1, 2. Heeshshoˈne giddo harunsitinanni mixo fushshidhinanni woyite, Kalaqaanchiˈne yaannoˈnere macciishsha hasiissannoˈnehu mayiraati? (Hanafote noo misilla lai.)

ATI wedellichahoro, albillittete heeshshokki daafira batinye amaale uyinoonniheha ikkara dandaanno. Rosiisaano, rosu mini amaalaano, woy wolu manni kaffi yiino roso rosatto gedenna lowo woxe baantanni looso amadatto gede jawaachishshahera dandiitanno. Yihowa kayinni kawiinni baxxinore assattora amaalannohe. Isi jawaattine rossine looso afidhine umoˈne dandiitinara hasiˈrannoti egennantinote. (Qol. 3:23) Ikkollana heeshshoˈne giddo balaxisiissinanni coyibba doodhitinanni woyite, isi fushshino biddishsha harunsitinara hasiˈranno; kuni biddishshi tenne goofimarchu yannara iso hagiirsiisanno garinni heedhinanni gede kaaˈlannoˈne.—Mat. 24:14.

² Yihowa baalankare afinota qaaga hasiissannonke; isi tini heeˈnoommo alame albillitte ma ikkitannoronna baose gambissinota afino. (Isa. 46:10; Mat. 24:3, 36) Qoleno isi ninke daafira seekke afino; hattono addu hagiirrenna harshammo aannonkerinna  dadillenna yaaddo abbannonkeri maatiro afino. Konnira mannu aannonke amaale gara labbunkero nafa, Maganu Qaali aana xintantinota ikka hooggu geeshsha hatti amaale hayyonnite yaa didandiinanni.—Law. 19:21.

3, 4. Addaaminna Heewani busha amaale macciishshansa insa umonsano ikko sirchonsa gawajjitinohu hiittoonniiti?

³ Umo mannu oosora busha amaale amaalinohu Sheexaaneho. Sheexaanu eessannosikkiwa eˈˈe, umosi amaalaancho asse shoome Heewani amaalino; isenna minaannise uminsa doogonni heeˈriro hagiirraamma ikkannota kulinose. (Kal. 3:1-6) Ikkollana Sheexaanu hatto assinohu insara shete ikkikkinni umisira yeeti. Sheexaanu Addaaminna Heewanino ikko albillitte ilantanno oosonsa, Yihowa agurte iso magansidhannonna isira gashshantanno gede hasiˈrino. Sheexaanu insara maa assinonsa? Noonsare baala uyinonsahu Yihowaati; Yihowa insara galte, biifado qaenna hegerera heedhannota guuta billiite uyinonsa.

⁴ Addaaminna Heewani kayinni Maganoho hajajama gibbe isi ledo noonsa aante huˈnitino. Anfummonte gede, tini lowo coye daaffino. Tayinsoonni awawi gede, insa gale hose geedhe reyino. Oosonsano cubbu guma mixxa hanaffino. (Rom. 5:12) Yannankerano batinyu manni Maganoho hajajama giwino. Insa uminsa doogonni heeˈra hasidhanno. (Efe. 2:1-3) Hatto assansa abbitino gumi “Mannu egenno, . . . Kaaliiqi yiinore ittisa” dandiitannokkita leellishshanno.—Law. 21:30.

5. Maganu mannu ooso lainohunni maa addaxxanno? Hatto assasi garaho yineemmohu mayiraati?

⁵ Yihowa mannu ooso mereerinni isi daafira rosanna isira soqqama hasiˈranno manni heeˈrannota afino; togoo manni giddo batinyu wedelli no. (Far. 103:17, 18; 110:3) Togoo wedelli Yihowa albaanni muxxete! Ati insa giddo mittoho? Hatto ikkiro, Maganu hagiirraamo ikkatto gede assannoheha batinye “dancha coye” aanni nooheti egennantinote. (Faarso 103:5 nabbawi; Law. 10:22) Konninni aanchine ronseemmonte gede, kuri ‘dancha coyibba’ giddo mitu ayyaanaamittete sagaleeti, dancha jaallaati, hagiirsiissanno mixootinna addu wolaphooti.

6. Ayyaanaamittete hasattoˈne wonshiˈra hasiissannoˈnehu mayiraati? Yihowa ayyaanaamittete hasattoˈne wonshannohu hiittoonniiti?

⁶ Mannu ooso ayyaanaamittete hasatto noonsare ikkitino daafira, saadatenni baxxitinoreeti; tenne hasatto wonshara dandaannohu Kalaqaanchonsa callaho. (Mat. 4:4) Isi yaannoˈnere macciishshitinanniha ikkiro, wodancha, hayyonna hagiirre afidhinanni. Yesuusi, “Ayyaanaamittete coye goodhinori hagiirraammaho” yiino. (Mat. 5:3, NW) Maganu Qaalisi, hattono “ammanaminohunna wodanaamu borojjichi” widoonni shiqishannonkete falakkinote ayyaanaamittete sagalenni hasattonke wonshanno. (Mat. 24:45, NW) Tini sagale dhaabbannotenna ceeˈmishshannokkite!—Isa. 65:13, 14.

