1-3. Adhantinorira hiittoo fatani iillannonsa? (Umi misile lai.)

 ADHAMINKU 38 diro ikkinosihunna hagiirraame galte a noosihu mittu minaanni togo yiino: “Addinta sharrantinannihanna galteꞌne seekkara hasidhinannita leellishshinanniha ikkiro, Yihowa atoote afidhine hagiidhitinanni.” Ee, minaanninna minaama galtensa hagiirraame assiꞌranna qarru yannara mimmito irkisa dandiitanno.—Law. 18:22.

² Ikkollana, adhamino mannira ‘maalinsara qarru iillannoti’ wosincho coye diꞌꞌikkitino. (1 Qor. 7:28) Mayira? Barru barrunku iillitanno mitiimma hagiirrensa huntara dandiitanno. Minaanninna minaama guuntete xeꞌne noonsare ikkitino daafira, coyidhanno coyinni mimmito gawajjitara, coyi kawa kaꞌaa higansara hattono garunni hasaawa hooggara dandiitanno. (Yaq. 3:2, 5, 8) Mitu minaanninna minaama qolte ooso noonsarenna kabbaade looso loossannore ikkitara dandiitanno. Loosunni jaatanaawanna daafuru, mereeronsa noo mittimma kaajjishiꞌrate hasiissannonsa yanna hooganno gede assansara dandaanno. Woxu coyi, fayyimmate qarri, woy wole mitiimma baxillinsanna mimmitoho noonsa ayirrinyi sunu sununni baꞌꞌanno gede assitara dandiitanno. Hakkiinni saeno, “maalu loosi” lawishshaho foorre,  mancau amanyooti, gibbo, gaance, hinaasonna hanqe boolaqiꞌra lawinori jawaata galteeti yinannita nafa daafara dandaanno.—Gal. 5:19-21.

³ Gamete aana gami-tokke yinanninte gede, aleenni yinireno agurranna tini “goofimarchu barruwa” umonsa baxannohunna Magano ayirrisannokki manni woꞌminote; togoo akatta qolte galtete hadhote. (2 Xim. 3:1-4) Qoleno, galte diigate murciꞌre kainohu mittu urungichu diini no. Hawaariya Pheexiroosi togo yee qorowisiisinonke: “Baarigaariꞌne Daawuloosi egemmannoha hasiꞌre ittananno doobbiichi gede kawanna kaꞌa doyanni no.”—1 Phe. 5:8; Aju. 12:12.

4. Galte jawaatanna hagiirru noota assiꞌra dandiinanni yineemmohu mayiraati?

⁴ Jaappaanete heeꞌrannohu mittu minaanni togo yee noore coyiꞌrino: “Alba woxu coyi lowo qarra ikkinoe. Qoleno, minaamaꞌya ledo hakkeeshshi geeshsha dihasaambeemmo; hakko daafira tini iserano lowo fatana ikkitinose. Hakkiinni saeno, muli yannara ise buuto xiwantino. Tini coyibba saꞌe saꞌe mereeronke gaance kalaqantanno gede assitino.” Adhantinorira iillannohu mitu qarri hoolle dianfanniho; ikkirono kuni qarri mala diafiꞌrinoho yaa diꞌꞌikkino. Minaanninna minaama Yihowa kaaꞌlonni galtensa jawaatanna hagiirru noota assiꞌra dandiitanno. (Faarso 127:1 nabbawi. b) Hanni galte jawaatanna geedonnita assiꞌra dandiinannita onte doogga laꞌno. Qoleno, galte jawaata ikkite heedhanno gede baxillu hasiisannohu mayiraatiro laꞌneemmo.

5, 6. Minaanninna minaama Yihowa mereeronsa karsamanno gede assiꞌra dandiitannohu hiittoonniiti?

⁵ Minaanninna minaama adhanna adhama xintinohura Yihowara ammanantinorenna isira maahoyye yite galtannore ikkituro, galtensa kaajjadu xinti noota ikkitanno. (Mekibibi 4:12 nabbawi. c) Adhantinori Yihowa baxillunni uyino biddishsha harunsite, isi ledonsa karsamanno gede assiꞌra dandiitanno. Qullaawu Maxaafi hundihu Maganu manni daafira togo yaanno: “Qiniitira higge haꞌra hasiissuhero woy gurara higge haꞌra hasiissuhero, maccakki badhekkiinni, ‘Doogo tenneetina, kawaanni higge haꞌri’ yitanno huuro macciishshitanno.” (Isa. 30:20, 21) Yannankera minaanninna minaama Maganu Qaale mitteenni nabbabbe Yihowa huuro ‘macciishsha’ dandiitanno. (Far. 1:1-3) Qoleno, hagiirsiissannotinna ayyaanaamittetenni jawaachishshannoti Maatete Magansiꞌra heedhannonsa gede assidhe galtensa roore jawaata assiꞌra dandiitanno. Barru barrunku mitteenni huuccatto assiꞌransano, busha Sheexaanu alame abbitannonsa fatana qeelate baasa kaaꞌlitannonsa.

