1, 2. (a) Wole gobba manni adhe dayino oosora qarra ikkannonsari maati? (b) Konni birxichira hiikkuri xaꞌmuware ronseemmo?

 JOOSHSHUWA yinanni rodii ‘Anje noo yannara minenna songote giddo, annisinna amasi ilamino gobba afoo’ coyiꞌranni lophinota coyiꞌrino. Isi lede togo yiino: “Rosu minira eummo gedensaanni kayinni heeꞌneemmo gobbara coyiꞌnanni afoo roorsiꞌra hanafummo. Shiimu diri gedensaanni coyi roore suta fuli. Gambooshshunniwa yinannire huwata dandeemmokkiha ikkummo; qoleno anniꞌyanna amaꞌya bude hawummo.” Togoo coyi tuncu yiinohu Jooshshuwara calla diꞌꞌikkino.

² Yannankera 240,000,000 saꞌꞌanno manni ilamino gobbanni haꞌre wole gobbara heeꞌranno. Ati wole gobbara heeꞌrattoho ooso noohe Kiristaanchootiro, oosokki “halaalaancho heeshsho” yaano halaalu mine heedhanno gede kaaꞌla dandaattohu hiittoonniiti? (3 Yoh. 4) Wolootu insa kaaꞌlitannohu hiittoonniiti?

3, 4. (a) Annuwunna amuuwu oosonsara dancha lawishsha ikka dandaannohu hiittoonniiti? (b) Annuwunna amuuwu mayyee heda dihasiissannonsa?

³ Annuwanna amuuwa, kiꞌne dancha lawishsha ikkaꞌne, oosoꞌne hegere heeshshowa massitanno doogora haꞌrate baasa kaaꞌlitannonsa. Oosoꞌne heeshshoꞌne giddo “Maganu Mangiste” balaxisiissinannita  laꞌanno wote, heeshshote heeꞌrate hasiissannonsare afiꞌrate Yihowa addaxxa rossanno. (Mat. 6:33, 34, NW) Konni daafira bikku heeshsho heedhe. Maalaamittete coyinni roore ayyaanaamittete coye asse. Asalu giddora eꞌinannikki gede qorophe. ‘Mannu jajaꞌnera’ woy maccaha ikka hasiꞌrantenni “gordoho jiro” afiꞌrate yaano Yihowa hagiirsiisate kaaꞌlannoꞌnere assate sharramme.—Maarqoosi 10:21, 22 nabbawi; Yoh. 12:43.

⁴ Addi addi dilgo oosoꞌne ledo hossinannikki gede assitaꞌnera wodhitinoonte. Oosoꞌne maccare ikkatenna dureeyye ikkantenni woy kiꞌnera woxe aantenni roore Yihowara soqqanturo hagiidhitinannita huwattanno gede asse. Kiristaana ikkinokki manni hedannohu gede, ooso annuwinsanna amuuwinsa dancha heeshsho heeꞌranno gede assa hasiissannonsa yitine heddinoonte. Qullaawu Maxaafi, “Oosonsara woxe miinjitannori iltinonsareeti ikkinnina ooso iltinonsarira woxe dimiinjitanno” yaannota deꞌinoonte.—2 Qor. 12:14.

5. Annuwunna amuuwu oosonsara ganyite Yihoware rosiisa hasiissannonsahu mayiraati?

⁵ Masaalotenni kulloonninte gede, “wole gobba manni” yaano addi addi afoo coyidhanno gaꞌre giddonni fulino manni Yihowa dirijjitewa yaaꞌꞌanni no. (Zak. 8:23) Ikkollana, afoo dandaa hooga oosoꞌnera halaale rosiissinanni wote guficho ikkitaꞌnera dandiitanno. Kiꞌne kaaꞌla hasiissannoꞌneti waanna Qullaawu Maxaafi xiinxalloꞌne oosoꞌneeti; qoleno insa Yihowa ‘afansa’ hegere heeshsho afiꞌrate faro fantannonsa. (Yoh. 17:3) Oosoꞌnera Yihoware rosiisate afidhinanni faro baala horoonsidhine ‘hajajosire kula’ hasiissannoꞌne.—Marro 6:6, 7 nabbawi.

