1. Halaaleho yinoonniri maati?

 “HALAALE macciishshoottohu hiittoonniiti?” “Lophoottohu halaalu mineeti?” “Halaalu mine mageeshsha keeshshootto?” Ati manna hatto yite xaꞌmite egennoottoha, woy wolootu ate hatto yite xaꞌmitinoheha ikkara dandaanno. Ikkina isi halaaleho yiniri maati? Xaphoomunni, ammanneemmore, magansiꞌneemmonna heeꞌneemmo gara xawisate halaale yaanno qaale horoonsiꞌneemmo. Halaalu mine noo manni, Qullaawu Maxaafi rosiisannore afino, hattono heeshshonsa giddo Qullaawu Maxaafi seera harunsanno. Insa hatto assansanni, kaphu ammaꞌno rosinni keere fultino, qoleno guuntete xeꞌne noonsaha ikkirono hagiirraammaho.—Yoh. 8:32.

2. Yohaannisi 13:34, 35 kultanno garinni, mitootu halaalu minira dagganno gede assannonsari maa ikkara dandaanno?

² Halaalu minira daatto gede assinoheri maati? Yihowa manniha dancha amanyoote laꞌe dawottoha ikkara dandaanno. (1 Phe. 2:12) Woy insa manna baxxanno gara laꞌe ikkara dandaanno. Lowo manni mite yee gambooshshe daanno woyite huwatanno coyi konneeti; insa madirakete rosiinsoonnirinni roore roduuwu leellishshinonsa baxille qaagganno. Yesuusi rosaanosi bande anfannihu mimmitoho noonsa baxillinni ikkinota coyiꞌrino daafira, tini nooreentilla. (Yohaannisi 13:34, 35 nabbawi.) Ikkollana, kaajjado ammana heedhankera hasiꞌnummoro, tennenni calla kassi yaa dihasiissannonke.

3. Ammanankera xintu Maganu manni mereero noo baxille calla ikkiro mayi ma ikkara dandaanno?

³ Ammanankera xintu, Maganu manni mereero noo baxille calla ikka dihasiissannosi. Hatto yineemmohu mayiraati? Korkaatuno togoo ammana shiimurinni baꞌara dandiitanno. Lawishshaho,  mittu songote cimeessi woy suwisaanchi woy wolu rodii cubbo loosiro Yihowara soqqama agurrammora dandiineemmo. Qoleno, mittu rodii koffi assinkero woy kaadaasincho ikke ammanneemmori halaale diꞌꞌikkino yiiro, ninkeno halaalu mininni fullammora dandiineemmo. Magano ammanoottohu isi ledo noohe aantenni ikkikkinni wolootu assitannore calla laꞌe ikkiro, ammanakki kaajjado diꞌꞌikkitino. Konnira, Maganu mine noo hagiirrenna baxille calla laꞌe ammanantenni, Yihowa daafira rosoottori halaale ikkinota buuxiꞌrate seekkite xiinxalli. Qullaawu Maxaafi Yihowa daafira halaale rosiisannota buuxiꞌra hasiissannohe.—Rom. 12:2.

4. Maatewoosi 13:3-6, 20, 21 kultanno garinni, mitootu fonqolu iillannonsa woyite maa ikkitanno?

⁴ Yesuusi, mitu manni halaale ‘hagiidhe adhannoha’ ikkirono, fonqolu iillannonsa woyite kayinni ammanansa muꞌrote gede qoortannota coyiꞌrino. (Maatewoosi 13:3-6, 20, 21 nabbawi.) Insa Yesuusi rosaanora qarru iillannonsata huwattinokkiha ikkara dandaanno. (Mat. 16:24) Woy Kiristaana ikkiniro mittu qarrino nookkiha faffote heeshsho calla heeꞌnanniha lawinonsaha ikkara dandaanno. Ikkollana, heeꞌnoommohu busha alamera ikkino daafira, qarru iillannonke. Heeshshonke gari soorramara dandaanno daafira, mito woyite hagiirrinke baꞌꞌara dandaanno.—Far. 6:6; Ros. 9:11.

5. Batinyu roduuwinke halaale seekkite cuꞌmidhinota leellishshinohu hiittoonniiti?

⁵ Batinyu roduuwinke halaale seekkite cuꞌmidhinota leellishshino. Tenne mayinni anfeemmo? Insa roduuwinsa koffi assitunsarono woy wolootu cubbo loossuro nafa ammanansa dishoshshoggitanno. (Far. 119:165) Insara fonqolu iillinsa kiiro ammanansa roore kaajjitanno ikkinnina dibaꞌanno. (Yai. 1:2-4) Togooti kaajjado ammana heedhannonke gede assiꞌra dandiineemmohu hiittoonniiti?

