1-3. Phaawuloosi Yihowa albinni roore addaxxanno gede assinosiri maati? (Umi misile lai.)

 UMI xibbi diro Roomaho Kiristaana ikkino mannira yanna kabbaadete. Hakkawaro Roomu daga, Kiristoosi harunsaano 64 M.D. katama giirtino hattono manna gibbanno yite duume illenni laꞌannonsa. Atino Kiristaancho ikkite hatte yannara heeꞌroottoro, barru barrunku amande usurraheranna gadadinsahera dandiinanni. Ammanate roduuwikki giddo mito moyichoho sayinse uyineenna itantara woy bubbe caabbicho ikkitara haqqaho sunte lubbote heedheenna giirrara dandiinanni.

² Hawaariya Phaawuloosi Roomaho layinkimeeshsho usuraminohu hattee qarru yannaraati. Hakkawote kaaꞌlasira shiqino Kiristaani nookka? Phaawuloosi kaaꞌlasira daannohu heeꞌrannota huluullamikki digatino; korkaatuno isi hakkuyira albaanni tuncu yiinosire togo yee Ximootewosira kulino: “Kassanseennae umi gargarooshsheꞌya shiqishiꞌrummo yannara, baalunku agurte hadhinoe ikkinnina anera kaaꞌlinohu dino; Maganu tennera gatona yoonsa.” Ikkirono, Phaawuloosi kaaꞌlannoehu mittuno dino yee hedinokkita coyiꞌrino. Togo yee borreessino: “Ikkollana, . . . Mootichu muleꞌya uurre wolqa uyie.” Ee,  Mootichu Yesuusi Phaawuloosira hasiissannosi wolqa uyinosi. Hatti kaaꞌlo Phaawuloosira mageeshshire assitino? Isi, “doobbiichu afiinnino gatummo” yee borreessino.—2 Xim. 4:16, 17. a

³ Phaawuloosi Maganu kaaꞌlo afiꞌrinota hattee yanna qaagasi, hakkawote iillanni noosi qarranna albillitte iillasira dandaanno coye Yihowa kaaꞌlonni dandee saꞌꞌannota hexxanno gede kaaꞌlitinosi daafira jawaachishshusikki digattino. Isinni bayichonko togo yiino: “Mootichu bushu loosi baalunkunni gatisannoe.” (2 Xim. 4:18) Ee, Phaawuloosi mannuwiinni gari kaaꞌlo afiꞌra hoogiro nafa, Yihowanna Beettisi uyitannosi kaaꞌlo addaxxino!

4, 5. (a) Duuchanka wote hasiissannonke kaaꞌlo afiꞌneemmohu ayewiinniiti? (b) Yihowa ledo noohe jaalooma kaajjado assiꞌra dandaattohu hiittoonniiti?

⁴ Qarru iilleennahe shiqe kaaꞌlannoheha hoogge callatootto woti no? Iillinohe qarri angate anje, rosu mine iillanno fatana, ordu keere hooga woy wole yaachishanno coye ikkara dandaanno. Miteekkite wole manna kaaꞌlo xaꞌmiꞌroottohanna hasiissinohe kaaꞌlo afiꞌra hoogge koffi yoottoha ikkara dandaanno. Hige mitu qarri mannu tire afannokkiho. Ikkina togoo yannara “Yihowa addaxxi” yitannota Qullaawu Maxaafi amaale harunsa kaaꞌlitannori dinoni? (Law. 3:5, 6) Togoo wote iso addaxxa beebbate? Deeꞌni! Batinye Qullaawu Maxaafi xaggenni huwata dandiineemmonte gede, Maganu aanno kaaꞌlo addaxxinannite.

⁵ Hakko daafira, mannu kaaꞌlo afiꞌra hoogatto wote hattee godowaho amaxxantenni, hattoo yanna Phaawuloosi laino garinni laꞌꞌate woꞌnaali; yaano, Yihowa woꞌmunni woꞌma addaxxatenna baxillu towaanyosi heeshshokkinni laꞌꞌate kaaꞌlitanno faro gede assite lai. Tini qolte iso albinni roore addaxxatto gedenna isi ledo noohe jaaloomi roore kaajjado ikkanno gede kaaꞌlitannohe.