6. Oosoꞌne kiꞌne afoo dandaansa kaaꞌlitannonsahu hiittoonniiti? (Hanafote noo misile lai.)

⁶ Oosoꞌne heedhinanni gobba afoo, rosu minenna hossannowa rossannoha ikkara dandaanno; kiꞌne afoo rossannohu kayinni ganyitine insa ledo hasaabbinanniha ikkirooti. Oosoꞌne kiꞌne afoo dandaansa kiꞌne ledo godowita hasaawate calla ikkikkinni, wole dancha faro fantannonsa. Lame afoo coyiꞌra dandaansa hedate dandoonsa lexxitanno gede assitanno; hattono wolu manni lao huwata qarrissannonsakkire ikkitanno. Qoleno, Yihowara albinni roore soqqantanno faro fantannonsaha ikkara dandaanno. Wole gobbanni dayino anninna ama adhe dayinoti Karoliina yinanni beetto togo yitino: “Wole gobba afoo coyidhanno songora soqqama baxissanno. Sabbakkannori roore hasiissannowa haꞌre soqqama baasa hagiirsiissanno.”

7. Oosoꞌne kiꞌne afiinni roore heedhinanni gobba afoo dandiitannoha ikkiro maa assa dandiitinanni?

⁷ Ikkollana, ooso martino gobba budenna afoo rossanno wote, insa giddo mitu anninsanna amansa coyiꞌranno afoo coyiꞌra baxxannokkihanna habbannoha ikkara dandaanno. Annuwanna amuuwa, oosoꞌne konni garinni heddannoha ikkiro heedhinanni gobbara coyiꞌnanniha mito afoo rosa dandiitinanni? Oosoꞌne hasaabbanno hasaawa, boohaartanno boohaarsha, rossannore afanna rosiisaanonsa ledo hasaawa dandiitinanniha ikkiro, insa Yihowara soqqantannore ikkite lophitanno gede roore kaaꞌla dandiitinanni. Wole afoo rosate yanna uyine rosiisiꞌranna meessaneeto heeshshi assa hasiissannoti egennantinote. Qaaqqiꞌne danqicha ikkoommero, isi ledo hasaawate danqootu afoo rosaꞌne gattannoni? Hatteente gede, kiꞌne coyidhanni afiinni roore heedhinanni gobba afoo dandaanno qaaqqi ledo hasaawate wole afoo rosa hasiissanno yiniro, tennera sumuu diyitinanni? a

8. Oosoꞌne coyidhanno afoo seekkitine coyiꞌra dandaa hoogginiro insa kaaꞌla dandiitinannihu hiittoonniiti?

⁸ Hige mito wole gobbanni dayino manna, oosonsa coyidhanno afoo seekke coyiꞌra qarrissannonsaha ikkara dandaanno. Tini, insa hawa gede huwantannikkita “Qullaawa Borro” giddo noo egenno oosonsara rosiisate guficho ikkitansara dandiitanno. (2 Xim. 3:15) Kiꞌnera togoo coyi  iillinoꞌneha ikkiro, oosoꞌne Yihoware rossannonna Iso baxxanno gede assa didandiitinanni yaa diꞌꞌikkino. Sheeni yinanni cimeessi anjeta qaage togo yiino: “Ninke lossitinoti galtiweelo amanke, ninke seekkine coyiꞌneemmo qaale hakkeeshshi geeshsha didandiitanno; meya roduuwiꞌyanna anino ise seekkite coyidhanno afoo hakkeeshshi geeshsha didandiineemmo. Ikkirono, ise lamalate kiiro ninke rosiisate, huuccatto assatenna maatete magansiꞌra massagate dandiiture baala assitanna laꞌꞌanke Yihoware rosa lowo geeshsha hasiissannota ikkitinota huwatate kaaꞌlitinonke.”

9. Annunna ama oosonsa lamu afiinni rosa hasiissannonsaha ikkiro tenne assa dandiitannohu hiittoonniiti?

⁹ Mite oosora Yihoware lamu afiinni yaano rosu mine rossanno afiinninna mine hasaambanni afiinni rosiisa hasiissannoha ikkara dandaanno. Tennera mitu annuwinna amuuwi, lamunku afiinni attammoonni borro, qoonqotenni qixxeessinoonni borronna viidiyo horoonsiꞌranno. Tini, wole gobbanni dayino anninna ama oosonsa Yihowa ledo noonsa jaalooma kaajjishidhanno gede kaaꞌlate dandaannore baala assa hasiissannonsata leellishshannote.

