AANIIDI QOOLIHA COYI UMO | YAADDO DANDIINE HEEꞌNANNIHU HIITTOONNIITI
Yaachishanno Coyi Nookkiwi Dino!
“Sagale hidhammora mareemmo wote koshoro calla no; hattinni waaga lexxite giira kaxxitino! Layinki barra isinni, suuqqate sagalete yinanniri horo dino.”—Pooli, Zimbaawe.
“Minaanniꞌya woshshe ofolli yeeꞌꞌe, hune haꞌrankera kainota kulie. Togoo kaada hiitto ikke dandeemma? Qaaqquulleꞌya hiisseemma?”—Jaaneeti, Ameerika.
“Danote yannara gannanni dowwoli dowwolamitanna rokkeette dhookkuta xooqe uulla barxa yuumma. Lowo saate gedensaanni nafa angaꞌya huxiꞌra diagurtino.”—Aloona, Isiraeele.
Heeꞌnoommohu yaachishannonna “dandee heeꞌrate qarrisannohu baxxino diri” giddooti. (2 Ximootewosi 3:1) Miinju qarri, maatete diigama, olu, shaanno xibbinna kalaqamunni woy mannu assootinni iillitanno dano lowo manna yaachishshanni no. Qoleno batinyu manni togo yaanni yaadanno: ‘Kuni bisoho fulinoeri kaanseretella soorramae?’ ‘Oosoꞌya ooso lophitanno alame hiittoota ikkitakka?’
Mito geeshsha yaada kayinni nooreentilla. Lawishshaho, fonqolo fonqolammammora, lowo mannira albaanni fulle coyiꞌnammora woy loosoho qaalu xaꞌmo xaꞌmammammora kaꞌneemmo wote yaadanke digattanno. Dano abbannore waajja gawajjotenni ganteemmo gede kaaꞌlitannonke. Ikkollana quwa saꞌne woy seeda yanna yaada baasa gawajjitanno. Muli yannara 68,000 saꞌꞌannoha anja egemmino manna horoonsiꞌne assinoonni xiinxallo, quwa saꞌinokki yaaddo nafa keeshshituro diro haransitara dandiitannota leellishshino. Yesuusi, “Kiꞌne giddo yaaddotenni dirisi aana mitte cigile lexxa dandaannohu nooni?” yaasi garankolla. Ee, yaaddotenni dirosi lexxinohu dino. Konni daafira Yesuusi, “Yaada agurre” yee amaalino. (Maatewoosi 6:25, 27) Ikkina yaada agura dandiinannihu hiittoonniiti?
Hayyo afiꞌra, Magano seekkine ammananna konni kaꞌira huluullissannokki hexxo afiꞌra tennera kaaꞌlitanno. Xa yaachishannori tuncu yiinonkekkiha ikkiro nafa, albillitte tuncu yaankera dandaanno. Hanni kuni sasu coyi Pooli, Jaaneetinna Aloona yaaddo dandiite heedhanno gede kaaꞌlinonsa gara laꞌno.
Kurino Lai
WOLE BIRXICHUWA
Labballo Amaddanno Yaaddo—Qullaawu Maxaafi Kulanno Mali Maati?
Xaa yannara yaaddo amaddino manni batiꞌrino. Yaaddo amaddinoheha ikkiro, Qullaawu Maxaafi kaaꞌlannohe?
