1-3. Mitte rodoo Yihowa mayi hasiisannonkero afinota addaxxitanno gede assinoseri maati?

LAANARA 2012nni Jarmanete gobbara horo habbannokki coyi tuncu yiinose. Hatte yannara ise lame addi addi huuccattosera dawaro afidhino. Umi huuccattose assidhinohu horophillu dirrannowa iillate baaburunni seeda doogo hadhanni heedheeti. Ise farciˈrate faro afidhara Yihowa kaaˈlannose gede huuccidhino. Layinki huuccattose assidhinohu horophillu dirrannowa iillitu gedensaanni, ise gidditanno horophilli tari layinki barrira sainota kullise yannaraati. Ise roore woxese guxxitino daafiranna galtannowi nookki daafira Yihowa kaaˈlasera huuccidhino.

² Laana huuccidhe kaˈanni heedheenna, mittu beetti “Laana, koye ma assitanni nootta?” yiise. Kuni aju beetti alba rosu mine ledose rosinoho. Hakkawote iso amasinna ahaahesi Wodiidi Afirika horophillunni haˈranna geegiissitanni noosi. Amasi Elke, Laana ikkito macciishshituti isewa galtanno gede faasiiqqe koyissuse. Elkenna amase, Laana dancha gede asse wosinsise; qoleno ammanasenna woˈma yanna soqqanshose daafira addi addi xaˈmo xaˈmise.

³ Layinki soodo Laana dancha gede shooˈmitu gedensaanni, wole Qullaawu  Maxaafi xaˈmonsara dawaro qoltunsa; qoleno, galagalte coyishiishshannonsa gede insa teesso borreessite adhitu. Hakkiinni Laana qaese keerunni iillitino; ise xaano woˈma yanna suwisaanchooti. Ise togo coye qineessinosehu ‘huuccatto macciishshanno Magano’ ikkinota huwattino.—Far. 65:2.

4. Aanchine ronseemmohu hiittee hasattonke daafiraati?

⁴ Hedeweelcho mitiinsannori tuncu yaannonke wote, kaaˈlo afiˈrate huuccatto assiˈra dandiineemmo; Yihowa ammanantino soqqamaanosi assidhannota togoo huuccatto macciishsha baxanno. (Far. 34:15; Law. 15:8) Ikkollana, lawishshu huuccatto hiincineemmo wote roore hasiisannonke coyi noota huwanteemmo. Lawishshaho, Yesuusi rosiisino huuccattora jeefote nooti sase hedo ayyaanaamittete hasattonke qummi assitanno gara hanni laˈno. Qoleno, shoolki hedo yaano barru sagalenke daafira huucciˈneemmo huuccatto ledo sumuu yaannore assa dandiineemmo gara laˈneemmo.—Maatewoosi 6:11-13 nabbawi. *

5, 6. Maalaamittete hasiisannori gariri noonkeha ikkiro nafa, barru sagalenke daafira huucciˈra hasiissannonkehu mayiraati?

⁵ Yesuusi barru “sagaleˈya” yine ikkikkinni barru “sagalenke” yine huucciˈnammora rosiisinonke. Afirikaho woradu aliidi laˈˈaancho ikkinohu Vikitoori togo yiino: “Aninna minaamaˈya inteemmo sagale hiikkiinni afiˈneemmokka woy minu kira ayi baatankekka yine lowo geeshsha yaada hasiissannonkekki daafira Yihowa duucha hige galaxxeemmo. Roduuwinke barru baala shaqqillunni towaattannonke. Ikkirono, ninke kaaˈlitanno roduuwi iillannonsaha miinju qarra dandiitanno gede Yihowa huucceemmo.”

⁶ Duuchu wotira ikkitanno sagale noonkeha ikkiro, anga ajjino roduuwira woy kalaqamu danonni gawajjantinori daafira heda dandiineemmo. Insa daafira huuccatto assa calla ikkikkinni huuccattonke ledo sumuu yaannore assa hasiissannonke. Lawishshaho, noonkere qarrantino roduuwinke ledo beeqqa dandiineemmo. Qoleno, alamete doyicho loosira fushshineemmo woxe garunni horoonsiˈnannita huwante, ganyine togoo fushsho fushsha dandiineemmo.—1 Yoh. 3:17.