⁶ Jarmanete heeꞌrannohu Geerihati togo yiino: “Gillete qarrinninna coyi kawa kaꞌaa higeenna hagiirrinke ajanno wote, Maganu Qaali aanno amaale cincineemmorenna gatona yineemmore ikkineemmo gede kaaꞌlitinonke. Tini akatta galte seekkinota ikkitanno gede lowo geeshsha hasiissanno.” Adhantinori ayyaanaamo coye mitteenni assite Maganu mereeronsa ikkanno gede assidhannoha ikkiro, Maganunniwa hattono mimmitunniwa gamba yitanno.

7. Minaanni umimmate silxaanesi hiittoonni horoonsiꞌra hasiissannosi?

⁷ Minaanni umimmate silxaanesi horoonsiꞌranno gari, galte jawaatanna hagiirraame assiꞌrate lowore kaaꞌlanno. Qullaawu Maxaafi togo yaanno: “Labbaahu baalunkura umu Kiristoosiiti; meyaate baalantera kayinni umu labbaaho.” (1 Qor. 11:3) Tenne xiqisera qooxeessaho noo assaawe, minaanni umimmate silxaanesi Kiristoosi rosaanosi aana noosi silxaane horoonsiꞌrino garinni horoonsiꞌra hasiissannosita xawissanno. Yesuusi gadadisannoha  woy kaajjado ikkikkinni, ayewoteno baxillu noosiho, shaqqadoho, quwa saꞌꞌannokkiho, rahe hanqannokkihonna shooshaqaho.—Mat. 11:28-30.

8. Minaanni minaamasi baxxannosinna ayirrissannosi gede maa assa dandaanno?

⁸ Kiristaana ikkino minaanni, minaamasi ayirrissannosi gede kuꞌla dihasiissannosi. Hatteentenni, minaamasi ‘ledo egennotenni [woy, isera assaawannoha ikke] heeꞌranno.’ Qoleno, ‘roore hiiqqamanno uduunnicho ikkitinota minaamasi ayirrisanno.’ (1 Phe. 3:7) Minaanni minaamasi isira muxxe ikkitinota leellishate, ise ledo calla noo woteno ikko mannu albaanni ayirrisannoseta leellishanno garinni coyishiishannose, hattono mararannoseta leellishannore assannose. (Law. 31:28) Umimmate silxaanesi togo baxillunni horoonsiꞌrasi, minaamasi baxxannosinna ayirrissannosi gede assitanno; qoleno Maganu galtensa maassiꞌranno.

9. Minaama shooshanqetenni maahoyye yite galtannota leellisha dandiitannohu hiittoonniiti?

⁹ Yihowara uminke horo agurreemmo gede assannohunna xintu seerisi aana xintamino baxilli heeꞌrinkero, bayira angasira woroonni umonke heeshshi assa diqarrissannonke. (1 Phe. 5:6) Owaata minaama Yihowa silxaane ayirrissannota leellishshannoti mitte doogo, minaannise ledo buusamatenna iso irkisate. Qullaawu Maxaafi togo yaanno: “Minaamuwa, Mootichu albaanni gara ikkino daafira minaannuwiꞌnera maahoyye yitine galle.” (Qol. 3:18) Minaanni wossanannohu mitu coyi minaamasi baxxanno gedeeha ikka hoogara dandaanno. Ikkirono, wossanino coyi Maganu higge ledo sumuu yaannokkiha ikka hoogi geeshsha, maahoyye yite galtanno minaama adha digibbanno.—1 Phe. 3:1.

10. Baxillunni maahoyye yee gala hasiissannota ikkitinohu mayiraati?

¹⁰ Minaama minaannisera “aggaare” ikkitino daafira ayirradote. (Mil. 2:14) Ise ayirrinyunni hedosenna simmeetese coyidhe maatete danchare wossannanni gede kaaꞌlitanno; kayinni hakkawoteno maahoyye yite galase diagurtanno. Hayyichu minaanni minaamasi coyidhannore seekke macciishshanno. (Law. 31:10-31) Minaama baxillunni maahoyye yite galase, mereeronsa hagiirrunna salaame heedhanno gede, hattono maate afoo xaaddanno gede assitanno; qoleno minaanninna  minaama Magano hagiirsiissanni noota affanno daafira tashshi yaannonsa.—Efe. 5:22.