6. Qarru iillannonke wote Yihowa addaxxa kabbaade ikkitankera dandiitannohu mayiraati?

⁶ Miteekke dadillisannohu buutote qarri iillinoheha ikkara dandaanno. Konne qarrakki tirate dandaamannohere baala assoottohanna kaaꞌlo afiꞌrate Yihowa huucciꞌroottohano ikkara dandaanno. Isi kaaꞌlannoheta addaxxakki giddiidi salaame afiꞌratto gede assitahera dandiitanno? Ee, dandiitanno! (Faarso 62:8; b 1 Pheexiroosi 5:7 nabbawi. c) Yihowa ledo danchu jaaloomi heeꞌrannohe gede, iso addaxxa rosa hasiissannohe. Ikkirono, Yihowa hasiissannohe kaaꞌlo aannoheta addaxxa shota ikka hooggara dandiitanno. Mayira? Tennera mittu korkaati, Yihowa mito wote huuccattonkera dawaro bayichonko qola hoogasi ikkitara dandiitanno.—Far. 13:1, 2; 74:10; 89:46; 90:13; Imb. 1:2.

7. Yihowa huuccattonke baalantera dawaro bayichonko qolannokkihu mayiraati?

⁷ Yihowa huuccattonke baalantera dawaro bayichonko qolannokkihu mayiraati? Qullaawu Maxaafi Yihowa Annanke ikkinota, ninke kayinni oososi ikkinoommota coyiꞌranno. (Far. 103:13) Mittu anni qaaqqisi xaꞌmiꞌrannore baala diassanno woy bayichonko diaanno. Qaaqqu mito wote mitto coye xaꞌmiꞌrannohu mulla qulli yeennasi calla ikkara dandaanno. Qoleno, mito coye oosote uyinannihu yannasiraati. Hattono, annu qaaqqisira roore woyyinori maatironna hakku coyi wolu manni heeshsho ledo mayi xaado afiꞌrinoro afino. Hakkiinni saeno, annu qaaqqu xaꞌmiꞌrire baala bayichonko assannoha ikkiro, annanna beetto ikkansa gatteenna qaaqqu mooticha, annu soqqamaancho ikki yaate. Hatteente gede, Yihowa huuccattonkera dawaro qolara albaanni yanna saꞌara sammi yaannohu ninkera yee ikkara dandaanno. Hayyicha Kalaqaanchonke, baxillaancho Mootichankenna iimi Annanke  ikkino daafira konne assate qoosso noosi. Xaꞌmiꞌnummore baala bayichonko assannonkeha ikkiro, isinna ninke mereero noo jaaloomi gara baꞌꞌanno.—Isayyaasi 29:16; 45:9 ledo heewisiisi.

8. Duqqa dandiineemmo qarri jilba lainohunni Yihowa mayyee qaale eino?

⁸ Yihowa dhukinke jilba seekke afinotano heda hasiissannonke. (Far. 103:14) Konni daafira, isi shaqqadu anni gede irkisannonke ikkinnina uminke wolqanni sharrammammora wore dilaꞌꞌannonke. Noonke dhuki baalunku goofinohu gede ikke macciishshamannonke woti heeꞌrara dandaanno. Ikkirono, Yihowa soqqamaanosira wolqansara aleenni ikkino qarri iillansara wore agurannokkita coyiꞌrino. Ee, ‘fultanno furcho qixxeessannonsa.’ (1 Qorontoosi 10:13 nabbawi. d) Konni daafira, Yihowa duqqa dandiineemmo qarri jilba afinota addaxxa dandiineemmo.

9. Huuccatto assiꞌne dawaro bayichonko afiꞌra hoongummoro maa assa hasiissannonke?

⁹ Yihowa kaaꞌlankera huucciꞌnoommo huuccattora dawaro bayichonko qolannokki wote cincine agadhino. Isi ninke kaaꞌla baxannoha ikkirono, xaꞌmiꞌnoommore assate woyyitino yanna dagga geeshsha cincannota qaagi. “Yihowa ayirrisaꞌnera cincatenni agadhe no; qoleno maaraꞌnera kaꞌꞌanno. Korkaatuno Yihowa taashshote Maganooti. Cincite iso agadhitannori baalunku hagiirraammaho.”—Isa. 30:18.

