1. Soqqamaasinchu Phaawuloosi mayyee coyiˈrino?

SOQQAMAASINCHU Phaawuloosi wolqiweelino woyiti noota coyiˈrino. Isi, mannimmasi ‘baˈanni’ woy jaabbanni hadhinota, gara ikkinore assa qarra ikkitinosita, hattono Yihowa huuccattosira dawaro isi hedino garinni qolinosikki woyiti noota coyiˈrino. (2 Qor. 4:16; 12:7-9; Rom. 7:21-23) Qoleno, Phaawuloosi gibbannosiri wolqiweelu gede assite laˈannosita kulino. * Ikkollana, wolootu gibbinosi daafira, woy noosi laanfenni kainohunni waagu dinooeho yee dihedino.—2 Qor. 10:10-12, 17, 18.

2. Layinki Qorontoosi 12:9, 10 kultanno garinni, Phaawuloosi hiikkonne kaajja roso rosino?

² Phaawuloosi, mittu manchi wolqiweeliro nafa jawaata ikka dandaannota rosino. (2 Qorontoosi 12:9, 10 nabbawi.) Yihowa Phaawuloosira “Ane wolqa guutte leeltannohu ate wolqiweelle” aanaati yiinosi; hatto yaa, Phaawuloosira wolqa ajjannosi woyite Yihowa jawaante aannosi yaate. Hanni balanxe, gibbannonkeri xontannonke woyite giirama hasiissannonkekkihu mayiraatiro laˈno.

3. Xonnanninke woyite hagiidha dandiineemmohu mayiraati?

³ Xonnannisita baxanno manchi dino. Ikkollana diinnanke xontannonke woyite, giiramme gicilammeemmoha  ikkiro, wolqa baˈnammora dandiineemmo. (Law. 24:10) Ikkina insa xontannonke woyite maa assa hasiissannonke? Phaawuloosi gede xonnanninke woyite hagiidha dandiineemmo. (2 Qor. 12:10) Mayira? Korkaatuno, mannu xonannonkehunna xiiwannonkehu addinta Yesuusi rosaano ikkinoommo daafiraati. (1 Phe. 4:14) Yesuusi harunsaanosi mannu xiiwannonsata coyiˈrino. (Yoh. 15:18-20) Umi xibbi diri Kiristaanano mannu xiiwinonsa. Hakkawaro Giriikete bude harunsanno manni Kiristaana gowwuullunna wolqiweelootu gede asse laˈˈanno. Ayihudete mannino, Pheexiroosinna Phaawuloosi hattono wole Kiristaana ‘roso afidhinokkiri mullu manni’ gede asse laˈˈanno. (Soq. 4:13) Qoleno Kiristaanaho poletiku silxaane noonsakkihuranna ola olantannokki daafira mannu wolqiweelootu gede asse laˈˈannonsa, hattono diayirrisannonsa.

4. Umi xibbi diri Kiristaani mannu xiiwinsa woyite maa assino?

⁴ Ikkina, umi xibbi diri Kiristaani mannu giwinonsa daafira hexxo mudhe Yihowara soqqamanna Yesuusa harunsa agurinoni? Diagurino. Lawishshaho, soqqamaasinchu Pheexiroosinna Yohaannisi Yesuusa harunsitinohuranna isi rosiisinore rosiissino daafira xiimbinsata tashshi yiinonsa. (Soq. 4:18-21; 5:27-29, 40-42) Insa saaltanno gede assannonsari dino. Hakkawaro Yesuusi rosaano mannu ayirrisannonsakkiha ikkirono, insa woloota kaaˈlate giwannonsa manni assa dandaannokkiha batinye dancha coye assitino. Lawishshaho, insa giddo mitu qullaawu ayyaaninni borreessitino maxaaffa hakkawarinni kayisse lowo miliyoone ikkanno manna kaaˈlitanninna hexxo afiˈranno gede assitanni no. Insa dudubbino Mangiste xaa yannara iima gashshite no; muli yannara kayinni, tini Mangiste uulla woˈma gashshitanno. (Mat. 24:14) Hakkawaro Kiristaana beebba assiˈrannohu wolqaataamu gashshooti buko buluulo ikkino; ammanantino rosaano kayinni iima mookke no. Hakkawaro Kiristaana xiibbannori kayinni reyitino; insa reyotenni kaˈuro nafa, hakkawaro gibbanno Kiristaani duduwi Mangistera maahoyye yite galtanno.—Aju. 5:10.