7. Maganu qixxeessannoˈneta ayyaanaamittete sagale sagaˈlaˈne maaho kaaˈlitannoˈne?

⁷ Maganu aannoˈneti ayyaanaamittete sagale albinni roore hayyootanna wodanchitinannire ikkitinanni gede kaaˈlitannoˈne; tini akatta qolte duucha doogonni agarooshshe ikkitannoˈne. (Lawishsha 2:10-14 nabbawi.) Lawishshaho hayyonna wodancha ‘Kalaqaanchu dino’ yaannohanna wole kaphu roso baddine affinanni gede ille fantannoˈne. Qoleno ‘Hagiirraamma assannohu qaru coyi woxehonna maalaamittete jirooti’ yinannite kaphu hedonni agartannoˈne. Hattono hayyonna wodancha busha yortonna gawajjanno rosicho baddine affinanninna gargadhitinanni gede kaaˈlitannoˈne. Konni daafira, Maganu hayyonna wodancha afiˈra, hattono kuri akatta muxxe jiro gede assitine laˈˈa agurtinoonte!  Kuri muxxe akatta heedhuˈnero, Yihowa baxannoˈnetanna woyyino coye halchannoˈneta umiˈne heeshshonni laˈinanni.—Far. 34:8; Isa. 48:17, 18.

8. Xa Maganunniwa shiqqi yaa hasiissannoˈnehu mayiraati? Togo assaˈne albillittete kaaˈlitannoˈnehu hiittoonniiti?

⁸ Muli yannara Maganu Sheexaanu alame uullate gananno; hatte yannara agarooshshe ikkankera dandaannohu Yihowa callaati. Wole agurina afooho wodhineemmore afiˈrate nafa, isi anga laˈˈa hasiissannonkeha ikkara dandaanno! (Imb. 3:2, 12-19) Wedella, iimi Anniˈnewa shiqqi yitinannitinna isira nooˈne ammana kaajjishidhinanni yanna xaati! (2 Phe. 2:9) Hatto assitiniro, baxiri dayirono Daawiti gede “Woˈmanka woyite Kaaliiqa albaˈyaanni nooha afeemmo; qiniiteˈyaanni noo daafira dimaseemmo” yaa dandiitinanni.—Far. 16:8.

9. (a) Yohaannisi 6:44te garinni Yihowa maa assanno? (b) Yihowa Farciˈraasine ikkinonna ikkinokki manchi ledo xaada mayi badooshshe afidhino?

⁹ Yihowa baxillunni kae suwashshu wodani noonsa manna isiwa abbe ayyaanaamittete maatesi miilla assannonsa. (Yohaannisi 6:44 nabbawi.) Yihowa Farciˈraasincho ikkinokki manchi ledo mite yitine xaaddinanni woyite, hakko manchi daafira maa afa dandiitinanni? Suˈmasinna danasi agurranna, garire afa hoogginara dandiitinanni. Yihowa afinonna Iso baxanno manchinni mite yitine xaaddinanni woyite kayinni hatto diˈˈikkino. Hakku manchi lophino gari, budisi, gaˈresi woy gobbasi kiˈnetenni baxxitinota ikkituro nafa, isi daafira batinye coye afa dandiitinanni; isino kiˈne daafira duuchare afa dandaanno!

10, 11. Yihowa daga mitto assannonsari maati? Tini kaaˈlitannonkehu hiittoonniiti?

¹⁰ Lawishshaho coyidhinanni afii babbaxxinoha ikkirono lamunku halaalunniha “xalala qaale” coyidhinanni. (Sof. 3:9, NW) Konnira, Maganu daafira nooˈne lao, harunsitinannihu amanyootu biddishshinna albillittete daafira nooˈne hexxo mitte ikkitinota affinanni. Qoleno tenne afaˈne hakkonne mancho addaxxitinanni gede assitannoˈne. Kuri, mannu ledo geedanno jaalooma kalaqiˈrate xinta ikkitino coyibbaati.

¹¹ Yihowa soqqamaano ikkaˈne baalantenni  roortino jaalla afidhinanni gede assitinoˈneti dihuluullissanote. Insa giddo rooru ledo xaaddine egentinoonnikkiha ikkirono, alamete doyichora batinye jaalla nooˈne! Yihowa soqqamaano agurranna, togoota muxxe elto afiˈrinohu wolu nooni?

