1. Yihowa ledo loosa dandiineemmohu hiitte doogganniiti?

 YIHOWA mannu ooso kalaqi gedensaanni, isi hedinore wonshate ledosi lossara hasiꞌrino. Mannu ooso guuntete xeꞌne noonsare ikkiturono, ammanamino manni barru baala Yihowa ledo loosa dandaanno. Lawishshaho, Maganu Mangisteha dancha duduwo dudumbenna manna rosaano assine “Maganu ledo [loosa]” dandiineemmo. (1 Qor. 3:5-9) Kalqete alame Kalaqaanchi Yihowa lowo geeshsha naadannoha konne looso isi ledo loosa kaajja qoossooti! Ikkollana Yihowa ledo loosa dandiineemmohu sabbakatenna manna rosaano assatenni calla diꞌꞌikkino. Konni birxichira, maatenkenna ammante roduuwanke kaaꞌline, wosina adhineemmore ikkine, tiokiraasete looso loosate ninkeneeto shiqinshenna soqqanshonke halashshiꞌne Yihowa ledo loosa dandiineemmo gara ronseemmo.—Qol. 3:23.

2. Yihowara yine assineemmore wolootu assitannori ledo heewisiisa hasiissannonkekkihu mayiraati?

² Konne birxicho xiinxallineemmo woyite, Yihowara soqqamatto soqqansho wolootu soqqansho ledo heewisiissooti. Dirinke, fayyimmanke, heeꞌnoommo gari hattono dandoonke babbaxxitinota ikkitinota deꞌooti. Soqqamaasinchu Phaawuloosi qullaawu ayyaaninni togo yee borreessino: “Mittu mittunku umisi looso  fonqole lao! Assino coyi dancha ikkiro, isonoo wolu manni ledo taashsha agure, umisi kuꞌlannore afiꞌranno.”—Gal. 6:4.

3. Maatesi kaaꞌlannohu baalu Yihowa ledo loosanni no yineemmohu mayiraati?

³ Yihowa soqqamaanosi maatensa towaaxxitara hasiꞌranno. Lawishshaho, maatekkira hasiisannoha maalaamittete coye wonshate looso loosa hasiissannoheha ikkara dandaanno. Batinyu amuuwi qaaqquullensa towaaxxate mine hosanno. Anninkenna amanke jajjabbooꞌmanno woyite towaanteemmonsa. Qoleno hatto assanke hasiissannote. Maganu Qaali togo yaanno: “Umisi fiixa, roorenkanni minisi manna kaaꞌlannokkihu, ammana agurinoho; ammaninokki manninni roore bushaho.” (1 Xim. 5:8) Aterano maatete giddo loosu batiꞌrinoheha ikkiro, Yihowara hasiꞌrootto geeshsha soqqama dandaattokkiha lawahera dandaanno. Ikkirono hexxo mudhitooti! Maatekkira hasiisannore shiqishatto woyite, Yihowa hagiidhanno.—1 Qor. 10:31.

4. Annuwunna amuuwu Maganu Mangiste balaxisiisa dandaannohu hiittoonniiti? Hatto assansa kaaꞌlitannonsahu hiittoonniiti?

⁴ Kiristaana ikkino anninna ama oosonsa ayyaanaamittete mixo fushshidhanno gede kaaꞌlannoha ikkiro, Yihowa ledo loosanni no. Batinyu anninna ama hatto assino; konnira yannate gedensaanni oosonsa woꞌma yanna soqqansho hanaffe xeertowa hadhe soqqamate insaneeto shiqishshino. Insa giddo mitu misiyoone, wolootu qolte suwisaano ikkite sabbakkannori roore hasiissannowa hadhe, mitootu qole Beeteelete soqqantanno. Oosonsa qaetenni xeertidhe soqqantanno daafira, annuwunna amuuwu hasidhu gede xaada hooggara dandiitanno. Ikkirono, Maganu Mangiste balaxisiisanno anninna ama oosonsa soqqanshonsanni kaajjitanno gede jawaachishanno. Mayira? Korkaatuno oosonsa Maganu Mangiste balaxisiissanni noota afansa tashshi assitannonsa. (3 Yoh. 4) Mitu annuwinna amuuwira Haanna gede ikke macciishshamansara dandaanno; Haanna qaaqqose Saamueeli Yihowara ‘uyitinota’ coyidhino. Annuwunna amuuwu konni garinni Yihowa ledo loosate qoosso afiꞌransa ayirrinyeho. Insa kawiinni saino hagiirri nookkita afino.—1 Sam. 1:28.