5. Yohaannisi 15:19 kultanno garinni, mannu Yihowa soqqamaasine woffi asse laˈˈannohu mayiraati?

⁵ Xaa yannara Maganu soqqamaasine mannu mito woyite gowwuullunna wolqiweelootu gede asse laˈˈannonsa, hattono qacifatannonsa. Mayira? Korkaatuno alamete manni ikkaata diˈˈikkineemmo. Umonke heeshshi assineemmore, jooguullenna owaata ikkate sharrammeemmo. Tini alame kayinni, naaxxaleeyye, booˈnaleeyyenna finqila manna naaddanno. Qoleno, poletikaho dikarsammeemmo, hattono aye gobbarano ola diolammeemmo. Alame lambe galleemmokki daafira, mannu woffi asse laˈˈannonke.—Yohaannisi 15:19 nabbawi; Rom. 12:2.

6. Yihowa mannasi horoonsiˈre maa loosanni no?

⁶ Mannu wolqiweelootaho yiinkerono, Yihowa ninke horoonsiˈre hoola yinoonnire assanni no. Isi sabbakate looso konni albaanni loonse egenninoonnikki garinni loosiisanni no. Xaa yannara soqqamaanosi metseettansa alamete aana qixxeessinannite wole baalante metseettanni roore lowo afiinni tirte mannaho iillishshanni no; qoleno, Qullaawa Maxaafa horoonsidhe lowo miliyoone ikkanno manni heeshsho woyyaabbanno gede kaaˈlitanni no. Konni dhagge ikkanno loosi baalaho galatu hasiisannosihu Yihowaati; isi mannu woffi asse laˈˈanno soqqamaanosi horoonsiˈre, hoola yinoonni looso loosanni no. Ikkina, Yihowa ninke mitto mittonka jawaata ikkineemmo  gede kaaˈlannonke? Isi kaaˈlo afiˈrate ninke maa assa hasiissannonke? Hanni soqqamaasinchu Phaawuloosi lawishsha harunsine assa dandiineemmoha sase coye laˈno.

7. Phaawuloosi lawishshinni maa ronseemmo?

⁷ Yihowara soqqammeemmo woyite uminke jawaante woy dandoo addaxxa hasiissannonkekkita Phaawuloosi lawishshinni ronseemmo. Phaawuloosi naaxxannonna umosi addaxxanno gede assannori noosi. Isi Roomu gashshooti giddo noohu, Xersesi yinannihu Kiliqiyunnihu qaru katamira lophino. Xersesi katami dureessahonna jajjabba rosu minna afiˈrinoho. Phaawuloosi lowo roso rosinoho; qoleno iso mannu ayirrisannosihunna seeru rosiisaancho ikkinohu Gemaaliyaali yinanni Yihudichi rosiisinosi. (Soq. 5:34; 22:3) Alba Phaawuloosi Yihudu manni mereero ayirradoho. Isi “Ani yannaˈyara noo Ayihude lowotenni roortino ammaˈno nooeho” yiino. (Gal. 1:13, 14; Soq. 26:4) Ikkirono, Phaawuloosi umosi diaddaxxino.

8. Filiphisiyusi Sokka 3:8 kultanno garinni, Phaawuloosi facci asse agurino coyibba ma garinni laˈˈanno? Isira ‘wolqiweellesinni tashshi yiinosihu’ mayiraati?

⁸ Phaawuloosi, mannu ayirrisannosi gede assitinosi coyibba xiixamikkinni facci asse agurino. Isinni, Phaawuloosi kuri coyibba “ishinu gede asse aguroommo” yiino. (Filiphisiyusi Sokka 3:8 nabbawi.) Isi Kiristoosi harunsaancho ikkate yee lowore agurino. Iso umisi daga gibbinosi. (Soq. 23:12-14) Gobbasi qansoota ikkinohu Roomu manni ganinosi, hattono usursiisinosi. (Soq. 16:19-24, 37) Qoleno Phaawuloosi laanfesi waaddinosi. (Rom. 7:21-25) Ikkollana, isi mannu giwinosi daafira woy laanfesinni kainohunni Kiristoosi rosaancho ikka diagurino; hatteentenni ‘wolqiweellesinni tashshi yiinosi.’ Mayira? Korkaatuno Maganu wolqa giddosi loossanna laˈˈannohu wolqiweelanno woyiteeti.—2 Qor. 4:7; 12:10.

