1. Isayaasi Yesuusi daafira mayyee masaalino? Tini jawaachishshannote yineemmohu mayiraati?

 ISAYAASI Mootichinke Yesuusi Kiristoosi daafira masaalino masaalo, hagiirsiissannotenna sheshifachishshannote. Isi Yesuusi daafira togo yee masaalino: “Illesinni lai garinni calla yoo diyaanno; maccasinni macciishshi garinni calla dicoyiꞌranno.” Hatteentenni Yesuusi, “buxanete taashshe coyiꞌranno.” (Isa. 11:3, 4) Tenne afanke sheshifachishshannote yineemmohu mayiraati? Korkaatuno, heeꞌnoommohu taashshote xeꞌne batidhinonna manna mulla kae giwanno manni woꞌmino alameraati. Aana lae yoo yaannokkihu guutu Daanyi gashshanno yanna quqquxamme agadhineemmo!

2. Yesuusi mayyee hajajinonke? Konni birxichira maa ronseemmo?

² Barru baala xaandeemmo manni daafira mitore coyiꞌneemmo. Ikkollana, Yesuusi gede guuta ikkinoommokki daafira, wolootaho gara ikkitinokki lao heedhankera dandiitanno. Ninke duucha woyite manna aana laꞌne yoo yaa rakkannonke. Yesuusi kayinni uullate noo waro togo yee hajajinonke: “Halaalu yoo yiiyye ikkinnina manna alba laꞌine coyidhinoonte.” (Yoh. 7:24) Ee, Yesuusi isi lawishsha harunsine manna aana calla laꞌne yoo yaa hoogate qorophinammora hasiꞌranno. Konni birxichira wolootu daafira dancha  woy busha lao heedhannonke gede assannoha sase coye ronseemmo; insano: sirchoho woy gaꞌrete, jirotenna diroho. Mitto mittonka laꞌneemmo woyite Yesuusi hajajo harunsa dandiineemmo gara ronseemmo.

3, 4. (a) Pheexiroosi isi gaꞌre ikkinokki mannira noosi hedo biddi assiꞌranno gede kaaꞌlinosiri maati? (Hanafote noo misile lai.) (b) Yihowa Pheexiroosi hiikkonne haaro halaale huwatanno gede kaaꞌlinosi?

³ Pheexiroosi Qiisaariyaho noohu Yihudu wido ikkinokkihu Qornelewoosi yinanni manchiwa haꞌranno gede kullisi woyite mayi macciishshaminosiro heda dandaatto. (Soq. 10:17-29) Wolu Yihudu manninte gede Pheexiroosi lophinohu, Yihudu wido ikkinokki manna battaawinohu gede assine laꞌnanni dagoomi giddooti. Ikkollana, Pheexiroosi togoo hedo biddi assiꞌranno gede assannosi coyi tuncu yiinosi. Lawishshaho, isi mitte dhagge ikkitanno ajuuja laino. (Soq. 10:9-16) Pheexiroosi laino ajuuja maati? Isi battaabbino yee hedanno saadanni woꞌminohu mittu hocci iiminni dirranna laino; hakkiinni mitte huuro iiminni, “Pheexiroosi, kaꞌe gorrite iti!” yitinosi. Pheexiroosi diꞌꞌiteemmo yiino. Isi ita giwita, “Maganu faansinoha [keereensinoha] ati battete yitooti” yitanno huuro iiminni daggino. Ajuuja laihu gedensaanni, Pheexiroosi Yihowa maa kulasira hasiꞌrinoro afa hooge gurchaawino. Hakkiinni Qornelewoosi soyino manni Pheexiroosiwa dayi. Qullaawu ayyaani Pheexiroosi Qornelewoosiwa haꞌrano gede kulisita isi dayino manni ledo Qornelewoosi minira haꞌrino.

