MAATENKE 1910 balla Joorjiyaho Tibiliisi yinanniwiinni Kanaada dagge galchimaanni Saskaachiwaani giddo Pelii yinanniwa saada ceꞌe heeꞌra hanaffino. Ilamoommohu 1928nniiti; ani lee oosonke giddo maaꞌneho. Anniꞌya reyinohu amaꞌya ane iltara lewu agani albaanniiti; amaꞌya reyitinohu kayinni ani danqu qaaqqi heeꞌreennaati. Hakkiinni keeshshikkinni Luusi yinanniti bayira rodoonke 17 diriti heedhe reyitino. Hakkuyi gedensaanni abbinke anenna gatino roduuwanke isiwa haaꞌrinke.

Mito barra maateꞌya ani farashshu farro cuꞌme goshooshanna laꞌu; hakka waro ani xaallalla qaafa hanafe noommo. Insa ane farashshu qoxe gananno yite massinohura hakkiinni hoꞌleemmo gede cancite coyidhu, ani kayinni riffi nafa diyoommo. Ani insara badhe wodhe noommo; qoleno yitannore dimacciishshoommo. Ikkollana Maganu assa gede farashshu diganinoe; maatenke ani danqicha ikkoommota huwattinohu hakko barraati.

Maateꞌya jaali insa ane danqootu rosi minira eessitannoe gede amaali; hakko daafira abbiꞌya Niki Saskaachiwaani giddo Saskaatooni yinanniwa noohu danqootu rosi mine eessie. Maateꞌyawiinni haammata saate haꞌne iillinanniwa haꞌre heeꞌra hanafummo; hakkawaro anera onte dirolla ikke nooe; konni daafira waajjummo. Maateꞌyawa haꞌreemmohu ayyaanna ayirrinsanninna rosu mini cufamanno wote callaati. Gale hosanni danqootu afoo rosummo; qoleno hakko wole ooso ledo godoꞌla baxisannoe.

Bayira rodoonke aaniti Maariyeni, Biili Daaniyelchekira assidhuta rodooꞌya Firaansesinna ane insa towaata hanafi. Fiixiꞌya giddo balaxe Yihowa Farciꞌraasine ledo xaadinori insaati. Rosu cufameenna insawa dayeemmo yannara, insa Qullaawu Maxaafinni rosanni noore anera kulate dandiire baala assanno. Noore coyiꞌrummoro, insa danqootu afoo  dandaannokki daafira hakka waro insa ledo hasaawa shota diꞌꞌikkitinoe. Ikkollana, insa ani ayyaanaamittete coye baxeemmota huwatino. Ani insa assannori Qullaawu Maxaafi giddo noore ikkinota huwatoommo daafira, insa sabbakate haꞌranno wote ledonsa haꞌreemmo. Hakkuyi gedensaanni mulenni cuuama hasiꞌrummo; hakko daafira Wocawaaro 5, 1941nni Biili yinanni rodii kurete giddonni maashinetenni fushshinoonni waa wonshinoonnihu siwiilu gandira cuuie. Hakku wayi qorre qiidinoho!

Mitte hige 1946nni hawado rosu mini cufameenna qaera hige heeꞌreenna, Ameerikaho Ohayo giddo Kiliivilaandi yinanniwa jawa gambooshshe haꞌnummo. Gambooshshunniwa umi barra, rosiinsannire huwata dandeemmo gede roduuwiꞌya shiqanno roso bado bado borreesse leellishie. Layinki barra kayinni, danqootu afii gaamo noota afummoti lowo geeshsha hagiidhummo; hakko mitte rodoo shiqanno roso danqootu afiira qolte tirtanni no. Konni daafira gambooshshe hagiidhanni harunsummo; hattono jeefote Qullaawu Maxaafi halaale huwatummo!

