1, 2. (a) Kiristaanu Maganoho ammanama hasiissannonsahu mayiraati? Tini alamete gaance giddora ea hoogate ledo mayi xaado afidhino? (Umi misile lai.) (b) Yannankera batinyu manni maaho ammanamanno? Tini maa abbitino?

 ADDU Kiristaani olu yannara calla ikkikkinni ayewoteno ammanaminoho; hattono poletikaho anga diwodhanno. Mayira? Korkaatuno Yihowa banxeemmohuranna isira ammanammoommore ikkanna hajajama hasiꞌneemmohuraati. (1 Yoh. 5:3) Heeꞌneemmo gobba, lophinoommo gari, gaꞌrenke woy budinke ikkihano ikkiro, Maganunnihu xalalu seeri ledo sumuu yine heeꞌra hasiꞌneemmo. Wolu baalunku coyinni roore ammanammeemmohu Yihowaranna Mangistesiraati. (Mat. 6:33) Konni daafira, Kiristaanu tenne alame sarraaqinna gaance baalante giddora horonta dieanno.—Isa. 2:4; Yohaannisi 17:11, 15, 16 nabbawi. a

² Yannankera alamete noohu batinyu manni gobbansara, gaꞌrensara,  budinsara, wole agurina gobbansate ispoortete kilabera nafa ammanamanno. Tini qolte kuꞌu kuꞌuyi ledo heewisantannonna yekkeerantanno gede, hakkiino saꞌe wole garo wido ikkitinore shitanno gede assitinonsa. Ninke togoo gaance giddora eꞌneemmokkiha ikkirono, tenne alamera heeꞌnummo geeshsha togoo gaari ninkeno ikko maatenke gawajjara dandaanno; qoleno taashshote xeꞌne iillitankera dandiitanno. Maganu gara ikkino coyenna gara ikkinokkire bade afate dandoo oye kalaqinonke daafira, uullate gashshaano assitannori koffi assankera dandaanno. (Kal. 1:27; Marro 32:4) Togoo coyi tuncu yaannonke wote ma assineemmo? Qoropha hoongummoro, alamete coyi giddo mittu widira hinge tuqqine gaancete giddora eꞌnammora dandiineemmo.

3, 4. (a) Kiristaanu tenne alame gaancera karsama hasiissannonsakkihu mayiraati? (b) Konni birxichira maa ronseemmo?

³ Gaance kaꞌanno wote, dagooma gashshitanno gashshaano qansichootu mittu widira higge tuqqitanno gede xixxiibbara dandiitanno. Addu Kiristaani kayinni togoo coyira dikarsamanno. Tenne alamehu poletiku sarraaqira anga diwodhineemmo; hattono olaho digaandeemmo. (Mat. 26:52) Sheexaanu alameha mitto gafa woluwiinni roorsine dilaꞌneemmo. (2 Qor. 2:11) Alamete wido ikkinoommokki daafira, gaancetewiinni xeertiꞌneemmo.—Yoh. 15:18; Yohaannisi 15:19 nabbawi. b

⁴ Ikkollana, guuta ikkinoommokki daafira, ninke giddo mitoho insawiinni baxxino manna dancha illenni laꞌꞌa xaano qarra ikkitinonsaha ikkara dandaanno. (Erm. 17:9; Efe. 4:22-24) Konni daafira, konni birxichira togoo hedo qeeꞌlate kaaꞌlannoha mito xintu seera ronseemmo. Qoleno, Maganu Mangistera ammanammoommore ikkate surrenkenna tiianke qajeelsiꞌra dandiineemmo gara laꞌneemmo.

5, 6. Yesuusi uullate aana noo waro duuchunku gari manna ma garinni laꞌꞌanno? Mayira?

⁵ Alamete gaance giddora eꞌneemmokki gedenna mittu widira hinge tuqqineemmokki gede maa assa hasiissannonkero leella giwannonke wote, ‘Yesuusa ikkoommero ma assanno?’ yine heda danchate. Yesuusi uullate aana noo waro, Yihudu, Galiilunna Samaariyu manni mereero xaadooshshu dino. Lawishshaho, Yihudunna Samaariyu manni mimmito dicoyishiishanno. (Yoh. 4:9) Ferisaanotenna Seduqaanote mereero (Looso 23:6-9), batinyu Isiraeelete manninna qaraxo gamba assitannori mereero (Mat. 9:11), hattono Higge rossino Yihudootinna rossinokkiri mereero mittimma dino. (Yoh. 7:49) Umi xibbi diro, Isiraeelete daga gashshitannori Roomu gashshaanooti; Yihudootu qolte tenne gashshaano effidhe gibbanno. Yesuusi halaale irkisinohanna gato daggannohu Yihudootu widoonni ikkinota afinoha ikkirono, rosaanosi dagoomu mereero kaꞌanno gaancera eꞌanno gede horonta dirosiisino. (Yoh. 4:22) Hatteentenni, insa manna baalanka olliichinsa gede assite baxxanno gede rosiisino.—Luq. 10:27.