⁴ Pheexiroosi aana calla lae yoo yaannoha ikkoommero, Qornelewoosi minira dieanno. Yihudu manni insa gaꞌre ikkinokki manni minira horonta dieanno. Ikkina Pheexiroosi manna mulla kae giwate hedo qeele Qornelewoosiwa haꞌrinohu mayiraati? Pheexiroosi haꞌranno gede assitinositi, laino ajuujaatinna qullaawu ayyaani uyinosi biddishshaati. Isi Qornelewoosi coyiꞌrinore macciishshihu gedensaanni qullaawu ayyaaninni togo yee coyiꞌrino: “Halaalinta Maganu manna mallaadannokkita xa buuxoommo. Aye gosano ikkiro Maganu waajjannosihanna dancha loosannoha baxanno.” (Soq. 10:34, 35 ) Pheexiroosi haarote huwatinori, lowo geeshsha hagiirsiisinosi! Baalunku Kiristaani hakkonne biddishsha harunsa hasiissanonsa yineemmohu mayiraati?

5. (a) Yihowa baalunku Kiristaani maa huwatara hasiꞌranno? (b) Halaale anfoommoha ikkirono, hiittenne hedo qeela qarrissankera dandiitanno?

⁵ Yihowa Pheexiroosi widoonni baalunku Kiristaani Isi manna mallaadannokkita huwatanno gede assino. Gaꞌrenke, sirchinke, gobbankenna coyiꞌneemmo afii ikkihano ikkiro, Yihowa kuri coyibba aana diꞌꞌillachishanno. Aye manchino Magano waajjannohanna dancha ikkinore assannoha ikkiro Isi baxannosi. (Gal. 3:26-28; Aju. 7:9, 10) Tini halaale ikkitinota ati umikki huwatoottoti dihuluullissannote. Ikkollana lophoottohu manna mulla kaꞌne gimbanni qooxeessira woy hattoo maate giddolla ikki? ‘Ani manna dimallaadeemmo’ yite hedattoha ikkara dandaanno; ikkollana togoo hedo giddokkinni gudisante fultinokkiha ikkara dandaanno. Pheexiroosi, Yihowa mallaadannokkiha ikkinota wolootu huwattanno gede kaaꞌlate qoosso afiꞌrinoha ikkirono, yannate gedensaanni isi umisi woloota mallaadino woyiti no. (Gal. 2:11-14) Yesuusi roso harunsine manna aana laꞌne yoo yineemmokki gede qoropha dandiineemmohu hiittoonniiti?

6. (a) Manna mulla kae giwate hedo giddonkenni fushshine hunate mayi kaaꞌlannonke? (b) Mittu songote cimeessi borreessino rippoorte maa leellishshanno?

⁶ Manna mulla kaꞌne giwate hedo giddonke  nooha ikkiro, caabbicho ikkinohu Maganu Qaalinni ninkeneeto seekkine layiꞌra hasiissannonke. (Far. 119:105) Manna mulla kaꞌne giwate hedo giddonke noota huwata hoongummoro nafa, wolootu tenne huwattara dandiitanno daafira, insa baxillunni uyitannonke kaaꞌlo adha hasiissannonkeha ikkara dandaanno. (Gal. 2:11, 14) Togoo akatta giddonke bayicho assidhuro, ninkera leella hooggankera dandiitanno. Hanni mitto woꞌnaalsha laꞌno: Mittu cimeessi woꞌma yanna soqqamaano ikkino minaanninna minaama daafira sinu biirora rippoorte borreessino. Minaanni batinyu manni woffi asse laꞌꞌannote shiima gaꞌre giddo ilaminoho. Rippoorte borreessi cimeessi umisi, hattenne gaꞌre ajishe laꞌꞌannota huwatinokkiha ikkara dandaanno. Hakku cimeessi minaanni daafira batinye dancha coye borreessino. Ikkollana cimeessu borrote aana togo yiino: ‘Minaanni wolootu ajishshe laꞌanno gaꞌre wido ikkirono, akatisinna heeꞌranno heeshsho danchate; tini qolte mittu manchi hattenne gaꞌre wido ikkino daafira calla xuraamo ikkanno yaa ikkitinokkita leellishshanno.’ Konni lawishshinni maa ronseemmo? Yihowa dirijjite giddo noonke qeechi ikkihano ikkiro, giddonke woloota mulla kae giwate hedo nooronna teꞌee afate ninkeneeto ganyine layiꞌranna wolootu uyitannonke kaaꞌlo adha hasiissannonke. Wolere maa assa dandiineemmo?