6. Umi xibbi diri Kiristaani ammana xintantinohu mayi aanaati?

⁶ Umi xibbi diri Kiristaani ammana xintantinohu, Qullaawa Borro egennonna Yesuusi Kiristoosi rosiisinohu halaalunnihu “danchu duduwi” aanaati. (Gal. 2:5) Kuni halaali, Yesuusite wodote kakkalonna kaosi daafira kulanno halaalenna wole Kiristaanu ammananno roso baala xaphi asse amadinoho. Soqqamaasinchu Phaawuloosi kuni rosi halaale ikkinota buuxiꞌrino. Tenne mayinni anfeemmo? Isi, Qullaawa Borronni taje shiqishanni, “Kiristoosi qarramanna reyotennino kaꞌꞌa” hasiissinosita seekke kulino. (Soq. 17:2, 3) Umi xibbi diri Kiristaani konne roso ammane adhino, qoleno Maganu Qaale wodanchate kaaꞌlannonsa gede qullaawa ayyaana addaxxino. Insa kuni rosi Qullaawa Borro aana xintaminoha ikkinota buuxidhino. (Soq. 17:11, 12; Ibi. 5:14) Magano ammantinohu mannisi mereero noo hagiirrenna baxille calla laꞌe diꞌꞌikkino; hattono Yihowara soqqantinohu mannisi ledo gamba yaa hagiirsiissannonsa daafira calla diꞌꞌikkino. Hatteentenni ammanansa xintantinohu, gara ikkitinote “Maganu egenno” aanaati.—Qol. 1:9, 10.

7. Qullaawu Maxaafi halaali aana xintantino ammana kaaꞌlitannonkehu hiittoonniiti?

⁷ Maganu Qaali giddo noo halaali soorramannoha diꞌꞌikkino. (Far. 119:160) Lawishshaho, ammanate rodiinke koffi assinkero woy shota ikkinokki cubbo loosiro Maganu Qaali giddo noo halaali disoorramanno. Buutote qarri iillannonke woyiteno kuni halaali disoorramanno. Konnira, Qullaawu Maxaafi rosiisannore seekkine egennanna kuni rosi halaale ikkinota buuxiꞌra hasiissannonke. Waajjishanno dambali giddo markaawe milli miliqqi yitannokki gede assanno mokkollichi  gede, Qullaawu Maxaafi halaali aana xintantinoti kaajjado ammanano fonqolu iillannonke woyite kaajjine uurrineemmo gede kaaꞌlitannonke. Ikkina cuꞌmiroottohu halaale ikkinota buuxiꞌra dandaattohu hiittoonniiti?

8. Layinki Ximootewoosi 3:14, 15 kultanno garinni, Ximootewoosi ammanannori halaale ikkasi buuxiꞌrinohu hiittoonniiti?

⁸ Ximootewoosi ammanannori halaale ikkinota buuxiꞌrino. Isi hatto assinohu ma garinniiti? (2 Ximootewoosi 3:14, 15 nabbawi.) Isira amasinna ahaahesi umo “Qullaawa Borro” rosiissinosi. Ikkollana isi umisi yanna gaaꞌme hattee borro seekke xiinxallinoti dihuluullissannote. Konninni kainohunni isi Qullaawa Borro ‘halaalinni kaajje heeꞌrino.’ Yannate gedensaanni Ximootewoosi, amasinna ahaahesi Kiristaana ikkino. Ximootewoosi, Yesuusi harunsaano mereero noo baxille lae dhagge assiꞌrinoti dihuluullissannote; qoleno isi ayyaanaamittete roduuwisi ledo gamba yaanna insa kaaꞌla lowo geeshsha hasiꞌrino. (Fil. 2:19, 20) Ikkollana, ammanasi xintantinohu roduuwisira noosi baxilli aana ikkikkinni, Yihowawa shiqanno gede assinosihu Qullaawu Maxaafi halaali aanaati. Atino Qullaawa Maxaafa nabbabbe Yihowa daafira rosoottori halaale ikkasi buuxiꞌra hasiissannohe.

9. Hiikkonne sase xinta ikkino halaale buuxiꞌra hasiissannohe?

⁹ Balaxxe ajayi ajeenna sase xinta ikkino halaale buuxiꞌra hasiissannohe. Umihunni, baalanka coye kalaqinohu Magano Yihowa ikkinota seekkite ammana hasiissannohe. (Ful. 3:14, 15; Ibi. 3:4; Aju. 4:11) Layinkihunni, Qullaawu Maxaafi Maganu ayyaaninni borreessinoonni maxaafa ikkinota buuxiꞌra hasiissannohe. (2 Xim. 3:16, 17) Sayikkihunni, Kiristoosi massagannohu qinaawino garinni Yihowa magansiꞌranno manni nootanna kuni manni Yihowa Farciꞌraasine ikkinota buuxiꞌra hasiissannohe. (Isa. 43:10-12; Yoh. 14:6; Soq. 15:14) Konne sasenka xinta ikkino halaale buuxiꞌrate, Qullaawu Maxaafi kulannore baala affe guda hasiissannohe yaa diꞌꞌikkino. Qara mixokki, hedate  dandookki horoonsidhe ammanattori halaale ikkinota buuxiꞌrate.—Rom. 12:1.

