1-2. Yesuusi Yohaannisi 4:35, 36 noo hedo coyiˈrinohu mayyaate hede ikkara dandaanno?

YESUUSI gidu irshi giddoonni hige saˈˈanni no; kuni gidi xaalla mure noo hayixe ikkikkinni digatino. (Yoh. 4:3-6) Gidi shoolu agani gedensaanni midote iillanno. Yesuusi “illeˈnenni laˈe! gidu laalino; gamba assateno iillino” yiita rosaanosi dhagge assidhinoha ikkara dandaanno. (Yohaannisi 4:35, 36 nabbawi.) Yesuusi hatto yaasi mayyaate?

² Yesuusi lawishshu yaattonni manna gamba assate daafira coyiˈranni nooha ikkikkinni digatino. Hanni hakkuyira albaanni ikkinore laˈno. Yihudu manni Samaariyu manna giwannoha ikkirono, Yesuusi kayinni Samaariyu manchora farciˈrino; iseno ammante adhitino. Isinni Yesuusi ‘gidu gamba assate iillino’ yii yannara batinyu Samaariyu manni isiwa daanni no; kuni manni Samaariyu manchowiinni Yesuusire macciishshe isiwiinni lede rosa hasiˈrino. (Yoh. 4:9, 39-42) Mittu Qullaawu Maxaafi egennaami kuni “rosate quqquxamino manni midote iillino gidi gedeeti” yiino.

3. Manna Yesuusi laˈˈanno garinni laˈˈaˈne sabbakate loosinni dancha guma afiˈrate kaaˈlitannoˈnehu hiittoonniiti?

³ Dancha duduwo sabbakkinanni mannira nooˈne lao hiittoote? Insa midote iillino gidi gede assitine laˈinanni? Hatto assaˈne sase horo afidhino. Umihunni, wiinamunni sabbakkinanni. Midote yanna harancho ikkitinohura konne looso ranke loosa hasiissanno. Layinkihunni, mannu dancha duduwo macciishshe adhanna laˈinanni woyite hagiidhitinanni. Qullaawu Maxaafi midote yannara mannu ‘hagiidhannota’ kulanno. (Isa. 9:3) Sayikkihunni, mittu mittunku manchi albillitte Yesuusi rosaancho ikkara dandaanno  yitine heddinanni daafira, insa roore macciishshate quqquxantanno garinni hasaawisate woˈnaaltinanni.

4. Konni birxichira soqqamaasinchu Phaawuloosi daafira maa ronseemmo?

⁴ Mite Yesuusi rosaano Samaariyu manni Kiristaana diˈˈikkanno yite heddinoha ikkara dandaanno; Yesuusi kayinni hatto yee dihedino. Hatteentenni isi insa albillitte rosaano ikkitanno yee hedino. Ninkeno, soqqanshote qoqqowinkera heeˈranno manna albillitte Kiristoosi rosaano ikkitara dandiitanno yine heda hasiissannonke. Soqqamaasinchu Phaawuloosi dancha lawishsha ikkinonke. Isi lawishshinni maa ronseemmo? Isi (1) sabbakanno manni ammanannore afate woˈnaalanno; (2) hasattonsa maatiro wodanchate sharramanno; hattono (3) albillitte Yesuusi rosaano ikkitara dandiitanno yee hedanno. Konni birxichira isi lawishsha harunsine ninkeno hatto assa dandiineemmo gara ronseemmo.

5. Phaawuloosira xaadu mine sabbaka shota ikkitinosihu mayiraati?

⁵ Phaawuloosi duucha woyite Ayihudennihu xaadu mine sabbakanno. Lawishshaho, Phaawuloosi Teselonqe katamira noohu xaadu mine ‘sase Fooliishshote Barra mannaho Qullaawa Borronni’ qummi assanni rosiisino. (Soq. 17:1, 2) Phaawuloosi Yihudicha ikkino daafira, xaadu mine sabbaka roore shota ikkitinosiha ikkara dandaanno. (Soq. 26:4, 5) Isi Yihudu manni ammanannore seekke afino daafira insara huluullamikkinni sabbakino.—Fil. 3:4, 5.

