“HAGIIRRAAMMU minaanninna minaama mereero heeꞌranno baxilli, jaaloomi, fiixoomi, hagiirrinna gambo geeshsha ikkannori dino.” Tini rosantino yaattooti. Konnira, lowo miliyoone ikkannohu adhaminokki manni adhama hasiꞌransa nooreentilla.

Mitu manni galte ikkannonsaha kompiyuterete widoonni hasiꞌranno, mitu kayinni tennera buusa layiꞌranno. Ikkollana, adhama xintino Kalaqaanchinke biddishsha hasiꞌra kayinni lowo geeshsha woyyitannote! (Kalaqo 2:18-24) Maganu baxannonke daafiranna hayyicha ikkino daafira, aannonke amaalenna biddishsha addaxxa dandiineemmo; kuni biddishshi qole galte ikkankera hasiꞌneemmo manchi hiittooha ikka hasiissannosiro anfeemmo gede kaaꞌlannonke. (Faarso 19:7) Maganu Qaali togo yee hajajannonke:

Mayira? Maganu Yihowa tenne amaale uyinohu albillittete heeshshonke daafira assaawannohuraati. Hawaariya Phaawuloosi ‘Mooticha ammaninohu ledo calla adhammanni’ gede uyino amaale, hunda Yihowa soqqamaano assitannori ledo sumuu yitannote; insa adhantannohu insante gede Magano halaalunni magansiꞌranno manni ledooti. (1 Qorontoosi 7:39; Marro 7:3, 4) Tenne assa abbitanno atooti bae ikkinota dea dihasiissannonke.

Lawishshaho, Yihowa magansiꞌranno manchi ledo adhama baxillaanchu iimi Anninkera ammanamme heeꞌneemmo gede kaaꞌlitannonke. (Mekibibi 4:9-12 ledo heewisiisi.) Kiristaana ikkino minaanninna minaama mimmito jawaachishanna iillannonsa qarra mitteenni kaaꞌlame saꞌꞌa dandaanno. Qoleno, mittimmansa shoshshoggitanno gede assanno fatana mitteenni gargadha dandaanno. Lamunku Yihowa biddishsha hasidhannonna kaajja amaalesi harunsitanno daafira, mimmitu ledo morkama agurte baxillensa hunannore afoo xaadde tira shota ikkitannonsa. Yihowara soqqamatenna heeshshonsa seerisi ledo sumuu yitanno gede assiꞌrate sharrantanno daafira adhamansa Kalaqaanchinke ayirranno gede assitannota ikkitanno.

Lowo diri albaanni, Gilooriya yinanniti mitte rodoo songote gambooshshenke daannonna Agarooshshu Shae Xiinxallo yannara dawaro qola jammarinohu mittu aju beetti ledo jaalooꞌma jammartino. Konni cuuaminokki beetti ledo noose jaalooma agurtanno gede amaale uyinoonniseha ikkirono, ise kayinni iso “baasa baxxino” daafira dimacciishshitino. Uyinoonnise amaale dancha ikkitinota kayinni affino. Hakko daafira, mitto barra konni coyira Yihowa kaaꞌlo afiꞌrate eeggifatte huuccatto assidhu. Hakkiinnino mulenni, hakku beetti amanyoote maaeelinoha ikkinota huwattu; hakko daafira  isi ledo noose jaalooma bayichonko agurtu. Gedenaanni ise kaajju Kiristaanchira assidhino. Xa minaannise songote cimeessaati; lame oosonsa qolte halaalu giddo jawaattinoreeti. Ise bashshota hedde togo yitino: “Yihowa galatamona, lowo qarrinni gatoomma. Isi kaaꞌlonni dancha amaale afiꞌroomma; tini baxannoe minaanniꞌya ledo hagiirru noo heeshsho heeꞌreemma gede assitinoe.”

Ikkina isonooto Yihowara sayise uyinohu mittu manchi galte ikkannoha wolewiinni hasiꞌrannohu mayiraati? Kuni Kiristaanchi ninkera woyyannore afinohunna danchare halchannonkehu Yihowa ikkinota diammananno? (Lawishsha 3:1-7; Faarso 145:16) Atina? Yihowa “halaalu Magano” ikkinota ammanatta? a (Faarso 31:5) Hatto ikkiro, isi ayewoteno danchanna horoontanno amaale aannonkeha ikkinota dihuluullamatta yaate. (Isayyaasi 48:17, 18) Addaho, baxillaanchu iimi Anninke ninke amaalannonkehu hegeri yannata hedeeti; ninke kayinni xeertinse heda hoonge muli yannara ikkanno soma calla fushshiꞌneemmoha ikkara dandaanno. Adhama hasiꞌranno Kiristaani kayinni xeertise heda dihasiissannonsa?—Faarso 37:11, 29.

