Masaalo 4. Baxillu Hoonge

“Mannu . . . baxillu nookkiha [ikkanno].”—2 XIMOOTEWOOSI 3:1-3.

● Kiriisi, Noorzi Weelsi qooxeessira mini giddo gawajjo iillitannonsa manna kaaˈlitanno gaamo giddo loossanno. Ise togo yitino: “Mitto barra mitte mancho anewa dagge eˈuta, lowo geeshsha ganneenna dana danancho baˈino daafira ewelummase nafa bada didandoomma.” Kiriisi ledde togo yitino: “Wolu meenti kayinni wodaninsa baasa xissiisiˈrino daafira manna ille qase nafa lae diafanno.”

TAJE MAA LEELLISHSHANNO? Mitte Afiriku gobbara, 3 meenti giddo 1 anje heedheenna bushiinshoonnise. Hattee gobbankura assinoonni xiinxallo leellishshanno garinni, sasu labballi giddo mittu minaamasi gana qarra diafidhino yee hedanno. Ikkollana mini giddo gawajjo iillitannonsari meento calla diˈˈikkino. Lawishshaho Kanaadaho, 10 labballi giddo 3 meentinsa ganannonsa woy wolu garinni gawajjannonsa.

MITU MANNI KAYINNI MAYYAANNO? Mannu mini giddo manna gawajja biˈrenni nooreentilla. Xa togoo coye albinni roore illachisha hananfoonni daafiraatilla.

HATTO YAANSA GARAHO? Muli dirra kawa, mininsa manna gawajjitannori daafira mannu albinni roore afanno gede assinoonni. Kayinni togoo qarri noota albinni roore anfoonni daafira gawajjamanno manni kiiro ajjinoni? Deeˈni, diajjino. Baxillu roore baˈˈanni haˈrinoti xabbe leeltino.

TENNERA ATI MAYYAATTO? Layinki Ximootewoosi 3:1-3 noo masaalo woˈmitanni nooha lawannohe? Batinyu manni woleteemmero mininsa manna baxa hasiissannansa baxille hooginoha dilawannohe?

Woˈmitanna laˈnanni heeˈnoommoti ontikki masaalo, heeˈnoommo baatto ledo xaadooshshe afidhinote. Hanni Qullaawu Maxaafi tenne hajo daafira mayyaannoro laˈno.

[Murre Haaˈnoonni Hedo]

“Mini manna gawajja dagoomu giddo hakkeyi geya rippoorte assinannikki jaddo wido ikkitinota mannu ammane adhino. Mitte meyati polisete kuˈlitannohu minaannise mereerimunni 35 hige ganisehu gedensaanniiti.”​—WEELSIRA MINI GIDDO GAWAJJAMINO MANNA SILKETENNI KAAˈLITANNO DIRIJJITE QAALI-SAYISAANCHO.