16:9) Daawiti togo yiinohu ani direyeemmo woy mannu eanno waamma dieꞌꞌeemmo yaate diꞌꞌikkino. Maganu Qaali Daawiti geedhinota xawise kulanno. Hakkiinni isi “annuwasinte gede reenna Yerusaalamete Daawiti katama yinannihura madaarrisi.” (1 Mot. 2:1, 10) Ikkina Faarso 16:9 aye daafira kultanni no?

11. Pheexiroosi Faarso 16:9 te aana noo hedo xawisinohu mamarooti?

¹¹ Qullaawu Maxaafi tenne daafira kulannonke. Hattenne faarso borreessinihunni mitto kume saꞌꞌanno diri gedensaanni yaano Yesuusi reyotenni kaihunni shiima lamala gedensaanni Pheexiroosi Ayihudetenna Yihudimmate soorramino mannira Faarso 16:9 aana noo hedo xawisinonsa. (Soqqamaasinete Looso 2:29-32 nabbawi.) Pheexiroosi Daawiti reyenna madaarroonnita kulinonsa. Hakko noo manni tenne afino. Pheexiroosi lede Daawiti “Maganu albillitte assara noore balaxe afe, Kiristoosi reyotenni kaꞌꞌannota” coyiꞌrino yiino; Qullaawu Maxaafi Pheexiroosi hatto yii yannara hakko noo manni giddo tennera huluullaminohu noota dikulanno.

12. Faarso 16:9 woꞌmitinohu hiittoonniiti? Tini masaalo woꞌmase kaote hexxo daafira maa kultannonke?

¹² Pheexiroosi Faarso 110:1te aana noota Daawiti borreessino hedo qummi asse coyiꞌrinori halaale ikkinota buuxisino. (Soqqamaasinete Looso 2:33-36 nabbawi.) Pheexiroosi konni garinni Qullaawa Borro horoonsiꞌre xawisasi, batinyu manni Yesuusi “Mootichanna Kiristoosa” ikkinota ammananno gede assitino. Qoleno mannu Yesuusi reyotenni kai yannara Faarso 16:9 woꞌmitinota huwatino. Yannate gedensaanni soqqamaasinchu Phaawuloosino Phisidiyu giddo noohu Antsookiya yinanni katamira heedhanno Ayihudera rosiisi yannara tenne taje horoonsiꞌrino. Phaawuloosi rosiisinonsari baxisinonsa daafira wole woteno daye rosiisansara xaꞌmidhino. (Soqqamaasinete Looso 13:32-37, 42 nabbawi.) Tini Qullaawu Maxaafi masaalo lowo xibbi diri albaanni  masaalloonnita ikkiturono woꞌmitinota ninkeno ammana dandiineemmo.

13. Kaote daafira hiikkuri xaꞌmuwa xaꞌminammora dandiineemmo?

¹³ Qaale eꞌnihunni lowo diri gedensaannino reyino manni kaꞌꞌannota afanke jawaachishshannonke. Ikkirono mittu manchi togo yee hedara dandaanno: ‘Shiiroommo manninni xaadate konni gedensaanni lowo diro agadheemmo yaate? Reyino manni kaꞌꞌannohu mamarooti?’ Yesuusi rosaanosira insa afa dandiitannokki coyi noota kulinonsa. Yesuusi ‘Annu [Yihowa] roorresinni hirqino [woy, murino] yannanna diri’ noota coyiꞌrino. (Soq. 1:6, 7; Yoh. 16:12) Hatto yaa kayinni reyitinori kaꞌanno yanna afa horo didandiineemmo yaa diꞌꞌikkino.

14. Yesuusi kao wolu manni kaonni baxxitannohu hiittoonniiti?

¹⁴ Tenne afate hanni Qullaawu Maxaafi giddo noota reyotenni kaꞌinori daafira kultanno xagge qaagi. Kuri kao giddo baalanta roortannoti Yesuusi kaooti. Yesuusi reyotenni kainokkiha ikkoommero, shiiꞌnoommo manni ledo galagalle xaandeemmo yine hexxa didandiineemmo. Yesuusira albaanni reyotenni kaꞌinori lawishshaho, Eeliyaasinna Elsai kayisino manni hegerera diheeꞌrino. Insa galagale reyino, hattono waammate giddo bushsha ikkite gattino. Yesuusi kayinni ‘reyotenni kaino daafira, layinkimeeshsho reyannokkitanna reyono isi aana wolqa afidhinokkita’ anfoommo. Isi iima ‘hegerera’ heeꞌranno, hattono layinkimeeshsho direyanno.—Rom. 6:9; Aju. 1:5, 18; Qol. 1:18; 1 Phe. 3:18.

15. Yesuusi ‘umiha ikke’ reyotenni kaꞌꞌasi mayi horo afidhino?

¹⁵ Mite yee iima heeꞌrate reyotenni kainohu Yesuusaati; qoleno isi kao baalanta roore kaooti. (Soq. 26:23) Kayinni ayyaanu kalaqo ikke iima heeꞌrate reyotenni kainohu Yesuusa calla diꞌꞌikkino. Yesuusi ammanantino soqqamaasinesira iima ledosi gashshitannota kulinonsa. (Luq. 22:28-30) Insa konne baꞌraarsha afiꞌrate balaxxe reya hasiissannonsa. Hakkunni gedensaanni insa Kiristoosi gede ayyaanu biso uddidhe reyotenni kaꞌanno. Phaawuloosi, “Kiristoosi reyitinorira reyotenni kaꞌꞌate umiha ikke, halaalinta reyotenni kaino” yee borreessino. Hakkiinni Phaawuloosi iima heeꞌrate reyotenni kaꞌannori noota coyiꞌrino; togo yiino: “Kuni ikkannohuno bado badosinniiti: Umiha ikke Kiristoosi kaꞌꞌanno; isi daanno woyite [“bayicho amadanno wote,” NW] isire ikkitinori kaꞌanno.—1 Qor. 15:20, 23.