Maganu Mangiste gambisse dagginotanna muli yanna giddo uulla keereensitannota addinta ammanatta? Qolteno, Gannate ikkitanno uulla ragidhe heedhanna leellannohenso, tenne alame aana qawaaxxiꞌra doodhatta? Qananaabbe heeꞌratta gede assannohe manchira assiꞌra hasiꞌrattanso, halaalu magansiꞌra balaxisiisanno mancho hasidhanni nootta? (Maatewoosi 6:33) Heeshshokki giddo kaffi assite laꞌꞌa hasiissannohe coyi maati? Giddiidi hedonkenna hasattonke seekkine layiꞌra hayyote. Hakkiinnino, hasiisannoha ikkiro hedonke biddi assiꞌne Yihowa dadillisara dandaanno assootiwiinni xeertiꞌra dandiineemmo.—Faarso 78:40, 41 ledo heewisiisi.

Ermiyaasi 17:9, “wodanu baalunkurinni roore hantaalaamo” ikkinota kultanno. Konni daafira, ayewoteno wodananke layiꞌra hasiissannonke. Qoleno, Qullaawu Maxaafi giddo noota Maganu amaalenna songote cimeeyyenna wolootu baxillunni uyitanno amaale lashshi assitannori roore wote buutote qarri iilleennansa wiꞌlitannota qaaga danchate.

Mittu manchi togo yaara dandaanno: ‘Kuni hiitto ikke ikkanno? Yihowa Farciꞌraasincho ikkitinokkita adhinohunna xa kayinni lamunku halaalu giddo noota afoommo rodii no.’ Hige togoori sae sae ikkara dandaanno; xa lamunku ‘halaalu giddo heeꞌransa’ tashshi assitannote. (3 Yohaannisi 4) Ikkollana, cuuantinokkita adhihu hakku rodii dihajajamino. Konni kaꞌano hattonni umisi doogo haꞌrannohalla ikki? Magano roore afinohu gede asse hede wole hajo tuncu yitannosi woteno Qullaawu Maxaafi amaale lashshi asse umisi hayyo addaxxannohalla ikka? Amaalloonninkehu kayinni ‘woꞌmu wodaninkenni Yihowa addaxxineemmo’ gedeeti. (Lawishsha 3:5) Hatto yaa duuchunku coyira Maganu fajjo ledo sumuu yine heeꞌneemmo yaate. Konni daafira, shiimaaddu coyi nafa gatikki duuchanka wote wodaninke  owaata ikka hasiissannosi. (Luqaasi 16:10) Maganoho hajajammeemmokkiha ikkiro, wodaninkera maa rosiinsanni heeꞌnoommo? ‘Mooticha ammantinokkita’ adhi rodii, umisi doogo haꞌrasinni soꞌrinota wodanche xa Yihowa maaro hasiꞌrinoha ikkara dandaanno. Ati kayinni togoo coye hanafa hasiꞌratta?

Mitte rodoo togo yitara dandiitanno: ‘Ane jaali kayinni xa Qullaawa Maxaafa xiinxallanna songo daa jammarino.’ Hatti danchate; kayinni xiinxallanni noohu mayiraati? Ate adha hasiꞌreetinso, Yihoware rose isira soqqamaraati? Mimmito egennate mitteenni yanna sayissinanni wote, giddiidi hasattosi leella hooggara dandiitanno. Sargete barri gedensaanni kayinni mayi xawe leellara dandaanno? Hige jaalikki cuuama geeshsha agarattaranna hakkuyi gedensaanni mulenni sarge assidhinara dandiitinanni. Hatto ikkiro, ‘Mooticha ammaninohura’ assiꞌroottata kaadannohu dino. Kayinni tini amaale sayissanno sokka ledo sumuu yaannore assootta yaa dandiinanni?

Songote giddo mittu rodiira qoosso uyinannihu mamooteetiro huwatootta? Cuuamasi calla baqeteni? Deeꞌni; konne rodoo ‘balanxe fatanne ikkado ikkasi laꞌnanni.’ (1 Ximootewosi 3:10) Tennenni maa ronseemmo? Ee, seekkite assaawi; hixamanyite lai, hattono seekkite macciishshi. Adhama mageeshshi halaafinateetiro seekkite assaawi. Qolteno, baxillunni wojji yitino illenni ikkikkinni haja assite hakkoye beetto hixamanyite lai. Hattono seekkite macciishshi. Kuni beetti Magano addinta baxannota leellishannore coyiꞌranno? Yanna saꞌu kiiro ayyaanaamittetenni lophanni noota leellishannori no? Ammanaminoha ikkinotanna ayyaanaamitte akatta noosita leellishi gedensaanni, konne beetto galte ikkaera dandaanno yee heda gara ikkitanno. Mitte dhagge ikkitanno yaatto no:

“Tenne beetto! xagge kuleemmohe

Coyiꞌreemmorinni konne roso adhi

Malino beetto calla ikkikkinni,

Adhamate maltino yanna doodhi.”

