1. Filiphisiyusi Sokka 2:3 kultanno garinni, umonke heeshshi assa wolootu ledo dancha aante heedhannonke gede kaaꞌlitannonkehu hiittoonniiti?

 WOꞌMANKA woyite ninkera seekkannota afinohu Yihowa ikkino daafira, umonke heeshshi assine isira maahoyye yine gala hasiissannonke. (Efe. 4:22-24) Umonke heeshshi assineemmoha ikkiro ninke hasatto agurre Yihowa fajjo balaxisiinseemmo, hattono wolootu ninke roortannota ammanneemmo. Tini, Yihowanna ammanate roduuwinke ledo dancha aante heedhannonke gede kaaꞌlitannonke.—Filiphisiyusi Sokka 2:3 nabbawi.

2. Soqqamaasinchu Phaawuloosi maa huwatino? Konni birxichira maa ronseemmo?

² Ikkollana, qoropha hoongummoro, Sheexaanu alamera noohu naaxxaleessunna umonsa calla baxanno manni hunankera dandaanno. b Umi xibbi diri Kiristaanirano togoori tuncu yiinsakki digatino; konnira soqqamaasinchu Phaawuloosi Roomu Kiristaanira togo yee borreessino: “Mitti mittiꞌne Maganu uyinoꞌne ammaꞌna bikkinni umoꞌne heeshshi assitine laꞌe ikkinnina, hasiisannohura aleenni heddinanni booꞌnitinannikki gede uyinoonnie eltonni seejjeemmoꞌne.” (Rom. 12:3) Phaawuloosi, ninkeneetira heda soꞌro ikkitinokkita afino. Ikkollana, umonke heeshshi assineemmore ikkinummoro, ninkeneetira quwa saꞌne dihendeemmo. Konni birxichira, (1) adhamanke giddo, (2) Yihowa dirijjite giddo qoosso uyinanninke woyitenna (3) dagoomittete  webisayite horoonsiꞌneemmo woyite umo heeshshi assa ninkeneetira quwa saꞌne hendeemmokki gede kaaꞌlitannonke gara ronseemmo.

3. Minaanninna minaamara coyi kawa kaꞌaa higansara dandaannohu mayiraati? Mitootu togoo qarri kalaqamanno woyite maa assitanno?

³ Yihowa minaanninna minaama hagiirraamma ikke heeꞌrara hasiꞌranno. Ikkollana, guutu manchi nookki daafira, mereeronsa coyi kawa kaꞌaa higara dandaanno. Isinni, Phaawuloosi adhantannore qarru amadannonsata borreessino. (1 Qor. 7:28) Mitootu galtensa ledo hashsha barra kanca yitanno daafira, ate adhummohu barri bao, woy atera assiꞌrummahu barri bao yitanno. Togoo minaanninna minaama alame ikkitaata ikkituro, muddante adhamanke diingummoro woyyanno yite heddara dandiitanno. Insa uminsa injo calla hasidhanno daafira, hagiirraamma ikkineemmohu adhamanke diingummoro callaati yite heddanno.

4. Maa qoropha hasiissannonke?

⁴ Adhamanke diseekkino yine hexxo mudha dihasiissannonke. Qullaawu Maxaafi kulanno garinni, galte diiga dandiinannihu minaanni woy minaama fooriro callaati. (Mat. 5:32) Konnira, Phaawuloosi coyiꞌrino garinni, adhamate giddo qarru kalaqamanno woyite minaanni woy minaama booꞌnatenni togo yee heda dihasiissannonsa: ‘Isi galteꞌya hasiꞌreemmore assitinoe? Ise ane baxa hasiissannoseta diaffino ikka? Wole adhummoro salaame afiꞌrammo ikka?’ Hatto yine hendeemmoha ikkiro, uminkera calla roorsiꞌnanni heeꞌnoommo. Alame, ninkeralla gara lawinkero umonke hagiirsiisate galtenke nafa diingeemmo gede jawaachishshannonke. Maganu Qaali “Mittu mittunku woleho woyyannore hedo ikkinnina, umisira woyyannore calla laoonke” yaanno. (Fil. 2:4) Yihowa galtenke diigantukki  heedhara hasiꞌranno. (Mat. 19:6) Yihowa ateneetira roorsiꞌra agurte, iso balaxisiisattora hasiꞌranno.