16. Iima heeꞌrate kaꞌannori mamoote kaꞌannoro anfeemmo gede kaaꞌlannonkeri maati?

¹⁶ Phaawuloosi coyiꞌrinori iima heeꞌrate kaꞌannori mamoote kaꞌannoro anfeemmo gede kaaꞌlannonke. Kuni ikkannohu Yesuusi  “bayicho amadanno” yannaraati. Yihowa Farciꞌraasine Qullaawa Borro xiinxallite Yesuusi 1914nni kayise ‘bayicho amade nootanna’ tini alame baꞌanno yanna gambissinota ammantanno.

17, 18. Kiristoosi bayicho amadanno yannara, mitu buuramino Kiristaani ma ikkanno?

¹⁷ Qullaawu Maxaafi iima heeꞌrate reyotenni kaꞌannori daafira kulanni lede togo yaanno: “Reyino mannire baddine affinara hasiꞌneemmo. Yesuusi reyinotanna reyotenni kainota ammannoommo. Konnira Yesuusa ammante heedhe reyitinore Maganu isi ledo haaꞌre abbannonsa. . . . Mootichu daanno [“bayicho amadanno,” NW] yanna geeshsha lubbotenni heeꞌneemmori reyitinore dibalanxeemmo. Mootichu hajajote hirbinni . . . dukkisame gordunni daanno. Kiristoosa ammante heedhe reyitinori balaxxe kaꞌanno. Hakkunni gedensaanni lubbotenni heeꞌnoommori Mootichu ledo bubbete aana xaandammora, insa ledo gomichu giddora hawulukammeemmo. Mootichu ledono hegerera heeꞌneemmo.”—1 Tes. 4:13-17.

¹⁸ Umi kao hanaffinohu Kiristoosi ‘bayicho amadihunni’ shiima yanna gedensaanniiti. Bayiru qarri yannara lubbotenni noo buuramaasine ‘gomichu giddora hawulukantanno.’ (Mat. 24:31) ‘Gomichu giddora hawulukantannori’ reyite lowo yanna keeshshitannokki daafira ‘direyitanno’ yaa dandiinanni. Insa ‘goofimarchu xurumba ufuunfanni woyite baalunku mitte higge illete lipheessi giddo soorrantanno.’—1 Qor. 15:51, 52.

19. ‘Roore kao’ yiniti hiitteeti?

¹⁹ Yannankera rooriidi Kiristaani buuraminoha ikkinokki daafira Yesuusi ledo gashshate iimira dihaꞌranno. Hatteentenni insa Yihowa “barra” tini busha alame baꞌanno yanna agadhitanno. Tini alame baꞌanno yanna afino manchi dino; ikkirono taje tini yanna rakkinota leellishshanno. (1 Tes. 5:1-3) Haaro alame dagganno wote addi addi manni gannate ikkitino uullara heeꞌrate reyotenni kaꞌꞌanno. Reyotenni kaꞌꞌanno manni gale hose guuta ikkanno, hattono galagale direyanno. Alba reyotenni kaino manni galagale reyino; konni daafira albillitte heedhanno kao ‘roore kaooti.’—Ibi. 11:35.

20. Reyino manni reyotenni kaꞌꞌannohu qinaawino garinniiti yineemmohu mayiraati?

²⁰ Qullaawu Maxaafi iima heeꞌrate kaꞌnanni kao daafira kulanni mittu mittunku ‘bado badosinni’ kaꞌꞌanno yaanno. (1 Qor. 15:23) Uullate aana heeꞌrate kaꞌꞌanno mannino qinaawino garinni kaꞌꞌannota addaxxa dandiineemmo. Hatti hagiirsiissanno yannaati. Gedeꞌne reyino manni Kiristoosihu Kumu Diri Gashshooti hanafanno yannara balaxe kae baxanno manni ledo xaadanno ikka? Maganu manna massagate dandoo noonsari hunda heedhinori Maganu soqqamaano haaro alamera manna qineessate balaxxe kaꞌanno ikka? Yihowa magansiꞌra hanafikki reyino manni hiikkanno? Insa reyotenni kaꞌꞌannohu hiitte yannaraati? Woy kaꞌꞌannohu hiikkooti? Tenne daafira lowo xaꞌmo xaꞌminammora dandiineemmo. Kayinni xaa yannara kuri coyibba hendanni mitiiꞌma hasiissannonkeni? Mayi ikkannoro marranni anfummoro diwoyyanno? Hatte yannara Yihowa kuri coyibba assanno gara laꞌneemmo wote dhagge assiꞌnammora dandiineemmo.

21. Ati reyino manni daafira maa hexxatto?

²¹ Hakka geeshsha Yihowara noonke ammana kaajjishiꞌra hasiissannonke; Isi Yesuusi widoonni reyitinore qaage kayisannonsata kulinonke. (Yoh. 5:28, 29; 11:23) Mitte hige Yesuusi Yihowara reyitinore kayisate wolqa noosita buuxisate, Abirihaami, Yisihaaqinna Yaaiqoobi “Isira [Maganoho] heedhannoreeti” yiino. (Luq. 20:37, 38) Konni daafira, ninkeno Phaawuloosi gede “Maganu cubbaataammanna keeraano reyotenni kayisanno” yine coyiꞌra dandiineemmo.—Soq. 24:15.