9. Alame lowori gede assite laˈannori hooginkerono maa assa dandiineemmo?

⁹ Yihowa aanno wolqa afiˈrate, isi albaanni noonke waaga bikkinannihu, mannimmate jawaantenni, rosinke deerrinni, budinkenni  woy jironkenni ikkinokkita qaaga hasiissannonke. Yihowa horoonsiˈrannonkehu kuri coyibba noonke daafira diˈˈikkino. Isinni batinye Maganu soqqamaano ‘mannu hedanno garinni, egennaamma woy wolqaataamma woy ayirradda diˈˈikkitino.’ Yihowa alamete aana “gowwoota labbannore doorino.” (1 Qor. 1:26, 27) Alame lowori gede assite laˈannori hoogiherono, Yihowara soqqama dandaatto. Isinni kuri coyibba hoogguhero, Yihowa wolqa heeshshokki giddo loossanno gara laˈˈatto. Lawishshaho, mannu ammanatto halaale huluullamatto gede assate woˈnaalanno woyite, waajjittokki ammanakkira gaaramatto gede kaaˈlahera Yihowa huucciˈri. (Efe. 6:19, 20) Buutote dhibbi waadanni nooheha ikkiro, wolqakki assitu geeshsha isira soqqantanni heeˈratto gede kaaˈlahera Magano huucciˈri. Yihowa irkisannahe laitto kiiro, ammanakki kaajjitanno, atino jawaatatto.

10. Qullaawu Maxaafi giddo kulloonnihu ammanamino manni lawishsha xiinxalla hasiissannonkehu mayiraati?

¹⁰ Phaawuloosi Qullaawa Borro diinaggaawe xiinxallino. Isira Qullaawu Maxaafiti lowo egenno noosi; qoleno, Qullaawa Borro giddo kulloonni manni lawishshinni lowore rosino. Isi Ibiraawootu Kiristaanira sokka borreessi woyite, hunda babbaxxitino yannara heedhinote ammanantinote Yihowa soqqamaasine lawishsha heddanno gede jawaachishinonsa. (Ibiraawoota 11:32-34 nabbawi.) Hanni kuri Maganu soqqamaasine giddo Moote Daawiti lawishsha laˈno. Daawiti diinnasi calla ikkikkinni jaallasi nafa gibbinosi. Daawiti lawishsha xiinxallineemmo woyite, Phaawuloosi isi heeshsho daafira hiince jawaante afiˈrino garanna ninkeno Phaawuloosi lawishsha harunsa dandiineemmohu hiittoonniitiro ronseemmo.

11. Mannu illera Daawiti wolqiweeloho yineemmohu mayiraati? (Aaniidi qoolira noo misile lai.)

¹¹ Wolqaataamo olamaancho Gooliyaadi hendiro Daawiti wolqiweeloho. Gooliyaadi Daawiti laiti ‘mishinosi.’ Qoleno Gooliyaadi jigeessaho, olu uduunne qodhinohonna fullahino olamaanchooti. Daawiti kayinni, olama rosinokkihonna gariha olu uduunne afiˈrinokkiho shiima beettooti. Ikkollana isi jawaataho. Daawiti Yihowa addaxxino daafira, Yihowa diinasi Gooliyaadi qeelanno gede wolqa uyinosi.—1 Sam. 17:41-45, 50.

12. Daawitira iillinosihu wolu qarri maati?

¹² Daawiti wolqa baˈˈanno gede assasira dandaannohu wolu qarrino iillinosi. Isi Yihowa shoominohu Israeelete Moote Saaoolira ammaname soqqamino. Moote Saaooli umi qara Daawiti ayirrisinosi. Gedensoonni kayinni, isi naaxxino daafira Daawiti hinaasa hanafino. Isi Daawiti beebba assiˈrino; wole agurina shaasira nafa woˈnaalino.—1 Sam. 18:6-9, 29; 19:9-11.

13. Moote Saaooli beebba assiˈrinosiha ikkirono, Daawiti maa assino?

¹³ Moote Saaooli Daawiti beebba assiˈrinoha ikkirono, Daawiti Yihowa shoomino moote ayirrisa diagurino. (1 Sam. 24:6) Qoleno Daawiti, Saaooli miicinositera Yihowa dibushiishino. Hatteentenni iillinosi qarra cince saˈˈanno gede jawaante aasira Yihowa huucciˈrino.—Far. 18:1nna umoonni noo hedo.

14. Phaawuloosira Daawitira iillinohu gedeehu hiittoo qarri iillinosi?

¹⁴ Soqqamaasinchu Phaawuloosira Daawitira iillino gedee qarri tuncu yiinosi. Phaawuloosi diinna isinni roore wolqaataammaho. Hakkawaro batinyu ammaˈnotenna poletiku sooreeyye gibbinosi. Insa duucha higge gansiissinosi, hattono usursiissinosi. Daawiti  gede, Phaawuloosino woleteemmero iso kaaˈla hasiissannonsari gibbinosi. Kiristaanu songo giddo nafa mitootu gibbinosi. (2 Qor. 12:11; Fil. 3:18) Ikkollana Phaawuloosi gibbannosire baala qeelino. Hiittoonni? Isi mannu giwisirono sabbaka diagurino. Ammanate roduuwisi koffi assitusi yannara nafa insara ammaname heeˈrino. Qoleno, Phaawuloosi reya geeshsha Maganoho ammaname soqqamino. (2 Xim. 4:8) Isi, konne baala assa dandiinohu umisi jawaantenni ikkikkinni Yihowa addaxxino daafiraati.