7. Yesuusi ‘gaˈa daafira horonta yaada’ hasiissannonkekkita lawishshunni rosiisinohu hiittoonniiti?

⁷ Yesuusi barru sagalenke yaasi, xa hasiise noonkere yaasi ikkitukki digattino. Hakko daafira isi hakkiinni aanche Maganu xawu awawa uddisiisanno gara coyiˈrino; hakkiinnino togo yiino: “Kiˈne ammana xeˈinoˈneri, Maganu kiˈne roore diuddisiisannoˈne? Konni daafira, yaaddinoonte hattono, . . . Maa uddiˈneemmo?’ yitinoonte.” Isi aante noota hasiissanno amaale lede coyiˈre jeefisino: “Gaˈa daafira horonta yaaddinoonte.” (Mat. 6:30-34) Hatto yaasi maalaamittete coyira quwa saˈˈa agurre, barru barrunku afiˈneemmohu qaru coyinni kassi yaa hasiissannonketa leellishshanno. Kuri coyibba giddo mitu injiino mine, maatenkera hasiisannore shiqishate kaaˈlannonke looso, hattono fayyimmanke towaaxxate hasiissannonke hayyo ikkitara dandiitanno. Huuccatto assiˈneemmohu togoohu maalaamittete coyi daafira calla ikkiro kayinni, woluri gatinonkeri no. Roore hasiissannota ayyaanaamittete hasattonke dea dihasiissannonke.

8. Yesuusi barru sagalenke daafira coyiˈrinori hiittee hasiissanno hasattonke qaagiissannonke? (Umi misile lai.)

⁸ Yesuusi barru sagalenke yaasi ayyaanaamittete sagaleno hasiissannonketa qaagiissitannonkete. Mootichinke togo yiino: “Manchu Yihowa afiinni fulanno qaali baalunkunni ikkinnina sagaletenni calla diheeˈranno.” (Mat. 4:4) Konni daafira, Yihowa hasiissannonketa ayyaanaamittete sagale ayewoteno yannasera aannonke gede huucciˈra agurroonke.

9. Cubbu “asale” ikkinohu ma garinniiti?

⁹ Yesuusi togo yiino: “Asalenke gatona yiinke.” (Mat. 6:12) Wole bayicho kayinni, “Cubbonke gatona yiinke” yiino. (Luq. 11:4) Tini metseete 60 diri  albaanni tenne hedo togo yite danchu garinni xawissino: “Maganu higge diinge cubbo loosanke isira asalu heeˈrannonke gede assitannonke. . . . Maganu cubbinke daafira heeshshoˈne baaxxe yee xaˈma dandaanno. . . . Ninke ledo noosi fiixooma gudise facci asse agure, salaamesi ninkewiinni haare hoola dandaanno. . . . Isira hajajamme banxeemmosita leellisha hasiissannonke; cubbo loosa Maganoho hasiisanno baxille xeisa ikkitino daafira, cubbo loonseemmo wote baxillu asali heeˈrannonke yaate.”—1 Yoh. 5:3.

10. Yihowa cubbonke gatona yaannohu hiitti qixxaawo noo daafiraati? Tenne qixxaawo ma garinni laˈˈa hasiissannonke?

¹⁰ Barru barrunku Yihowa maaro hasiissannonke; isi cubbonke maarannoti mitticho qixxaawo yaano Yesuusiti wodote kakkalo lowo geeshsha hasiissannonke! Tini kakkalo shiqqinohu mitu 2,000 diri albaanni ikkirono, techo afiˈnoommo elto gede assine laˈˈa hasiissannonke. Heeshshonkera baantannihu “wodote waagi lowoha” ikkino daafira, guuntete xeˈne noosihu aye manchino konne waaga baate horo diafanno. (Faarso 49:7, 8 nabbawi; * Far. 49:9; 1 Pheexiroosi 1:18, 19 nabbawi. *) Ee, tenne taalle nookki eltora ayewoteno Yihowa galata hasiissannonke. Qoleno, Yesuusi “cubboˈya” yaa agure “cubbonke” yee rosiisasi, ammanate roduuwinke baalunkura tini maarote qixxaawo hasiissannonsata qaagiissitannonke. Addaho, Yihowa uminke ayyaanaamittera calla ikkikkinni wolootu daafirano hendammora hasiˈranno; hatto yaa, baddaltinonkeri daafirano yaate. Togoo baddalo duucha wote shotate; qoleno roduuwanke addinta banxeemmotanna, Maganu ninke shaqqillunni gatona yiinonkente gede gatona yineemmore ikkinoommota leellishate faro fantannonke.—Qol. 3:13.

