1, 2. Alamete doyichora 2018nni mannu hiikkonne ayyaana ayirrisate gamba yaanno? Kuni ayyaani baxxinoho yineemmohu mayiraati? (Hanafote noo misile lai.)

 BADHEESSA 31, 2018nni arrishsho ea hanaffanno wote, Yihowa Farciꞌraasinenna hasatto noonsahu wolu batinyu manni Mootichu Hurbaate ayirrisate gamba yaanno. Arrishsho eꞌanno wote, lowo miliyoone ikkanno manni Kiristoosi Reyo Qaagooshshe ayirrisanno. Diru kiiro ayirrinsannihu kuni Ayyaani uullate aanna assinannihu wolu coyi baalunni roore mittimma heedhanno gede assannoho!

² Yihowanna Yesuusi alamete doyichora lowo miliyoone ikkanno manni konne baxxino ayyaana ayirrisanna laꞌanno woyite mageeshshi geeshsha hagiidhitannoro hanni hedi. Qullaawu Maxaafi, addi addi afoo coyiꞌrannohu ‘ayino kiire dandaannokkihu lowo manni gosa baalatenninna gare baalatenni’ daye qoonqonsa naggi asse “Gato ayirradu barcimira ofollino Maganitenna, Geꞌrechunnite” yee coyiꞌrannota balaxe kulino. (Aju. 7:9, 10) Ee, diru kiiro ayirrinsannihu  Qaagooshshu Ayyaani Yihowanna Yesuusa guwisiꞌneemmo faro fanannonke!

3. Konni birxichira hiikkuri xaꞌmuwara dawaro afiꞌneemmo?

³ Konni birxichira aante noo xaꞌmuwara dawaro afiꞌneemmo. (1) Qaagooshshu Ayyaanira qixxaawanna konni ayyaaninni horo afiꞌra dandiineemmohu hiittoonniiti? (2) Qaagooshshu Ayyaani Maganu manni mereero mittimma heedhanno gede assannohu hiittoonniiti? (3) Ninke mittimma heedhanno gede kaaꞌla dandiineemmohu hiittoonniiti? (4) Jeefonniha Qaagooshshu Ayyaana ayirrinseemmohu mamarooti?

4. Qaagooshshu Ayyaana hosa hoogate sharrama hasiissannonkehu mayiraati?

⁴ Qaagooshshu Ayyaana haꞌnummoro afiꞌneemmo horo hiince. Songote gambooshshi magansiꞌranke kifile ikkinota habbinoonte. Yihowanna Yesuusi konne baxxino Ayyaana ayirrisate sharrantannore laꞌanno. Fayyimmate woy wolu shota ikkinokki qarri iilla hooginke geeshsha Qaagooshshu Ayyaana hosa dihasiissannonke; hatto ikkiro Yesuusinna Yihowa hagiidhitanno. Assootinkenni gambooshshe naandeemmota leellinsheemmoha ikkiro, Yihowa suꞌmanke ‘maxaafisira borreessanno;’ konni “heeshshote maxaafira” suꞌmansa borreessinoonni manni hegere heeshsho afiꞌranno.—Mil. 3:16; Aju. 20:15.

