1, 2. Ibirayisxete Afiite Qullaawa Borro giddo, Maganu ‘lekka kaxxitanno base’ yaanno qaali maa riqiwanno?

 MAGANU YIHOWA, “Iimi zuufaaneꞌyaati; uulla kayinni lekkaꞌya kaxxitanno baseeti” yiino; hatto yaasi garankolla. (Isa. 66:1) Qoleno, “Lekkaꞌya kaxxitanno base ayirriseemmo” yiino. (Isa. 60:13) Isi konne assannohu hiittoonniiti? Ninke heeꞌnoommohu Maganu ‘lekka kaxxitino base’ aana ikkino daafira, tini ninke heeshsho ledo afidhino xaadooshshi maati?

² Maganu ‘lekka kaxxitino base’ yaanno qaali uulla riqiwannoho; iseno agurranna, Ibirayisxete Afiite Qullaawa Borro giddo hundi Isiraeele horoonsidhanno beetemeqideseno riqiwanno. (1 Zee. 28:2; Far. 132:7) Uullate aana heedhinoti hatti beetemeqidese, halaalu magansiꞌrara mereerima base ikkite keeshshitino. Hakko daafira, Yihowa illera lowo geeshsha biifadote. Tini beetemeqidese heeꞌrase umise, Yihowa lekka kaxxitanno base ayirrinye afidhanno gede assitino.

3. Maganunniti bayira ayyaanaamitte beetemeqidese maati? Hanaffinohuna mamooteeti?

³ Yannankera halaalu magansiꞌrara mereerima ikkitinoti gimbete beetemeqidese diꞌꞌikkitino. Ikkollana, xaa yannara aye gimbenni roore Yihowa ayirranno gede assitannoti ayyaanaamitte beetemeqidese no. Tini beetemeqidese Maganu isi ledo araarammeemmo gede, Yesuusi  Kiristoosi kakkalaanchimmanna wodo widoonni assino qixxaawooti. Tini qixxaawo hanaffinohu 29 M.D., Yesuusi cuuame Yihowate bayira ayyaanaamitte beetemeqidesera Kakkalaanote Biilo ikke shoomami woteeti.—Ibi. 9:11, 12.

4, 5. (a) Faarso 99 kultanno garinni, Yihowa halaalunni magansiꞌranno manniti qara hasatto maati? (b) Ninkeneeto mayine xaꞌma hasiissannonke?

⁴ Ayyaanaamitte beetemeqidese lowonta naandeemmo daafira, mannu Yihowa suꞌma afanno gede assine iso guwisiꞌneemmo; hattono shaqqillunni wodo qixxeessinohura gotti gotti assineemmosi. Xaa yannara sette miliyoone saꞌꞌannohu addu Kiristaani Yihowara ayirrinye aanni noota afa lowo geeshsha hagiirsiissannote! ‘Magano guwisiꞌneemmohu iimira haꞌnummo gedensaanniiti’ yee soꞌrotenni coyiꞌrannohu mitu manni gede ikkikkinni, Yihowa Farciꞌraasine baalunku xaanni koye uullate aana iso guwisiꞌra hasiissannota huwattino.

⁵ Yihowa guwisiꞌneemmoha ikkiro, Faarso 99:1-3, 5 aana kulloonnite ammanantino soqqamaanosi lawishsha harunsinoommo yaate. (Qummeeshsha nabbawi. a) Tini faarso xawissannonte gede, Muse, Aarooninna Saamueeli dirinsara wolqansa assitu geeshsha halaalu magansiꞌra irkissino. (Far. 99:6, 7) Yannankera buurantinori Kiristoosi roduuwi giddo uullate aana gattinori iimira hadhe isi ledo kakkalaano ikkite soqqantara albaanni, ayyaanaamitte beetemeqidesera uullayidi hoowera ammanante soqqantanno. Haammata miliyoone ikkannohu “wolu geꞌreewi” wido ikkino manni ammaname insa irkisanni no. (Yoh. 10:16) Tini lamenti gaamo addi addi hexxo noonsare ikkiturono, Maganu lekka kaxxitinowa koye iso mittimmatenni magansidhanni no. Ninke mittu mittunku kayinni, ‘Yihowa qixxeessinota halaalu magansiꞌra qixxaawo wolqaꞌya assitu geeshsha irkisanni noommo?’ yine ninkeneeto xaꞌma hasiissannonke.