11. Mimmito gatona yaa lowonta hasiissannota ikkitinohu mayiraati?

¹¹ Minaanninna minaama galtensa geeddanno gede assiꞌrate, kuꞌu koꞌoye gatona yitannore ikka hasiissannonsa. Lamunku ‘mimmito cincitannohanna mimmito mulla gatona yaansa agurtannokkiha’ ikkiro, mereeronsa noo mittimma jawaata ikkitanno. (Qol. 3:13) Minaanninna minaama koma wodanaho borreesse amaxxannohanna mimmito qohate horoonsiꞌrannoha ikkiro kayinni, galtensa dhuka baꞌanno. Hiinxa mitte gimbera kaajjille huntara dandiitannonte gede, koffi yine hattee wodanaho wodhine keeshsha gatona yaa roore qarrissanno gede assitara dandiitanno. Minaanninna minaama Yihowa insara gatona yaanno garinni mimmito gatona yitannoha ikkiro kayinni, mittimmansa jawaattanno.—Mik. 7:18, 19.

12. Baxillu ‘cubbu batinye diwannohu’ hiittoonniiti?

¹² Addu baxilli “soꞌro mazaggawe diwodhanno.” Isinni “baxillu cubbu batinye diwanno.” (1 Qor. 13:4, 5, lekkaalliidi qaagiishsha; 1 Phe. 4:8) Wole yaattonni, baxillu heeꞌrinkero meꞌꞌe hinge gatona yineemmoro diwossanneemmo. Yesuusi hawaariya Pheexiroosi mitto mancho meꞌꞌe hige gatona yaa hasiissannosiro xaꞌmita, “77 higge” yiinosi. (Mat. 18:21, 22) Hatto yaasi, mittu Kiristaanchira woloota gatona yaate gawalo dino yaasiiti.—Law. 10:12. d

13. Gatona yaa giwate dooꞌꞌo gargadha dandiinannihu hiittoonniiti?

¹³ Anneeti togo yitino: “Minaanninna minaama mimmito gatona yaa giwannoha ikkiro, godowa baꞌꞌanninna mimmito addaxxa aguranni haꞌranno; tini qolte galtete hadhote. Mimmito gatona yineemmore ikka galtete mittimma jawaachishshanno hattono kuꞌu kuꞌuyiwa gamba yineemmo gede assitanno.” Gatona yaa giwate dooꞌꞌo gargadhate, galattinannirenna kuꞌu koꞌoye naaddinannire ikkate woꞌnaalle. Mimmito addinta galata roso assidhe. (Qol. 3:15) Kuꞌu koꞌoye gatona yitinannire ikkaꞌne surrete salaame, mittimmanna Maganu atoote afidhinanni gede assitannoꞌne.—Rom. 14:19.

14, 15. Amanyootu Higge yinanniti hiitteeti? Tini higge galtete baasa kaaꞌlitannohu hiittoonniiti?

¹⁴ Wolu manni ayirrisaꞌnera hasidhinanniti dihuluullissannote. Mannu hedoꞌnenna simmeeteꞌne misha agure ayirrise macciishshiꞌnero tashshi yaannoꞌne. Kayinni mannu, “Assieta asse qoꞌleemmo” yaanna macciishshitine egentinoonni? Mito wote hatto yine hendanni gede assannori heeꞌrannoha ikkirono, Qullaawu Maxaafi kayinni togo yaanno: “‘Isi assieta asse qoꞌleemmo’ yitooti.” (Law. 24:29) Isinni Yesuusi qarra ikkanno coye roore woyyino garinni amandanni gara kulino. Amanyootu Higge yinanniti tini higge lowonta rosantinote: “Mannu assaꞌnera hasidhinannire baalankare kiꞌneno insara hattonni assensa.” (Luq. 6:31) Yesuusi hatto yaasi, qohinonke mancho qonke qoꞌla agurre, woloota mannu ninke amadankera banxeemmo garinni amada hasiissannonke yaasiiti. Tenne higge garinni, minaanninna minaama galtensawiinni afiꞌra hasidhannore galtensara assa hasiissannonsa yaate.