Hatte yannara, Layinkihu Alamete Oli xaalla uurre no; qoleno meessi gobba bande baxate hedo iibbite no. Gambooshshunniwa rosoommori rosu mine ammanaꞌyara gaaramate murciꞌre kaeemmo gede assinoe. Konni daafira, baandiraho ayirrinye aanna gobbate faarso faarsa agurummo. Qoleno, ayyaanna ayirrisate karsamanna beetekiristaane haꞌra agurummo. Rosu mine loossannori tennera dihagiidhitino; hakko daafira ane waajjishiishatenna nookkire coyidhe hedoꞌya soorrate woꞌnaaltu. Ledoꞌya rossanno ooso tenne macciishshitu; tini insara farciꞌreemmo faro fantinoe. Ledoꞌya rossannori lawishshaho, Leerii Andirosoofi, Normani Ditirikinna Emili Shineeyideri jeefote Yihowara Farciꞌraasine ikkite xaa geeshsha isira ammanante soqqantanni no.

Wole katama haꞌneemmo yannara, duuchanka wote danqootaho farciꞌreemmo. Lawishshaho Moontiriyali giddo noohu danqootu boohaaranno bayicho Edi Taageri yinanni wedellichira farciꞌroommo; isi hakka waro mitte duuru gaamo miilaati. Isi niro reyi geeshsha Quyibeeki giddo Laavaali yinanni bayicho noote danqootu afii songora soqqamino. Ani Kiwaani Ardaneezi yinannihu wolu wedellichi ledono egennamoommo; isi biꞌre Beeriyu manni gede Qullaawu Maxaafi sokka halaale ikkase buuxate diinaggaawe xiinxallino. (Soq. 17:10, 11) Isino halaalu minira daye, Ontiriyo giddo Otaawa yinanniwa cimeessa ikke lubbote noo geeshsha Yihowara ammaname soqqamino.

Ani 1950nni Vaankeeri haꞌre heeꞌrummo. Danqootaho sabbaka baxisannoeha ikkirono, Kiristi Ispayiseri yinannite coyiꞌranna macciishsha dandiitanno manchora doogote farciꞌre afiꞌroommo woꞌnaalsha horo dihaweemmo. Ise borronke ganyite adhate sumuu  yite, minaannise Geeri ledo xaadissaera hasidhinota kultue. Hakko daafira ani mininsara mareenna hedonke mimmitoho borreessine kullanni seeda yanna hasaambummo. Hakkuyi gedensaanni insa ledo xaandoommohu boode diro keeshshineeti; insa Ontiriyo giddo Toronto katamira gambooshsheho dayino manni giddo bade afie; insa ane hawa hoogansa dhagge ikkitinoe. Hakku barri Geeri cuuamannoho. Kuni woꞌnaalshi, halaalu wixi muranno yannanna bayicho anfoommokki daafira, ayewoteno sabbaka hasiissannota qaageemmo gede assinoe.

Hakkuyi gedensaanni Saskaatooni haꞌre heeꞌrummo. Hakko Jeeninna Joyana yinanniri lakkuwu danqootu seenni noose mancho, insara Qullaawa Maxaafa rosiisammonsara hasidhinota kultue; hakka waro insa alba ani rosoommo rosi mine rosanni no. Mulenni lamenti seenni rosanni noore rosu mini jaallansara farciꞌri. Ledonsa rosannori giddo onte seenni gedensaanni Yihowa Farciꞌraasine ikkino. Insa giddo mitte Yunesi Kooleni yinannite. Ani Yunesi ledo egennamoommohu danqootu rosi mine roso gudummo dirooti. Hatte yannara ise karameellicho uyiteꞌꞌe jaalla ikkineemmo gede xaꞌmitinoe. Gedensaanni ise lowo geeshsha baxeemmo minaama ikkitinoe!

Yunesi ama ise Qullaawa Maxaafa xiinxallitanni noota affuti, rosu mini sooreessi xiinxalla agurtanno gede assara kultu. Isi Qullaawa Maxaafa xiinxallate horoonsidhanno borro nafa adhinose. Ikkollana, Yunesi Yihowara soqqantanni heeꞌrate murcidhino. Ise cuuamate kaꞌuta annisenna amase, “Yihowa Farciꞌraasincho ikkittaro minenke diheeꞌratta!” yee waajjishiishinose. Insa yiinonte gede Yunesi 17 diriti heedheenna mininni fushshe huneennase qooxeessisera heedhannoti mitte Yihowa Farciꞌraasine maate haadhuse. Ise xiinxalla diagurtino; ise gedensaanni cuuantino. Isenna ani 1960nni adhammummo barra annisenna amase sargenke didayino. Ikkollana, diru saꞌꞌanni haꞌrita insa ammanankenna oosonke lossiꞌnoommo gara laiti ninke ayirrisa hanafino.