12. Hiittenne ayyaanaamittete mixo fushshiˈra dandaatto?

¹² Rosiisaancho 11:9–12:1 nabbawi. Wonshiˈrate heddinoonni mixo nooˈne? Barru baala mito Qullaawu Maxaafi gafa nabbawate mixo fushshidhinoonniha ikkara dandaanno. Woy qole coyiˈratenna rosiisate dandooˈne woyyeessiˈrate sharrantinanni heedhinoonniha ikkara dandaanno. Mixoˈne ikkitutano ikkituro, dancha guma afidhinanni woyite woy wolootu sharrantinanni sharro naaddanno woyite mayi macciishshamannoˈne? Tenne yannara tashshi yaannoˈneti egennantinote! Tennera hagiidhaˈne garankolla; korkaatuno Yesuusi gede umiˈne fajjo ikkikkinni Maganu fajjo balaxisiissinanni heedhinoonni.—Far. 40:8; Law. 27:11.

13. Alamete mixo shorrantenni Maganoho soqqama woyyitannohu mayiraati?

¹³ Ayyaanaamittete mixoˈne wonshiˈrate sharramaˈne harshammo afidhinanni gede assitannoˈne; korkaatuno loossinanni loosi mullawa digatanno. Soqqamaasinchu Phaawuloosi togo yee borreessino: “Roduuwaˈya, Mootichaho soqqantinanni daafurtinoonni daafuri mullawa gatannokkita affinoonnina, Mootichu looso woˈmanka woyite agurtinikkinni kaajjitine loosate hixamanye!” (1 Qor. 15:58) Alamete mixo harunsanna lowo deerra iillate sharrama hagiirsiissannota labburono nafa, togoorira sharrammanni sharro galte hosse mullawa gattanno. (Luq. 9:25) Moote Selemooni heeshsho tennera lawishsha ikkitannonke.—Rom. 15:4.

14. Selemooni hagiirre afiˈrate assinorinni maa rosa dandiitinanni?

¹⁴ Hoqino dureessinna wolqaataamu Moote Selemooni, ‘hagiirru maatiro afatenna isonooto hagiirsiisate’ qodhe kaino. (Ros. 2:1-10) Konnira isi minna miˈnino, kaashshu basenna paarke qixxeessiˈrino, hattono hasiˈrinore baala assino. Hakkiinni isira mayi macciishshamisiyya? Isi hagiirrenna harshammo afiˈrino? Selemooni umisi togo yee coyiˈrino: “Loosoommo loosonna daafuroommo daafuro baala laoommo. Kuni baalunku haafaho; diilallo cuˈmate gedeeti. Kalqete aana lexxinanniri mitturino dino.” (Ros. 2:11) Tennenni kaajja roso ronseemmo! Kiˈne Selemooni xaggenni rossine hayyoota ikkitinoonnita leellishshinanni?

15. Ammana hasiissannohu mayiraati? Faarso 32:8 kultanno garinni ammananke kaajjishiˈra maaho kaaˈlitannonke?

¹⁵ Yihowa qarrantine kaˈine rossinara dihasiˈranno. Maganoho hajajamatenna heeshshoˈne giddo isi fajjo wonshate ammana hasiissannoˈne. Togoo ammana taalle nookkitenna horonta irraaambanni gede assitannota diˈˈikkitino. Ee, Yihowa “leellishshinoonnisi baxille dihawanno.” (Ibi. 6:10) Konni daafira, kaajjado ammana heedhannoˈne gede sharramme; hatto assitiniro, iimi Anniˈne baalunkurinni woyyino coye afidhinara hasiˈrannota wodanchitinanni.—Faarso 32:8 nabbawi.

16. Afiˈnoommo wolapho lowori gede asse laˈˈanna hayyotenni horoonsiˈra hasiissannonkehu mayiraati?

¹⁶ Phaawuloosi “Mootichu ayyaani noowa wolapho no” yee borreessino. (2 Qor. 3:17) Ee, Yihowa wolapho baxanno; kiˈne kalaqinoˈnehuno wolapho baxxinanni gede asseeti. Ikkollana afidhinoonni wolapho garunni horoonsidhinara hasiˈranno; tini qolte agarooshshe ikkitannoˈne. Teeda baˈino misilla laˈannore, maaeela coye assitannore, gawajjitanno ispoorte loossannore  woy jingilli assitanno dhagga adhitannorenna ago quwa sayisse aganno ooso afoottoha ikkara dandaanno. Tini ooso yannate geeshsha hagiirre afidhara dandiitanno. Ikkollana kuri coyibba assite afidhanno hagiirri gale hose qarra abbannonsa; lawishshaho, dhibbunna araado amaddansara woy reyitara dandiitanno. (Gal. 6:7, 8) Kuri ooso wolapho afidhinoha lawinsarono, insaneeto dogganni no.—Tit. 3:3.