¹⁵ Adhantinori galtensa simmeete lashshi assitannokkiha ikkiro, mittimmansa jawaattanno. Wodiidi Afirikira heeꞌrannohu mittu minaanni togo yiino: “Amanyootu Higge harunsate woꞌnaalleemmo. Koffi yineemmo woti nooha ikkirono, kuꞌu koꞌoye ninke amandankera hasiꞌneemmo garinni  amadate yaano mimmito ayirrisate lowo geeshsha sharrammeemmo.”

16. Minaanninna minaama mimmito ma assa dihasiissannonsa?

¹⁶ Galteꞌne laanfe woy kiꞌne baxisannoꞌnekki akatasi haariimotenni nafa kayissinoonte. Adhanna adhama lamunku giddo roore wolqaataamu ayetiro, roore cance coyiꞌra dandaannohu ayetiro woy roore xissiisannore coyiꞌra dandaannohu ayetiro afate heewisammanni heewo ikkitinokkita qaagge. Ninke baalunku soꞌnammoranna saꞌne saꞌne woloota koffi assinammora dandiineemmo. Hakkoyeno ikkiro, minaanni woy minaama saalfachishannore, woy xissiisanno qaale coyiꞌre kuꞌu koꞌoye goddaasanno gede assannohu gara ikkino korkaati dino.—Lawishsha 17:27; e 31:26 nabbawi. f

17. Minaanni Amanyootu Higge harunsa dandaannohu hiittoonniiti?

¹⁷ Mitu qooxeessira minaama wolqatenni gawajja woy gana labballimmate gede assine laꞌnanniha ikkirono, Qullaawu Maxaafi kayinni togo yaanno: “Rahe hanqannokki manchi wolqaataamo mancho rooreho; isonooto qeeꞌlanno manchino katama horre amadanno manchinni rooranno.” (Law. 16:32) Uullate aana heeꞌrino manni baalunkunni roore bayiru manchiha Yesuusi Kiristoosi lawishsha harunsine meessaneeto qeeꞌlate lowo jawaante hasiissanno. Coyiꞌnanni coyinni woy wolqatenni minaama gawajja labballimma diꞌꞌikkitino; isinni togo assanno manchi Yihowa ledo noosi fiixooma huꞌnanno. Wolqaataamonna jawaata mancho ikkinohu faarsaanchu Daawiti umisi togo yiino: “Hanqa hanqena, kayinni cubbo loossinoonte. Daallasiꞌnera heedhine wodaniꞌnenni hedde; hattono sammi yiiyye.”—Far. 4:4.

18. Ayewoteno baxille lossiꞌra hasiissannohu mayiraati?

¹⁸ Umi Qorontoosi 13:4-7 nabbawi. g Galtete mereero duuchunkunni roore hasiisannohu baxilleho. “Godowinni marara, shaqqille, shooshanqe, joongillenna cinca uddanote gede assitine uddidhe. Konne duuchankano agurranna, baxille uddidhe; korkaatuno baxillu mittimmate guuta usuraasinchooti.” (Qol. 3:12, 14) Adhantinori umisi xiqime aguranno baxille mimmitoho leellishanna mannaho yee isonooto sayise uyinohu Kiristoosi faale haꞌra hasiissannonsa. Togoo baxilli heeꞌriro, caacceessanno akati, kabbaade fayyimmate qarri, woxu coyi, woy balluwu ledo xaado afiꞌrino qarri galte dishashshafanno.

19, 20. (a) Adhantinori galtensa jawaatanna hagiirru noota assiꞌra dandiitannohu hiittoonniiti? (b) Aananno birxichira maa ronseemmo?

¹⁹ Galte seekkanno gede assiꞌrate baxillu, ammanama hattono lowo sharro hasiissannoti egennantinote. Minaanninna minaama qarru kalaqamanno wote hexxo mudhantenni, albinni roore mimmitunniwa gamba yaate murciꞌre kaꞌꞌa hasiissannonsa. Yihowaranna mimmitoho insaneeto sayise uyino minaanninna minaama, Maganohonna mimmitoho noonsa baxillinni mereeronsa kalaqamino qarra tirate kaꞌꞌanno; korkaatuno “baxillu horonta dibaꞌꞌanno.”—1 Qor. 13:8; Mat. 19:5, 6; Ibi. 13:4.

²⁰ Hakko iso tenne ‘qarrissanno yannara’ galte jawaatanna hagiirraame assiꞌra shota diꞌꞌikkitino. (2 Xim. 3:1) Yihowa kaaꞌlonni kayinni tenne assa dandiinanni. Alamennihu maaeelu amanyootino adhamino mannira kabbaade fatana ikkanno. Aananno birxichira, minaanninna minaama galtensa jawaata ikkitanno gede assiꞌra dandaanno gara laꞌneemmo.