6. Phaawuloosi Ateensi dikkote sabbakino manni xaadu mine sabbakino manniwiinni baxxannohu mayinniiti?

⁶ Phaawuloosi dartu iilleennasi Teselonqenninna Beeriyunni fulihu gedensaanni, Ateensi haˈrino. Isi hatte yannarano “xaadu mine afi Ayihudootinna Magano waajjitanno daga ledo” hasaawino. (Soq. 17:17) Isi dikkote sabbaki yannara kayinni baxxitino ammana noonsa manninni xaadino. Phaawuloosi sabbakkino sokka “haaro roso” ikkitinonsari giddo mitu hayyoolletenna Ayihude ikkitinokkireeti. Insa “gamu coyi ati yaattohu ninkera haaroho” yitino.—Soq. 17:18-20.

7. Soqqamaasinete Looso 17:22, 23 kultanno garinni Phaawuloosi sabbakanno gara biddi assiˈrinohu hiittoonniiti?

⁷ Soqqamaasinete Looso 17:22, 23 nabbawi. Phaawuloosi Ateensi xaadinohu Yihudu wido ikkinokki mannira sabbakinohu xaadu mine Yihudu mannira sabbakino garinni diˈˈikkino. Isi isonooto ‘Ateensi manni ammanannori maati?’ yee xaˈminoha ikkara dandaanno. Isi qooxeessaho noo coyenna ammaˈnote bude seekke wodanchino. Hakkiinni insa ammantannoha Qullaawo Borro ledo sumuu yaannore  afiˈrate woˈnaalino. Mittu Qullaawu Maxaafi egennaami togo yiino: “Phaawuloosi Yihudu ammaˈnonni dayino Kiristaancho ikkino daafira, Kiristaanunna Ayihude ‘halaalaancho’ Magano yite magansidhannoha, kaphu magano magansidhanno Giriike magansidhannokkita huwatino; ikkirono isi sabbakanno Magani Ateensi mannira haaro ikkinokkita kulate woˈnaalino.” Phaawuloosi baalunku mannira hasattonsa kakkayisanno garinni sabbakanno. Isi Ateensi mannira sabbakanno sokka insa “Anfoonnikki Magano” yite magansidhannohunnita ikkitinota kulinonsa. Ayihudete wido ikkinokki mannira Qullaawa Borroti gari egenno noonsakkiha ikkirono, Phaawuloosi hexxo mudhe insara sabbaka diagurino. Hatteentenni isi insa midote iillino gidi gede asse laino daafira, insara dancha duduwo hasattonsa kakkayisanno garinni kulate woˈnaalino.

8. (a) Qoqqowiˈnera heeˈranno manni ammanannore wodancha dandiitinannihu hiittoonniiti? (b) Mittu manchi ammaˈno noosita kuliˈnero mayitine qola dandiitinanni?

⁸ Phaawuloosi gede xiinxalloota ikke. Qoqqowiˈnera heeˈranno manni maa ammanannoro leellishannore seekkitine laˈe. Qaete anni mineho suxxinori woy gaˈninori maati? Manchu suˈmi, uddanosi, seesino gari, wole agurina coyiˈranno gari nafa ammanannore leellishara dandaanno. Woy hasaawissinanni manchi ammaˈno noosita kulaˈnera dandaanno. Filutura yinanniti baxxitino suwisaancho togoori tuncu yaannose woyite “Atewa dawoommahu giddeesse ane ammaˈnowa qolammahera diˈˈikkino; hatteentenni tenne hajo daafira hasaambammoraati . . . ” yitanno.