Wodaninke yaannore harunsine dancha amaalenna ninkera hende uyinanninke assaawe lashshi assineemmohalla ikki? Hatto ikkiro, buutote qarri iillankera dandaanno. Qullaawu Maxaafi togo yee amaalannonketa qaagi:

Hanni Jakuliini yinanni beettora mayi iillinoro laꞌno. Tini beetto Kiristaanu songo miila ikkinokkihu aju beetti ledo jaalooma jammartino daafira mittu cimeessi amaalise. Ise kayinni roduuwu quwa saꞌinohu gede assite heddino daafira, Qullaawu Maxaafi amaale lashshi assite agurtino. Yannate gedensaanni hakkawari dooꞌꞌose qaagge togo yite noore coyidhino: “Mittu manchi Yihowa laꞌꞌannorenna yaannore agure isi hasiꞌrinore calla laꞌꞌara dandaanno.” Ise jaaloontuhu hakku beetti Qullaawa Maxaafa xiinxalla jammari; hakkiinnino gedensaanni cuuami. Hakkiinni sasu agani gedensaanni lamunku adhami.

Qarru bayichonko kalaqama jammari. Isinni mereeronsa qarru jammarinohu idaannu heeꞌreennaanti! Hakkiinnino Jakuliini alba huwattinokkiti woy affanni heedhenni lashshi assite agurte saꞌino akatta xabbe leella jammartu. Ise minaannise ledo hagiirrunna mittimma noo heeshsho heeꞌreemma yite hexxitino; kayinni kuni ikkikki gatino. Minaannise songote giddonni bohami, hakkiinnino isenna lame  qaaqquullensa agure haꞌrino. Xa isera tenne bushshanni hadhino alame aana miinju qarri iillanni noose; hakkiinni saeno lame qaaqquullese maalaamittetenna simmeetete hasiisannonsare assite towaata qarra ikkitinose. Jakuliini tuncu yiinosehu konni buutote coyinni maa rossino? Ise togo yitino: “Hajajama rosoomma. Mittu manchi uyinoonnisi amaale kaajjado woy isira kaaꞌlitannokkita labbusiro nafa, Yihowawiinni daggino amaale gede asse adhe woꞌmunni woꞌma harunsa hasiissannosi.”—Galaatiya 6:7; Faarso 86:11.

Hanni tenne wole lawishsha laꞌno. Meriiza gedenaanni minaannase ikkino manchinni xaaddinohu loosu bayichooti. Kuni manchi isera affe egentinokkiha alamete coye leellisha jammarise; iseno hakkawote tenne digibbino. Isi lowo geeshsha rosinoho, manna ayirrisannoho, hattono coye egenninoho. Qullaawa Borro amaale uyine duucha hinge qorophitara kulloonniseha ikkirono, isera kayinni tishshi nafa diyiinose. Ise iso baasa “baxxino.”

Hawarro hawarro jaalise ledo xaadde hasaabbanni sayissanno yanna gattannose daafira, mulenni songote gambooshshi ceeꞌmisha jammarise. Adhamara albaanni, isi songote gambooshshe hadhannota hoolannosekkita coyiꞌrino; qoleno dihoolinose. Ikkollana, galte hossanni wole coyibba heeshshose sakaalte amaddino daafira ayyaanaamo coye balaxisiisa didandiitino; konni garinni ayyaanaamittetenni qiiddu.

Lamunku hasaawanni boohaaranno boohaarshi hiikkiyya? Sunu sununni hakku hasaawino gati; gedensaanni minaannise isenna shoolunna honsu diri mereero noore shoole qaaqquullensa hune haꞌri. Meriiza lowo geeshsha masse jalli yite gattino; ise heeshshose giddo ikkinore gaꞌlabbi yite assaawanna ma assituro woyyannoro heda jammartinohu sasu diri gedensaanniiti. Ise duucha wote, “Heeshshote yaa qarraho” yitanno. Hatto yaase kayinni leddinoseri dino; korkaatuno, alba halaalu giddo hagiirraame ikkite heedhino diri, hattono Maganu Mangisteha dancha duduwo mannaho kulate soqqansho fultanno wote afidhannoti dancha qiidado ayyare nafa qulli yitannose.