MAGANUNNITE AYYAANAAMITTE BEETEMEQIDESERA SOQQANTANNORE BADE AFA

6, 7. Hundi Kiristaani mereero mayi qarri kalaqamino? Lowo xibbi diri gedensaanni mayi ikkiyya?

⁶ Kiristaanu songo xintantunku mitto saneno woꞌmikki, balanxe kulloonni kaadaasine fula hanaffu. (Looso 20:28-30; 2 Tes. 2:3, 4) Hakkiinni hanaffe, Maganoho ayyaanaamitte beetemeqidesesira addinta soqqantanni noori ayeootiro bade afa roore qarra ikkitanni hadhu. Yihowa haaru Nugusi Yesuusi Kiristoosi widoonni coyi xawe leellanno gede assinohu lowo xibbi diri gedensaanniiti.

⁷ Yihowa hagiirsiissannorinna ayyaanaamitte beetemeqidesesira soqqantannori 1919⁠nni hanaffe baxxite egennantino. Insa soqqanshonsa Magano roore baxissanno gede ayyaanaamittetenni collooꞌmitanni keeshshitino. (Isa. 4:2, 3; Mil. 3:1-4) Lowo xibbi diri albaanni hawaariya Phaawuloosi ajuujatenni lainori shiimu deerrinni woꞌma hanafino.

8, 9. Phaawuloosi ajuujatenni laino “gannate” maa maa riqibbannoro xawisi.

⁸ Layinki Qorontoosi 12:1-4 Phaawuloosi laino ajuuja kultanno. (Kiiro 1, 2, 4 nabbawi. b) Yihowa hatte ajuuja widoonni Phaawuloosira albillitte ikkanno coye leellishinosi. Phaawuloosi “sayikki gordo [hawulukami]” yannara lai gannate maati? Phaawuloosi laino gannate uullate, ayyaanaamittenna iimi gannate riqibbanno; kuni baalunku mitteenni ikkannohu albillitteeti. Tini  gannate albillitte uullate aana heedhanno Gannate riqibbanno. (Luq. 23:43) Qoleno, haaro alamera heedhannota guuta ayyaanaamitte gannateno riqibbanno. Hakkiinni saeno, “Maganu gannatera” yaano iima Yihowa noowa heeꞌrate qoosso riqibbanno.—Aju. 2:7.

⁹ Ikkina, Phaawuloosi “coyiꞌra hasiissannokkitanna mannu coyiꞌrara fajjinannikki qaalla” macciishshinota coyiꞌrinohu mayiraati? Hatti yanna isi ajuujatenni lainota dhaggete coyibba tittire xawisannota diꞌꞌikkitino. Ikkollana, yannankera Maganu manni mereero noo atoote coyiꞌra fajjinoonnireeti!

10. Ayyaanaamitte gannatenna ayyaanaamitte beetemeqidese mitto diꞌꞌikkitino yineemmohu mayiraati?

¹⁰ “Ayyaanaamitte gannate” yaanno qaali duucha wote horoonsiꞌneemmoho. Tini gannate Maganunna roduuwinke ledo salaametenni hagiidhinanni heeꞌneemmo gede assitinonketa baxxitinota ayyaanaamitte qawaaxxo xawissannote. Ikkollana, ‘ayyaanaamitte gannatenna’ “ayyaanaamitte beetemeqidese” mitto coyeeti yaa diꞌꞌikkino. Ayyaanaamitte beetemeqidese Maganu halaalu magansiꞌrara qixxeessino qixxaawooti. Ayyaanaamitte gannate kayinni yannankera Magano hagiirsiissanninna ayyaanaamitte beetemeqidesesira isira soqqantanni noore bade afate kaaꞌlitannote.—Mil. 3:18.