5. Qaagooshshu Ayyaanira albaanni noo barruwa giddo ‘ammananke’ layiꞌra dandiineemmohu hiittoonniiti?

⁵ Qaagooshshu Ayyaanira albaanni noo barruwa giddo, huuccatto assiꞌne Yihowa ledo noonke jaaloomi mageeshshihoro layiꞌra dandiineemmo. (2 Qorontoosi 13:5 nabbawi.) Hatto assa dandiineemmohu hiittoonniiti? ‘Ammanatenni kaajjine heeꞌnoommoronna teꞌee’ fonqolle layiꞌra hasiissannonke. Tenne afate ninkeneeto aante noo xaꞌmuwa xaꞌma dandiineemmo: ‘Yihowa fajjosi wonshate horoonsiꞌrannoti tenne dirijjite calla ikkitinota ammaneemmo? Mannaho Maganu Mangisteha dancha duduwo duduwatenna rosiisate danduummore baala assanni noommo? Asseemmori heeꞌneemmohu goofimarchu barra ikkinotanna Sheexaanu gashshooti baꞌꞌanno yanna iillitinota ammaneemmota leellishannoho? Yihowaranna Yesuusira nooe ammana, heeshshoꞌya Maganoho sayise uummo wote nooe geeshshite?’ (Mat. 24:14; 2 Xim. 3:1; Ibi. 3:14) Kuri xaꞌmuwa hiincanke, ninkeneeto fonqole layiꞌrate kaaꞌlitannonke.

6. (a) Hegere heeshsho afiꞌrate maa assa hasiissanno? (b) Mittu cimeessi Qaagooshshu Ayyaanira qixxaawate diru kiiro maa assanno? Atino Qaagooshshu Ayyaanira qixxaawa dandaattohu hiittoonniiti?

⁶ Qaagooshshu Ayyaani hasiisannoha ikkinota leellishshanno qummeeshshuwa nabbabbine hiince. (Yohaannisi 3:16; 17:3 nabbawi.) Hegere heeshsho afiꞌrate, Yihowa ‘afanna’ mitto Beettosi Yesuusa ‘ammana’ hasiissanno. Qaagooshshu Ayyaanira qixxaawate, Yihowawanna Yesuusiwa shiqate kaaꞌlannohe birxicho doorte xiinxalla dandaatto. Hanni mittu cimeessa ikke soqqamanni lowo diro keeshshino rodii assannore laꞌno. Isi Qaagooshshu Ayyaani daafiranna Yihowanna Yesuusi leellishshinonke baxilli daafira kultannota Agarooshshu Shaera fultino birxichuwa doore gamba assanni keeshshino. Isi Qaagooshshu Ayyaanira albaanni noo lamala giddo kuri birxichiwa wirro nabbawanno, hattono konne Ayyaanna ayirrisa hasiissannohu mayiraatiro hiincanno. Isi tenne hajore kulanno birxicho afiꞌranno woyite, alba gamba asse wodhinotera aanaho lexxanno. Kuni cimeessi, kuri birxichuwa wirro nabbawanna hiinca, hattono Qaagooshshu Ayyaanita Qullaawu Maxaafi niwaawe hiinca haaro roso rosate kaaꞌlitannota huwatino. Baalunkunni roore diru kiiro isi tenne assanno wote Yihowaranna Yesuusira noosi baxilli lexxannota huwatino. Atino hatto assattoha ikkiro, Yihowaranna Yesuusira noohe baxilli  lexxanno, hattono Qaagooshshu Ayyaaninni roore horo afiꞌratto.

7. (a) Yesuusi umo Mootichu Hurbaate ayirrinsi hashsha mayyee huucciꞌrino? (b) Yihowa Yesuusi huuccatto macciishshinota leellishannori maati?

⁷ Mite yine Mootichu Hurbaate ayirrisa hananfi hashsha, Yesuusi Yihowanna isi mereero noo gedee mittimma harunsaanosi mereerono heedhanno gede huuccatto assino. (Yohaannisi 17:20, 21 nabbawi.) Yihowa Beettisi huucciꞌrino huuccatto macciishshino; korkaatuno xaa yannara Yihowa Beettosi soyinota ammanannohu lowo miliyoone ikkanno manni no. Maganu soqqamaano assidhannohu wolu gambooshshinte gede, Qaagooshshu Ayyaanino Yihowa Farciꞌraasine mereero mittimma noota leellishanno. Hakko barra alamete doyichora addi addi gaꞌrenni dayinohu babbaxxino dani noonsa manni gamba yaanno. Mitu qooxeessiꞌra, addi addi sirchinni dayino manni magansiꞌrate gamba yaa rosantinota diꞌꞌikkino; togoo gambooshshe isinni gibbannori no. Yihowanna Yesuusi kayinni Maganu manni mereero noo mittimma naaddanno!

