1. Mittu manchi ledo jaalooma kalaqiˈra dandiineemmohu hiittoonniiti?

DUUCHA woyite mittu manchi ledo jaalooma kalaqiˈrate balanxe hakko manchiwa aana hasiissanno. Hakko manchi ledo giddoˈneta mimmitoho hasaabbinanniha ikkiro jaalla ikkitinanni. Yesuusi ledo lubbote jaalla ikka kayinni shota diˈˈikkitannonke. Mayira?

2. Yesuusi ledo jaalooma kalaqiˈra shota ikkitinokkihu mayiraati?

² Qarra ikkannonkehu umi coyi Yesuusi ledo xaande diegenninoommo. Umi xibbi diro heeˈrinohu batinyu Kiristaanino Yesuusi ledo xaade diegennino. Ikkirono, soqqamaasinchu Pheexiroosi togo yiino: “Yesuusa Kiristoosa laˈinoonnikkiha ikkirono baxxinannisi. Xa laˈinoonnisikkiha ikkirono, ammantinannisi.” (1 Phe. 1:8) Hakko daafira, Yesuusi ledo xaande egenninoommokkiha ikkirono, isi ledo lubbote jaalooma kalaqiˈra dandiineemmo.

3. Yesuusi ledo jaalooma shota ikkitannonkekki gede assannohu layinki coyi maati?

³ Qarra ikkannonkehu layinki coyi Yesuusi ledo hasaambe diegenninoommo. Huuccatto assiˈneemmo woyite hasaawinsanni heeˈnoommohu Yihowaati. Yesuusi suˈminni huucciˈneemmoha ikkirono, isi ledo xaaddotenni dihasaambeemmo. Qoleno, Yesuusi iso huucciˈnammora dihasiˈranno. Mayira? Korkaatuno huuccatto magansiˈrate; magansiˈra  hasiissannohu qole Yihowa callaati. (Mat. 4:10) Ikkirono, Yesuusa banxeemmota leellisha dandiineemmo.

4. Yesuusi ledo jaalooma shota ikkitannonkekki gede assannohu sayikki coyi maati? Konni birxichira maa ronseemmo?

⁴ Qarra ikkannonkehu sayikki coyi Yesuusi heeˈrannohu iimaati. Hakko daafira, isi ledo hosa didandiineemmo. Yesuusiwa shinqe egenninoommokkiha ikkirono isi daafira lowore rosa dandiineemmo. Konni birxichira Yesuusi ledo noonke jaalooma kaajjishiˈrate kaaˈlannonkeha assa hasiissannonkeha shoole coye laˈneemmo. Hanni balanxe Kiristoosi ledo jaalooma kalaqiˈra hasiissannonkehu mayiraatiro laˈno.

5. Yesuusi jaalla ikka hasiissannonkehu mayiraati? (“ Yesuusi Jaalla Ikka Yihowa Jaalla Ikkineemmo gede Kaaˈlitannonkenna” “ Yesuusi Silxaane Daafira Quwa Saˈinokki Lao Heedhoˈne” yitanno saaxineno lai.)

⁵ Yihowa ledo dancha aante heedhankera hasiˈnummoro Yesuusi jaalla ikka hasiissannonke. Hatto yineemmohu mayira? Hanni lame korkaata laˈno. Umihunni, Yesuusi harunsaanosira ‘Anniˈya baxinoˈnehu ane baxxinoonniehuraati’ yiino. (Yoh. 16:27) Isi lede “Ane widoonni ikka hoogiro, ayino Anniˈyawa daannohu dino” yiino. (Yoh. 14:6) Yesuusi ledo jaaloommikkinni Yihowa ledo jaaloomate woˈnaala mittu minira waalcho agurre waalchu nookki widoonni eate woˈnaalate gedeeti. Yesuusi “ani geˈreewu waalchooti” yee coyiˈri woyite togoo lawishsha horoonsiˈrino. (Yoh. 10:7) Layinkihunni Yesuusi Annisi lawishsha guutu garinni harunsino. Isi harunsaanosi “Ane afinohu annaˈyano afino” yiino. (Yoh. 14:9) Konnira, Yihowa daafira ronseemmo doogga  giddo mitte Yesuusi heeshsho xiinxallineeti. Yesuusi daafira ronsummo kiiro iso albinni roore banxeemmo. Yesuusira lubbote jaalla ikkinummoro, Yihowara noonke baxilli lexxanni haˈranno.