10. (a) Mitte maate hiittee songora soqqanturo woyyannonsaro murannohu ayeti? (b) Minaanni mitto doorsha doorara albaanni maa assa hasiissannosi?

¹⁰ ‘Wole gobbanni dayino manni’ gobbansa afoo coyidhanno songowiinni xeertiꞌre heeꞌrannoha ikkiro, hatte gobba afoo coyidhannota qooxeessinsara noo songo haꞌra hasiissannonsa. (Far. 146:9) Ikkollana, kiꞌne afoo coyidhanno songo qooxeessiꞌnera nooha ikkiro, aane noore hedaꞌne danchate: Maateꞌne hiikkoye afoo coyidhanno songora soqqanturo woyyanno? Maatete umo ikkinohu coye heeshshi gotti asse hedenna huuccatto assiꞌre, hattono minaamasinna oososi ledo hasaawe kae, hiittee songora soqqamiro woyyannonsaro mura hasiissannosi. (1 Qor. 11:3) Maatete umo ikkinohu maa heda hasiissannosi? Togoo yannara kaaꞌlannohu Qullaawu Maxaafihu xintu seeri hiikkoyeti? Xa hanni togoo wote kaaꞌlannohu Qullaawu Maxaafi seeri giddo mito laꞌno.

11, 12. (a) Ooso songo coyidhanno afoo dandaa woy dandaa hoongansa kaaꞌlitansara woy gawajjitansara dandiitannohu hiittoonniiti? (b) Mite ooso annuwinsanna amuuwinsa afoo rosa hasidhannokkihu mayiraati?

¹¹ Annuwunna amuuwu oosonsara hasiisannonsa coye seekkite heda hasiissannonsa. Ooso halaale seekkite cuꞌmidhanno gede kaaꞌlate, lamalate kiiro boode saate gambooshshunniwa rossannorinni sainore rosiisa hasiissannoti egennantinote. Hanni tenne hedde: Ooso seekkite egentino afoo coyidhanno songo gambooshshe hadhuro lowore rossanno; tenne annuwinsanna amuuwinsa huwata hoogara dandaanno. Lowo geeshsha dandiitannokki afoo coyidhanno songo assidhanno gambooshshe hadhuro kayinni coyi dihattooti. (1 Qorontoosi 14:9, 11 nabbawi.) Mittu qaaqqi afoo dadhino afiinni roore wole afoo roorsiꞌrannoha ikkara dandaanno. Mito wote isinni, ooso dadhitino afiinni gambooshshunniwa dawaro qoltannoha, loonse leellinshanni ikkito woy lallawo shiqishshannoha ikkara dandaanno; togo assitanno wote kayinni giddonsanni coyiꞌra dandiitannokkiha ikkara dandaanno.

¹² Qoleno, mittu qaaqqira rosannori wodanisira qaꞌmiꞌrannohu hakko afoo dandiino daafira calla diꞌꞌikkino. Hanafote qummi assinihu Jooshshuwa gari hattooti. Rodoosi Asteeri yitinonte gede, “aja oosora annuwansanna amuuwinsa afii, budinna ammaꞌno mitteenni amadaminoreeti.” Ooso annuwinsanna amuuwinsa bude badde afa hoogguro, insa coyiꞌranno afoonna ammaꞌnonsare rosa gibbannoha ikkara dandaanno. Tennera wole gobbanni dayino annuwinna amuuwi maa assa dandaanno?

13, 14. (a) Wole gobbanni dayino minaanninna minaama maatensa heedhanno gobbara coyiꞌnanni afoo coyidhanno songo haꞌrinohu mayiraati? (b) Insa ayyaanaamittetenni jawaate heeꞌra dandiinohu hiittoonniiti?