7. Wodananke halashshine fana dandiineemmohu hiittoonniiti?

⁷ Wodananke halashshine fannummoro, manna mulla kaꞌne giwate bayicho baxille wonsha dandiineemmo. (2 Qor. 6:11-13) Muli jaallakki ikkitanno gede hasiꞌrattori ate gaꞌre, sirchonna gobbakki manna woy ati coyiꞌratto afoo coyidhannore callaati? Hatto ikkiro wodanakki halashshite fani. Atewiinni baxxino budi noonsa roduuwa soqqansho ledokki fultanno woy waartanno gede mayira dikoyisattonsa? (Soq. 16:14, 15) Hatto assittoro, wodanikki giddo baxille wonshidhe manna mulla kae giwate hedo heedhannohekki gede assiꞌratto. Ikkollana woloota aana calla laꞌne yoo yineemmo gede guficho ikkannonkehu wolu coyino no. Hakkuno jirote.

8. Leewaawoota 19:15 jiro woy buxima laꞌne yoo yaate daafira mayitanno?

⁸ Maalaamittete jiro wolootaho gara ikkitinokki lao heedhannonke gede assitankera dandiitanno. Leewaawoota 19:15 togo yitanno: “Buxichoho godowa hossinoonte; dureessa waajjitinoonte; manna taashshitine laꞌe.” Ikkollana mittu manchi buxicho woy dureessa ikkasi isira noonke lao gara woy gara ikkitannokki gede assitannohu hiittoonniiti?

9. Selemooni hiikkonne halaale borreessino? Konni qummeeshshinni maa ronseemmo?

⁹ Selemooni qullaawu ayyaaninni guuntete xeꞌne noonsa mannire borreessino. Isi Lawishsha 14:20 te togo yiino: “Buxicho olliisi nafa gamba diassiꞌrannosi; dureessaho kayinni lowo jaalla noosi.” Kuni qummeeshshi maa rosiisannonke? Qoropha hoongummoro, buxane ikkitino roduuwinkewa aana agurre, dureeyye ikkitino roduuwa calla jaallanke assiꞌnammora dandiineemmo. Maalaamittete jiro calla laꞌne wolootaho yoo yaa lowo geeshsha gawajjitanno yineemmohu mayiraati?

10. Yaiqoobi Kiristaana hiikkonne gawajjanno coye kule qorowisiisino?

¹⁰ Maalaamittete coye laꞌne wolootaho yoo yineemmoha ikkiro, songote giddo babbadooshshe kalanqammora dandiineemmo. Umi xibbi diro togoo babbadooshshi mite songo giddo kalaqamino daafira, rosaanchu Yaiqoobi Kiristaana qorowisiisino. (Yaiqoobi 2:1-4 nabbawi.) Xaa yannarano songonke gawajjotenni agarate, togoo hedo heedhannonkekki gede assiꞌra hasiissannonke.  Ikkina manna aana calla laꞌne yoo yaatenni qoropha dandiineemmohu hiittoonniiti?

11. Mittu manchira noositi maalaamittete jiro Yihowa ledo noosi jaaloomi ledo xaadooshshe afidhino? Xawisi.

¹¹ Roduuwanke Yihowa laꞌꞌanno garinni laꞌꞌa hasiissannonke. Mittu manchi Yihowa albaanni muxxe ikkannohu buxicho woy dureessa ikkasinni diꞌꞌikkino. Yihowa ledo noonke jaalooma bikkinannihu, noonkete maalaamittete jiro deerrinni diꞌꞌikkino. Yesuusi, “dureessaho Maganu Gashshoote ea lowo geeshsha qarraho” yiinoha ikkirono, dureessu Maganu Mangiste ea didandaanno diyiino. (Mat. 19:23) Qoleno Yesuusi, “Maganu Gashshooti kiꞌneha ikkino daafira, kiꞌne buxane baꞌraadhinoonnireeti” yiino. (Luq. 6:20) Togo yaa buxane baala Yesuusi roso harunsitino woy baxxino atoote afidhino yaa diꞌꞌikkino. Batinye buxane Yesuusi roso diharunsitino. Konni daafira, mittu manchira Yihowa ledo noosi jaaloomi maalaamittete jirosi aana xintaminoho yaa didandiinanni.