8. Yihowa mannisi mitto ikkannota leellishate Hiziqeelira maa assanno gede kulinosi?

⁸ Yihowa daga mereero togoo mittimma heeꞌrase dhagge diꞌꞌikkitannonke. Korkaatuno Yihowa mannisi mereero mittimma heedhannota balaxe coyiꞌrino. Hanni Maganu masaalaanchu Hiziqeelira kulino sokka hedi; Isi “Yihudu gashshoote” nna “Israeelete gashshoote” yitannota lame siqqo mittowa gamba assanno gede kulinosi. (Hiziqeeli 37:15-17 nabbawi.) Maaja 2016nnite Agarooshshu Shaera fulinohu “Nabbawaano Xaꞌmitanno Xaꞌmo” yaanno birxichira togo yitanno hedo no: “Yihowa, masaalaanchu Hiziqeeli Israeele Hexxote Gobba higgu gedensaanni mitte daga ikkitannota kultanno sokka masaalanno gede assino. Hatti masaalo goofimarchu yannara heeꞌrannohu Maganu mannino mitto ikkannota leellishshanno.”

9. Diru kiiro Qaagooshshu Ayyaana ayirrinsanni wote Hiziqeeli masaalotenni kulino mittimma xabbe leeltannohu hiittoonniiti?

⁹ Yihowa 1919nni kayise, “Yihudu gashshoote” yine borreessini siqqo yaano buuramaasine wirro mitto ikkitanno gede assino. Hakkiinni “Israeelete siqqo” yiniri yaano uullate aana heeꞌrate hexxo noonsari, buurantinori ledo “mitte hoshsha” ikkitino. (Yoh. 10:16; Zak. 8:23) Yihowa tenne lamenta siqqo xaadise mitte asse amadate qaale eino. (Hiz. 37:19) Yannankera tini lamenti gaamo mitte Moote hunda heedhe mitteenni soqqantanni no; tini Moote “soqqamaanchoꞌya Daawiti” yine masaalotenni kulliho Yesuusa Kiristoosaati. (Hiz. 37:24, 25) Uullate aana gate noohu buuramino Kiristaani, diru kiiro “wolu geꞌreewi” ledo Kiristoosi Reyo Qaagooshshe ayirrisate gamba yaanno yannara, Hiziqeeli maxaafira kulloonni mittimma xabbe leeltanno! Ikkina, ninke Maganu manni mereero noo mittimma baꞌannokki gede kaaꞌla dandiineemmohu hiittoonniiti?

10. Maganu manni mereero mittimma heedhanno gede kaaꞌla dandiineemmohu hiittoonniiti?

¹⁰ Maganu manni mereero mittimma heedhanno gede kaaꞌla dandiineemmo doogga giddo mitte umonke heeshshi assate. Yesuusi uullate aana noo yannara, rosaanosi umonsa heeshshi assitanno gede amaalinonsa. (Mat. 23:12) Umonke heeshshi assineemmoha ikkiro, alamete manni gede umonke gotti diassineemmo. Hatteentenni umonke heeshshi assineemmore ikkanke, Maganu manni mereero albisa ikkite soqqantannorira hajajammeemmo gede assitannonke; tini qolte songote giddo mittimma heedhanno gede kaaꞌlitanno. Baalunkunni roore umonke heeshshi assineemmoha ikkiro Maganu hagiidhanno; isi  ‘booꞌnaleeyye giwanno; jooguulleho kayinni elto aanno.’—1 Phe. 5:5.

11. Qaagooshshu Ayyaaniwa shiqanno timinna woyine afidhino tiro hiincanke mittimma heedhannonke gede kaaꞌlitannohu hiittoonniiti?