11. Xaa yannara maa assate qoosso noonke?

¹¹ Yihowa 1919⁠nni hanafe, guuntete xeꞌne noonsa manni ledosi ayyaanaamitte gannate latisanno, lossannonna halashshanno gede fajjinota afanke lowo geeshsha hagiirsiissannote! Ati konne kaajja looso kaaꞌlitanni nootto? Yihowa ‘lekka kaxxitino base’ ayirrinye afidhanno gede assate isi ledo ganyite loossanni nootto?

12. Isayyaasi 60:17 noo masaalo woꞌmitinota mayinni anfeemmo? (Umi misile lai.)

¹² Yihowa dirijjiteta uullayidi kifile roore biifisatenna woyyeessate lowore taashshinannita Isayyaasi 60:17 aana balanxe masaalloonni. (Qummeeshsha nabbawi. c) Wedellu woy halaalu mine lowo diro keeshshitinokkiri togoo taashsho daafira borronke aana nabbabbino woy wolu roduuwiwiinni macciishshitino. Tenne taashsho illensanni laꞌino roduuwi kayinni kaajja qoosso afidhino! Kuri roduuwi Yihowa Nugusinke Yesuusi widoonni dirijjitesi massaganni noota seekkite ammantanno! Insa togoo ammana heedhannonsa gede assitanno taje laꞌino; ninkerano hattoo ammana noonke. Kuri muxxe roduuwi woꞌnaalsha macciishshanke Yihowara noonke ammana lexxitanno gede assitanno.

13. Faarso 48:12-14 yitanno garinni maa assate qeechi noonke?

¹³ Halaalu mine keeshshinoommo diri ikki geeshshihano ikkiro, Yihowa dirijjite daafira mannaho kula hasiissannonke. Tenne busha, maaeelanna baxillu nookki alame aana ayyaanaamitte gannate heeꞌrase maalalete! Yihowa dirijjite, woy “Tsiyooni” giddo noota dhaggete coyibbanna ayyaanaamitte gannatere kulanno halaale “dagganno ilamara” hagiirrunni sayisa hasiissannonke.—Faarso 48:12, 13 nabbawi; d Far. 48:14.

14, 15. Tonaa honsu lamalawu kawa taashshinoonni coyibba maati? Tini taashsho dirijjitete kaaꞌlitinohu hiittoonniiti?

¹⁴ Mereeronke noohu batinyu jajjabbu roduuwi, Yihowa dirijjiteta uullayidi kifile albinni roore biiffanno gede assannoha duucha coye taashshinanna illensanni laꞌino. Kuri roduuwi mitte songo giddo cimeeyyete bisi nookkiha mittu songote soqqamaanchi noo yanna, mitte gobbara Sinu Biiro Komite nookkiha mittu sinu biiro soqqamaanchi noo yanna, hattono egennaminohu Yihowa Farciꞌraasinehu Aliidi Bisi nookkiha Agarooshshu Shae Maamarihu  mittu pirezidaantichi massagino yanna qaagganno. Hatte yannara, diinaggaabbe loossannore kore roduuwa kaaꞌlitannori ammanantino roduuwi nooha ikkirono, songote giddo, sinu biiroranna qara biirora addi addi coye murannohu mitto mancho callaho. Hakkiinni 1970 kawa, aliidi laꞌꞌaancho ikkate qeecha mittu manchira calla aantenni cimeeyyete gaamo amaddanno gede assini.