⁶ Yesuusi Yihudootu gede manna mulla kae giwinokkihu mayiraati? Korkaatuno isino Annisino tenne alame coyi giddo mittu widira higge tuqqitannokki daafiraati. Yihowa Beettisi widoonni labbaahanna meyaata kalaqi wote, insa ilte ilante uulla woꞌmitanno gede hedino. (Kal. 1:27, 28) Maganu manna kalaqinohu addi addi sircho iltanno gede asseeti. Yihowano ikko Beettisi mitto sircho woluwiinni, mitte daga woletewiinni, woy mitto afoo woluwiinni roorsite dilaꞌanno. (Looso 10:34, 35; Aju. 7:9, 13, 14) Ninkeno insa lawishsha harunsa hasiissannonke.—Mat. 5:43-48.

7, 8. (a) Kiristaanu hiikka hige tuqqa hasiissannonsa? (b) Poletikunna dagoomu qarra tira lainohunni Kiristaanu maricho heda hasiissannonsa?

 ⁷ Alamete coyi giddo mittu widira hinge tuqqineemmokkiha ikkirono, Yihowate kalqete alame aliidimmawa hinge kayinni tuqqa hasiissannonke. Sheexaanu hunda Edenete Yihowa gashshoote hettisino. Xaa yannara baalunku manni Maganu doogonna Sheexaanunnite giddo hiitti roortannoro doodha hasiissannonsa. Ati umikki doogo haꞌra agurte, Yihowa seeranna biddishsha harunsite isi widira higge tuqqattota leellishatto? Mannu ooso qarrira malu Maganu Mangiste ikkitinota ammanattonso, manchu beetti isonooto umisinni gashsha dandaanno yite ammanatto?—Kal. 3:4, 5.

⁸ Tenne xaꞌmuwara qolatto dawaro mannu alamete coyi daafira xaꞌmannohe wote yaattore leellishshanno. Poletiku marooti, hattono poletikanna dagoomu heeshsho soorrite woyyeessate woꞌnaaltannori gaance kalaqqanno coyibbara mala abbate lowo diro sharrantanni keeshshitino. Kuri mannooti togo sharrantannohu danchare hedde ikkara dandaanno. Ikkollana, Kiristaanu mannu qarra baalanka huntannotinna taashsho abbitannoti Maganu Mangiste calla ikkitinota seekke afino. Konni daafira togoo coye Yihowa taashshara agura hasiissannonke. Qoleno, mittu mittunku Kiristaanchi isi woyyanno yee hedanno mala cuꞌmiꞌre giwannoha ikkiro, songote mereero bayichonko babbadooshshu dikalaqamanno?

9. Umi xibbi diro, Qorontoosi songo mereero kalaqamino qarri maati? Phaawuloosi tennera malu maati yiino?

⁹ Hanni umi xibbi diri Kiristaani songote giddo babbadooshshe kalaqqanno hajo kaꞌu wote assinore laꞌno. Hakkawaro Qorontoosira noohu mitu Kiristaani, “‘Ani Phaawuloosiho,’ ‘Ani Aphiloosiho,’ ‘Ani Keefiho,’ ‘Ani Kiristoosiho’” yaanni mimmitu ledo heewisamino. Phaawuloosi tenne macciishshiti lowo geeshsha hanqino. Isi, “Kiristoosi bebbeehaminoni?” yee xaꞌminonsa. Tenne roduuwu mereero babbadooshshe kalaqqanno hajora malu maati? Phaawuloosi togo yee kaajjishe amaalinonsa: “Konnira roduuwa, coyidhinanni gari mitto ikkanno gedenna, mereeroꞌne babbadooshshu heeꞌrannokki gede, hatteentenni hedotenninna alaamunni woꞌmunni woꞌma mitto ikkitinanni gede eeggo yeemmoꞌne.” Yannankerano Kiristaanu songo mereero babbadooshshe kalaqannohu mittu coyino heeꞌra dihasiissannosi.—1 Qor. 1:10-13; Roomu Sokka 16:17 nabbawi; c Rom. 16:18.