10-12. (a) Darga assiꞌrino dhibbinni amadaminoha maatete miila xiwansiisiꞌranno Kiristaanira coyi roore kabbaade ikkannohu hiittoonniiti? (b) Qarru yannara Yihowa addaxxinummoro isi ledo noonke jaaloomi hiikkanno? Lawishsha kuli.

¹⁰ Kabbaade qarri iillannohe wote, Phaawuloosira macciishshaminohu gede ‘doobbiichu afii’ giddo woy “doobbiichu afii” mule noottohu gede ikke macciishshamahera dandaanno. Togoo yannara Yihowa addaxxa roore kabbaade ikkiturono, tenne assa kayinni lowo geeshsha hasiissinote. Lawishshaho, darga assiꞌrino dhibbi amadinoha maatekki miila xiwansiisidhanni noottoha ikkara dandaanno. Tennera kaaꞌlitanno hayyonna jawaante afiꞌrate huuccatto assiꞌroottoha ikkara dandaanno. e Dandaamannohere baala assitto gedensaanni, Yihowa nootto gara laꞌꞌanni nootanna kaajjite uurratto gede hasiissannohe kaaꞌlo aannoheta afakki giddokki salaame afidhanno gede diassitanno?—Far. 32:8.

¹¹ Mito wote Yihowa kaaꞌlanni noohekkiha lawahera dandaanno. Akimootu dhiwamino fiixikki daafira coyidhannori gurcheessahera dandaanno. Woy kaaꞌlannoe yite hexxootto fiixi coyi roore kabbaade ikkannohe gede assara dandaanno. Jawaante afiꞌrate Yihowa hexxa agurtooti. Albinni roore isiwa shiqi. (1 Saamueeli 30:3, 6 nabbawi. f) Yihowawiinni shesho afiꞌratto wote, isi ledo noohe jaaloomi albinni roore kaajjado ikkanno.

¹² Linda g yinanni rodoo tini halaale ikkitinota huwattinohu geedhinonna dhiwamino annasenna amase reyi geeshsha boode diro xiwansiisidhu gedensaanniiti. Ise togo yitino: “Hatte yannara anera, minaanniꞌyaranna rodiiꞌyara ma assa hasiissannonkero leella giwinke. Mito wote hexxo mudhineemmo. Ikkollana, hakkawarita hendeemmo wote, Yihowa ninke ledo ikkinoti leeltannonke. Isi jawaante uyinonke; qoleno xaate hige ma assineemmo yine hendeemmo yannara nafa hasiisannonkere assinonke.”

13. Mitte rodoo Yihowa addaxxasse hoode hoodete iillinose qarra dandiite saꞌanno gede kaaꞌlitinosehu hiittoonniiti?

 ¹³ Woꞌmu wodaninkenni Yihowa addaxxa hedeweelchu qarri iillannonke woteno kaaꞌlitannonke. Raanda yinanni rodoo Yihowa Farciꞌraasincho ikkinokki minaannise ise fushshe haꞌrisate kae noo yannara, rodiise shaara dandaanno dhibbinni amadaminota anfi. Hakkiinni shiimu agani gedensaanni, rodiise galte reyitu. Raanda tini dadillissanno coyibba iilliteennase sheshifata jammartuti, woꞌma yanna suwisaancho ikkite soqqama jammartu. Hakkiinni mulenni amase reyitu. Raanda konne baala dandiitanno gede kaaꞌlinoseri maati? Ise togo yitino: “Shiimaaddu coyi nafa gatikki baalankare barru baala Yihowara hasaapheemma. Hatto assaꞌya Yihowa xawe leellannoe gede assitinoe. Qoleno, aneneeto woy wole manna addaxxa agure iso addaxxa roseemma gede assitinoe. Isi kaaꞌlo heeshshoꞌyanni laꞌꞌa dandoomma; hasiisannoere baalankare assinoe. Konninni kainohunni, Yihowa ledo gamba yee loosate faro afiꞌroomma.”