6. Yesuusi ledo jaalooma hasiissannonkehu wolu korkaati maati? Lawishsha kuli.

⁶ Yihowa huuccattonke macciishshannohu Yesuusi jaalla ikkinummorooti. Konnira huuccatto assiˈneemmo woyite yinoomme geeshshira calla “Yesuusi suˈminni” yaa dihasiissannonke. Yihowa huuccattonkera dawaro qolate Yesuusa horoonsiˈrannohu hiittoonniitiro afa hasiissannonke. Yesuusi soqqamaasinesira “suˈmiˈyanni huuccidhinannire baala asseemmoˈne” yiino. (Yoh. 14:13) Huuccattonke macciishshe dawaro qolannohu Yihowa ikkirono, isi fajjosi wonshanno gede Yesuusira silxaane uyino. (Mat. 28:18) Hakko daafira, Yihowa huuccattonke macciishshe dawaro qolara albaanni balaxe Yesuusi asse yiinonkere assinoommoronna teˈee hedanno. Lawishshaho, Yesuusi togo yiino: “Mannu sao agurtiniro, gordu Anniˈne kiˈne saono agurannoˈne. Mannu sao agura hoogginiro kayinni, Anniˈne kiˈne saono diagurannoˈne.” (Mat. 6:14, 15) Yihowanna Yesuusi maartannonkente gede ninkeno woloota maara hasiissannonke.

7. Yesuusiti wodote kakkalo kaaˈlitannohu ayeooraati?

⁷ Yesuusiti wodote kakkalo kaaˈlitannonkehu isi ledo danchu jaaloomi heeˈrinkero callaati. Hatto yineemmohu mayiraati? Yesuusi ‘lubbosi jaallasira sayise aannota’ coyiˈrino. (Yoh. 15:13) Isi uullara daara albaanni heeˈrinohu ammanamino manni albillitte Yesuusi daafira rosanna baxa hasiissannonsa. Abirahaami, Saara, Muse, Reaabinna wolu ammanantinori Yihowa soqqamaasine reyotenni kaˈannoha ikkirono, hegere heeshsho afiˈrate Yesuusi ledo jaalooma hasiissannonsa.—Yoh. 17:3; Soq. 24:15; Ibi. 11:8-12, 24-26, 31.

8-9. Yohaannisi 15:4, 5 kultanno garinni Yesuusi jaalla ikkanke maa assate kaaˈlitannonke? Yesuusi ledo noonke jaalooma geedonniha assiˈra hasiissannonkehu mayiraati?

⁸ Xaa yannara Yesuusi ledo Maganu Mangisteha dancha duduwo dudumbanninna manna rosiinsanni heeˈnoommo. Yesuusi uullate aana noo yannara rosiisaanchoho. Isi songote umo ikkino daafira, iimira haˈrihu gedensaannino sabbakatenna rosiisate looso loosiisanni no. Yesuusi dandaamihe deerrinni lowo manni isonna Annasi afanno gede kaaˈlate assattore laˈˈanno woyite lowo geeshsha hagiidhanno. Qoleno, konne looso umo fushsha dandiineemmohu Yihowanna Yesuusi kaaˈlitunkero callaati.—Yohaannisi 15:4, 5 nabbawi.

⁹ Maganu Qaali Yihowa hagiirsiisa hasiˈnummoro, Yesuusa baxanna baxillenke geedonniha assiˈra hasiissannonketa kulanno. Hanni Yesuusi jaalla ikkate assa hasiissannonkeha shoole coye laˈno.

10. Yesuusi jaalla ikkate assa hasiissannonkehu umi coyi maati?

¹⁰ (1) Yesuusa seekkitine affe. Maatewoosi, Maarqoosi, Luqaasinna Yohaannisi Wongeella nabbambe Yesuusa seekkine afa dandiineemmo. Qullaawu Maxaafi Yesuusi heeshsho daafira kulannore hiincinummoro, isi manna shaqqillunni kaaˈlino gara huwanteemmo daafira albinni roore banxeemmosi. Lawishshaho, isi rosaanosira Mooticha ikkirono, insa borojju gede asse laˈˈa agure giddosita hasaawinonsa. (Yoh. 15:15) Isi insa dadillitu yannara dadillino, wiˈlitu yannara  ledonsa wiˈlino. (Yoh. 11:32-36) Diinnasi nafa sokkasi macciishshe adhino manni Yesuusi jaalla ikkinota ammantino. (Mat. 11:19) Ninkeno Yesuusi lawishsha harunsine wolootaho danchare assinummoro, mannu ledo dancha aante heedhannonke; hattono hagiirrinke bae ikkanno, Kiristoosira noonke baxillino lexxanno.

11. Yesuusi jaalla ikkate assa hasiissannonkehu layinki coyi maati? Hatto assa hasiissannonkehu mayiraati?

¹¹ (2) Hedoˈnenna assootiˈne Yesuusihu gedeeha ikko. Yesuusi hedanno gara anfummoronna ninkeno hakko garinni hedate woˈnaallummoro jaaloominke kaajjado ikkanno. (1 Qor. 2:16) Ikkina, Yesuusi lawishsha harunsa dandiineemmohu hiittoonniiti? Hanni mitto lawishsha laˈno. Yesuusi aneti bushshu yaa agure woloota kaaˈlanno. (Mat. 20:28; Rom. 15:1-3) Konnira, isi umisi injo aguranno hattono woloota gatona yaanno. Yesuusi mannu suˈmasi huniro nafa hanqoho dimuddamanno. (Yoh. 1:46, 47) Isi alba soˈro loosino manni diwoyyaawanno yee dihedino. (1 Xim. 1:12-14) Yesuusi togo yiino: “Kiˈne kiˈneneewa baxantiniro, ane rosaano ikkitinoonnita mannu baalu tennenni egennannoˈne.” (Yoh. 13:35) Konnira, ateneeto togo yite xaˈmi: “Yesuusi lawishsha harunse roduuwu ledo keerunni heeˈrate wolqaˈya assitu geya sharramanni noommo?”