5. Ammante roduuwakki kaaꞌla dandaattohu hiittoonniiti? (Hanafote noo misile lai.)

⁵ Mini giddo hakkeeshsha loosu batiꞌrannohekkiha ikkiro, maatensa miilla towaaxxitannore ammanate roduuwakki, xiwantinore, geerra, woy woloota kaaꞌlo hasiissannonsare kaaꞌla dandaatto. Songoꞌnera togoo kaaꞌlo hasiissannonsari no? Geedhino annase woy amase towaaxxitannoti mitte rodoo wolere assiꞌra dandiitanno gede ati annase woy amase towaata dandaatto. Woy songo haꞌrate, dikko dikkiꞌrate, sokka soqqate woy hospitaale hadhe woloota xaꞌmate kaaꞌlo hasiissannonsare kaaꞌla dandaatto. Hatto assittoro, Yihowa kuni manni huucciꞌrino huuccattora dawaro qolanno woyite ledosi loosatto.—1 Qorontoosi 10:24 nabbawi.

6. Wosina adhate yaa mayyaate?

⁶ Maganu ledo loossannori wosina adhatenni egennantinoreeti. Giriikete Afiite Qullaawa Borrora, “wosina adha” yitanno yaatto “anfoonnikki mannira danchumma leellisha” yitanno tiro afidhino. (Ibi. 13:2) Maganu Qaali giddo wosina adhine baxille leellinsheemmo gede jawaachishshanno dhagge no. (Kal. 18:1-5) Ammanate roduuwanke ikkiturono ikka hooggurono, afiꞌnummo tunceenya baala horoonsiꞌne woloota kaaꞌla hasiissannonke.—Gal. 6:10.

7. Woꞌma yanna soqqamaano wosinsa mayi horo afidhino?

⁷ Woꞌma yanna soqqansho soqqantannore  wosinsite Maganu ledo loosa dandaatto? (3 Yohaannisi 5, 8 nabbawi.) Hatto assanke “mimmitonke jawaachinsheemmo” faro fantannonke. (Rom. 1:11, 12) Hanni Olaafi yinanni rodii lawishsha laꞌno. Olaafi qaaqqu heeꞌreenna mittu seenne adhinokkihu woradu aliidi laꞌꞌaanchi songonsa towaatino; hatte yannara songonsa giddo woradu aliidi laꞌꞌaancho minesi wosinsa dandaannohu dino. Olaafi woradu aliidi laꞌꞌaanchi minensa gala dandaannotanna teꞌee Yihowa Farciꞌraasine ikkinokki annasinna amasi xaꞌmi. Annisinna amasi minensa gashshanno gede fajjitusi; ikkollana Olaafi soofu aana goxannota kultusi. Olaafi hatto assasinni lowo atoote afiꞌrino. Olaafi togo yino: “Lowo geeshsha hagiirsiissanno lamala sayinsoommo! Aninna woradu aliidi laꞌꞌaanchi soodo afoo seekkiꞌneemmo woyite haammata baxissanno haja kayinse hasaambeemmo. Isiwiinni afiꞌroommo jawaante woꞌma yanna soqqansho hanafeemmo gede assitinoe.” Olaafi saihu 40 diri giddo misiyoone ikke babbaxxino qooxeessira soqqamino.

8. Mannu shaqqille leellinsheemmonsa woyite umi qara naada hoogiro nafa, hatto assa agura hasiissannonkekkihu mayiraati? Lawishsha kuli.

⁸ Wolootu assineemmonsare naada hoogguro nafa, wosinaho baxille leellisha dandiineemmoti batinye doogga no. Hanni mitto lawishsha laꞌno. Ispeenete heedhannoti mitte halashshaancho, Yosika yinannita Ikuwadooretenni daggino mancho Qullaawa Maxaafa xiinxallissanno; mitto barra xiinxallissanni heedheenna Yosika wiꞌla hanaffu. Hatti halashshaancho Yosika mayira wiꞌlitannoro xaꞌmituse. Yosika gobbasera heedhe buxicho ikkitinota kultuse. Isinni mitto barra minese gaꞌmine gaggawo hooꞌlinanniri nafa nookki daafira, qaaqqosera waa calla uyitinota coyidhino. Yosika qaaqqose goxissara hayye assitanni heedhe Maganu kaaꞌlannose gede huuccidhino. Bayichonko lame Yihowa Farciꞌraasine minisera mari; Yosika kayinni hanqite uyitinose metseete daddartu. Yosika “Tini qaaqqoꞌyara sagale ikkitannoni?” yitunsa. Roduuwu ise sheshifachishate woꞌnaalinoha ikkirono ise sheshifata hooggino. Gedensoonni kuri roduuwi sagale haaꞌre mare minise xullora wori. Roduuwu leellishino shaqqilli Yosikara dhagge ikkinose; qoleno ise Maganu huuccattosera qolinose dawaro wodancha hooggino daafira dadillitino. Ikkirono Yosika Yihowara soqqamate murcidhino. Ee, roduuwu leellishino shaqqilli dancha guma abbino!—Ros. 11:1, 6.