12. Qullaawu Maxaafi buxaneteno ikko dureeyyete mayi biddishsha aanno?

¹² Yihowa baxannonna isira woꞌmu wodaninsanni soqqamannori buxanenna dureeyye roduuwi noonke. Qullaawu Maxaafi dureeyye, ‘Hawaqiꞌnannikki coye hexxa agurte Magano hexxitanno’ gede amaalanno. (1 Ximootewoosi 6:17-19 nabbawi.) Maganu Qaali Isi soqqamaano dureeyyeno ikkito buxane woxu baxillinni umonsa agadhitanno gede qorowisiisanno. (1 Xim. 6:9, 10) Ee, roduuwanke Yihowa laꞌꞌanno garinni laꞌneemmoha ikkiro, noonsaha maalaamittete coye calla laꞌne yoo diyineemmo. Manna dironsa laꞌne yoo yaa garahoyya? Hanni laꞌno.

13. Qullaawu Maxaafi jajjabba ayirrisate daafira maa rosiisannonke?

¹³ Qullaawu Maxaafi duucha hige jajjabba manna ayirrinseemmo gede hajajannonke. Leewaawoota 19:32 togo yitanno: “Jawaho kaꞌine darga uuyye; geerra ayirrisse; Maganoꞌne waajje.” Qoleno Lawishsha 16:31, “Seedu diri keeraanote baꞌraaꞌraati; awuuwe ayirrinyu baꞌlattooti” yitanno. Phaawuloosino, Ximootewoosi jajjabba roduuwa annuwu gede asse laꞌꞌanno gede ikkinninna mishannonsakki gede qorowisiisinosi. (1 Xim. 5:1, 2) Ximootewoosi jajjabbu roduuwisi aana silxaane noosiha ikkirono, isi insa shaqqillunninna ayirrinyunni towaatino.

14. Diro ninke rooranno mancho amaala woy seejja hasiissannonkehu hiittoo yannaraati?

¹⁴ Mittu jawu rodii afanni heeꞌre cubbo loose Yihowa dadillisannohalla ikki? Yihowa afanni heeꞌre cubbo loosino manchi jawa ikkino daafira calla gatona yaannosi yaa diꞌꞌikkino. Isayaasi 65:20 te nooha xintu seera wodanchi; qummeeshshu togo yaanno: “Xibbu dirinni heeꞌre reyannoha anje heeꞌre reyinohu gede assine kiirranni; hakkuyi kawa reyannohu kayinni rumammohu gede kiiramanno.” Hiziqeelino togooha xintu seera kulino. (Hiz. 9:5-7) Konnira, baalunkunni roore ayirrisa hasiissannonkehu biꞌre birqiiqinni kayise nooha Magano Yihowa ikkinota dea dihasiissannonke. (Dan. 7:9, 10, 13, 14) Yihowa ayirrinseemmoha ikkiro, mittu manchi diri jawa woy shiima ikkino daafira amaalatenni badhera dihingemmo.—Gal. 6:1.

15. Wedella roduuwa ayirrisa lainohunni Phaawuloosiwiinni maa ronseemmo?

¹⁵ Songote giddo nooha wedella roduuwa ma garinni laꞌꞌa hasiissannonkeyya? Soqqamaasinchu Phaawuloosi wedellichu Ximootewoosira togo yee borreessino: “Anjekki ayino mishoonkehe; coyiꞌratto coyinni, heeꞌratto heeshshonni, baxillunni, ammanatenninna fayyaaleessimmatenni ammanaasinete dancha lawishsha ikki.” (1 Xim. 4:12) Phaawuloosi tenne sokka borreessanno woyite Ximootewoosira 30 diri balla ikkisikki digatino. Ikkirono, Phaawuloosi Ximootewoosira lowoha loosu qeecha  uyinosi. Tennenni maa ronseemmo? Wedella roduuwa diro calla laꞌne yoo yaa dihasiissannonke. Mootichinke Yesuusi uullate aana noo waro soqqanshosi gumulinohu 30 diri balla heeꞌre ikkinota dea dihasiissannonke.