17, 18. (a) Maganoho hajajama wolassitannohu hiittoonniiti? (b) Hunda Addaaminna Heewani afiˈrino wolapho xaa yannara mannu oosora noonsa wolapho ledo heewisiisi.

¹⁷ Yihowa biddishshi garinni heeˈra kayinni uminkera kaaˈlitannonke. Hatto assanke fayyimmanna addu wolapho afiˈneemmo gede kaaˈlitannonke. (Far. 19:7-11) Wolaphoˈne hayyotenni horoonsidhinanniha yaano, Maganunnihu guutu seerinni massagantinanniha ikkiro, Maganohono ikko anniˈneranna amaˈnera addaxxinannirenna wolapho lendanniˈnere ikkitinoonnita leellishshinanni. Maganu mannisira guuta wolapho aa hasiˈranno; Qullaawu Maxaafi tenne wolapho “Maganu oosota ayirrinyu wolapho” yee xawisanno.—Rom. 8:21.

¹⁸ Addaaminna Heewani umi qara togoo wolapho afiˈrino. Maganu Edenete kaashshu basera mitto coye calla hoolinonsa. Insa mitte haqqicho laalo calla itannota hoolloonni. (Kal. 2:9, 17) Tini hajajo furro fuuqqo hoˈlitannota ikkitinoni? Diˈˈikkitino! Maganu uyino hajajo furro fuuqqo hoˈlitannota ikkitinokkita huwatate, isi hajajo mannu ooso fushshitinohu kiirre tunqannikki seeri ledo heewisiisa dandiinanni.

19. Wolapho afiˈneemmo gede rosiinsanni heeˈnoonninkehu hiittoonniiti?

¹⁹ Yihowa soqqamaasinesi hayyotenni amadannonsa. Isi kiirre tunqannikki seera aantenni baxillu seerinni heeˈnammora hasiˈranno. Qoleno isi fushshinoha xintu seera harunsinammoranna bushare gimbammora hasiˈranno. (Rom. 12:9) Tennera dancha lawishsha ikkannohu Yesuusi Ilaalu Sibikatesi yannara rosiisino rosooti; Ilaalu Sibikate illachishshannohu cubbo loonsanniwa qole massanno coyi aanaati. (Mat. 5:27, 28) Maganu Mangiste Moote ikkinohu Yesuusi Kiristoosi, keeraanchimmatenna finqillete daafira isira noosi gedee lao heedhannonke gede haaro alamerano rosiisannonke. (Ibi. 1:9) Qoleno surrenkenna bisinke guuta ikkanno gede kaaˈlannonke. Hanni hedi! Haaro alamera cubbunniwa hinge dooˈneemmo gede assitanno hedonnino ikko cubbu abbannohu bushu qarrinni ganteemmo! Hakkiinni Yihowa qaale einonketa “ayirrinyu wolapho” afiˈneemmo.

20. (a) Yihowa wolaphosi horoonsiˈrannohu hiittoonniiti? (b) Maganu lawishshinni maa ronseemmo?

²⁰ Mannu ooso dannu nookki wolapho afiˈra didandiitanno. Wolaphonke Maganohonna mannaho baxillu noonketa leellishanno garinni horoonsiˈra hasiissannonke. Tennera Yihowa isi lawishsha harunsinammora hasiˈranno. Isi dannu nookki wolapho noosiha ikkirono, hedate dandoo noonsa kalaqama baxillunni amadanno. (1 Yoh. 4:7, 8) Konnira, wolaphonke woˈmunni woˈma horoonsiˈnoommo yaa dandiinannihu Maganu baxillinni massagammeemmoha ikkiro callaati.

21. (a) Daawitira Yihowa daafira mayi macciishshaminosi? (b) Aananno birxichira maa ronseemmo?

²¹ Yihowa falakkinota ayyaanaamittete sagale, dancha jaalla, kaajja mixonna addu wolapho afiˈrate hexxo uyinoˈne. Ikkina isi uyinoˈneta ‘dancha coyibba’ naaddinanni? (Far. 103:5) Hatto ikkiro faarsaasinchu Faarso 16:11te huucciˈrino huuccatto ledo sumuu yitinara dandiitinanni; isi togo yiino: “Heeshshote doogo leellishoottoena, ledokki heeˈraˈya hagiirrunni wonshitannoe; qiniitekkiinni heeˈra hegere hagiirre uyitannoe.” Aananno birxichira Faarso 16te noota mite ayyaanaamittete jiro xiinxallineemmo. Tini, addu hagiirri noo heeshsho heeˈra dandiinanni gara ledde huwatatto gede kaaˈlitannohe.