ANNUWAHONNA AMUUWAHO
8: Lawishsha Ikka
HATTO YAA MAYYAATE?
Dancha lawishsha ikkanno anninna ama, oosonsara rosiisanno rosi garinni heeꞌrannoreeti. Lawishshu gedera, mannu gobbaanni heeꞌre woshsheennaꞌne “Mine dino yiiyye” yitinanna oosoꞌne macciishshituro, insa noore coyidhannore ikkitanno yitine heda dihasiissannoꞌne.
“Duuchu manni ‘Ani asseemmore agurte, yeemmore assi’ yaanno. Ooso kayinni hatto yaa didandiinanni. Ooso mulese noore gudisse xuuxxanno ispoonje gede ikkitino daafira, coyiꞌneemmorenna assineemmore baalankare laꞌanno; coyiꞌneemmori assineemmori ledo xaadannokkiha ikkiro, insa tenne affanno.”—Deevidi.
QULLAAWU MAXAAFI BIDDISHSHA: “‘Moortinoonte!’ yite kultanni, ati mayira moorattoyya?”—Roomu Sokka 2:21.
HASIISSANNOHU MAYIRAATI?
Qaaqquulleno ikko wedelloota anninsanna amansa geeshsha hunara woy seekkara dandaannohu wolu manchi dino yaa dandiinanni. Darawonsa nafa annu woy amate geeshsha huntara woy seekkitara didandiitanno. Hatto yaa, rosiissinanni rosi garinni heedhine dancha lawishsha ikkitinanniha ikkiro, oosoꞌne dancha doogo hadhanno gede aye manchinni roore kaaꞌla dandiitinanni yaate.
“Qaaqqinkera mitto coye duucha hinge kullummohu gedensaanni, ‘Isi macciishshanni nookka?’ yine hendammora dandiineemmo; kayi yineemmore ninke assinummokki gantummoro, diassitinoonni yaasi digattanno. Ooso assineemmore laꞌanni nookkiha lawannonke woyite nafa, insa baalankare laꞌanni no.”—Nikooli.
QULLAAWU MAXAAFI BIDDISHSHA: “Gordu egenno . . . awaawurshu [lawisiisa] nookkite.”—Yaiqoobi 3:17.
MAA ASSA DANDIITINANNI?
Kiꞌneneeto layidhe. Laꞌinanni boohaarshi hiittooho? Galteꞌnenna oosoꞌne ma garinni amaxxitinanni? Jaallaꞌne hiittooreeti? Wolootu daafira heddinanni? Haranchunni, kiꞌne oosoꞌne ikkitara halchitinanni manni gedeereeti?
“Minaanniꞌyanna ani, ninke harunsineemmokki biddishsha oosonke harunse diyineemmo.”—Kiristiini.
Soꞌro loossiniro maaro xaꞌmidhe. Oosoꞌne guuntete xeꞌne nooꞌneta affino. Sodhinanni woyite galteꞌne woy oosoꞌne maaro xaꞌmidhinanniha ikkiro, oosoꞌne noore coyiꞌranna insaneeto heeshshi assa hasiissannonsata rossanno.
“Oosonke loonsoommo soꞌro ammanne maaro xaꞌmiꞌnanna laꞌꞌansa lowo geeshsha danchate. Hatto assa hoongummoro, insano soꞌro loossuro maaxa rossanno.”—Roobini.
“Ninke annuwunna amuuwu geeshsha oosonke hunara woy seekkara dandaannohu wolu dino; oosonke danchu garinni quxa dandiineemmoti qara doogo dancha lawishsha ikkate; mayira yiniro insa woꞌmanka woyite assineemmore laꞌanno. Ooso anninsanna amansa heedhanno heeshsho laꞌe, woꞌmanka woyite rossannori no.”—Wendeli.
