DAANIEELINNA MIIRIYAAMI adhaminohu Wocawaaro 2000 maarote dirooti; insa Ispeenete Baarsiloona yinanni katamira heeꞌranno. Daanieeli togo yiino: “Heeꞌneemmo heeshsho mannu qiniitaamete yaannote. Loosinke, dancha hoteelera inteemmo gede, wole gobbuwa haꞌneemmo gedenna lowo waagi uduunne uddiꞌneemmo gede kaaꞌlinonke. Qoleno soqqansho ganyine fulleemmo.” Ikkollana heeshshonsa soorrantanno gede assannori ikkino.

Daanieeli 2006nni jawu gambooshshiwa shiqqino lallawo loosoho kakkaꞌꞌanno gede assitinosi; lallawo shiqishi rodii, “‘Reyote widira bobbahanno’ manna hegere heeshsho doogowa qolate dandiineemmore baala assinanni heeꞌnoommo?” yee xaꞌmino xaꞌmo wodanisira coꞌino. (Law. 24:11) Hattee lallawora, Qullaawu Maxaafi giddo noota hegere heeshshore kultanno sokka mannaho kula hasiissannonketa seekkine xawinsoonni. (Soq. 20:26, 27) Daanieeli hakka warita qaage togo yiino, “Yihowa ane coyishiishinoehu gede asse hedummo.” Qoleno, lallawo shiqinshi wote albinni roore soqqama hagiirrinke lexxanno gede assitannota xawinsoonni. Daanieeli tini adda ikkitinota huwatino. Minaamasi Miiriyaami wonanni suwisaancho ikkite babbaxxino atoote afidhino daafira hagiirru noo heeshsho heedhanni no.

Daanieeli ‘heeshshosi giddo lowo coye biddi assiꞌrate kainota’ coyiꞌrino. Isi hedinore assino. Albi gede seeda yanna loosa agure, woꞌma yanna suwisaancho ikki; hakkiinnino isinna Miiriyaami sabbakkannori roore hasiisannowa haꞌre soqqamiro afiꞌranno hagiirre heda hanafi.

Daanieelinna Miiriyaami 2007nni Onkoleessu aganira loosonsa agure, alba daaꞌꞌatate haꞌrinota Panama yinanni gobba haꞌri. Insa hakko soqqama hanafinohu Kariibiyu Baari giddo, Bokaasi Deeli Toro Arkipelego yinanniwa noo giddichuwaraati; hakkiicho heeꞌrannohu rooru manni Yengebii yinanniho hakko ilaminoho. Daanieelinna Miiriyaami codhino woxinsanni Panama giddo settu agani geeshsha soqqamate hedino.

Insa hatte giddichora mittu bayichinni wole bayicho haꞌrate howolonna biskilliite horoonsiꞌranno; insa mitte hige 32 km ikkitannotenna gooddo batidhino doogora lowo geeshsha iibbitino arrishsho fulte heedheenna biskilliitetenni harino gara horo dihawanno. Daanieeli daafurino daafira damme hooge gatino. Ikkollana, insa haꞌranno doogora heeꞌrannohu Yengebii manni mininsara masse wosinsinonsa; Daanieelinna Miiriyaami hakko qooxeessira horoonsiꞌnanni afoo woꞌnaalita mannu roore hagiidhe haaꞌrinonsa. Hakka mare keeshshikkinni, insa xiinxallisanno manni kiiro 23 ikkitu.

Ikkollana, codhino woxi goofinsata hagiirrinsa dadilleho soorrami. Daanieeli togo yiino: “Ispeene higate daafira hendummota hindiiddo daggunke. Qullaawa Maxaafa xiinxallinseemmo manna agurre haꞌra dadillissinonke.” Ikkollana, mittu agani gedensaanni hagiirsiissanno duduwo kullinsa. Miiriyaami togo yitino: “Baxxitino suwisaano ikkine soqqammeemmo gede koyinsinke. Soqqanshonke agurrummokkinni soqqama dandaanke lowo geeshsha hagiirsiissinonke!”

Yihowa dirijjite 2015nni mito coye biddi assitino daafira, Daanieelinna Miiriyaami woꞌma yanna suwisaano ikke soqqamanno gede assinoonninsa. Tennera insa maa assiyya? Insa Faarso 37:5 giddo noo qaale addaxxino; qummeeshshu togo yaanno: “Doogokki Kaaliiqira eeggo uyiꞌri; iso addaxxi; isino towatannohe.” Insa suwisaano ikke soqqamate kaaꞌlannonsa looso afiꞌre, hakko Panama giddonni Beeragiwaasi yinanniwa noo songora soqqamanni no.

Daanieeli togo yiino: “Ispeenetenni haꞌnummo waro, bikku heeshsho heeꞌra dandiineemmoha dilawinonke. Xa kayinni bikku heeshsho heeꞌra dandiinoommo; qoleno hasiisannonkere dihoongoommo.” Insa konni garinni hagiidhanno gede assinonsari maati? Togo yiino: “Shaqqadu mannira Yihowa daafira rosiisa taalle nookki hagiirre afiꞌnanni gede assitanno!”