5. Efesooni Sokka 5:33 kultanno garinni, minaanninna minaama mimmito ma assa hasiissannonsa?

⁵ Minaanninna minaama mimmito baxanna ayirrisa hasiissannonsa. (Efesooni Sokka 5:33 nabbawi.) Qullaawu Maxaafi adhantenni roore aa hasiissannonketa rosiisannonke. (Soq. 20:35) Minaanninna minaama mimmito baxannohunna ayirrisannohu hiittoore ikkirooti? Umonsa heeshshi assannore ikkirooti. Minaanninna minaama umonsa heeshshi assannoha ikkiro, uminsa qiniite agure ‘wolu qiniite hasiꞌranno.’—1 Qor. 10:24.

6. Istiifeninna minaamasi coyidhinorinni maa rosootto?

⁶ Batinyu adhamino Kiristaani umonsa heeshshi assansa galtensanni hagiirraamma ikkitanno gede kaaꞌlitinonsa. Lawishshaho Istiifeni yinanni minaanni togo yiino: “Roorenkanni qarru kalaqamanno woyite, galteꞌne ledo mitteenni mala hasse. ‘Anera woyyannoeri maati?’ yaantenni ‘Ninkera woyyaannonkeri maati?’ yitine hedde.” Galtesi Isteefaniino togo yitino: “Kanca yaanni heeꞌra baxannohu dino. Coyi kawa kaꞌaa higannonke woyite, coyiꞌrammeemmo gede assinonkeri maatiro afate woꞌnaalleemmo. Hakkiinni, huuccatto assiꞌne seekkine xiinxallinummohu gedensaanni kalaqamino qarra tira dandiineemmo gara hasaambeemmo. Mimmitu ledo itamantenni qarra tirate olammeemmo.” Minaanninna minaama hasiisannohunni aleenni uminsa daafira calla hedannokkiha ikkiro, lowo geeshsha hagiidhanno.

7. Mittu rodii soqqanshote qoosso uyinannisi woyite, maa assa hasiissannosi?

⁷ Soqqammeemmowi ikkiwano ikkiro, Yihowara soqqamanke lowo ayirrinyeeti. (Far. 27:4; 84:10) Mittu rodii, baxxitinota soqqanshote qoosso uyinannisi gede maahoyye yiiro, tini hagiirsiissannote. Qullaawu Maxaafi mittu manchi songote “albisa ikka hasiꞌriro ayirrado looso halchanno” yaanno. (1 Xim. 3:1) Ikkollana, mittu rodii soqqanshote qoosso uyinannisi woyite, ane ikkinohu dino yee heda dihasiissannosi. (Luq. 17:7-10) Hatteentenni, umosi heeshshi asse wolootaho soqqama hasiissannosi.—2 Qor. 12:15.

8. Diyoxiraafiisi, Ooziyanna Abeseloomi xaggenni maa ronseemmo?

⁸ Qullaawu Maxaafi giddo quwa sae uminsara hedino manna kulloonni. Diyoxiraafiisi saala bae, songote giddo “albiidiha ikka hasiꞌrino.” (3 Yoh. 9) Ooziya, booꞌnatenni Yihowa assi yiinosikkire assino. (2 Dud. 26:16-21) Abeseloomi moote ikka hasiꞌrino daafira, elinoha lawe manna isi wido qoꞌlate woꞌnaalino. (2 Sam. 15:2-6) Tini Qullaawu Maxaafi xagge leellishshannonte gede, uminsara ayirrinye hasidhannori Yihowa dihagiirsiissanno. (Law. 25:27) Naaxxanna busha hasatto galte hosse balete huntanno.—Law. 16:18.