9. Ammaˈno noosi mancho hasaawissinanni woyite sumuu yitinanni hedo afiˈra dandiitinannihu hiittoonniiti?

⁹ Ammaˈno noosi manchi ledo hiittee hajo kayissine hasaawa dandiitinanni? Sumuu yitinanni hedo afiˈrate woˈnaalle. Hasaawissinanni heedhinoonni manchi halaalaanchu Magani mitto calla ikkinota, mannu ooso gatisaanchi Yesuusa ikkinota, hattono tini busha alame muli yannara baˈannota ammanannoha ikkara dandaanno. Sumuu yitinanni hedo kaima assidhine Qullaawu Maxaafi sokka manchu hasatto kakkayisanno garinni kullesi.

10. Maa assate woˈnaala hasiissannonke? Mayira?

¹⁰ Mannu ammaˈnote rosiisaano kultannonsare mitto mittonka coye ammananno yaa diˈˈikkino. Hakko daafira, mittu manchi ammaˈno buuxxinihu gedensaanni nafa manchu mayyee ammanannoro huwatate woˈnaalle. Deevidi yinannihu Awustiraaliyaho heeˈrannohu baxxino suwisaanchi “xaa yannara batinyu manni ammaˈnote roso mannu hayyo ledo karse rosiisanno” yiino. Albaaniyaho heedhannoti Donaalta yinanni rodoo togo yitino: “Hasaawinseemmo manni giddo mitu uminke ammaˈno noonke yaanno; ikkollana, insa gedensoonni Maganu noota ammanannokkita coyiˈranno.” Mittu Arjentiinaho misiyoone ikke soqqamanno  rodii mitu manni Sillaase ammanannota coyiˈrannoha ikkirono, Annu, Beettunna qullaawu ayyaani mitto Maganooti yee ammanannokkita wodanchino. Isi togo yiino: “Tenne afanke hattoo manna hasaawinseemmo woyite sumuu yitanno hedo afiˈra roore shota ikkitannonke.” Hakko daafira mannu addinta maa ammanannoro afate woˈnaalle. Hatto assitiniro, Phaawuloosi gede “baalunku mannira baalankare” ikka dandiitinanni.—1 Qor. 9:19-23.

11. Soqqamaasinete Looso 14:14-17 kultanno garinni Phaawuloosi Lisxiraho heeˈranno mannira hasattonsa kakkayisanno garinni sabbakinohu hiittoonniiti?

¹¹ Soqqamaasinete Looso 14:14-17 nabbawi. Phaawuloosi hasaawisanno manni hasatto wodanche hasaawisanno gara biddi assiˈrino. Lawishshaho, isi Lisxiraho hasaawisinohu lowo manni gariti Qullaawa Borro egenno dinoonsareeti. Hakko daafira Phaawuloosi insa ammansiisate insa huwata dandiitannore horoonsiˈrino. Isi misino gide mixxatenna hagiirre afiˈrate daafira coyiˈrino. Phaawuloosi hasaawisanni noo manni wodancha dandaanno qaallanna lawishshuwa horoonsiˈrino.

12. Hasaawisatto manchi hasatto wodanchanna hasaawisatto gara biddi assiˈra dandaattohu hiittoonniiti?

¹² Qoqqowiˈnera heeˈranno manni hasatto wodanchitine hasaawissinanni gara biddi assidhe. Ikkina, mitto mancho hasaawissinara woy minisira eˈinara albaanni maa hasaawa baxannoro afa dandiitinannihu hiittoonniiti? Xiinxalloota ikka hasiissannoˈne. Manchu uulla loosiˈranni, maxaafa nabbawanni, mine gatamadhanni woy wolere assiˈranni nooha ikkara dandaanno. Dandaamannoha ikkiro, assiˈranni noo coye kayissine hasaawisa dandiitinanni. (Yoh. 4:7) Manchu uddiˈrino uddano ayimmasi yaano gobbasi, loosanno looso woy baxannota ispoortete gaamo leellishshannota ikkitara dandiitanno. Gusitawo yinanni rodii togo yiino: “Mittu egennamino sirbaanchi misile aanaho noo kanateera uddiˈrinoha 19 diri wedellicha hasaawisoommo. Hatte misile daafira xaˈmummota hakko sirbaancho baxannohu mayiraatiro kulinoe. Kuni hasaawi Qullaawa Maxaafa xiinxalliseemmo faro faninoe; xa isi Yihowa Farciˈraasincho ikkino.”