16, 17. (a) Cimeeyye mittu rodii songote soqqamaancho woy cimeessa ikkate ikkado ikkinotanna teꞌee murtannohu ma garinniiti? (b) Meessi hedo woy budi garinni heda Qullaawu Maxaafi ledo sumuu yitannokkihu hiittoonniiti?

¹⁶ Mitu qooxeessira mannu wedella diayirrisanno; ninke heeꞌneemmohu hattoo qooxeessira ikkara dandaanno. Hatto ikkiro, songote giddo noo cimeeyye wedellu roduuwi ikkadda ikkitinoha ikkirono songote soqqamaasine woy cimeeyye ikkite shoomantanno gede shiqishate huluullantara dandiitanno. Baalanti cimeeyye, Qullaawu Maxaafi mittu manchi songote soqqamaancho woy cimeessa ikkannoha diru deerra kulannokkita qaaga hasiissannonsa. (1 Xim. 3:1-10, 12, 13; Tit. 1:5-9) Mittu cimeessi umisi bude harunse biddishsha fushshannoha ikkiro, massagamannohu Qullaawu Maxaafinni diꞌꞌikkino yaate. Cimeeyye wedella uminsa laonni woy budinsa garinni ikkikkinni Qullaawu Maxaafinni bikka hasiissannonsa.—2 Xim. 3:16, 17.

¹⁷ Qullaawu Maxaafi hedo ledo sumuu yaannokkihu togoo budi ikkadda ikkitinori songote giddo qoosso afidhannokki gede assara dandaanno. Hanni mitto lawishsha laꞌno. Mitte gobbara ikkado ikkinohu songote soqqamaanchira lowoha loosu qeecha uyinoonnisi. Cimeeyye kuni rodii Qullaawu Maxaafi kulanno garinni ikkado ikkinota affinoha ikkirono, cimeessa ikkanno gede dishiqishshino. Mite jajjabba cimeeyye kuni rodii wedellicha ikkino daafira cimeessa ikkate diꞌꞌiillino yite heddino. Wedellichu rodii aja ikkasinni calla cimeessa ikke shoomama hoogasi dadillissannote. Togoo budi batinye gobbara egennaminoha ikkinota addi addi rippoorte leellishshanno. Budinke garinni woy meessi laonni heda agurre Qullaawu Maxaafinni massagama lowo geeshsha hasiissannote! Yesuusi manna aana laꞌne yoo yineemmokki gede uyinonke hajajo agadha dandiineemmohu hatto assinummoro callaati.

18, 19. Woloota Yihowa laꞌꞌanno garinni laꞌꞌate maa assa hasiissannonke?

¹⁸ Guuntete xeꞌne heedhunkerono, woloota Yihowa laꞌꞌanno garinni mallaandummokkinni laꞌꞌa hasiissannonketa ronsoommo. (Soq. 10:34, 35) Togo assate kayinni agurrummokkinni sharramanna ganyine Maganu Qaali giddo noo biddishsha harunsate woꞌnaala hasiissannonke. Konne biddishsha seekkine harunsinummoro, Yesuusi manna aana laꞌne yoo yineemmokki gede hajajinonke hajajo agadha dandiineemmo.—Yoh. 7:24.

¹⁹ Muli yannara Mootichinke Yesuusi Kiristoosi mannu oosora taalo yoo yaanno; isi yoo yaannohu lainorinninna macciishshinorinni calla diꞌꞌikkino. (Isa. 11:3, 4) Hattee yanna quqquxamme agadhineemmo!