9. Yesuusi dancha lawishsha ikkinonkehu hiittoonniiti?

⁹ Yesuusi kayinni aleenni kullihu booꞌnaleessu manni gedeeha diꞌꞌikkino; “Isi Maganu dana afiꞌre heeꞌrenni, afiꞌrino wolqa kuꞌle, Maganu ledo taalamara dihasiꞌrino.” (Fil. 2:6) Kalqe alame giddo Yihowanni aane lowo silxaane noosihu Yesuusa ikkirono, isi hasiisannohunni aleenni umisira dihedino. Yesuusi rosaanosi “Kiꞌne giddo woꞌmunkura woriidihu baalunkura rooriidiha ikkanno” yiinonsa. (Luq. 9:48) Yesuusi gede umonsa heeshshi assitanno suwisaano, songote soqqamaasine, cimeeyyenna woradu aliidi laꞌꞌaano ledo soqqama lowo ayirrinyeeti! Yesuusi addu Kiristaana bande anfannihu baxillinsanni ikkinota coyiꞌrino; umonke heeshshi assineemmore ikkinummoro, Maganu dirijjite giddo kuni baxilli woꞌmanno gede kaaꞌlineemmo.—Yoh. 13:35.

10. Songote giddo qarru kalaqiminohanna cimeeyye konne qarra garunni tirtinokkiha lawihero maa assatto?

 ¹⁰ Songote giddo qarru kalaqiminohanna cimeeyye konne qarra garunni tirtinokkiha lawihero maa assatto? Coyiꞌramattonte, cimeeyyete ledo kaaꞌlante umokki heeshshi assattota leellisha dandaatto. (Ibi. 13:17) Hatto assa dandaatto gede ateneeto togo yite xaꞌmi: ‘Isi kuni coyi hakkeeshsha muddinoreeti? Konne qarra tirate maltino yanna xaatini? Tini hajo ane laꞌannoe? Isi halaale coyiꞌniro, songote giddo mittimma heedhanno gede assa hasiꞌroommonso, aneneeto gotti gotti assanni noommo?’

11. Efesooni Sokka 4:2, 3 kultanno garinni, Yihowara umonke heeshshi assine soqqamanke maaho kaaꞌlitanno?

¹¹ Yihowa dandoontenni roore umo heeshshi assinannita, hattono chaachaarrentenni roore mittimma baxanno. Konnira, Yihowara umokki heeshshi assite soqqamate sharrami. Hatto assittoro, songote giddo mittimma heedhanno gede kaaꞌlatto. (Efesooni Sokka 4:2, 3 nabbawi.) Diinaggaabbe sabbaki. Mannaho danchumma assite insara soqqamatto faro hasiꞌri. Songote giddo baxxitino qoosso noonsakkireno ikko baalanka manna wosinsi. (Mat. 6:1-4; Luq. 14:12-14) Umokki heeshshi assite songote ledo kaaꞌlamattoha ikkiro, wolootu dandookki calla ikkikkinni umokki heeshshi assattoha ikkoottotano huwatatto.

12. Qullaawu Maxaafi jaalla kalaqiꞌrate daafira mayyaanno? Xawisi.

¹² Yihowa mininke manninna jaallanke ledo honseemmo hoshshanni hagiidhinammora hasiꞌranno. (Far. 133:1) Yesuusirano dancha  jaalla noosi. (Yoh. 15:15) Qullaawu Maxaafi dancha jaalla afiꞌra lowore kaaꞌlitannota kulanno. Qoleno mannunniwa gambo giwa dancha ikkitinokkita kulanno. (Law. 18:1) Batinyu mannira dagoomittete webisayite lowo jaalla kalaqiꞌratenna boorraso hooꞌlate kaaꞌlitannoha lawannonsa. Ikkollana, dagoomittete webisayite layiꞌnanni horoonsiꞌra hasiissannonke.

13. Mito dagoomittete webisayite horoonsiꞌranno manna callimmanna yaaddo amaddannonsahu mayiraati?

¹³ Addi addi xiinxallo leellishshanno garinni, dagoomittete webisayitera noore laꞌꞌanni lowo yanna gudanno manna callimmanna yaaddo amaddansara dandiitanno. Mayira? Mannu duucha woyite uminsatanna jaallansa fotta dancha dancha doore hattono daaꞌꞌatinoha baxisanno bayicho webisayitete aana fushshanno daafira ikkara dandaanno. Mittu manchi tenne fotta laꞌꞌanno woyite ‘Xa anetino isi heeshshoteni?’ yee hedara dandaanno. Mitte 19 diri rodoo, “Qidaamenna Sambata ani mine kuttuwame heeꞌreenna wolootu kayinni baxxuta ikkitanni sayissinota hedeemma woyite hinaaseemma” yite maaxxukkinni coyidhino.