9, 10. (a) Hunda Maganu manni mereero uminsa fajjonni loosanno manni hasiisinohu hiittoo yannaraati? (b) Xaa yannara insaneeto uminsa fajjonni shiqishino roduuwi songote giddo hiikkonne looso loosanno?

⁹ Hunda Israeelete yannara uminsa fajjonni loosanno manni hasiisino woyiti no. (Ful. 36:2; 1 Dud. 29:5; Neh. 11:2) Yannankerano woxenke, yannankenna dandoonke horoonsiꞌne roduuwanke kaaꞌla dandiineemmoti duucha doogga no. Qoleno ateneeto umikki fajjonni shiqishittoro bae hagiirrenna atoote afiꞌratto.

¹⁰ Maganu Qaali, songote giddo noohu labballu roduuwi songote soqqamaasinenna cimeeyye ikke soqqamate sharrame Yihowa ledo loosanno gede jawaachishanno. (1 Xim. 3:1, 8, 9; 1 Phe. 5:2, 3) Hatto assitanno roduuwi, ammanate roduuwansa ayyaanaamittetennino ikko maalaamittetenni kaaꞌlitanno. (Soq. 6:1-4) Cimeeyye gambooshshunniwa soqqamatto gede, gambooshshu base gatamaratto gede, borrote kifilera loosatto gede, soqqanshote qoqqowi soqqamaancho ikkatto gede woy wole looso loosatto gede xaꞌmite egentinohe? Togoo looso loossanno roduuwi woloota kaaꞌlansa lowo geeshsha hagiirsiissannonsata coyidhanno.

11. Mitte rodoo tiokiraasete looso loossanni afidhino jaalla kaaꞌlitinosehu hiittoonniiti?

 ¹¹ Gimbaatu looso loossannori haaro jaalla kalaqidhanno tunceenya afidhanno. Hanni Marjii yinanni rodoo lawishsha laꞌno. Ise 18 diro woꞌma Gambooshshu Addaraashe mina kaaꞌlitino. Tenne yanna giddo ise batinye meya roduuwa qajeelsitino. Ise kuni loosi mimmito ayyaanaamittetenni jawaachishate faro fanannota huwattino. (Rom. 1:12) Marjii heeshshose giddo fonqolu iillise yannara, gimbaatu looso loossanni kalaqidhino jaalla jawaachishshinose. Ati umikki fajjonni gimbaatu looso kaaꞌlite egennootto? Gimbaatu looso loosate dandoo heedhuherono heeꞌra hoogguherono, ateneeto umikki fajjonni shiqisha dandaatto?

12. Dano iillitinonsare kaaꞌla dandaattohu hiittoonniiti?

¹² Dano kalaqantanno yannara Maganu manni roduuwanke kaaꞌle Maganu ledo loosanno tunceenya afiꞌranno. Lawishshaho insa dano iillitinonsare woxunni kaaꞌlitanno. (Yoh. 13:34, 35; Soq. 11:27-30) Roduuwanke kaaꞌla dandiineemmoti wole doogo minensa gatamarate woy wole mine minate looso kaaꞌlatenniiti. Gabireela yinannite mitte Poolaandete heedhanno rodoora lolahu minese gawajjino; ise qooxeessaho noo songuwara heedhanno roduuwi kaaꞌlitasera dagguta lowo geeshsha hagiidhitino. Ise togo yitino: “Bainohu maalaamittete coye ikkino daafira, isi aana diꞌꞌillachishoomma. Kuni tunceenyi Kiristaanu songo miila ikkaꞌya lowo qoossonna hagiirsiissannota ikkitinota wodancheemma gede assinoe.” Kalaqamu dano iilliteennansa kaaꞌlinoonninsa roduuwi hoogginorinni roorinore afidhinota coyidhino. Togoo roduuwa kaaꞌlite Yihowa ledo loossannorino hatto assansanni tashshi yaannonsa.—Soqqamaasinete Looso 20:35; 2 Qorontoosi 9:6, 7 nabbawi.

13. Uminke fajjonni ninkeneeto shiqisha Yihowa ledo noonke jaaloomi kaajjanno gede assitannohu hiittoonniiti? Lawishsha kuli.