11. Gatona yineemmore ikka hasiissannonkehu mayiraati?

¹¹ Guuntete xeˈne noonkere ikkinoommo daafira, mito wote koma amandammora dandiineemmo; tini dadillissannote. (Zel. 19:18) Tenne hajo woleho kullummoro, hakku manchi ninkera kaaˈlara dandaanno; tini qolte songote giddo babbadooshshe kalaqqanno. Kuni coyi tenne gedee heeˈrara sammi yineemmoha ikkiro, tini Maganu  maaroranna wodote kakkalora diniqo noonkekkita leellishshanno. Gatona yineemmokkire ikkinummoro, Anninke Beettisi kakkalo widoonni ninke gatona yaa aguranno. (Mat. 18:35) Yesuusi lawishshu huuccatto rosiise kaˈˈanni heeˈrenni tenne lede xawisino. (Maatewoosi 6:14, 15 nabbawi. *) Hakkiinni saeno, Maganu gatona yaankera hasiˈneemmoha ikkiro, kabbaade cubbo loosa rosicho assiˈra dihasiissannonke. Tini hedo lawishshu huuccattora noote aante noo hedowa massitannonke.—1 Yoh. 3:4, 6.

12, 13. (a) Yesuusi cuuamihu gedensaanni mayi tuncu yiinosi? (b) Fonqoloho qeelammummoro xaˈmammeemmori ninkeeti yineemmohu mayiraati? (c) Yesuusi reyote geeshsha ammanaminoha ikke maa buuxisino?

¹² “Fonqolu giddora eessitootinke” yitanno huuccatto, Yesuusi cuuamihu gedensaanni tuncu yiinosire qaagiissitannonke. Hatte yannara Maganu ayyaani Yesuusa halallira haˈranno gede assino. Mayira? “Daawuloosi fonqolannosi gede.” (Mat. 4:1; 6:13) Tenne dhagge assiˈra hasiissannonkeni? Maganu Beettosi uullara soyinohu qaru korkaati maatiro huwanteemmoha ikkiro, tini dhagge diˈˈikkitannonke. Iso uullara sonkoonnihu qaru korkaati, Addaaminna Heewani finqilte Maganu aliidimma adha gibbu yannara kaˈino xaˈmora dawaro qolaraati. Hakkawote dawaro qolate yanna hasiissanno xaˈmuwa kaˈino. Lawishshaho, Maganu mancho kalaqino gari xeˈne afiˈrinokka? Guutu manchi “bushu” Daawuloosi addi addi fonqolo abbisirono, Maganu aliidimma irkisa dandaanno? Sheexaanu yii gede manchu beetti Maganu gashshootiwiinni baxxe fuliro woyyitino heeshsho heeˈranno? (Kal. 3:4, 5) Tenne xaˈmuwara dawaro afiˈrate yanna hasiissanno; ikkirono, tini xaˈmuwa duushshitanno dawaro afidhanno wote Yihowa silxaanesi horoonsiˈrannohu horoomanno garinni ikkinota hedate dandoo noonsa kalaqami baalunku huwatanno.

¹³ Yihowa qullaawa ikkino daafira aye manchono bunshe assara difonqolanno. “Fonqolaanchu” Daawuloosiiti. (Mat. 4:3) Daawuloosi addi addi doogganni fonqolankera woˈnaalanno. Ikkirono, fonqolu giddora eate woy ea hoogate mittu mittunku manchi doodha dandaanno. (Yaq. 1:13, 15; Yaaqoobi 1:14 nabbawi. *) Yesuusi Maganu Qaali giddonni hasiisanno qummeeshsha horoonsiˈre mittu mittunku fonqolira bayichonko dawaro qolino. Konni garinni isi Maganu aliidimma irkisannota leellishino. Sheexaanu kayinni hexxo mudhe diagurino. Isi “wole injiitanno yanna” agadhino. (Luq. 4:13) Yesuusi, Maganoho ammanamannokki gede assate Sheexaanu abbinosi fonqolo baalanka qeelino. Kiristoosi Yihowa aliidimma keeraancho ikkitinota, hattono guutu manchi baxi geeshshi fonqoli tuncu yiisirono ammanaminoha ikka dandaannota buuxisino. Ikkollana, Sheexaanu Yesuusi harunsaano ateno mitteenni woshshaade karate woˈnaalanno.