13. Mannu Qullaawa Maxaafa xiinxallara koyissinanni woyite, hasattonsa kakkayisanno garinni koyisate ma assa dandiitinanni?

 ¹³ Mittu manchi Qullaawa Maxaafa xiinxallara koyissinanni woyite, hasattosi kakkayisanno garinni koyisse; hattono Qullaawa Maxaafa xiinxalla kaaˈlitannosi gara kulle. (Yoh. 4:13-15) Lawishshaho, Popii yinanni rodoo, mitte hasatto noose mancho minisera eˈanno gede koyissinose. Popii, mancho rosu daafira xiinxallitino pirofeeseritte ikkitinota leellishannoha tajete woraqata mine gaˈnitinota wodanchitino; hakkiinni ise ninkeno, Qullaawu Maxaafi pirogiraamenna gambooshshu widoonni manna rosiinseemmo yite kultino. Tini mancho Qullaawa Maxaafa xiinxallate sumuu yitino; ise layinki barra gambooshshe hadhino; hattono hakkuyi gedensaanni woradu gambooshshe hadhino. Ise mittu diri gedensaanni cuuantino. Kiˈneneeto togo yitine xaˈme: ‘Wirro mare hasaawiseemmo manni hasatto maati? Qullaawa Maxaafa xiinxallitara koyiseemmo woyite hasattonsa kakkayisanno garinni koyiseemmo?’

14. Mitto mittonka rosaancho xiinxallisatto woyite xiinxallisatto gara biddi assiˈra dandaattohu hiittoonniiti?

¹⁴ Qullaawa Maxaafa xiinxallisa hanafittohu gedensaanni, mitto mittonka rosaancho xiinxallisattora albaanni rosaanchu lophino garanna hasattosi maatiro heddanni seekkite qixxaawi. Qixxaawatto woyite, nabbawatto qummeeshshuwa, leellishatto viidiyubbanna Qullaawu Maxaafi halaale xawisate horoonsiˈratto lawishshuwa doori. Ateneeto ‘Kuni rosaanchi loosoho kakkaˈˈanno gede assannosiri maati?’ yite xaˈmi. (Law. 16:23) Filoora yinanni suwisaancho xiinxallissannoti mitte Albaaniyaho heedhanno mancho “Reyino manni kaˈˈannota horo diammaneemma” yite kultinose. Filoora mancho tenne ammantanno gede digiddeessitino. Ise togo yitino: “Balaxxe mancho kaote daafira hexxo uyino Magani daafira afa hasiissannose yee hedoomma.” Filoora hatte yannanni kayisse xiinxallissanno woyite Yihowa baxilli, hayyosinna wolqasi daafira luphi assite kultanno. Hatti mancho xa worba rodoo ikkitino.

15. Soqqamaasinete Looso 17:16-18 kultanno garinni Phaawuloosi Ateensi maricho lae caaccaawino? Ikkirono, isi hexxo mudhe insara sabbaka agurinokkihu mayiraati?

¹⁵ Soqqamaasinete Looso 17:16-18 nabbawi. Phaawuloosi Ateensi katamira kaphu maganna, foorrenna kaphu maganna magansiˈranno manni rosiisanno hayyo batidhinoha ikkirono, insara sabbaka diagurino; qoleno, insa xontusirono hexxo dimudhino. Phaawuloosi umisi alba Magano ‘xonannohanna’ Kiristaanaho darte iillishannoha ikkirono, Kiristaancho ikka dandiino. (1 Xim. 1:13) Yesuusi iso albillitte Kiristaancho ikkara dandaanno hedinte gede, Phaawuloosino Ateensi manni albillitte Kiristaana ikkara dandaanno yee hedino. Isi hatto yee hedasi garankolla!—Soq. 9:13-15; 17:34.

16-17. Baalunku gari manni Kiristoosi rosaano ikka dandaannota leellishannori maati? Lawishsha kuli?