¹³ Annuwunna amuuwu uminsa hasattonni roore oosonsa ayyaanaamittete kaaꞌlitanno gara heda hasiissannonsa. (1 Qor. 10:24) Jooshshuwanna Asteeri anni Saamueeli togo yiino: “Minaamaꞌyanna  Ani oosonke ayyaanaamittete lophate hiikko afiinni rossuro woyyannoro hendummo; tenne yannara hayyo afiꞌrate huuccatto assiꞌnoommo. Huuccattonkera afiꞌnoommo dawaro harunsa shota diꞌꞌikkitinonke. Ikkirono, oosonke ninke afiinni assinanni gambooshshiwa huwattanni noori nookkita anfummoti, heeꞌneemmo gobba afoo coyidhanno songo haꞌrate murciꞌnummo. Ganyine insa ledo gambooshshe haꞌneemmo hattono soqqansho ledonsa fulleemmo. Qoleno, heeꞌneemmo gobba afoo coyidhanno roduuwa sagalete koyinseemmo; hattono insa ledo milli yineemmo. Hatto assanke, oosonke roduuwinke ledo egennantanno gede assitino; hattono Yihowa Maganonsa calla ikkikkinni Annansanna Jaalansa ikkinota affanno gede kaaꞌlitino. Tini, insa ninke afoo rossanno gede assatenni roorino waaga afidhinota anfoommo.”

¹⁴ Saamueeli lede togo yiino: “Ayyaanaamittetenni jawaante heeꞌrate, minaamaꞌyanna Ani ninke afoo coyidhanno songo assidhanno gambooshsheno haꞌneemmo. Heeꞌnoommo heeshsho loosu batiꞌrinotenna daafursitannote. Ikkirono, Yihowa galatamona sharronkenna daafurinke guma laalino. Sasenti oosonke xa woꞌma yanna soqqansho eꞌꞌe Yihowara soqqantanni no.”

15. Kiristiina yinanni rodoo insa heeꞌranno gobba afoo coyidhanno songo harate kaꞌinohu mayiraati?

¹⁵ Ooso wedella ikkitanno wote, insa seekkite coyiꞌra dandiitanno afoo coyidhanno songo hadhuro Yihowara albinni roore soqqama dandiitannota huwattannoha ikkara dandaanno. Insa konni garinni hedduro, annuwinsanna amuuwinsa oosonsa ayirrisa gibbinonsahu gede assite heda dihasiissannonsa. Kiristiina albita qaagge togo yitino: “Anniꞌyanna amaꞌya coyiꞌranno afoo mito geeshsha dandeemmaha ikkirono gambooshshunniwa roseemmari lowo geeshsha dileellannoe. Tonaalamu diriti heeꞌre rosu mine roseemma afiinni assinoonniha mitto jawa gambooshshe haꞌrumma. Tenne yannara macciishshoommari halaale ikkinota mite yee huwatumma! Hakkiinni saeno, rosu mine rosiinsanni afiinni huucciꞌra hanafaꞌya lowo geeshsha kaaꞌlitinoe. Yihowara wodaniꞌyata fushshe hasaaweemma!” (Soq. 2:11, 41) Kiristiina wedellitte ikkituti hattee insa heeꞌranno gobbara coyiꞌnanni afoo coyidhanno songo haꞌrate murcidhinota annisenna amase ledo hasaabbu. Ise togo yitino: “Rosu mine rosiinsanni afiinni Yihowa daafira rosaꞌya rosoommare loosunni leellisheemma gede assitinoe.” Mulenni Kiristiina woꞌma yanna suwisaancho ikkitino.

16. Naadiya, isenna roduuwise annisenna amase afoo coyidhanno songonni haꞌra hooginotera hagiidhitinohu mayiraati?

¹⁶ Wedella, kiꞌne heedhinanni gobbara coyiꞌnanni afiinni massanganni songo haꞌra woyyitannoha lawannoꞌne? Hatto ikkiro haꞌra hasidhinannihu mayiraatiro hedde. Hattee songo haꞌraꞌne Yihowawa albinni roore shiqate kaaꞌlitannoꞌneha lawannoꞌne? (Yai. 4:8) Hakkira haꞌrate kaꞌinoonnihu anniꞌnenna amaꞌne anganni fula hasidhinoonnihura woy looso ceeꞌmitinoonni daafiraati? Xa Beeteelete soqqantannoti Naadiya yinanni rodoo, ‘Isenna roduuwise wedella ikkiti, heeꞌranno gobba afoo coyidhanno songo haꞌra hasiꞌrinota’ coyidhino. Anninsanna amansa kayinni insa haꞌriro Yihowara noonsa baxilli baꞌꞌara dandaannota afino. Ise togo yitino: “Anninkenna amanke insa coyiꞌranno afoo rosiisate sharraminoteranna insa afoo coyidhanno songonni haꞌneemmokki gede assitinotera galanteemmonsa. Insa hatto assansa hagiirraame heeshsho heeꞌneemmo gedenna wolu mannira Yihowara rosiisate faro afiꞌneemmo gede kaaꞌlitinonke.”