14. Fonqoloho qeelammeemmokki gede ma assa hasiissannonke?

¹⁴ Maganu aliidimma daafira kaˈino xaˈmuwa xaano dawaro afiˈra hasiissannonsahura, Yihowa Fonqolaanchu tenne alame horoonsiˈre fonqolankera fajjanno. Fonqolu giddora eessannonkehu Magano diˈˈikkino. Isi ammanammoommore ikkineemmota dihuluullamanno; qoleno kaaˈlankera hasiˈranno. Ikkollana, Yihowa doodhate dandoonke ayirrisanno daafira, ammanammoommore ikka woy ikka hooga ninke doodhinammora aguranno. Ammanammoommore ikkate lamere assa hasiissannonke: ayyaanaamittetenni baqqi yine heeˈranna ganyine huuccatto assiˈra hasiissannonke. Yihowa huuccattonkera dawaro qolannohu hiittoonniiti?

15, 16. (a) Xeertiˈra hasiissannonkehu mitu fonqoli hiikkoyeti? (b) Iillinonke fonqolinni qeelammummoro, bushiinshannihu ayeti?

¹⁵ Yihowa jawaante ikkannonkeha hattono fonqolo qeelate kaaˈlannonkeha wolqaataamo qullaawa ayyaanasi aannonke. Qoleno, Maganu  Qaalesinna songo horoonsiˈre xeertiˈra hasiissannonke coye lawishshaho, gari geeshsha hasiisannokkihu maalaamittete coyira lowo yanna, woxenna wolqa guda qorophineemmo gede amaalannonke. Ispeninna Yaani yinanni minaanninna minaama Awuroppaho mitte dureette gobbara heeˈranno. Insa gobbansara sabbakkannori roore hasiissanno qooxeessira woˈma yanna suwisaano ikke lowo diro soqqamino. Umi qaaqqonsa iliti kayinni suwisaanchimmansa uurrisino; xa insa layinki qaaqqo ilino. Ispeni togo yiino: “Xa albi gede ayyaanaamittete loosira lowo yanna sayinseemmokki daafira fonqolu giddora eˈneemmokki gede ganyine Yihowa huucciˈneemmo. Yihowa ayyaanaamittenke agadhineemmo gedenna soqqanshote diinaggaawa agurreemmokki gede kaaˈlankera huucciˈneemmo.”

¹⁶ Yannankera lowo fonqolo ikkinohu wolu coyi teeda baˈino misilla laˈˈate. Togoo coyibba laˈˈate fonqolammeemmoha ikkiro, Sheexaane bushiisha didandiineemmo. Mayira? Korkaatuno Sheexaanunna alamesi bushare assinammora giddeessite diaffannonke. Mitootu konni fonqoli giddora eˈinohu surrensa bushare hiincitanno gede assidhino daafiraati. Ikkirono, lowo kume ikkitanno roduuwinke assitinonte gede ninkeno togoo coyiwiinni xeertiˈra dandiineemmo.—1 Qor. 10:12, 13.

17. (a) Bushuwiinni gatate huucciˈneemmo huuccatto ledo sumuu yine heeˈra dandiineemmohu hiittoonniiti? (b) Muli yanna giddo afiˈneemmo fooliishsho hiitteeti?

¹⁷ “Bushuwiinni gatisinke” yitanno huuccatto ledo sumuu yine heeˈrate, ‘Sheexaanu alame wido ikkineemmokki’ gede sharrama hasiissannonke. “[Sheexaanu] alame woy alamete noo coyibba” baxa dihasiissannonke. (Yoh. 15:19; 1 Yoh. 2:15-17) Kuni duuchanka wote sharrama hasiissannonke coyeeti. Yihowa Sheexaanenna busha alamesi hune tenne huuccattonkera dawaro qolanno wote lowo fooliishsho afiˈneemmo! Ikkollana, Sheexaanu iiminni tugami wote shiima yanna calla gattinosita afinota qaaga hasiissannonke. Baasa hanqino daafira, Maganoho ammanammoommokkire ikkineemmo gede assate dandaamisire baala assanno. Konni daafira, isiwiinni gatate Yihowa ganyine huucciˈra hasiissannonke.—Aju. 12:12, 17.

18. Sheexaanu alame baˈanno wote gatate, maa assanke agura dihasiissannonke?

¹⁸ Sheexaanu nookki alamera heeˈra hasiˈratto? Hatto ikkiro, Maganu Mangiste Maganu suˈma qullaawa assitanno gedenna fajjosi uullate aana woˈmitanno gede assitara huucciˈra agurtooti. Qoleno, Yihowa ayyaanaamittetenna maalaamittete hasiissannohere aannohe gede huucciˈri. Ee, lawishshu huuccatto ledo sumuu yaanno garinni heeˈrate murcidhe kai.