¹⁶ Umi xibbi diro baalunku gari manni Kiristoosi rosaano ikkino. Phaawuloosi Giriikete katamira Qorontoosi heeˈranno Kiristaanira sokka borreessi woyite, mite songote miilla alba jaddo loossannorenna maaeela heeshsho heedhanore ikkitinota coyiˈrino. Hakkiinni isi lede togo yiino: “Kunni albaanni kiˈne giddonni mitu mitu hattooreeti. Ikkollana, qullaawoota ikkitinoonni.” (1 Qor. 6:9-11) Kiˈne ikkitinoommero, hakku manni soorrame Kiristoosi rosaano ikkanno yitine heddinanni?

¹⁷ Xaa yannara batinyu manni Kiristoosi rosaano ikkate yee biddi assiˈra hasiissannonsare biddi assiˈrino. Lawishshaho, Awustiraaliyaho heedhannoti Yukiina yinanniti baxxitino suwisaancho baalunku gari manni Qullaawu Maxaafi sokka ammane adha dandaannota huwattino. Mitte biirowa halaˈlado uddano uddidhinotenna biso naqqasidhinote wedellitte beettonni xaaddino. Yukiina togo yitino: “Umi qara hobbi  ruxxi yoomma; gedensoonni kayinni hasaawisa hanafumma. Hakkiinni Qullaawa Maxaafa rosate hasatto noosetanna ise Faarsote maxaafi giddonni mite qummeeshshuwa naqqasidhinota huwatoomma.” Hatti beetto, Qullaawa Maxaafa xiinxallanna gambooshshe haˈra hanaffino. *

18. Mannaho yoo yaa hasiissannonkekkihu mayiraati?

¹⁸ Yesuusi sabbakanno manna midote iillino gidi gede asse lainohu batinyu manni rosaanoˈya ikkanno yee hedeetini? Deeˈni. Qullaawa Borro giddo Yesuusa ammanannohu boode manna calla ikkinota masaalloonni. (Yoh. 12:37, 38) Yesuusi maalaletenni mannu wodanita afa dandaanno. (Mat. 9:4) Yesuusi iso ammanannoha boode manna illachishinoha ikkirono, baalunku mannira diinaggaawe sabbakino. Manni wodanita afa dandiineemmokkiri ninke isinni hakkiinni roorsine sabbakanna qoqqowinkera heeˈranno mannira yoo yineemmokki gede qoropha hasiissannonke. Hatteentenni mannu albillitte Kiristoosi rosaano ikkara dandaanno yine heda hasiissannonke. Burkinafaaso misiyoone ikke soqqamannohu Maarki yinanni rodii togo yiino: “Duucha woyite ayyaanaamittetenni lophanno yee hedoommo manni xiinxalla nafa aguranno. Hakkeeshshi geeshsha dilophanno yee hedoommo manni kayinni dancha gede lophannota huwatoommo. Hakko daafira, Yihowa ayyaani massagankera wodha woyyitannota huwatoommo.”

19. Qoqqowinkera noo manna ma garinni laˈˈa hasiissannonke?

¹⁹ Umi qara qoqqowinkera midote iillino gidi gedeehu woy Maganu Mangiste sokka macciishshe adhannohu lowo manni dino yitine heddinara dandiitinanni. Kayinni Yesuusi rosaanosira yiinota qaagge. Gidu laalino; gamba assateno iillino. Mannu woyyaawe Kiristoosi rosaano ikkara dandaanno. Yihowa albillitte rosaano ikkara dandaanno manna muxxe “jiro” gede asse laˈˈanno. (Hag. 2:7) Manna Yihowanna Yesuusi laˈanno garinni laˈneemmoha ikkiro, lophino garanna hasattonsa afate woˈnaalleemmo. Hatto assineemmoha ikkiro, insa anfoommokki manni gede assine dilaˈneemmo; hatteentenni albillitte roduuwanke ikkitara dandiitanno yine hendeemmo.