¹³ Isteefeni yinanni rodoonna wole halashshaano darame Ameerika haꞌrino roduuwa kaaꞌle Yihowa ledo loosate qoosso afiꞌransanni tashshi yiinonsa. Isteefeni olu batiꞌrino gobbanni dagganno maate, minenna mini uduunne afidhanno gede kaaꞌlitannonsa. Ise togo yitino: “Kuri Kiristaani, wolootu roduuwi leellishshinonsa baxille laꞌꞌanno woyite  lowo geeshsha hagiidhitanno, hattono naaddanno; ninkeno tenne laꞌꞌanke tashshi assitannonke. Kuri maate ninke kaaꞌlinanni heeꞌnoommonsaha lawannonsa; ikkirono kaaꞌlanni noonkeri insaati. Roduuwaho noonsa baxilli, mittimmanna ammana ninkerano Yihowara noonke baxilli lexxanno gede assitino; tini qolte dirijjitesi widoonni afiꞌneemmore baala naandeemmo gede assitinonke.”

14, 15. (a) Masaalaanchu Isayaasira hiittoo lao noosi? (b) Yannankera nooti Maganu soqqamaano Isayaasi lawishsha harunsa dandiitannohu hiittoonniiti?

¹⁴ Albinni roore Yihowara soqqama hasiꞌratto? Dirijjitesi giddo soqqamaasine roore hasiissannowa umikki fajjonni hadhe soqqama dandaatto? Maganu soqqamaano shaqqille leellisha dandiitannohu wolewa hadhe soqqamatenni callaati yaa diꞌꞌikkino. Ikkollana mitu roduuwi wolewa hadhe soqqama dandiitanno. Insara masaalaanchu Isayaasira noosi gedee lao noonsa. Yihowa “Aye soqqo? Soqqamannonkehu ayeti?” yee xaꞌmita Isayaasi “Ani haꞌreemmona, ane soqqie” yee qolino. (Isa. 6:8) Atino Yihowa looso loosate hasatto noohe? Nootto gari hatto assate fajjannohe? Ikkina Yihowa dirijjite giddo hiikkonne looso loosa dandaatto?

¹⁵ Yesuusi sabbakatenna rosaano assate loosi daafira coyiꞌranni togo yiino: “Gidu lowoho; gide gamba assanno manni kayinni shiimaho. Gide gamba assate, lowo loosaasine soyanno gede loosu Mooticha huuccidhe!” (Mat. 9:37, 38) Suwisaancho ikkite sabbakkannori roore hasiissannowa soqqama dandaatto? Woy wolootu hatto assitanno gede kaaꞌla dandaatto? Batinyu roduuwi Maganohonna mannaho noonsa baxille leellisha dandiitannoti qara doogo midote looso loossannori roore hasiissannowa hadhe suwisaano ikke soqqama ikkinota huwattino. Atino albinni roore soqqama dandaattoti wole doogo no? Hatto assittoro lowo hagiirre afiꞌratto.

16, 17. Yihowara albinni roore soqqama dandaattoti wole doogga hiikkuriiti?

¹⁶ Yannate geeshsha woy lamalate giddo gama barra Beeteelete soqqamate woy gimbaatu loosira kaaꞌlate ateneeto shiqishatto? Uyinanninsa looso baala loosate insaneeto uminsa fajjonni shiqishshanno roduuwi woꞌmante yannara Yihowa dirijjite giddo hasiissanno. Kuri roduuwira baxxitino dandoo noonsaha ikkiro nafa, loosaasine roore hasiissannowa soqqantanno gede xaꞌminanninsa woyite insaneeto shiqishshanno. Uminsa horo agurte ayewano sonkinsaro hagiirrunni soqqamate insaneeto shiqishshanno roduuwa Yihowa naadannonsa.—Far. 110:3.

¹⁷ Yihowara albinni roore soqqamate kaaꞌlanno qajeelsha afiꞌra hasiꞌratto? Hatto ikkiro Maganu Mangiste Sawaakooti Rosi Mine eꞌe rosattora dandaatto; konni rosi minira woꞌma yanna soqqansho giddo soqqantannori Yihowa baxxanno roduuwi qanchoho danchu garinni soqqama dandiitanno gede kaaꞌlanno qajeelsha uyinanni. Hakko rosi mine eꞌe rosate forme wonshitannori baalu, maassantu gedensaanni ayewano sonkinsaro hadhe soqqamate insaneeto shiqisha hasiissannonsa. Atino konni garinni Yihowara albinni roore soqqama dandaatto?—1 Qor. 9:23.

18. Barru baala Yihowa ledo loosittoro mayi atoote afiꞌratto?

¹⁸ Yihowa soqqamaasine ikkinoommo daafira, shaqqille, danchummanna baxille leellinsheemmo; hattono barru baalu wolootaho hendeemmota leellishannore assineemmo. Hatto assineemmoha ikkiro ninkeno hagiirrena salaame afiꞌneemmo. (Gal. 5:22, 23) Nootto gari ikkihano ikkiro, Yihowa gede shaqqado ikkittoro hattono isi ledo loosittoro lowo hagiirre afiꞌratto.—Law. 3:9, 10.