14. Dagoomittete webisayite horoonsiꞌneemmo woyite, 1 Pheexiroosi 3:8 noo amaale harunsa dandiineemmohu hiittoonniiti?

¹⁴ Dagoomittete webisayite woꞌmunni woꞌma bushate yaa diꞌꞌikkino; lawishshaho, tenne webisayite widoonni maatenkenna jaallanke ledo xaada dandiineemmo. Ikkollana, maalu coye calla illachishanno manni webisayitete aana fotta woy viidiyo fushshannohu janjansara hasiꞌre ikkinota huwatootto? Insa hatto assitannohu leellama hasidhe ikkara dandaanno. Mitootu, insa woy wolu manni webisayitete aana fushshitino foto aana koffi assannorenna maaeelare borreessitanno. Kiristaanu kayinni, umonsa heeshshi assannorenna manna mararannore ikkanno gede amaalloonni.—1 Pheexiroosi 3:8 nabbawi.

15. Qullaawu Maxaafi ninkeneeto bokkeessineemmokki gede kaaꞌlannonkehu hiittoonniiti?

¹⁵ Dagoomittete webisayite horoonsiꞌrattoha ikkiro, ateneeto togo yite xaꞌmi: ‘Webisayitete aana borreesseemmore woy fushsheemmo fotonna viidiyo wolootu laꞌanno woyite ane naaxxaleessaho yite heddara dandiitanno? Woloota hinaasiisanni noommohalla ikka?’ Qullaawu Maxaafi togo yaanno: “Tenne alame aana noori  baalu: maalu yorto, illete halchishannorinna jirote naaxxa tenne alamereeti ikkinnina, Maganu Annuwiinni dagginota diꞌꞌikkitino.” (1 Yoh. 2:16) Mitte Qullaawu Maxaafi tirora “jirotenni naaxxa” yitanno hedo, “meessaneeto bokkeessa” yine tirroonni. Kiristaanu mannu jajansara dihasiꞌranno. Insa “Mimmitonke gibbote kakkayinsanni woy kuꞌu koꞌonne hinaansanni mulla haafa adawadhinoonke” yine amaalloonni amaale harunsitanno. (Gal. 5:26) Umonke heeshshi assineemmore ikkinummoro, alamete noo naaxxaleeyye gede dileellammeemmo.

16. Naaxxa hasiissannonkekkihu mayiraati?

¹⁶ Naaxxa ‘fayyimma’ ikkitinokki daafira, umonke heeshshi assineemmore ikka hasiissannonke. (Rom. 12:3, NW) Naaxxaaleeyye coye hasidhannoreetinna umonsa bokkeessitannoreeti. Hedonsanna assootinsa duucha woyite umonsano wole mannano gawajjanno. Insa tenne hedonsa biddi assiꞌra gibburo, Sheexaanu wodanansa beeshshara dandaanno. (2 Qor. 4:4; 11:3) Umosi heeshshi assanno manchira kayinni ‘fayyo hedo’ noosi. Isi wolootu duucha doogganni roortannosita afino daafira, umosi dibokkeessanno. (Fil. 2:3) Qoleno, ‘Maganu booꞌnaleeyye giwannotanna jooguulleho kayinni elto aannota’ afino. (1 Phe. 5:5) Fayyu manchi Maganu giwasiꞌra dihasiꞌranno.

17. Woꞌmante yannara umonke heeshshi assate maa assa hasiissannonke?

¹⁷ Woꞌmante yannara umonke heeshshi assate Qullaawu Maxaafi ‘Akkala mannimma loosise ledo mulqitine tuggine haaro mannimma uddidhe’ yee amaalinonke amaale macciishsha hasiissannonke. Hatto assate sharrama hasiissannonke. Yesuusi lawishsha xiinxallanna dandaaminke deerrinni isi faale haꞌra hasiissannonke. (Qol. 3:9, 10; 1 Phe. 2:21) Togo assa kiissannote. Umonke heeshshi assineemmoha ikkiro, maatenke hagiirru noota ikkitanno, songote giddo mittimma heedhanno, hattono dagoomittete webisayite garimale dihoroonsiꞌneemmo. Baalunkunni roore Yihowa atoote afiꞌneemmo, hattono iso hagiirsiinseemmo.