10. Hawaariya Phaawuloosi alamete gaance giddora ea hasiissannonkekkita kulate maa lawishsha asse horoonsiꞌrino?

¹⁰ Phaawuloosi buuramino Kiristaani uullate coye agure iimi qansichimmansa aana illachishanno gede amaalino. (Fil. 3:17-20) d Insa Kiristoosi riqibbe loossanno ambaasadderootaati. Ambaasaadderootu noo gobba hajora anga diwodhitanno. Insa ammanantannohu gobbansaraati. (2 Qor. 5:20) Uullate aana heeꞌrate hexxo noonsa Kiristaanino Maganu Mangiste qansootaati; hakko daafira, alamete gaance yannara mitto wido higge tuqqa dihasiissannonsa.

11, 12. (a) Mittu Kiristaanchira Maganu Mangistera ammanama qarra ikkitanno gede assara dandaannohu maati? (b) Mitte Kiristaanchora qarra ikkinori maati? Ise tenne qeeltinohu hiittoonniiti?

¹¹ Alamete aana batinye gobbara dagoomu mimmitu ledo gamba yaanno. Konni mannira guto ikkitino xagge, budinna afii noonsa; duuchu mannira qole togoo coyibba loworeeti. Kiristaanu kayinni, ayewoteno alamete coyira karsamikki heeꞌranno gede surrensanna tiiansa  qajeelsiꞌra hasiissannonsa. Tenne assa dandiinannihu hiittoonniiti?

¹² Hanni Meriyeta e yinanniti alba Yugozilaviya yinanni gobbara ilantino rodoo assitinore laꞌno. Ise lophitino qooxeessira mannu Serbiyu daga wido ikkino manna giwanno. Ise Yihowa mallaadannokitanna mannu wole sircho giwanno gede xixxiiwannohu Sheexaane ikkinota rossuti ise sirchi woluwiinni rooranno yitanno hedo fushshite huꞌnate woꞌnaaltu. Ikkollana, heedhanno qooxeessira addi addi gaꞌre mereero olu kaita albiti busha hedo giddose wirro ciira hanaffu; hakko daafira Serbiyu daga wido ikkino mannira sabbaka qarra ikkituse. Ikkirono, Meriyeta tenne gara ikkitinokki hedo hooꞌlate assa hasiissannoseri noota huwattino. Ise hattee hedo qeeꞌlate calla ikkikkinni soqqanshose halashshidhe suwisaancho ikkitanno gede kaaꞌlasera Yihowa eeggifatte huuccidhino. Ise togo yitino: “Kaaꞌlinoehu qaru coyi soqqanshote aana illachishaꞌyaati. Soqqanshote yannara, baxissannota Yihowa akatta harunsate woꞌnaaleemma; hakko garinni busha hedo giddoꞌyanni fulte hoꞌlitino.”

13. (a) Mitte rodoo koffi assino coyi maati? Ise tennera ma assitino? (b) Toyilara tuncu yiinorinni maa ronseemmo?

¹³ Tenne hanni Toyila lawishsha laꞌno. Meksikote gobbara ilantinoti tini rodoo, xaa yannara Awuroppaho mitte songo giddo soqqantanno. Ise songote giddo Laatini Ameeriku gobbanni dagginori mitu roduuwi ise ilantino gobba, bude wole agurina muuziiqansa nafa mishshe coyidhanna macciishshitu. Ate ikkoottoro ma assatto? Togoo mishsho Toyila koffi assitinoseti dikaandannite. Ikkollana, ise wodanise giddo kalaqantannota busha hedo huꞌnate kaaꞌlannose gede Yihowa huuccidhino. Mereeronke mitu roduuwino togoo hedo gargadhate sharrantanni nooti dikaandannite. Roduuwinke mereero wolootu budi woy ilantino gobba daafira saalfachishannore coyiꞌra, woy wolu manni togoore coyiꞌranno wote babbadooshshe kalaqannore assa dihasiissannonke.—Rom. 14:19; 2 Qor. 6:3.