14. Fiixisi bohamino Kiristaanchi Yihowa ma assannosita addaxxa dandaanno?

¹⁴ Hanni qarra ikkannoha wole coye laꞌno. Mittu baxatto fiixikki songotenni bohaminoha ikkara dandaanno. Qullaawa Maxaafa xiinxallakkinni, bohantinore ma garinni laꞌꞌa hasiissannoro afootto. (1 Qor. 5:11; 2 Yoh. 10) Ikkirono, bohamino fiixakki baxatto daafira Qullaawu Maxaafi hajajo ayirrisa qarra ikkitahera dandiitanno. h Ikkina, Qullaawu Maxaafi bohamino manni daafira aanno biddishsha ayirrisa dandaatto gede iimi Annikki jawaante aannoheta addaxxatto? Tenne ikkito Yihowa ledo albinni roore quraanyante isi ledo noohe jaalooma lossiꞌrate kaaꞌlitannohe faro gede assite laꞌꞌa dandaatto?

15. Addaami Edenete Yihowa hajajo diiginohu mayiraati?

 ¹⁵ Tennera hanni umi mancho Addaami hedi. Addaami Yihowa hajajo agadha hoogirono heeshshote heeꞌrannota hedinoni? Isi hatto yee dihedino; korkaatuno Qullaawu Maxaafi Addaami “didogamino” yaanno. (1 Xim. 2:14) Hatto ikkiro, hajajama hooginohu mayiraatiyya? Addaami Heewani uyitinosi guma itinohu galtesi roorsiꞌrino daafiraati. Isi Maganisiha Yihowa qaale agure galtesi qaale macciishshino.—Kal. 3:6, 17.

16. Duuchunkunni roorsine baxa hasiissannonkehu ayeti? Mayira?

¹⁶ Ikkina fiixanke lowo geeshsha baxa dihasiissannonke yaateni? Hatto yaa diꞌꞌikkino! Ikkirono, roorsine baxa hasiissannonkehu Yihowaati. (Maatewoosi 22:37, 38 nabbawi. i) Tini fiixinke Yihowara soqqamanni nooha ikkirono ikka hoogirono insa uminsara kaaꞌlitannote. Konni daafira Yihowara noohe baxille lossiꞌranna iso albinni roore addaxxa agurtooti. Bohamino fiixikki ikkito yaachishshuhero, giddokkita fushshite huuccattotenni Yihowara kuꞌli. j (Rom. 12:12; Fil. 4:6, 7) Tenne dadillissanno ikkito Yihowa ledo noohe jaalooma kaajjishiꞌrate horoonsiꞌri. Tini qolte woyyino mala afiꞌrate Yihowa agadhatto gede kaaꞌlitannohe.

17. Sabbakate loosira diinaggaambeemmoha ikkiro, Yihowa ma assannonketa addaxxa dandiineemmo?

¹⁷ Yihowa Phaawuloosi ‘doobbiichu afiinni gatisinohu’ mayiraati? Isi togo yiino: “Ane widoonni sabbakate loosi woꞌmunni woꞌma gumulamanno gedenna daga baalanti macciishshitanno [gedeeti].” (2 Xim. 4:17) Ninkeno Phaawuloosi gede sabbakate looso diinaggaambe loonsanni, wole hasiisannonke coye baalanka Yihowa ‘aannonketa’ addaxxineemmo. (Mat. 6:33) Maganu Mangistere sabbankeemmore ikkinoommo daafira, ‘dancha duduwo hadara uyinoonninke’; hattono Yihowa ‘ledosi loossannori’ gede asse kiirinonke. (1 Tes. 2:4; 1 Qor. 3:9) Dandaaminke deerrinni Yihowa looso diinaggaambe loosanke, isi fooliishshiishannonke yanna agadha shota ikkitannonke gede assitanno.

18. Yihowa ledo noonke jaaloomanna ammana kaajjishiꞌra dandiineemmohu hiitte doogganniiti?

¹⁸ Hakko daafira, xa noonke yanna Maganu ledo albinni roore jaalooꞌmate horoonsiꞌno. Yaachishanno coyi tuncu yaannohe wote, hattee yanna Yihowawa shiqate horoonsiꞌri. Ee, Maganu Qaale seekkite xiinxalli, rosatto coye hiinci, ganyite huuccatto assiꞌri, hattono ayyaanaamittete loosira diinaggaawi; konne assite Yihowa xaano ikko albillitte iillannohe qarra dandiite saꞌꞌatto gede kaaꞌlannoheta addaxxattota leellishi.