17. (a) Yihowa, ooso ayeoo lossitanno gede hajajino? (b) Annuwunna amuuwu oosonsa halaalu mine lophitanno gede wolu manni kaaꞌlannonsa gede assa dandaannohu hiittoonniiti?

¹⁷ Yihowa, ooso halaalu mine lophitanno gede rosiissara hajajinohu akaakkansa woy wole manna ikkikkinni annuwansanna amuuwansaati. (Lawishsha 1:8; 31:10, 27, 28 nabbawi.) Ikkirono,  heeꞌranno gobbara coyiꞌnanni afoo dandaannokki annuwinna amuuwi, oosonsa danchu garinni rosiisate kaaꞌlo hasiissannonsaha ikkara dandaanno. Wolu manni kaaꞌlanno gede assiꞌra, Maganu insara uyino looso lashshi assa diꞌꞌikkitino; isinni hatto assansa, oosonsa Yihowa ‘amaalenni seejje lossa’ hasiꞌrannota leellishshannote. (Efe. 6:4) Lawishshaho, annuwunna amuuwu maatete magansiꞌransa ma garinni assidhuro woy oosonsa ayeoo ledo jaalla ikkituro woyyannoro songote cimeeyye amaaꞌla dandiitanno.

18, 19. (a) Ayyaanaamittete jawaatu Kiristaani wedella kaaꞌla dandaannohu hiittoonniiti? (b) Annuwunna amuuwu maa assa dea dihasiissannonsa?

¹⁸ Lawishshaho, annuwunna amuuwu maatete magansiꞌra assiꞌranno yannara, sae sae wole maate koyisa dandaanno. Batinyu wedelli ayyaanaamittete gikki yitinoriwa aaniro ayyaanaamittetenni lophanno; hakko daafira annuwunna amuuwu oosonsa togoo roduuwi ledo soqqantannonna boohaartanno gede assano danchate. (Law. 27:17) Aleenni qummi assinihu Sheeni, anje noo yannara kilate amaddinosi roduuwa seekke qaagannota coyiꞌrino. Isi lede togo yiino: “Insa, ani rosaanote kifile qixxaawe gambooshshunniwa shiqisheemmo gara leellishshue kiiro, lowore roseemmo. Qoleno, gamba yine boohaarreemmo yanna baasa baxeemmo.”

¹⁹ Annuwunna amuuwu oosonsa kaaꞌlara wodhitino roduuwi, ooso annansanna amansa ayirrissanno gede assa hasiissannonsati egennantinote; tenne assate annuwansanna amuuwansa ayirrissanno gede assanno garinni coyiꞌra hasiissannonsa; qoleno anna woy ama ikkitinoha dilawissanno. Qoleno ooso kaaꞌlitannori, songote giddo noori woy wolu manni wolere hedanno gede assannore assitannokki gede qorophitanno. (1 Phe. 2:12) Annuwunna amuuwu oosonsa wolu manni rosiisanno gede assiturono facci assite agura dihasiissannonsa. Insano kaaꞌlannonsa Kiristaani rosiisinore assitanno gede assanna insa uminsa rosiisa hasiissannonsa.

20. Annuwunna amuuwu oosonsa Yihowara soqqantannore ikkitanno gede kaaꞌla dandiitannohu hiittoonniiti?

²⁰ Annuwanna amuuwa, Yihowa kaaꞌlaꞌnera huuccidhe; qoleno assa dandiitinannire baala asse. (2 Duduwo 15:7 nabbawi.) Umiꞌne hasattonni roore qaaqqiꞌne Yihowa jaala ikkanno gede asse. Maganu Qaali qaaqqiꞌne wodanira qaꞌmiꞌranno gede dandiitinannire baala asse. Qaaqqiꞌne Yihowara soqqamannoha dancha Kiristaancho ikkanno yitine hexxa agurtinoonte. Oosoꞌne Maganu Qaalenna kiꞌne lawishsha harunsitinota laꞌinanni wote soqqamaasinchu Yohaannisi gede hagiidhitinanni; isi ayyaanaamittete oososi daafira togo yiino: “Oosoꞌya halaalaancho heeshsho heedhannota macciishshatenni roorino hagiirri dinoe.”—3 Yoh. 4.