14. Kiristaanu wole manna Yihowa laꞌꞌanno garinni laꞌꞌate surrensanna tiiansa qajeelsiꞌra dandaannohu hiittoonniiti?

¹⁴ Lophootto gari woy heeꞌrootto qooxeessi ilamootto gobba woy qooxeessa woluwiinni roorsite laꞌꞌatto gede assinohe? Togoo hedo xaano giddokki no? Kiristaanu mitte gobba woy qooxeessa woluwiinni roorse laꞌꞌa dihasiissannonsa. Ikkirono, ati xaano wole gobba manna, bude, afoo woy sircho dancha illenni laꞌꞌattokkihalla ikki? Hatto ikkiro, meessi gobba woletewiinni roorse baxanna woloota mulla kaꞌne giwa Yihowa ma garinni laꞌꞌannoro hiincakki lowore kaaꞌlitannohe. Gillete xiinxallonna maatete magansiꞌra yannara, tenne hajo daafira haja assite xiinxalli. Hakkiinni Yihowa wole manna isi laꞌꞌanno garinni laꞌꞌate kaaꞌlannohe gede huucciꞌri.—Roomu Sokka 12:2 nabbawi. f

15, 16. (a) Wolootuwiinni baxxine fulankenni mitu manni ma assankera dandaanno? (b) Annuwunna amuuwu oosonsa Yihowara ammanantinore ikkitanno gede kaaꞌla dandiitannohu ma garinniiti?

¹⁵ Yihowa soqqamaano woꞌmantera ledonsa loossannoriwiinni, ledonsa rossannoriwiinni, olliichinsawiinni, fiixinsawiinni woy wolootuwiinni baxxite fula gidde ikkitannonsa gede assannori mito wote tuncu yaansara dandaanno. (1 Phe. 2:19) Ikkirono, hattoo wote baxxine fula hasiissannonke! Baxxine fulankenni alame gibbunkero dhagge diassiꞌneemmo; korkaatuno Yesuusi kuni ikkannota balaxe coyiꞌrino. Giwannonkehu lowo mannira Kiristaanu mittu widira hige tuqqa dihasiissannonsa yinanniti diadhantannonsa. Ninkera kayinni tini hajo loworeeti.

¹⁶ Mannu waajjishiishinkerono Yihowara ammanammoommore ikkate kaajjine uurra hasiissannonke. (Dan. 3:16-18) Manna waajja ajano  akkalano qeeltara dandiitannoha ikkirono, rooru manni ikkannota ikka giwa roorenka wedellootaho qarra ikkitara dandiitanno. Oosoꞌnera baandiiraho faarsate woy gobbate ayyaanna ayirrisate ledo xaado afiꞌrino fonqoli iillanni noonsaha ikkiro, kiꞌne kaaꞌlo hasiissannonsa. Maatete Magansiꞌraꞌne yannara Yihowa tenne hajo ma garinni laꞌꞌannoro xiinxalle. Oosoꞌne ammanansa ayirrinyunni xawisse kula dandiitanno gede rosiissensa. (Rom. 1:16) Hasiisannoha ikkiro, oosoꞌne kaaꞌlate tenne hajo daafira rosiisaanonsa martine coyishiishshe.

17. Hiittoo hedo hooꞌla hasiissannonke? Mayira?

¹⁷ Ilammoommo gobba, budenke, coyiꞌneemmo afoo, woy qooxeessinke sagale mito geeshsha baxanke nooreentilla. Ikkollana, ‘ninkehu rooranno’ yitanno hedo hooꞌla hasiissannonke. Yihowa hagiidhinammora yee duuchu dani coyibba kalaqino. (Far. 104:24; Aju. 4:11) Hatto ikkina mittu coyi wole rooranno yineemmo gede assannonkeri mayi no?

18. Wole manna Yihowa laꞌꞌanno garinni laꞌꞌanke maaho kaaꞌlitanno?

¹⁸ Maganu duuchunku gari manni halaalunnita gara ikkitino egenno afiꞌraranna hegere heeshsho ragiꞌrara hasiꞌranno. (Yoh. 3:16; 1 Xim. 2:3, 4) Yihowa fajjo ledo sumuu yitannota duuchunku gari hedo macciishshate maahoyye yaanke hagiirrenke leddanno, hattono mittimmanke agartanno. Yihowaranna Mangistesira ammanammoommore ikkine heeꞌra hasiꞌneemmo daafira, alamete gaance giddora ea dihasiissannonke. Sheexaanu alamera rosantinota naaxxanna babbadooshshe gimbeemmo. Yihowa, salaame banxeemmorenna shooshaqoota ikkineemmo gede rosiisinonke daafira galanteemmosi! Mereeronke faarsaanchu yiinote gedee salaame heedhanno gede assate murciꞌne kaꞌno: “Kuneeti! Roduuwu sumuu yite mitteenni heedhanno wote hiittoo danchaati! Iso hiitto baxisanno!”—Far. 133:1.