Ninke danqoota ikkinummorono, lamala coyiꞌranna macciishsha dandiitanno ooso lossiꞌnoommo. Tini shota ikka hooggurono, oosonkera danqootu afoo rosiinsoommo daafira, insa ledo dancha gede hasaambeemmo hattono halaale rosiinsoommonsa. Songote giddo noo roduuwino lowo geeshsha kaaꞌlinonke. Lawishshaho, mitte maate oosonke giddo mittu Mangistete Addaraashera gara ikkinokkire coyiꞌranna affe borreessite kultinonke. Tennera qaaqqonke hakkawontenni seejjiꞌnummo. Shoole oosoꞌya Jeemsi, Jeeri, Nikolasinna Istiiveni hattono minaamuwinsanna maatensa Yihowara ammanante soqqantanni no. Shoolunku songote cimeeyye ikkite soqqantanni no. Qoleno, Nikolasinna minaamasi Diboora ledo Biritaaniyaho noote sinu biirora danqootu afiita tirote gaamo kaaꞌlitanni no; Istiiveninna minaamasi Sheeneni kayinni, Ameerikunniti sinu biiro giddo danqootu afiite tirote gaamo miillaati.

Yunesi, adhammummohunni 40^ki diro ayirrisate mittu agani gate heeꞌreenna kaanserete xibbinni reyitino. Ise hattee qarru yannara jawaatte heedhino. Jawaattanno gede kaaꞌlitinoseti reyino manni kaꞌꞌannota ammanaseeti. Ise ledo galagale xaadeemmo yanna quqquxame agadheemmo.

Ammajje 2012nni uwe gaꞌne hallo taoommo daafira kaaꞌlo hasiissinoe. Hakko daafira, mittu beettiꞌya minira higoommo. Xa ninke Kalgaari Danqootu Afii Songo miillaati; ani hakko cimeessa ikke soqqamanni noommo. Ani danqootu afii songora soqqamanna tini umite. Tini dhaggete! Ikkina, 1946nni kayise kageeshshi geeshsha Ingilizete Afii songora heeꞌre ayyaanaamittetenni jawaate keeshshoommohu hiittoonniiti? Yihowa anniweelo ooso towaatate eino qaale wonshino. (Far. 10:14) Ane kaaꞌlate yite, rosiinsanni roso borreessite leellishshuere, danqootu afoo rossurenna dandiitu deerrinni tirate woꞌnaalture baala galaxxeemmonsa.

Noore coyiꞌrummoro, rosiinsannire huwata hoogoommotera woy danqootaho hasiisannore lashshi assine agurroonni yee hedoommo daafira, dadille hexxo mudhe hoogoommo yanna no. Ikkollana hatte yannara Pheexiroosi Yesuusira coyiꞌrino qaale qaagoommo; isi togo yiino: “Mootichaꞌya, ayenkewa haꞌneemmo? Atera hegere heeshsho qaali noohe.” (Yoh. 6:66-68) Lowo diro halaalu mine keeshshinohu danqootu afoo coyiꞌrannohu wolu roduuwinte gede, anino cinca rosa hasiissinoe. Yihowanna dirijjitesi agadha hasiissannoeta rosoommo; hatto assaꞌya lowo horo afiꞌreemmo gede kaaꞌlitinoe. Xa anera umiꞌya afiinni qixxeessinoonniti falakkinoti ayyaanaamittete sagale nooe; qoleno Ameerikunnihu Danqootu Afiinni (ASL) assinanniha songotenna jajjabba gambooshshe haꞌreemmo. Ee, bayiru Maganinke Yihowara soqqama hagiirsiissanno heeshsho heeꞌreemmonna lowo atoote afiꞌreemmo gede kaaꞌlitinoe.