15. Hasattonke maa assate? Tenne assa dandiineemmohu hiittoonniiti?

¹⁵ Ledokki rossannori, loossannori woy Yihowa Farciˈraasine ikkitinokkiri maatekki miilla xiibbanni woy xontanni waaddannohe? Songote giddo mittu rodii miice egenninohe? Hatto ikkiro Daawitinna Phaawuloosi lawishsha qaagi. “Busha danchu coyinni” qeela dandaatto. (Rom. 12:21) Mixokki, Daawiti gede gibbannoheri alba kinchunni dhoosa ikkitukkinni, Maganu Qaali macciishsha hasiˈranno manni wodaninna surre giddo coanno gede assate. Hatto assate, mannu xaˈmanno xaˈmora dawaro Qullaawu Maxaafinni qola, xiibbannohere ayirrisanna baxa, hattono baalunkura wole agurina diinnakkira nafa danchumma assa hasiissannohe.—Mat. 5:44; 1 Phe. 3:15-17.

16-17. Phaawuloosi horo hawinokkiri maati?

¹⁶ Soqqamaasinchu Phaawuloosi Kiristoosi harunsaancho ikkara albaanni, Yesuusi harunsaano xiiwannohonna ayirrinye afiˈrinokki beettooti. (Soq. 7:58; 1 Xim. 1:13) Phaawuloosi Kiristaanu songo waajjishiishannota hoolinohu Yesuusa umosiiti. Yesuusi iima heeˈre Phaawuloosi hasaawisinosi, hattono illesi ballisino. Phaawuloosi illesi faˈnantanno gede, alba xiiwanno manna mare kaaˈlo xaˈmira hasiissinosi. Isi, umosi heeshshi asse kaaˈlo afiˈrate Hanaaniya yinanni rosaanchiwa marino; Hanaaniyano illesi fanino.—Soq. 9:3-9, 17, 18.

¹⁷ Phaawuloosi gedensoonni Kiristaanu songo giddo egennamino soqqamaancho ikkino;  ikkollana, Yesuusi Demaasqote doogora rosiisinosi roso horo dihawino. Phaawuloosi woˈmante yannara umosi heeshshi asse, roduuwisi kaaˈlo maahoyye yee adhino. Isi, ammanate roduuwisi ‘jawaachishshinosita’ coyiˈrino.—Qol. 4:10, 11.

18. Wolootu kaaˈlitannonketa fokkinammora dandiineemmohu mayiraati?

¹⁸ Phaawuloosi lawishshinni maa ronseemmo? Umo Yihowa manni ledo gamba yaa hananfummo woyite, ayyaanaamittetenni marqu qaaqqi gedeere ikkinoommotanna lowori ronseemmori noota huwantoommo daafira, wolootu kaaˈlitankera hasiˈnoommoha ikkara dandaanno. (1 Qor. 3:1, 2) Ikkina xaano hattoo hasatto noonke? Yihowara lowo diro soqqamme lowo egenno afiˈnoommoha ikkiro, wolootu hakko iso halaalu mine ninke geeshsha keeshshitinokki roduuwi kaaˈlitannonketa fokkineemmoha ikkara dandaanno. Ikkollana, Yihowa ninke jawaachishate duucha woyite ammanate roduuwanke horoonsiˈranno. (Rom. 1:11, 12) Yihowawiinni wolqa afiˈra hasiˈnummoro, tenne dea dihasiissannonke.

19. Phaawuloosi lowore loosa dandiinohu mayiraati?

¹⁹ Phaawuloosi Kiristaancho ikkihu gedensaanni lowore loosino. Mayira? Korkaatuno isi mittu manchi lowore loosa dandaannohu umisi jawaantenni, rosisi deerrinni, jirosinni woy budisinni ikkikkinni umosi heeshshi assasinninna Yihowa addaxxasinni ikkinota rosino. Konnira ninkeno Phaawuloosi gede (1) Yihowa addaxxino, (2) Qullaawu Maxaafi giddo kulloonni manni lawishshinni ronso, (3) ammanate roduuwinke uyitannonke kaaˈlo maahoyye yine adhino. Hatto assinummoro, wolqiweelloommoha lawinkerono, Yihowa wolqaataamma assannonke!