Meriiza togo yitanno: “Yinoonniere macciishshoommaro meu qarrinninna xissonni gateemmati baꞌino!” Oosose ledo rossanno ooso widoonni ise galagalte Yihowa Farciꞌraasine ledo xaaddu. Hakkiinnino halaaleho noose hasattonna Yihowara noose baxilli haarooꞌmi; xa isenna oosose halaalu giddo jawaatte no. Xa Meriiza woꞌmu wodaninni togo yitanno: “Yihowa aanno biddishshira maahoyye yee gala rosanna isi ninke ajinshe laꞌneemmo manni widoonni fajjosi kulannonketa huwata hasiissanno.” Yesuusi togo yiino: “Hiittoonni macciishshitinanniro seekkitine hedde.” (Luqaasi 8:18) Ee, seekkite assaawi, hixamanyite lai, hattono seekkite macciishshi!

Hanni tenne songo haꞌratta wote, Mangistete Addaraashera noo roduuwa lai. Songote giddo, batinye hagiirraamma minaannuwanna minaamuwa laꞌꞌattara dandaatta; qoleno insa mittimma noonsarenna mitteenni yanna sayise hagiidhannore ikkinota huwatattara dandaatta. Hakkonni kayinni, galtensa Yihowa magansiꞌrannokkiha ikkino daafira calluwu noore woloota laꞌꞌattara dandaatta. Kuri roduuwi galtensa ledonsa heeꞌroommero lowo geeshsha tashshi yaannonsa! Insa roore wote, gambooshshu goofanni heeꞌreenna minira haꞌra gidde ikkitannonsa  daafira ammanate roduuwinsa ledo sayisanno yannanna jawaachishanno hasaawi gate baꞌꞌannonsa. Ati ‘Mooticha ammaninohu ledo calla adhami’ yaanno biddishsha lashshi assite xiwinori nookkiha togoo coyi giddora ea hasiꞌratta? Hatteentenni, Yihowa biddishsha harunsine buutote qarrinni gata lowo geeshsha hayyote!—Faarso 119:9; Lawishsha 28:26.

Togo yite hedattaha ikkara dandaanno: ‘Kayinni songote giddo anera ikkannohu dinowe. Anera darawo ikkanno roduuwi shiimaholla.’ Hatto yaakki gara ikkitara dandiitanno. Kayinni Yihowa ati hagiirraame ikkattara hasiꞌrannota ammanatta? ‘Isi ate daafira assaawanno.’ (1 Pheexiroosi 5:6, 7) “Wodanaame galte aannohu Yihowaati” yaanno lawishshi qulli yaannohe? (Lawishsha 19:14) Hatto ikkiro, tenne hajo daafira huuccatto mayira diassiꞌratta?—Filiphisiyusi 4:6, 7.

Biꞌre Haanna ooso ila mageeshshi geeshsha hasidhinoro qaagatta? Ise maa assitino? Woꞌmu wodanisenni Yihowa addaxxitino daafira, giddoseta gudisse isira hasaaphitino. Hakkuyi gedensaanni, coyese isi aana tuqqite agurtino. Yanna iillituta, Maganu huuccattosera dawaro qolino; ise labbaa qaaqqo iltino.—1 Saamueeli 1:9-11, 18-20; Faarso 62:8.

Songoꞌne giddo atera darawo ikkitanno roduuwi ajjinoha ikkiro nafa, woradunna qoqqowu gambooshshiwana hiittooti? Togoo gambooshshe haꞌneemmohu ayyaanaamu coyiraati. Ikkirono, togoo gambooshshi yannara uminsa fajjonni soqqantannori, wolootaho soqqante hagiidhatenna Yihowara woꞌma lubbonsanni soqqantanno roduuwi ledo xaadate faro afidhanno. Togoo faro, albillitte galte ikkannohe rodiinni xaadattata ikkitara dandiitanno.

Ikkollana, xa atera malinoha Kiristaancho minaanna afiꞌra hoogittaro nafa, amanyootu xuru nookkita ikkite heeꞌrate kaaꞌlannohe gede Yihowa huucciꞌri. Xa mine assiꞌra hoogittarono, albillitte dancha minaamanna ama ikkate kaaꞌlitannohe akattanna dandoo lossiꞌrate jawaati. (Galaatiya 5:22, 23) Batinyu roduuwi suwisaano ikkite woꞌma yanna soqqansho giddora eansa kaaꞌlitinonsa. Tini yannakkinna wolqakki kaajja gede horoonsiꞌrate kaaꞌlitannohe!

Ikkina mine assiꞌra hasiꞌroottaha ikkiro, galte ikkannoheha mamiinni hasiꞌratta? Heeshshonsa giddo atete gedee mixo noonsarinna hegere geeshsha Yihowara soqqamate hasatto noonsari Yihowa soqqamaano mereerinni hasiꞌratta gede halchineemmo. (2 Ximootewosi 2:22) Qoleno, Yihowa iso waajjanno minaanna oye maassiꞌrihero, galteꞌne baxillaanchu Maganinke ayirranno gede assitannota ikkitara halchineemmo.