¹¹ Mittimma heedhanno gede kaaꞌla dandiineemmoti layinki doogo, Qaagooshshu Ayyaaniwa shiqanno timinna woyine mayi tiro afidhinoro hiincate. Roorenkanni Qaagooshshu Ayyaana ayirrinsanni hashsha shiishinokki timinna duume woyine afidhino tiro seekkitine hedde. (1 Qor. 11:23-25) Timu Yesuusi kakkalo asse shiqishinoha cubbu nookki maala riqiwanno; woyine kayinni duꞌnantino mundeesi riqibbanno. Ikkollana timunna woyine afidhino tiro huwata calla diguddanno. Wolurino qaaga hasiissannonkeri no; Maganu Beettosi ninkera oye baxillesi leellishinonke; Yesuusino umisi fajjonni ninkera heeshshosi sayise oye baxille leellishinonke; insa leellishshinonke gedee baxille leellishankera dandaannohu mittuno dino. Yihowanna Yesuusi baxille leellishshinonke daafira, ninkeno insa banxeemmota leellisha hasiissannonke. Yihowara noonke baxilli ninke baalunku mereero mittimma heedhanno gede assanno.

12. Yesuusi mitte mootenna borojjichisi daafira coyiꞌrino lawishshi, Yihowa wolootaho gatona yinammora hasiꞌrannota leellishannohu hiittoonniiti?

¹² Mittimma heedhanno gede kaaꞌla dandiineemmoti sayikki doogo wolootaho mulla gatona yaate. Koffi assitinonkere gatona yineemmoha ikkiro, Kiristoosite wodote kakkalo widoonni cubbinkera afiꞌnoommo maaro naandeemmota leellinsheemmo. Yesuusi Maatewoosi 18:23-34 aana coyiꞌrino lawishsha qaagge. Kiꞌneneeto togo yite xaꞌme: ‘Yesuusi rosiisinore harunseemmo? Ammanate roduuwiꞌyara cincate akata leellisheemmo? Insa koffi assitinoehu mayiraatiro huwatate woꞌnaaleemmo? Koffi assitinoere gatona yaate qixxaawoommoho?’ Guuntete xeꞌne noonkere ikkinoommo daafira, koffi assitinonkere gatona yaa qarra ikkitannonke woti heeꞌrara dandaanno. Ikkirono, Yesuusi coyiꞌrino lawishshi Yihowa maa assinammora hasiꞌrannoro leellishanno. (Maatewoosi 18:35 nabbawi.) Yesuusi, roduuwinke maaro xaꞌmidhanno wote gatona yineemmonsakkiha ikkiro, Yihowano ninke cubbo gatona yaannokkita xawisino. Kuni shotinse laꞌnanni coye diꞌꞌikkino! Yesuusi rosiisinonke garinni wolootaho gatona  yineemmoha ikkiro, mereeronke noo mittimma baꞌannokki gede kaaꞌlineemmo.

13. Salaame banxeemmore ikkanke mittimma heedhanno gede assitannohu hiittoonniiti?

¹³ Wolootaho gatona yaanke, salaame banxeemmota leellishshanno. Soqqamaasinchu Phaawuloosi ‘Maganu ayyaani aanno keerinni mittimmanke agadhate jawaata’ hasiissannonketa kulino. (Efe. 4:3) Qaagooshshu Ayyaana ayirrinsanni woggara, roorenkanni konne ayyaanna ayirrinsanni hashsha, wolootu ledo noohe aante hiittootero seekkite hedi. Ateneeto, ‘Koma amade keeshsheemmonso, salaamenna mittimma heedhanno gede assate sharrameemmo’ yite xaꞌmi. Qaagooshshu Ayyaana ayirrinsanni woggara tenne xaꞌmo seekke heda hasiissannonke.

14. ‘Mimmitonke baxillunni duqqine’ heeꞌra dandiineemmohu hiittoonniiti?