10. Halaale afano agurranna, wolere maa assa hasiissannonke?

¹⁰ Maganunnire hattono Qullaawu Maxaafinna Maganu manni daafira seekkite buuxittohu gedensaanni, Qullaawa Borro horoonsidhe tenne wolootaho kulate qixxaawa hasiissannohe. Mayira? Kiristaana ikkinoommo daafira, ronsoommore mannaho kula hasiissannonke. b (1 Xim. 4:16) Wolootaho Qullaawu Maxaafi halaale kulleemmo woyite, konni halaalira noonke ammana kaajjitanno.

11. Mannaho halaale rosiinseemmo woyite, Phaawuloosi lawishsha harunsa dandiineemmohu hiittoonniiti?

¹¹ Soqqamaasinchu Phaawuloosi manna rosiisi woyite, “Insa [ammansiisate] Muse Seerinna himanaanote borro giddo noo coye kulanni Yesuusire” egensiisinonsa. (Soq. 28:23) Wolootaho halaale rosiinseemmo woyite Phaawuloosi lawishsha harunsa dandiineemmohu hiittoonniiti? Maganu Qaali yaannore kulatenni sainore assa hasiissannonke. Qullaawu Maxaafi rosaanonke Maganu Qaale seekkite xiinxallite Yihowawa shiqqanno gede kaaꞌla hasiissannonke. Insa ninke ayirrissanno daafira calla halaale ammante adhitara ikkikkinni, baxillaanchu Maganinke daafira rossinori halaale ikkasi buuxxe ammantara hasiꞌneemmo.

12-13. Annuwunna amuuwu oosonsa halaalu mine kaajjite heedhanno gede kaaꞌla dandiitannohu hiittoonniiti?

¹² Annuwunna amuuwu oosonsa halaalu mine kaajjite heedhara hasidhannoti egennantinote. Oosoꞌne songote giddo dancha jaalla kalaqidhuro ayyaanaamittetenni lophitanno yitine heddinanniha ikkara dandaanno. Ikkollana, oosoꞌnera dancha jaalla noonsa daafira calla, insa Qullaawu Maxaafinni rossinori halaale ikkasi buuxidhanno yaa diꞌꞌikkino. Oosoꞌne uminsa Maganu ledo jaalooma kalaqiꞌranna Qullaawu Maxaafi rosiisannori halaale ikkasi buuxiꞌra hasiissannonsa.

¹³ Annuwunna amuuwu oosonsara Maganu daafira halaale rosiisate, balaxxe insa uminsa Qullaawa Maxaafa seekkite xiinxallite dancha lawishsha ikka hasiissannonsa. Qoleno rossinore hiinca hasiissannonsa. Tenne assituhu gedensaanni, oosonsano hatto assitanno gede rosiisa dandiitanno. Hattono Qullaawu Maxaafi rosaanonsara assitannonte gede, oosonsano Qullaawa Maxaafa xiinxallate kaaꞌlanno uduunnicho horoonsiꞌra dandiitanno gara rosiisa hasiissannonsa. Hatto assitannoha ikkiro, oosonsa Yihowa baxxanno gedenna isi ayyaanaamittete sagale shiqishate horoonsiꞌrannoha ammanaminohanna wodanaamo borojjicho naaddanno gede kaaꞌlitanno. (Mat. 24:45-47) Annuwunna amuuwu, oosonsara xinta  ikkinoha Qullaawu Maxaafi halaale calla rosiisa dihasiissannonsa. Hatteentenni, dironsanna dandoonsa heddanni Maganunniha hawa gede huwantannikki coye rosiisse ammanansa kaajjitanno gede kaaꞌla hasiissannonsa.—1 Qor. 2:10.

14. Qullaawu Maxaafi masaalo xiinxalla hasiissannonkehu mayiraati? (“ Aante Noo Masaalo Xawisa Dandaatto?” yitanno saaxineno lai.)