¹⁵ Togoo taashsho kaaꞌlitinori no? Ee, kaaꞌlitino. Hiitto? Korkaatuno togoo taashsho assinoonnihu Qullaawa Borro giddo noo lawishsha albinni roore huwanteeti. Coye baalanka mittu manchi calla murantenni, baalante cimeeyyeeti woy Yihowa uyinonkeri ‘elto ikkitino labballiti’ dancha akatta dirijjitete roore kaaꞌlitanno.—Efe. 4:8; Law. 24:6.

16, 17. Muli yannara taashshinoonni coyibba giddo atera roore dhagge ikkannohehu maati? Mayira?

¹⁶ Muli yanna kawa borronke dana, amado hattono mannaho tuqinseemmo doogga lainohunni assinoonni taashshono heda dandaatto. Soqqanshote yannara, kaaꞌlitanno amaale amaddinotanna laꞌꞌate baxissanno borro mannaho ela lowonta hagiirsiissannote! Hanni mannaho halaale kulate haaro tekinooloje lawishshaho, jw.org yinanni webisayite horoonsiꞌneemmo garano hedi. Tini webisayite lowo manni lowonta hasiisannonsa biddishsha afiꞌranno gede assitanno; qoleno, Yihowa mannaho addinta assaawannotanna baxannonsata leellishshanno.

¹⁷ Maatete Magansiꞌrara mitto hashsha woy gillete xiinxallora roore yanna afiꞌneemmo gede assinoonni taashshono dea dihasiissannonke. Jajjabbu gambooshshi pirogiraame albinni roore woyyaabbanni hadhino garino dhaggete. Diru kiiro roore seekkanni hadhanni no! Qoleno, addi addihu tiokiraasete rosi mininke widoonni albinni roorino qajeelsha uyinanni heeꞌnoonnihura tashshi yaannonke. Tini baalanti taashsho  Yihowa dirijjitesi massaganni noota leellishshanno. Isi yannate kiiro, dirijjitesinna ayyaanaamitte gannatenke biinfilli lexxanno gede assanni no!

18, 19. Ayyaanaamitte gannatenke biifisa dandiineemmohu hiittoonniiti?

¹⁸ Ayyaanaamitte gannatenke biifisa dandiineemmo gede Yihowa ninkerano qeecha oye ayirrisinonke. Tenne assa dandiineemmohu Maganu Mangisteha dancha duduwo diinaggaambe dudumbenna wole manna lende rosaano assineeti. Mitto mancho ayyaanaamittetenni lophe isonooto Maganoho sayise aanno gede kaaꞌlinummo kiiro, ayyaanaamitte gannate halashshinoommo yaate.—Isa. 26:15; 54:2.

¹⁹ Yannate kiiro Kiristaanu akatanke woyyeessiꞌrankeno ayyaanaamitte gannatenkera biinfille leddanno. Tenne assanke tini gannate laꞌꞌanno mannira roore baxissannota ikkitanno gede assitanno. Duucha wote Qullaawu Maxaafi egennonni roore, manna umo Maganu dirijjitewa, hakkiinni Yihowawanna Yesuusiwa shiqanno gede assitannoti amanyootu xuri noonkekkirenna salaame banxeemmore ikkankeeti.

20. Lawishsha 14:35 yitanno garinni, maa assa hasiissannonke?

²⁰ Yihowanna Yesuusi lowo geeshsha biiffinota ayyaanaamitte gannatenke laꞌanno wote baasa hagiidhitanno! Xa tenne gannatenke lende biifisate loonseemmo loosinni afiꞌneemmo hagiirri, albillitte uulla gannate assate looso loonse afiꞌneemmo hagiirre leellishannoho. Lawishsha 14:35, “Mitto coye wodanchatenni assanno soqqamaanchi nugusa hagiirsiisanno” yitannota deꞌnoonke. Ayyaanaamitte gannatenke lende biifisate diinaggaambe loonsanni, assineemmore baala wodanchatenni assino!