WOCAWAARO 1922nni Arbete barra soodo 8,000 manni mitte addaraashera gamba yee no; hakko wote ayyare iibba hanaffe no. Gambooshshu liqambartichi, tenne baxxitino pirogiraamera gamba yiino manni giddonni fula hasiꞌrannohu fula dandaanno; galagale ea kayinni didandaanno yee egensiishsha kuli.

Gambooshshe hananfoonnihu “Guweenyu Soqqanshonniiti”; faarsinihu gedensaanni Roduu Jooseefi Firaankilini Raazerfordi madirake fule atiraanoosenniwa uurri. Gamba yiino manni giddo rooru coyiꞌrannore macciishshate quqquxame no. Mitu kayinni iibbillu noo daafira mittowa ofolla didandiino. Lallawo shiqishannohu gamba yiino manni mittowa ofolle shiqanno roso macciishshanno gede seekke kuli. Roduu lallawo shiqisha hanafi yannara, madirakete aleenni xaaxamino hocci noota gamba yiino manni giddo wodanchinohu nooha dilawanno!

Roduu Raazerfordi shiqishino lallawo “Maganu mangiste gambissino” yitannote. Isi mitte saatenna boco ikkitanno yanna giddo jawa qoonqosinni, hundi masaalaano Maganu mangistere waajjitukkinni sabbakkinota xawisino. Lallawo gumulara kaiti togo yee xaꞌmi, “Ayirrado Moote gashsha hanafinota ammantinanni?” Gamba yiino manni “Ee!” yee qoonqonsa gotti asse coyiꞌri.

Hakkiinni aanche Roduu Raazerfordi, “Hattootiro, kiꞌne woꞌmanka dandaanno Magani ooso, soqqanshote qancho hadhe!” yee tanqa asse coyiꞌri. Isi lede “Kuneeti Moote gashsha hanafino! Kiꞌne isire dudubbinannireeti. Konnira Mootenna Mangistennire egensiisse, egensiisse, egensiisse” yii.

Hakko balla, xaanxe sunte heeꞌnoonni hocci tidhami; hakkiinni “Mootenna Mangistesi Egensiisse!” yitannoti aanannoho borreessinoonni sokka manna baalaho leeltu.

Reyi Bope hakka warita qaage “Gamba yiino manni baasa hagiidhino” yiino. Ana Gaardineri yinanni rodoono, “Mannu anga baasa ganinohura tuuqqa shashshafantino” yitino. Fireedi Tiwaaroshi yinanni rodii kayinni, “Gamba yiino manni baalu mitteenni shootti yee kaino” yiino. Ivanjeloosi Iskufaasi hakka warita kayise, “Ofollinoommo bayichinni mitte wolqa goshooshshe kayissinonkeha lawanno; baalunku shootti yine kaꞌnoommo; qoleno hindiiddo daggunke” yiino.

Gambooshsheho dayino manni giddo rooriidihu Maganu Mangisteha dancha duduwo wonanni duduwanni nooreeti. Gambooshshu gedensaanni kayinni dancha duduwo duduwate haaro ikke kaino. Eteliye Benekofi Qullaawu Maxaafi Rosaano hedo togo yite coyidhino: “Albinni roore diinaggaambe sabbakate murciꞌnummo hattono wodaninke giddo baxillu woꞌmino.” Hakka waro 18 diro ikke nooseti Adesa Taaki ‘Ayi haꞌranno?’ yitanno xaꞌmora dawaro qolate murcidhe kaꞌino. Ise togo yite coyidhino: “Hiikko, maa, woy hiittoonni sabbakeemmaro diafoomma. Ani afoomma coyi Isayaasi gede ‘Ani haꞌreemmana, ane soqqie’ yaate.” (Isa. 6:8) Raalfi Lefileri, “Yannankera alame woꞌmate halaꞌlinohu Maganu Mangiste duduwate zamachi biddiitto hanafinohu hakkuyi hagiirsiisanno barraati” yee coyiꞌrino.

Ee, Seedaari Poyinti, Ohayo yinanniwa 1922nni  assinoonni gambooshshi Tiokiraasete xagge giddo umo afidhino ikkito widira kiiramasi dhaggeeffantannita diꞌꞌikkitino! Roduu Joorji Gaangasi “Hakku gambooshshi, hakkuyi gedensaanni gambooshshe hoseemmokki gede murciꞌreemmo gede assinoe” yiino. Roduu Gaangasi yiinonte gede, hakkuyi gedensaanni gambooshshe horo hose diegennino. Juuliya Wiilkookisi togo yitino: “Borronke giddo Seedaari Poyinti yinanniwa 1922nni assinoonni gambooshshire nabbawumma kiiro, lowo geeshsha hagiidheemma. Ayewoteno, ‘Yihowa, hakko gambooshshira ofolleemma gede fajjoottoehura galaxxeemmahe’ yeemma.”

Ninkeno bayiru Maganinkeranna isi shoomino mootera diinaggaambe soqqammeemmonna insara noonke baxilli lexxanno gede, hattono wodaninke hagiidhanno gede assinoha hambannikkiha jawa gambooshshe qaangeemmoha ikkara dandaanno. Togoota hambannikki yanna qaangeemmo wote, “Yihowa, hakko gambooshshe haꞌreemmo gede fajjoottoe daafira galaxxeemmohe” yaanke digattanno.