¹⁴ Qullaawu Maxaafi masaalo Yihowara noonke ammana kaajjishiꞌrate kaaꞌlitannonke. Ammanakki kaajjishshino masaalo hiittenneeti? “Goofimarchu barruwa daafira kultanno masaalooti” yaattoha ikkara dandaanno. (2 Xim. 3:1-5; Mat. 24:3, 7) Ikkollana, ammanakki kaajjitanno gede assitinoti wole woꞌmite kaꞌino masaalo hiikkuriiti? Lawishshaho, Daanieeli Fooliishsho lamete woy Daanieeli 11 noo masaalo konni albaanni woꞌmitino garanna xa woꞌmitanni noohu hiittoonniitiro xawisa dandaatto? c Ammanakki Qullaawu Maxaafi aana xintantinota ikkituro, mili miliqqi diyitanno. Hanni Layinkihu Alamete Oli yannara Jarmanete buutote darti iillinonsa roduuwinke lawishsha hendo. Insa goofimarchu barruwa daafira kultanno masaalo woꞌmunni woꞌma huwattinokkiha ikkirono, Maganu Qaalira noonsa ammana kaajjadote.

15-17. Naazi gashshooti yannara buutote darti iillinonsa roduuwa, Qullaawa Maxaafa xiinxallansa kaaꞌlitinonsahu hiittoonniiti?

¹⁵ Jarmanete Naazi gashshooti yannara, kumunni kiirranni roduuwanke usuranyu kaampe eessinoonni. Hitilerinna miilisi Heniriki Himileri Yihowa Farciꞌraasine effidhe gibbanno. Mitte rodoo yitino garinni Himileri usuranyu kaampera nooha meya roduuwa togo yiinonsa: “Yihowa yitinannihu iima gashshe nooha ikkara dandaanno; uulla gashshinoommori kayinni ninkeeti! Gendeemmori ninkeetironna kiꞌneetiro leellinsheemmoꞌnena!” Ikkina Yihowa manni kaajje heeꞌranno gede kaaꞌlinonsari maati?

¹⁶ Kuri Qullaawu Maxaafi rosaano, Maganu Mangiste 1914nni gashsha hanaffinota  affino. Insara buutote darti iillinsata coyi hedeweelcho diꞌꞌikkinonsa. Yihowa soqqamaasine, mannu gashshooti Maganu hedinore ittisa dandaannokkita woꞌmunni woꞌma huwattino. Hitileri Magano magansidhannore feye hunano ikko, Maganu Mangiste ledo taalamanno gashshoote xinta didandiino. Roduuwinke, gale hose Hitileri gashshooti baꞌꞌannota affino.

¹⁷ Kuri roduuwi ammantannori haafare diꞌꞌikkino. Mulenni Naazi gashshooti baino; qoleno “Uulla gashshinoommori ninkeeti” yiinohu Heniriki Himilerino lubbosi adhe xooqino. Isi xooqe marinowa alba usuru mine afinoha Rodoo Lubiki xaadino. Himiliri qeelaminoti leelteennasi, “Koo Qullaawu Maxaafi rosaanchi, xa mayi ikkanno yaatto?” yee xaꞌmino. Roduu Lubiki, Yihowa Farciꞌraasine Naazi gashshooti baꞌꞌannotanna insa Maganu gatisannonsata albanni affinota kulinosi. Bashsho Yihowa Farciꞌraasine daafira totaꞌꞌannohu Himileri, xa kayinni bolli yee gatino. Mulenni Himileri isonooto shiino. Tenne xaggenni maa ronseemmo? Qullaawu Maxaafi masaalonna wole Maganu Qaali giddo noo roso seekke xiinxallanke, Maganoho noonke ammana kaajjishiꞌratenna qarru iillannonke woyite waajjineemmokki gede kaaꞌlitannonke.—2 Phe. 1:19-21.

18. Yohaannisi 6:67, 68 kultanno garinni, “halaalu egennonna woꞌma wodancha” afiꞌrate sharrama hasiissannonkehu mayiraati?

¹⁸ Ninke mittu mittunku addu Kiristaana bande anfanni gede assanno baxille leellisha hasiissannonke. Ikkollana, “halaalu egennonna woꞌma wodancha” afiꞌra hasiissannonke. (Fil. 1:9) Hatto assa hoongummoro, ‘mannu awaawurshinna soꞌrote bubbe,’ lawishshaho kaadaasinete rosi gatantarsankera dandaanno. (Efe. 4:14) Umi xibbi diro lowo rosaano Yesuusa harunsa agurtuta, soqqamaasinchu Pheexiroosi kayinni Yesuusira “hegere heeshsho qaali” noosita ammanannota coyiꞌrino. (Yohaannisi 6:67, 68 nabbawi.) Hatte yannara Pheexiroosi Yesuusi coyiꞌrinore woꞌmunni woꞌma huwatinokkiha ikkirono, Kiristoosi daafira halaale buuxino daafira ammaname heeꞌrino. Atino Qullaawu Maxaafi halaalira noohe ammana kaajjishiꞌra dandaatto. Hatto assittoro, aye geeshshi qarri iilliherono ammanakki kaajjite heedhanno, hattono wolootu ammana jawaattanno gede kaaꞌla dandaatto.—2 Yoh. 1, 2.