¹⁴ Mittimma heedhanno gede kaaꞌla dandiineemmoti shoolki doogo, Yihowanna Yesuusi gede wolootaho baxille leellishate. (1 Yoh. 4:8) “Rodooꞌya ikkino daafira ikkummota ikke duqqe heeꞌreemmona, baxille leellisha kayinni didandeemmo” yine heda dihasiissannonke. Togo yee heda gara diꞌꞌikkitino; korkaatuno Phaawuloosi, “mimmitoꞌne baxillunni duqqe” yee amaalinonke. (Efe. 4:2) Phaawuloosi “mimmitoꞌne duqqe” yiinoha calla ikkikkinni “mimmitoꞌne baxillunni duqqe” yiinota deꞌooti. Lamenti yaatto badooshshe afidhino. Songonke giddo Yihowa woshshe abbinohu addi addi gari manni no. (Yoh. 6:44) Yihowa insa woshshe abbinonsahu baxinonsa daafiraati. Ikkina, Yihowa baxino roduuwanke ninke baxa dihasiissannonke? Yihowa roduuwanke banxeemmo gede hajajinonke hajajo harunsa hasiissannonke.—1 Yoh. 4:20, 21.

15. Qaagooshshu Ayyaana jeefote ayirrinseemmo barri noota anfeemmohu hiittoonniiti?

¹⁵ Barrunni mitto barra jeefonniha Qaagooshshu Ayyaanna ayirrinseemmo. Tenne anfeemmohu hiittoonniiti? Phaawuloosi Qorontoosi Kiristaanira borreessinote umi sokka aana diru kiiro Yesuusi reyo qaagooshshe ayirrinse, “Mootichu daa geeshsha reyosire” kulleemmota coyiꞌrino. (1 Qor. 11:26) Kowiicho kulloonnihu “daa” yaanno qaalinna Yesuusi goofimarchu barri daafira masaali wote coyiꞌrinohu “daa” yaanno qaali mitte yannara ikkannore leellishannoho. Yesuusi albillitte daannohu bayiru qarri daafira coyiꞌranni togo yiino: “Manchi Beettihu daasi malaati gordoho leellanno. Hatte yannara gobbate aana noo manni baalu wiꞌlanno. Manchi Beettino wolqatenninna lowo ayirrinyinni gomichu aana daanna laꞌꞌanno. [Yesuusi] xurumba lowo geeshsha luushshitanno sokkaasine soyanno; insano shoolenka raga hadhe, gordunna gobbate qaccenni Maganu doodhinore gamba assitanno.” (Mat. 24:29-31) Yesuusi ‘Maganu doodhinore gamba assannohu’ uullate aana gatinoha buuramino Kiristaana baala iimira haaꞌranno woteeti. Kuni ikkannohu bayiru qarri hanafi gedensaanni, kayinni Armaagedooni oli hanafara albaanniiti. Hakkunni gedensaanni, 144,000 Yesuusi ledo uullate mootoolla baala qeeltanno. (Aju. 17:12-14) Konni daafira, Yesuusi uullate aana gattino buuramaasine gamba assate ‘daara’ albaanni ayirrinsannihu Qaagooshshu Ayyaani jeefonniho.

16. Tayixeha Qaagooshshu Ayyaana haꞌrate murciꞌroottohu mayiraati?

¹⁶ Badheessa 31, 2018nni ayirrinsanniha Qaagooshshu Ayyaana hosa hoogate murciꞌno. Qoleno Yihowa mannisi mereero noo mittimma baꞌannokki gede dandiinummore baala assineemmo gede kaaꞌlankera huucciꞌno! (Faarso 133:1 nabbawi.) Barrunni mitto barra jeefonniha Qaagooshshu Ayyaana ayirrinseemmota deꞌnoonke. Hakka geeshsha kayinni Qaagooshshu Ayyaana hosa hoogate dandiinummore baala assino, hattono konne Ayyaana ayirrinsanni yannara noo mittimma naandeemmota leellinsho.