12. Yesuusi jaalla ikkate assa hasiissannonkehu sayikki coyi maati? Hatto assa dandiineemmohu hiittoonniiti?

¹² (3) Kiristoosi roduuwa kaaˈle. Yesuusi buurantino roduuwisira assineemmore isira assinoommohu gede assa laˈˈanno. (Mat. 25:34-40) Buurantinore kaaˈlineemmoti qara doogo Yesuusi Maganu Mangisteha dancha duduwo dudumbammoranna manna rosaano assinammora uyinonke looso woˈma giddonkenni loosate. (Mat. 28:19, 20; Soq. 10:42) Kiristoosi roduuwi xaa yannara alame woˈmate loonsanni heeˈnoonniha sabbakate looso umo fushsha dandiitannohu “wolu geˈreewi” kaaˈlinsaro callaati. (Yoh. 10:16) Ati wolu geˈreewi widootiro, konne looso loositto kiiro buurantinore calla ikkikkinni Yesuusano baxattota leellishshanni nootto.

13. Luqaasi 16:9 noota Yesuusi amaalino amaale harunsa dandiineemmohu hiittoonniiti?

¹³ Yihowanna Yesuusi jaalla ikkinoommota leellisha dandiineemmoti wole doogo insa loosiissanni noo looso woxunni kaaˈlate. (Luqaasi 16:9 nabbawi.) Lawishshaho, alamete doyichora loonsanni heeˈnoonni looso woxunni kaaˈla dandiineemmo; roduuwu fushshitanno woxinni xeertote qooxeessira sabbakate looso loosate, Yihowa magansiˈnanni minna minatenna gatamarate hattono dano iillitinonsa roduuwa kaaˈlate horoonsiˈnanni. Qoleno, songote hasiisannorira woxe fushshine kaaˈlanna kaaˈlo hasiissannonsa roduuwi nooha ikkiro kaaˈla dandiineemmo. (Law. 19:17) Tenne doogganni Kiristoosi roduuwa kaaˈlineemmo.

14. Efesooni Sokka 4:15, 16 kultanno garinni Yesuusi jaalla ikkate assa hasiissannonkehu shoolki coyi maati?

¹⁴ (4) Dirijjite assitannore kaaˈle. Towaattankera shoomantinori ledo kaaˈlamme songote umo ikkinohu Yesuusi ledo noonke jaalooma kaajjishiˈra dandiineemmo. (Efesooni Sokka 4:15, 16 nabbawi.) Lawishshaho, xaa yannara noonketa Gambooshshu Addaraashuwa danchu garinni horoonsiˈrate woˈnaallanni heeˈnoommo. Hakko daafira, mite songuwa wole songuwa ledo mitte ikkitanno gede assinoonni hattono soqqanshote qoqqowo hakko garinni biddi assinoonni. Tini qixxaawo dirijjite fushshitannoha lowo woxe gatissino. Konninni kainohunni mite halashshaanora haaro songonna soqqanshote qoqqowo  rosa hasiissinonsa. Kuri ammanantino halashshaano albi songo giddo lowo diro soqqantinorenna roduuwu ledo lubbora jaaloontinore ikkitara dandiitanno. Xa kayinni wole songora soqqantanno gede assinoonninsa. Yesuusi, kuri ammanamino Kiristaani maahoyye yee hajajamanna laˈˈanno woyite lowo geeshsha hagiidhannoti dihuluullissannote.

15. Albillitte Yesuusi ledo lubbora jaalooma dandiineemmohu hiittoonniiti?

¹⁵ Qullaawu ayyaaninni buurantinorira iima Yesuusi ledo hegerera heeˈrate hexxo noonsa; insa Maganu Mangiste ragidhe ledosi gashshitanno. Insa Kiristoosi ledo heedhanno, hasaabbanno hattono ledosi yanna sayissanno. (Yoh. 14:2, 3) Yesuusi uullate aana heeˈrate hexxo noonsareno baxanno hattono towaatannonsa. Insa Yesuusa laˈannokkiha ikkirono, hagiidhitanni hegere heeshsho heedhanno daafira isi ledo lubbora jaalooma dandiitanno.—Isa. 9:6, 7.

16. Yesuusi jaalla ikkankenni mayi atoote afiˈneemmo?

¹⁶ Yesuusi koyishsha adhine isi jaalla ikkinummoro lowo atoote afiˈneemmo. Lawishshaho, xaa yannara nafa isi baxillinni lowo atootenna kaaˈlo afiˈnanni heeˈnoommo. Qoleno, albillitte hegere heeshsho heeˈrate hexxo noonke. Baalunkunni roore Yesuusi jaalla ikkanke Annisi ledo lubbora jaaloommeemmo gede kaaˈlitannonke; tini baalanta roore jirooti. Yesuusi jaalla ikkanke lowo ayirrinyeeti!